هلا اسفة طولت كاتبتها هيا بس مشغولة معنديش نت
بعد م روحو عيالها كلهم طبعا ممنوع المبيت مع المريض قعدت بروحها حزينة لين خداها النوم ، تحلم بشخص مش عارفة شن جابه لي راسها
والشخص كان عبد الحكيم ولد عمها 🥵
حلم غرييييب هلبا كانت تتمشى هيا وعبد الحكيم في الشارع جو شتاء وحلو وماسكين يدين بعض وجو يهبل ❤️❤️
مرام فاقت ع ادان الفجر مخلوعة وقلبها يدق بسرعة مصدومة شن جاب عبدو في بالها 🥵💕 بس حست انه بيصير شي لانه مرة امها حاكيتلها انه اي حد يبدا راقد وينوض ع ادان الفجر تكون هادي ( گ إشارة او رسالة من ربي او مش عارفة شن يسمو فيها الحق منبيش نخرط😂 )
قلبها يدق بسرعة مع انها متشوفش فيه غير مرة في السنة مرات ومرات اكتر متشوفاش وديما حاسباته واحد من خوتها بس حست بشي تجاهه وتجاهلاته وقالت
مرام : لا لا ميصير شي انشاء الله عبدو زي خوي ومن بعيد لي بعيد وخلاص 😔
بس في نفس الوقت محتارة وخايفة من المستقبل لدرجة متوصفش بس هيا قالت لا اني قوية وعبدو زي خوي مش تبعي حلمت ليه غير لان بكري امه كانت جنبي وتكلمنا عليه بسسس 😊😊
رجعت وهيا تفكر هلبا فيه بس رقدت في نوم عميق للساعة 10 فاقت لقت عماتها عندها وامها قاعدة مش موجودة
فاقت صباح الخير
عماتها : صباااحوووو حبيبتي شن حالك توا انشاء الله باهية
مرام : سارحة في انه الغرفة قبل م ترقد كانت فاضية ولما فاقت لقتها كلها ورد وفيه جنبها بوكيه ورد حلو وكبير فرحت هلبااا قالت اكييد من توفيق حبيبي
مرام : اي عمتو الحمد لله احسن من قبل ، اااا عمتو من منو الوردات هادو ☺️
ربيعة : هادو ي حنة باعتهملك مجهول مش موجود عليهم ولا اي شي يوحي عليه منو، شوفي البوكي لي جنبه يمكن فيه حاجة تبين لانه طلبو يكون جنبك وانتي اول من يشوفها حطاته الممرضة وحرصت علينا منشوفوشي الا بعد م تفيقي
مرام : ههههه العفو من بيجيبلي حاجة هكي
( في خاطرها اكيييد توفيق حبيبي 😻 )
شافت البوكيه وانصدمت انه البوكيه من انور ، ومكتوب فيه ك التالي
هلا مرام ، شنجوك اليوم انشاء الله احسن ي ربي تكوني بخير بس اسف ع الإزعاج بس حسيت اني اني السبب في اللي انتي فيه توا ف حبيت نعتذر منك ي ريت تسامحيني بس
اسف
مرام : علامات الصدمة واضحة ع وجع مرام 😳
ربيعة و نجلاء : خيرك من منو
مرام : ممم ممن من ولد كان يقرا معاي قبل شن دكره فيا مش عارفة🙂
عماتها : من دون م يصدقوها لان واضح في حاجة
اهاا باهي كويس ههه شكله يحبك
مرام :( فرقت حبه مرض ) في سرها طبعا ، هههه لا ديما حاسبني زي وخيته بسلامته كان هدا راه حبيته حتى ني 😂😂
عماتها : طبعا متعودين ع البرادة لي عندي مش ضروري نشرح ، صح مصدومين لان مرام مريضة وفي المستشفى لاكن فرحو لما لقوها جوها بادي يتغير وحلو هكي وفـي نفس الوقت مرام قلبها نار لانها كانت عكس ملامحها من الداخل تبكي ولو تلقى تقتل روحها بس ضروري تبين انها قوية قدام الكل
مرام : عمتو عادي تسانديني بنمشي للحمام ورجلي واجعتني
ربيعة : هي بنيتي هي اصبري متتحركيش ( تحبها هلبا وديما حاسبتها زي بنتها لانها ربيعة مش متزوجة ومرام ديما تعامل فيها ع انها امها التانية مش عمتها )
مرام : بالشوي بس
ربيعة : تمام نستناك ولا تساندي روحك بعدين
مرام : لا لا بعدين عادي غير توا معرفتش كيف ننزل من السرير
ربيعة : تمام ☺️💕
مرام : قفلت باب الحمام وتفجرت بكي 😭😭
معش قدرت تصير ع روحها تبكي عارفه انه انور مش طيب لهالدرجة وفيه وراها حاجة هادي وزلقت فيي الحمام لان كان تحتها مية وهيا اصلا رجلها كانت شبه مكسورة وتجي ع ضهرها
مرام : اااه عمتيييييي 😭😭😭
ربيعة ونجلاء : ميرو خييييرك شن فيك
مرام : رجلي رجلي 😭💔
عماتها : افتحي الباب بسرررعة هلي نجيبه دكتور
________ في بيت مرام _______
ناجية : هيا محمد بنمشي اني
محمد : باهي اصبرييي دقيقة شن هدا
ناجية : محمد قلبي
محمد : خيرك خيره قلبك
ناجية : مش مطمنة مرام ي محمد فيها حاجة قلبي حاس والله
محمد : تيي صلي ع النبي شن مرام توا تي تلقيها قاعدة راقدة لتوا
ناجية : هي هي بنمشي معش نقدر نزيد اكتر
محمد : 🤦🏻♂️🤷🏻♂️ امشي باهي تو نلحقك
نرجعو لي مرام .....
فتحت لي عماتها وجابو الدكتور رفعها لقسم الأشعة
الدكتور : مرام انتي رجلك ملتهبة هلباا
مرام : شن يعني !!!
الدكتور : ي بنتي رجلك مكسورة ليها يومين كان مش اكتر 😱
مرام : شن يومين ولا اكتر ي دكتور واني امس بس جاية هني
الدكتور : اهاا المهم ضروري يشوفها الأخصائي بعدين يصير لي بيقوله هوا
ربيعة : وامتى بيجي الأخصائي
الدكتور : اليوم تقريبا عنده شفت الليل يجي المغرب 🙄
نجلاء : هي هي هي البنت رجلها ملتهبة كان معالجتهاش وقتي تزيد شن انت دكتور ولا أستاذ رسم الدماغ لي عندك سبحان الله تقول دماغ عيل النم
الدكتور : لو سمحتي اني نعرف كيف نتصرف
وفجاءة تخش امها تجري وأيدها ع قلبها ومرام كانت تبكي مش قادرة توقف لان مش ساد رجلها زاد عليها ضهرها
ناجية : مش قادرة تتكلم خخخ خخخيرك مرام
الدكتور : عادي ي مدام وجلها مكسورة بس مش اكتر
ناجية : بسسس مش اكتر تي شن انت متحسش لاهب جبسالها رجلها شوف كيف تتوجع مسكينة حرام عليك 😭😭
الدكتور : صعبت عليه امها مع انه كان يبي ينتقم من عمتها لانها استهازئت بيه
حبسها وتمام وطلعو رجعو لي الغرفة متع مرام
تسريييع شوي §
مرام بعد يومين روحت للبيت ، كانو العيلة كلها موجودة وكلهم فاهمين ع اساس انه مرام داعمتها سيارة مش ضاربها خوها
روحت وهجمو عليها يسلمو كلهم عمات على خالات على جيران ، مرام كانت حلوة غيرت ملابسها قبل م تطلع من المشفى طالعة سبحان الله أميرة مش عادية لبست بلوزة سماوية واسعة وفيها قصة في الصدر بسيطة ومدخلتها في السروال سروال ابيض جينز مش واسع ومش ضيق فيه تنية من تحت وقايمة شعرها الطويييييل دايراته ديل طالعة حلوة مع انه كانت تعبانة والعيون كلهم عليها
بعد م سلمت عليهم كلهم وقفت ع دروج البيت فوق احمم ي عويلة بنقوللكم حاجة بسيطة بس يا ريت تفهموها........
يتبع .....
