ابنتي تينه جزء (8)
مازن ضل صافن ع بنته وكل شوي وباسها فتحت عينها ساره وانتبهت ان مازن يمها
ساره : مبروك مازن
مازن : يبارك بيج وحمدلله ع سلامتج
ساره : الله يسلمك شسميتها
مازن : تينه منا ورايح صيحولي ابو تينه
ساره : حلو الاسم عجبني ابو تينه
مازن : شكراً ساره
وبعده شايل تينه ويباوع عليه شلون راح اشبع منها بعد منا ورايح مافارگچ جانت هالكلمات بينه وبين نفسه وشوي ضلت تبچي انطها لامها لخاطر تسكتها
وطلع لامه بعد ماراح القابله
- يمه هسه المطلوب اجيب دكتوره لساره
- خلها كم يوم وخذها وديها للمستشفى
- ان شاءلله
- شلون شفت بنتك
- يمه تجنن مال گرط
- الله يديم هالفرح بعيونك وليدي
- مشكورا يمه عمري انتي
وباس امه ع راسها وراح يركض لابو الي گاعد ينتضر
وشاف ابو مشغول بالتلفون وملتهي يبلغ انو صار عند مازن بنيه
- ههه بويه احسن من المخابرات گوم شوف حفيدتك
- اي طبعاً هسه اروح متشوق اشوفها ياابو تينه
- ها كلتلك امي
- اي اجتني هنا وكلتلي سميتها تينه حلو الاسم وليدي
- اشكرك بويه
هذا اليوم جان اسعد يوم بحياة مازن اجته تينه جانت مثل الامل بحياته اتخيل عالم ثاني بس هو وبنته وحتى بدون مرته راد تينه اله وبس وقرر يخلي تينه تتعلق بي اكثر من امها مازن كان بعده يفكر شلون تزوج امها وشلون الكل صف ضده ومحد انطاه فرصه يحجي وجهة نضره بس الشي الحلو الصار تينه بنته بعد هالمعانة العشتها تينه احلى شي اجته
طبعاً مر اليوم واجه بعده ومازن كله يم تينه گاعد يشتغل ويرجع يركض يمها ومن يكعد الصبح يغسل وجهه ويروح يكعد يمها ومجان ياكل اي وجبه بدون مايروح يبوسها وتالي يروح ياكل ويكلها لاتضوجين شوي وراجعلج وكان بنفس الوقت متجاهل امها تماماً
بعد ماصار عمر تينه شهر قرر ياخذ ساره لدكتوره
خله تينه يم امه
- يمه دربالج عليها
- اي يمه تدلل بعيوني
- اندعيلنه كون الوضع مو خطر
- ان شاءلله يمه الله يسهلكم
خذه ساره وطلع ساره كان مبين عليها تعبانه وشكلها ذبلان مشه بالطريق بالكي مايوگفو داعش ويطلعلوه حجه طبعاً جان النقاب اهم شي عدهم لبس ساره نقاب بس جانت رافعته لان تختنگ من السياره شاف ثنين لازمين سلاح واگفين خاف
مازن : بسرعه نزلي جوه وخلي النقاب
ساره : ياربي ليش ميعوفونه بحالنه
مازن : بسرعه قبل لنوصل
وهيه مدنگه وگفو وضلو يفترون ع السياره
كال واحد منهم
- شبيها مدنگه
- داترجع
- ترجع خير عيني
- مرتي صار شهر من والده وحالته تعبانه اريد اخذه لدكتور
- كلها ترفع راسها
- اي هسه شوي وترفع بس خل تكمل
همزين كدرت ساره تخلي النقاب وشافوها وبعد ماخذو هويته وهويتها خلوهم يمشون
