هشاشة قلب

بارت21

ﺍﻟـﺴـﻼﻡُ ﻋـﻠـﻴـﻜـﻢ 🌼🌻
#ﻫﺸﺎﺷﺔ__ﻗﻠﺐ

ﻋﺒﺮﺍﺕ _ ﺍﻟﻌﺒﺎﺩﻳﻪ

#بارت٢١
alabadyia_09
ﺑـﺎﻫـﺘـﻪ ﻛﺄﺭﻣـﻠـﺔٌ . .
ﻻﺯﺍﻟﺖ ﻗﺎﺑﻌـﺔ ﻓﻲ ﺃﻳﺎﻡ ﺣِـﺪﺍﺩﻫـﺎ
ﺣـﺘـﻰٰ ﻳـﻤُـﺮ ﺇﺳـﻤـﻚَ ﻣـﻦ ﺃﻣـﺎﻣـﻲ
ﻓَـﺘﺴﺘـﻴﻘﻆ ﺑﺪﺍﺧﻠﻲ ﺍﻻﺯﻫﺎﺭ . .
ﻭﺗـﻄـﻮﻓـﻨﻲ ﺍﻟـﻔـﺮﺍﺷـﺎﺕ
~~~~~~~~~~~~~~~~~~~~~~~~~~~~~~~~~~~
ﺛُﺮﻯٰ . . .
ﺭﻓﻌﺖ ﺭﺍﺳﻲ ﻭﮔﻌﺪﺕ ﻋﻠﻰ ﺣﻴﻠﻲ ﺷﻬﮕﺘﻠﻲ ﺷﻬﮕﻪ ﺣﺴﻴﺖ ﺻﺪﺭﻱ ﺍﻧﺸﮓ .. ﻭﺧﻠﺖ ﻛﻞ ﺍﻟﻲ ﺑﺎﻟﺨﻂ ﻳﺮﻓﻌﻮﻥ ﺭﻭﺳﻬﻢ ﻣﺼﺪﻭﻣﻴﻦ !!!
ﺷﻔﺘﻪ ﻭﻳﻤﻪ ﺍﻟﺪﻛﺘﻮﺭﻩ ﺗﺨﺒﻠﺘﺖ !! ﻻ ﻳﺎﺍﻟﻠﻪ ﺑﺲ ﻻ ﻣﺘﺰﻭﺟﻬﻪ ﻻﻥ ﮔﺎﻋﺪﻩ ﺑﺎﻟﺼﺪﺭ !! ﺍﺗﺨﺒﻞ ﻏﻴﺮ ﺍﺫﺍ ﺻﺪﮒ ﻫﻴﺞ .
ﺑﺲ ﻫﻮَ ﺷﺼﺎﻳﺮ ﺻﺨﺎﻡ ﺑﻮﻳﻬﺞ ﺛُﺮﻯٰ .
ﻻﺃﻭﻝ ﻣﺮﻩ ﺑﺘﺎﺭﻳﺦ ﺣﻴﺎﺗﻪ ﻻﺑﺲ ﺗﻴﺸﻴﺮﺕ ﻟﻮﻧﻪ ﺃﺧﻀﺮ ﺗﺮﻛﻮﺍﺯﻱ ﻋﻠﻰ ﺳﻤﺎﺋﻲ . ﻣﻼﺻﻖ ﻟﻌﻀﻼﺕ ﺻﺪﺭﻩ ﻭﻧﺺ ﺭﺩﺍﻥ .. ﻣﺜﺨﻦ ﻟﺤﻴﺘﻪ ﻭﻣﺰﺩﺍﺩ ﻭﺳﺎﻣﻪ .. ﻭﺭﺍﻓﻊ ﺷﻌﺮﻩ ﻟﻔﻮﮒ ﻭﺍﻟﻨﻈﺎﺭﻩ ﻋﻠﻰ ﻋﻴﻮﻧﻪ . ﻭﻭﺟﻬﻪ ﺳﻤﻨﺎﻥ .
ﻣﺘﺘﺖ ﻣﺘﺘﺖ ﻭﺍﻟﻨﻮﺏ ﻋﺒﺎﻟﻚ ﺗﻮﻩ ﺳﺎﺑﺢ .. ﺷﻌﺮﻩ ﺭﻃﺐ ﻣﺪﺭﻱ ﺑﻴﻪ ﺟﻞ .
ﺗﺨﺮﺑﻄﺖ ﺍﺣﻮﺍﻟﻲ ﺭﺩﺕ ﺍﺷﻮﻓﻪ ﻭﺑﺴﺲ .
ﺭﺩﺕ ﺍﺗﺨﺒﻞ ﻣﻦ ﻫﺎﻱ ﺍﻟﻴﻤﻪ !!
ﺍﺣﺲ ﮔﻠﺒﻲ ﮔﺎﻡ ﻳﻔﺮﻓﺢ ﻣﺘﺖ ﻣﻦ ﺍﻟﻔﺮﺡ . ﺑﺲ ﻣﻦ ﺍﺗﺬﻛﺮ ﻫﺎﻱ ﻳﻤﻪ ﺗﻄﻴﺮ ﻓﺮﺣﺘﻲ ! ﺷﻨﻮ ﺧﻄﺒﻬﺎ؟؟ ﺗﺰﻭﺟﻬﺎ؟؟ ﺍﺫﺍ ﺧﺎﻃﺐ ﺍﺳﻤﻊ ﻣﻦ ﻧﻬﻰ .
ﻭﻟﻮ ﺫﻳﺞ ﺍﻟﻤﺮﻩ ﻣﺎﮔﺎﻟﺘﻠﻲ !! ﺧﻠﺘﻨﻲ ﺍﻧﺼﺪﻡ
ﺍﻟﺴﻴﺎﺭﻩ ﻋﺒﺮﺕ ﻭﺍﻧﻲ ﺭﮔﺒﺘﻲ ﺍﻧﻌﻮﺟﺖ ﺑﻌﺪﻧﻲ ﻣﻠﺘﻔﺘﻪ ﺭﻏﻢ ﺍﻟﺴﻴﺎﺭﻩ ﺍﺧﺘﻔﺖ ﺑﺲ ﮔﻠﺒﻲ ﻳﺮﻳﺪ ﺑﻌﺪ ﻳﺸﻮﻓﻪ .
ﻣﺘﻐﻴﺮ ﺷﻜﻠﻪ ﻣﺘﻐﻴﺮ ﺟﺬﺭﻳﺎً .. ﻫﻴﺞ ﺍﻧﺴﺤﺎﺑﻲ ﻣﻦ ﺣﻴﺎﺗﻪ ﺧﻼﻩ ﻳﺮﺗﺎﺡ ! ﻭﻟﻮ ﻫﺎﻱ ﺍﻟﺪﻛﺘﻮﺭﻩ ﻳﻤﻪ ﻣﺮﻳﺤﺘﻪ ﻭﻣﺪﻟﻠﺘﻪ ﺑﻌﺪ ﻭﻳﻦ ﻳﺘﺬﻛﺮ ﺛُﺮﻯٰ ﺗﻬﻲ ﺑﻬﻲ .
ﺍﻧﻲ ﺍﻓﻜﺮ ﻭﻣﺎﺍﺩﺭﻱ ﻟﻤﺎ ﺍﻧﺘﺒﻪ ﻭﺍﻟﮕﺎﻫﻢ ﻛﻠﻬﻢ ﺻﺎﻓﻨﻴﻦ ﻋﻠﻴﻪ !! ﻳﺎﺍﺍﺀ ﺷﺒﻴﻬﻢ ﺫﻭﻟﻪ ؟؟
ﻫﺬﺍ ﻋﻠﻲ ﺧﺎﺯﺭﻧﻲ ﺑﺎﻟﻤﺮﺍﻳﻪ !. . ﺍﻱ ﻭﺍﻟﻠﻪ ﺑﺲ ﻋﻮﺯﻫﻪ ﺗﺨﺰﺭﻧﻲ ﺧﺐ ﺩﺭﻭﺡ ﺍﻧﻲ ﺻﮕﺎﺭﻱ ﻭﺍﺣﺪ ﻭﻣﺤﺪ ﻳﻠﺤﮕﻪ .
ﻋﻠﻲ .. ﺷﻨﻮ ﺷﺒﻴﺞ ﺛُﺮﻯٰ ﺷﺸﻔﺘﻲ ﻭﻫﻴﺞ ﺧﻮﻓﺘﻴﻨﻪ؟
ﻇﻠﻴﺖ ﻣﺤﺘﺎﺭﻩ ﺷﺄﮔﻠﻪ ؟؟ ﺑﺸﺮﻓﻚ ﻫﻮَ ﻫﺬﺍ ﺳﺆﺍﻝ؟ ﺧﻠﻴﻨﻲ ﺑﺮﺍﺣﺘﻲ ﻣﻮ ﺗﻮﻧﻲ ﺳﮕﻴﺖ ﻋﻴﻮﻧﻲ ﺑﺸﻮﻓﺘﻪ
ﺭﺩﻳﺖ ﻋﻠﻴﻪ ﻭﺩﺍﺧﻠﻲ ﻣﻴﺖ ﻣﻨﻪ .
ﺛُﺮﻯٰ .. ﺻﺪﻳﻘﺘﻲ
ﻋﻠﻲ .. ﻭﻟﻴﺶ ﺷﻬﮕﺘﻲ؟
ﺭﺩﻳﺖ ﺑﻨﻔﺎﺫ ﺻﺒﺮ ﻻﻥ ﻋﺎﺵ ﺍﻟﺪﻭﺭ ﺯﻳﺎﺩﻩ
- ﺻﺎﺭ ﻫﻮﺍﻱ ﻣﺎﺷﺎﻳﻔﺘﻬﻪ
ﺳﻜﺖ ﻭﻭﺻﻠﻨﻪ ﻟﻠﻜﻠﻴﻪ ﻭﺭﺍﺡ .
ﺩﺧﻠﺖ ﻟﻠﻜﻠﻴﻪ ﻓﺮﺣﺎﻧﻪ ﻭﻃﺎﻳﺮﻩ ﻣﻦ ﺍﻟﻔﺮﺡ ﺑﺸﻮﻓﺘﻪ ﻭﺃﺗﻨﺎﺳﻪ ﺍﻟﻮﻳﺎﻩ ﻋﻨﺪﻱ ﺍﻫﻢ ﺷﻲ ﺷﻔﺘﻪ ﺧﻠﻴﻬﻪ ﺍﻟﺼﺪﻣﻪ ﻣﻮ ﻫﺴﻪ ﺍﺗﻠﻘﺎﻫﻪ .. ﺧﻞ ﺍﺳﺘﻌﺪ ﺷﻮﻳﻪ .بيج قصص عراقيه حقيقيه من واقعنا.روعه الطائي
ﺧﻠﺼﺖ ﺍﻟﻴﻮﻡ ﻛﻠﻪ ﺃﺿﺤﻚ ﻭﺍﻟﻨﻮﺏ ﻫﺬﺍ ﻣﻬﻴﺪﻱ ﻣﻦ ﻳﺤﺸﺶ ﺍﻧﻲ ﺍﺿﺤﻚ ﻻﻥ ﻓﺮﺣﺎﻧﻪ ﺑﺲ ﺑﺪﻭﻥ ﺻﻮﺕ ﺿﺤﻜﺘﻲ ﻫﻮَ ﻻﺣﻆ ﻫﺎﻟﺸﻲ ﻳﻮﻣﻴﻪ ﺷﻜﺪ ﻣﺎﻳﺤﺸﺶ ﻣﺎﺍﺿﺤﻚ . ﺑﺎﻭﻋﻠﻲ ﻣﺘﻔﺎﺟﺊ ﮔﺎﻝ
- ﻫﺎ ﺛُﺮﻯٰ ﺷﻌﺠﺐ ﺍﻟﻴﻮﻡ ﺗﻀﺤﻜﻴﻦ .. ﺍﻟﻠﻪ ﻳﺪﻳﻤﻬﻪ
- ﺷﻜﺮﺍً ﺃﺳﺘﺎﺫ
ﺿﺤﻚ ﻭﺭﺍﺡ ﻋﺒﺎﻟﻪ ﺍﺿﺤﻚ ﻋﻠﻰ ﺗﺤﺸﻴﺸﺎﺗﻪ ﺍﻟﺒﺎﻳﺨﻪ ﻣﺎﻳﺪﺭﻱ ﺍﻧﻪ ﮔﻠﺒﻲ ﺍﻟﻴﻮﻡ ﻋﻨﺪﻩ ﺣﻔﻠﻪ ﻻﻥ ﺷﺎﻓﻪ ﻭﺑﺎﺟﺮ ﻋﻨﺪﻩ ﻓﺎﺗﺤﻪ ﻣﻦ ﻳﺘﻠﻘﻰ ﺍﻟﺼﺪﻣﻪ .
ﺭﺟﻌﺖ ﻟﻠﺒﻴﺖ ﻣﻠﻬﻮﻓﻪ .. ﺭﻛﺾ ﻟﻠﻔﻴﺲ .. ﻃﻠﻌﺖ ﺍﻟﺮﺳﺎﺋﻞ ﻭﺍﺿﻐﻂ ﻉ ﺍﻟﺤﺴﺎﺏ ﺍﺭﻳﺪﻩ ﻳﻄﻠﻊ ﻭﻫﻮَ ﻣﻌﻄﻞ ﻳﻄﻠﻌﻠﻲ ﻣﺴﺘﺨﺪﻡ ﻓﻴﺴﺒﻮﻙ ﻭﻋﺒﺎﻟﻚ ﺣﺎﻇﺮﻧﻲ .
ﻣﻠﻴﺖ ﺍﺭﻳﺪ ﺍﺷﻮﻑ ﺻﻮﺭﺗﻪ ﻉ ﺍﻷﻗﻞ .. ﺭﺣﺖ ﻟﻨﻬﻰ ﺭﺍﺳﻠﺘﻬﻪ
- ﻧﻬﻰ ﺑﻈﺮﻑ ﻧﺺ ﺳﺎﻋﻪ ﺣﺴﺎﺏ ﻣﺎﻫﺮ ﻳﻤﻲ
ﻧﻬﻰ .. ﺍﻱ ﻭﺍﻟﻠﻪ ﻣﻮ ﺍﻧﻲ ﺧﺪﺍﻡ ﺟﻮﻩ ﺇﻳﺪﺝ
- ﻋﻠﻴﺞ ﺍﻟﻠﻪ ﺩﺑﺮﻳﻠﻴﺎﻩ
ﻧﻬﻰ .. ﺍﻣﻢ ﻳﻼ ﻛﺴﺮﺗﻲ ﺧﺎﻃﺮﻱ ﺧﻄﻴﻪ ﺑﺠﻴﺘﻴﻨﻲ
- ﺩﻳﻼ ﻋﻤﻲ ﺭﺍﺿﻴﻦ ﺑﺲ ﺟﻴﺒﻴﻪ
ﻇﻠﻴﺖ ﺍﻧﺘﻈﺮﻫﻪ ﺗﺪﺯﻟﻲ ﺍﻟﺤﺴﺎﺏ .. ﺭﺑﻊ ﺳﺎﻋﻪ ﻭﺩﺯﺗﻠﻴﺎﻩ .
ﻳﻤﻤﻤﻪ ﻣﺨﻠﻲ ﺻﻮﺭﺗﻪ ﺷﺨﺼﻴﻪ ﻭﻣﺴﻤﻲ ﺇﺳﻤﻪ ﺑﺤﺮﻭﻑ ﺍﻧﮕﻠﻴﺰﻳﻪ ﻣﺪﺭﻱ ﻓﺮﻧﺴﻴﻪ ﺑﺲ ﻣﻌﻜﺮﺑﻪ ﻣﺎﭼﻨﻬﻪ ﺍﻧﮕﻠﻴﺰﻱ .. ﺣﺘﻰ ﻣﻦ ﺍﺑﺤﺜﻪ ﺑﺎﻟﺒﺤﺚ ﻣﺎﻳﻄﻠﻌﻠﻲ .
ﺩﺧﻠﺖ ﻟﻤﻠﻔﻪ ﺍﻟﺸﺨﺼﻲ ﻣﻮ ﻋﺎﻡ ! ﻣﺎﺑﻴﻪ ﻭﻻ ﻣﻨﺸﻮﺭ ﻭﻻ ﺷﻲ ﺍﻻ ﺍﺩﺯﻟﻪ ﻃﻠﺐ ﺻﺪﺍﻗﻪ !
ﺷﻠﻮﻥ ﺳﺎﻟﻔﻪ ﻫﺎﻱ ﻳﺮﺑﻲ ﺍﺭﻳﺪ ﺍﺷﻮﻓﻪ ﺧﺎﻃﺐ ﻟﻮ ﻻ ! ؟
ﺍﻧﺠﺒﺮﺕ ﺍﺩﺯﻟﻪ ﻃﻠﺐ ﺣﺘﻰ ﺍﺭﺿﻲ ﻓﻀﻮﻟﻲ ﻭﻫﻢ ﺍﺷﻮﻑ ﻣﻨﺸﻮﺭﺍﺗﻪ ﺑﻌﺪ ﻣﺎﺍﺗﺤﻤﻞ . ﺍﻟﺘﻔﻜﻴﺮ ﺧﺒﻠﻨﻲ
ﺩﺯﻳﺖ ﺍﻟﻄﻠﺐ ﻭﺑﻘﻴﺖ ﻣﻨﺘﻈﺮﻩ ﻳﻮﺍﻓﻖ .
ﻣﺎﻛﻮ ﻣﺎﻭﺍﻓﻖ ﻳﻌﻨﻲ ﻣﻮ ﻧﺸﻂ .. ﻇﻠﻴﺖ ﻃﻮﻝ ﺍﻟﻴﻮﻡ ﻣﻨﺘﻈﺮﻩ ﻳﻮﺍﻓﻖ ﻭﻣﺎﻛﻮ .. ﺑﺎﻟﻠﻴﻞ ﻳﻼ ﻭﺍﻓﻖ ﻋﻠﻰ ﺍﻟﻄﻠﺐ ﻭﻭﺻﻠﺘﻨﻲ ﺭﺳﺎﻟﺘﻪ .
- ﺷﻜﻮ ﺷﺘﺮﻳﺪﻳﻦ ﻟﻴﺶ ﺩﺍﺯﺗﻠﻲ ﻃﻠﺐ؟؟
ﻇﻠﻴﺖ ﻣﺼﻔﺼﻔﻪ ﻭﻣﺤﺘﺎﺭﻩ ﺷﺄﺭﺩ؟؟ ﺻﺪﮒ ﻏﻴﺮ ﺭﻓﻀﺘﻪ ﺍﻧﻲ ﺍﻟﻤﻦ ﺩﺯﻳﺖ ﻃﻠﺐ؟ ﺍﻟﺨﻄﺐ ﻭﺍﻟﻤﺎﺧﻄﺐ ﺍﻧﻲ ﺷﻌﻠﻴﻪ ! ؟
ﺷﻠﻮﻥ ﺳﺎﻟﻔﻪ ﻫﺎﻱ ﻫﺴﻪ ﺷﺄﮔﻠﻪ؟ !
ﺷﻔﺘﻬﻪ ﻭﻣﺎﺭﺩﻳﺖ ﻻﻥ ﻣﺎﻋﻨﺪﻱ ﺟﻮﺍﺏ .
ﺭﺟﻊ ﺩﺯ
- ﻣﺘﺤﺠﻴﻦ؟؟
....- ‏( ﻣﺎﺟﺎﻭﺑﺖ ‏)
- ﺍﺫﺍ ﻣﺠﺎﻭﺑﺘﻲ ﺍﺣﻈﺮﺝ !!
ﻧﺎﺭ ﻭﺍﺷﺘﻌﻠﺖ ﺑﻴﻪ ﻳﺤﻈﺮﺭﺭﻧﻲ !! ﺍﻟﻤﻦ ﺩﺯﻳﺖ ﺍﻟﻤﻦ ﺍﻟﻤﻨﻨﻨﻦ .
ﺍﻟﻨﺪﻡ ﺃﻛﻠﻨﻲ ﺃﻛﻞ .. ﻣﻮ ﺭﺟﻌﺖ ﻛﺮﺍﻣﺘﻲ ﻭﮔﻠﺖ ﻫﺎﻱ ﻫﻴﻪ ﺑﺲ ﺍﻧﻲ ﺍﺧﺦ ﻣﺜﻞ ﺍﻟﺒﺰﻭﻥ ﻳﺤﺐ ﺧﻨﺎﮔﻪ .
ﻭﺍﻟﻠﻪ ﺷﻮﻳﻪ ﻭﻃﻠﻌﻠﻲ ﺍﻧﺤﻈﺮﺕ .
ﻣﺘﺘﺘﺘﺖ ﻗﻬﻬﺮﺭﺭ ﺍﺣﺘﺎﺭﻳﺖ ﺷﻠﻮﻥ ﺍﻃﻠﻊ ﻗﻬﺮﻱ .
ﺍﻟﺤﺮﮔﻪ ﻛﺎﻣﺖ ﺗﺪﮒ ﺑﻀﻠﻮﻋﻲ .
ﻃﻠﻌﺖ ﻓﺮﺣﺔ ﺷﻮﻓﺘﻪ ﻣﻦ ﺧﺸﻤﻲ .
ﺩﺍﻭﻣﺖ ﻭﻣﻴﺘﻪ ﻗﻬﺮ ﺣﺘﻰ ﻛﻤﺖ ﻣﺎﺍﺑﺎﻭﻉ ﻣﻦ ﺍﻟﺠﺎﻣﻪ .. ﺣﺎﻃﻬﻪ ﻭﻳﻔﺘﺮ ﺑﻴﻬﻪ ﻫﺴﻪ ﻣﺜﻞ ﺟﻨﺎﺕ ﺑﺎﻟﺒﺪﺍﻳﻪ ﻃﺎﻳﺮ ﻭﺑﻌﺪﻳﻦ ﺗﻄﻠﻊ ﺃﻧﮕﺲ ﺧﻠﻖ ﺍﻟﻠﻪ !
ﺍﻟﺪﻣﻌﻪ ﺑﻄﺮﻑ ﻋﻴﻨﻲ .. ﺑﻐﺒﺎﺋﻲ ﻣﺎﺷﻔﺖ ﻭﺍﺫﺍ ﺧﻄﺐ ﺍﻧﻲ ﺷﻜﻮﻭﻭ؟؟
ﺩﺍﻭﻣﺖ ﺛﺎﻧﻲ ﻳﻮﻡ ﻭﻣﻴﺘﻪ ﻗﻬﺮ .. ﻭﺻﻠﺖ ﻟﻠﻜﻠﻴﻪ ﻭﺫﻧﻲ ﺑﻨﺎﺕ ﺍﻟﺨﻂ ﻭﻳﺎﻱ ﻧﻮﻋﺎً ﻣﺎ ﻋﻼﻗﺘﻲ ﺯﻳﻨﻪ ﺑﻴﻬﻦ ﻧﺴﻮﻟﻒ ﻭﻧﻀﺤﻚ ﺳﻮﻳﻪ .. ﺭﺣﻨﻪ ﮔﻌﺪﻧﻪ ﺑﻘﺎﻋﻪ ﻓﺎﺭﻏﻪ ﻭﺳﺪﻳﻨﺎﻫﻪ ﻋﻠﻴﻨﻪ
- ﺍﻛﻠﺠﻦ ﺿﺎﻳﺠﻪ ﺣﻴﻞ ﻭﺭﻭﺣﻲ ﻃﺎﻟﻌﻪ ﺳﻮﻟﻔﻠﻲ ﻧﻜﺖ ﺗﻐﻴﺮ ﻣﺰﺍﺟﻲ
ﺍﺳﺮﺍﺀ ﻛﺎﻣﺖ ﺗﺴﻮﻟﻒ ﻭﺗﻀﺤﻚ ﺑﻴﻪ ﻣﻦ ﺻﺪﮒ ﺿﺤﻜﺖ ﻣﻦ ﮔﻠﺒﻲ . ﻋﻮﺯﻱ ﺑﺲ ﺍﺑﻮ ﺍﻟﺮﺯﺍﻳﻞ ﻳﻘﻬﺮ ﺑﻴﻪ .. ﺟﻨﺖ ﻣﺎﺍﻋﺮﻑ ﺍﻟﺒﺠﻲ ﺷﻨﻮ ﻣﻦ ﻋﺮﻓﺘﻪ ﻟﻬﺴﻪ ﺣﻴﺎﺗﻪ ﺗﺪﻣﺮﺕ .
ﺷﻮﻳﻪ ﻭﺍﻧﺪﮒ ﺍﻟﺒﺎﺏ ﻛﺎﻟﺖ ﺍﺳﺮﺍﺀ ﺻﺪﻳﻘﺘﻲ
ﺍﺳﺮﺍﺀ .. ﻣﻨﻮﻭﻭ؟؟
ﺍﻧﻲ ﻛﺎﻋﺪﻩ ﺭﺟﻞ ﻋﻠﻰ ﺭﺟﻞ ﻋﻠﻰ ﺍﻟﺴﺘﻴﺞ ﻭﻛﻠﺖ ﺑﻤﻴﺎﻋﻪ ﻭﺍﺿﺤﻚ -:
- ﺗﻔﻀﻞ ﻳﺤﻠﻮﻭﻭ
ﺍﻧﻔﺘﺢ ﺍﻟﺒﺎﺏ ﻭﺗﻔﻀﻞ ﺍﻟﺤﻠﻮ ﻳﺒﻮﻭ .. ﺩﺧﻞ ﺍﺳﺘﺎﺫ ﻣﻬﺪﻱ ﻭﻣﺸﺮﻉ ﺍﻟﺤﻠﮓ ﻣﻦ ﺍﻟﻄﻮﻝ ﻟﻠﻄﻮﻝ ﻣﺼﺪﮒ ﺭﻭﺣﻪ ﺣﻠﻮ .. ﻫﻮَ ﺍﻧﺖَ ﻛﻠﻚ ﻗﺮﺩ
ﺍﺻﻼً ﮔﻠﺖ ﺷﻨﻮ ﻫﺬﺍ ﺍﻟﻘﺮﺩ ﺍﻟﺪﺧﻞ ﻋﻠﻴﻨﻪ .
ﻳﻀﺤﻚ ﻭﻓﺮﺣﺎﻥ ﻭﺍﻟﻠﻪ ﻇﻠﻴﺖ ﺍﺿﺤﻚ ﻋﻠﻰ ﻋﻘﻠﻪ ﻋﺒﺎﻟﻪ ﺻﺪﻙ ﺣﻠﻮ .
ﺗﻄﺸﺮﻧﻪ ﺑﺪﺧﻮﻟﻪ ﻭﻫﻮَ ﻛﺎﻝ -:
- ﻭﻳﻦ ﻭﻳﻦ ﺭﺍﻳﺤﺎﺕ ﺍﺑﻘﻮ
- ﻻ ﺍﺳﺘﺎﺫ ﺭﺍﻳﺤﻴﻦ
- ﻻ ﺍﻧﻲ ﺭﺍﺡ ﺍﻃﻠﻊ ﺑﺲ ﺍﺧﺬ ﺍﻻﻭﺭﺍﻕ
ﻣﺪﺭﻱ ﺷﺄﺧﺬ ﻭﻃﻠﻊ ﻳﺒﺎﻭﻋﻠﻲ ﻣﺒﺘﺴﻢ ﻭﻳﻀﺤﻚ . ﻫﺎﻟﻠﻪ ﻫﺬﺍ ﻛﻞ ﻋﻘﻠﻪ؟؟
ﺭﺟﻌﺖ ﻟﻠﺒﻴﺖ ﺑﻌﺪﻧﻲ ﺑﻤﻼﺑﺴﻲ ﺗﻤﺪﺩﺕ ﺍﻧﺘﻈﺮ ﺍﻟﻐﺪﻩ ﺍﻟﻴﻮﻡ ﻏﺪﺍﻧﻪ ﻣﺘﺄﺧﺮ .. ﻟﺰﻣﺖ ﻣﻮﺑﺎﻳﻠﻲ ﺍﺗﺼﻔﺢ ﻭﺭﺣﺖ ﻟﻠﻤﺎﺳﻨﺠﺮ ﺍﺭﻳﺪ ﺍﺷﻮﻑ ﺍﻟﺤﻈﺮ ﺣﺘﻰ ﻳﺤﺘﺮﮒ ﮔﻠﺒﻲ ﺑﺎﻟﺰﺍﻳﺪ .
ﺩﺧﻠﺖ ﻟﻠﻤﺤﺎﺩﺛﻪ ﻭﺍﻟﮕﻪ ﻣﺎﻛﻮ ﺣﻈﺮ !!
ﺭﺍﻓﻌﻪ ﻋﻨﻲ .. ﺍﻟﻈﺎﻫﺮ ﺑﺲ ﻳﺮﻳﺪ ﻳﺤﺮﮒ ﮔﻠﺒﻲ .
ﻭﺍﻟﻠﻪ ﻣﺎﻝ ﻭﺍﺣﺪ ﻳﺴﻮﻳﻬﻪ ﺻﺪﮒ ﻭﻳﺮﮔﻌﻪ ﺑﺤﻈﺮ ﺣﺘﻰ ﺍﺭﺩﻫﻪ ﺇﻟﻪ .. ﺑﺲ ﻣﺎﺍﺳﻮﻳﻬﻪ ﻭﻳﮕﻮﻝ ﺷﺎﻓﺘﻨﻲ ﺭﺍﻓﻌﻪ . ﻻ ﺧﻠﻴﻪ ﻫﻴﺞ ﺍﺗﺠﺎﻫﻠﻪ ﺍﺣﺴﻦ ﺣﺘﻰ ﺍﺑﻴﻨﻠﻪ ﺍﻧﻲ ﻣﺎﺍﺩﺭﻱ ﺭﻓﻌﻪ ﻭﺍﺻﻼً ﻣﺎﺩﺍﺧﻠﻪ ﻋﻠﻰ ﺍﻟﻤﺤﺎﺩﺛﻪ .. ﻭﺍﻟﺤﻈﺮ ﻭﺳﻴﻠﺔ ﺍﻟﻀﻌﻔﺎﺀ ﺍﺣﻢ ﺍﺣﻤﻤﻢ .
ﺗﻔﺎﺟﺌﺖ ﺑﻮﺻﻮﻝ ﺭﺳﺎﺋﻞ ﻣﻦ ﺣﺴﺎﺏ ﺍﺳﻤﻪ ‏( ﺗﻮﻡ ﻛﺮﻭﺯ ‏) ﻭﻣﺎﻛﻮ ﺻﻮﺭﻩ ﺷﺨﺼﻴﻪ !
ﻛﺎﺗﺐ -:
- ﺍﻧﺖِ ﺛُﺮﻯٰ؟؟
ﺭﺩﻳﺖ
- ﺍﻱ ﺗﻔﻀﻠﻲ / ﺗﻔﻀﻞ؟؟
- ﺍﻧﻲ ﺑﻨﻴﻪ ﻣﻮ ﻭﻟﺪ
- ﺍﻱ ﺗﻔﻀﻠﻲ
- ﺍﻧﻲ ﺍﺣﺐ ﺍﺭﺍﺳﻞ ﻫﻮﺍﻱ ﻭﻣﺎﻋﻨﺪﻱ ﺷﺨﺺ ﺍﺭﺍﺳﻠﻪ
- ﺍﻱ ﻭﺍﻧﻲ ﺷﻜﻮ ﺷﻌﻠﻴﻪ ﺑﻴﺠﺞ؟؟
- ﺍﺭﻳﺪ ﺍﺑﻘﻪ ﺍﺭﺍﺳﻠﺞ ﻭﺍﺗﻌﺮﻑ ﻋﻠﻴﺞ
- ﺭﻭﺣﻲ ﺑﺎﺑﺎ ﺭﻭﺣﻲ ﺷﻮﻓﻲ ﻏﻴﺮﻱ ﺍﻧﻲ ﻣﺎﺍﻓﻴﺪﺝ
- ﺯﻳﻦ ﺗﻌﺮﻓﻴﻦ ﺩﻛﺘﻮﺭ ﻣﺎﻫﺮ؟؟
ﺻﻔﻨﺖ ﺷﻮﻳﻪ ﻭﺭﺩﻳﺖ
- ﺍﻱ ﺍﻋﺮﻓﻪ ﻟﻴﺶ ﺍﻟﻤﻄﻠﻮﺏ ﺷﻨﻮﻭﻭﻭ؟؟
- ﺍﺭﻳﺪ ﺍﻭﮔﻌﻪ ﺑﺄﻱ ﻃﺮﻳﻘﻪ ﺍﻧﻄﻴﺞ ﺃﻱ ﺷﻲ ﺑﺲ ﺳﺎﻋﺪﻳﻨﻲ
- ﻋﺮﻓﻪ ﻭﻟﻔﻪ ﺍﻋﺮﻓﺞ ﺗﻌﺮﻓﻴﻨﻲ؟؟ ﻭﺍﻧﻲ ﺷﻌﻠﻴﻪ ﺫﺍﻙ ﺩﻛﺘﻮﺭ ﻣﺎﻫﺮ ﻭﺭﻭﺣﻲ ﻭﮔﻌﻴﻪ
- ﻭﺍﻟﻠﻪ ﺷﺘﺮﻳﺪﻳﻦ ﺍﻧﻄﻴﺞ ﻻﻥ ﺍﻧﺖِ ﻭﻳﺎﻩ ﺑﻨﻔﺲ ﺍﻟﻜﻠﻴﻪ ﻭﺗﻌﺮﻓﻴﻨﻪ
- ﺍﻧﻲ ﻣﺎﻋﻠﻴﻪ ﻭﺍﺫﺍ ﻭﮔﻌﺘﻴﻪ ﺷﻌﻠﻴﻪ ﺑﻴﺞ ﺭﻭﺣﻲ ﻋﻴﻨﻲ ﺑﺎﻱ
ﻇﻠﻴﺖ ﺻﺎﻓﻨﻪ ﻣﻨﻮ ﻫﺎﻱ؟؟ ﻣﻌﻘﻮﻟﻪ ﻫﻮَ ﺩﺧﻠﻠﻲ ﺑﺤﺴﺎﺏ ﺛﺎﻧﻲ ﺣﺘﻰ ﻳﺸﻮﻑ ﺷﻨﻮ ﺍﺟﺎﺑﺘﻲ؟؟ ﻻ ﻣﺎﺍﺗﻮﻗﻊ ! ﺯﻳﻦ ﻣﻌﻘﻮﻟﻪ ﺍﻟﺪﻛﺘﻮﺭﻩ ؟؟ ﺩﺧﺖ ﻳﺎﺭﺑﻲ ﺍﺣﺲ ﻋﻘﻠﻲ ﺟﻤﺪﺩ
ﺭﺣﺖ ﺗﻐﺪﻳﺖ ﻭﺍﻧﻲ ﺍﻓﻜﺮ ﻣﻨﻲ ﻫﺎﻱ ﻳﺮﺑﻲ ؟ !
.
ﻣﺮ ﺇﺳﺒﻮﻉ ﻣﻦ ﺁﺧﺮ ﻣﺤﺎﺩﺛﻪ ﺑﻴﻨﺎﺗﻨﻪ .. ﻭﺍﺳﺘﺎﺫ ﻣﻬﺪﻱ ﻣﻦ ﮔﺘﻠﻪ ﺗﻔﻀﻞ ﻳﺤﻠﻮ ﻟﻬﺴﻪ ﻻﻃﺸﻠﻲ ﻟﻄﺸﻪ ﻣﻦ ﻫﺎﻱ ﺍﻟﺰﻳﻨﻪ .. ﻭﺍﻟﻨﻮﺏ ﻛﻠﻤﺎ ﻳﺸﻮﻓﻨﻲ ﻳﺸﺮﻉ ﺣﻠﮕﻪ ﻭﻳﻀﺤﻚ ﻣﺼﺪﮒ ﺭﻭﺣﻪ .
ﺍﻟﻴﻮﻡ ﻣﻦ ﺩﺍﻭﻣﺖ ﺑﺎﻟﻜﻠﻴﻪ ﺭﺣﺖ ﻟﻠﻜﺎﻓﺘﻴﺮﻳﺎ ﻭﺍﻧﺼﺪﻣﻠﻚ ﻫﻴﺌﺔ ﺇﺑﻮ ﺍﻟﺮﺯﺍﻳﻞ ﮔﺎﻋﺪ ﻳﻢ ﺍﺳﺘﺎﺫ ﻣﻬﺪﻱ ﻋﻠﻰ ﻃﺎﻭﻟﻪ ﻭﻳﺸﺮﺑﻮﻥ ﮔﻬﻮﻩ !
ﻇﻬﺮﻩ ﻋﻠﻴﻪ ﻭﺍﺳﺘﺎﺫ ﻣﻬﺪﻱ ﻣﻘﺎﺑﻴﻠﻲ .. ﻣﻦ ﺩﺧﻠﺖ ﺍﺳﺘﺎﺫ ﻣﻬﺪﻱ ﻧﻈﺮﻩ ﺷﺎﺡ ﻋﻠﻴﻪ ﻭﻣﻦ ﺷﺎﻓﻨﻲ ﺿﺤﻚ ﻛﺎﻟﻌﺎﺩﻩ .. ﻫﻮَ ﺍﻟﺘﻔﺖ ﻋﻠﻤﻮﺩ ﻳﺸﻮﻓﻪ ﺍﻟﻤﻦ ﻳﺒﺎﻭﻉ ﻭﺻﺪﮒ ﻳﻄﻠﻊ ﺍﺑﻮ ﺍﻟﺮﺯﺍﻳﻞ . ﻣﻦ ﺷﺎﻑ ﺍﺑﺘﺴﺎﻣﺔ ﺍﺳﺘﺎﺫ ﻣﻬﺪﻱ ﻭﺍﻧﻲ ﻭﺍﮔﻔﻪ ﻋﮕﺪ ﺣﺎﺟﺒﻪ ﺧﺰﺭﻧﻲ ﻭﺭﺟﻊ ﺩﺍﺭ ﻭﺟﻬﻪ
ﺭﺣﺖ ﺍﺷﺘﺮﻳﺖ ﻭﻛﻌﺪﺕ ﺁﻛﻞ ﻭﺣﺪﻱ .
ﻧﻈﺮﺍﺕ ﺍﺳﺘﺎﺫ ﻣﻬﺪﻱ ﻭﺭﺍﻱ ﻭﺭﺍﻱ .. ﺣﺘﻰ ﻣﻠﻴﺖ ﻣﻦ ﺍﺷﻮﻑ ﺷﻜﻠﻪ ﺗﺼﻴﺒﻨﻲ ﻛﺂﺑﻪ ﻻﺍﺭﺍﺩﻳﺎً .
ﻛﻤﻠﺖ ﺍﻛﻞ ﻭﺭﺩﺕ ﺍﻃﻠﻊ .. ﺍﻧﺮﻓﻌﺖ ﺍﻳﺪ ﺍﺳﺘﺎﺫ ﻣﻬﺪﻱ ﻭﺍﺷﺮﻟﻲ . ﺻﺎﺣﻠﻲ ﺑﺈﺳﻤﻲ
- ﺛُﺮﻯٰ ﺗﻌﺎﻟﻲ ﺷﻮﻳﻪ
ﺍﺷﺮﺕ ﻋﻠﻰ ﻧﻔﺴﻲ ﻋﻮﺩ ﺍﻧﻲ؟ ﻫﺰ ﺭﺍﺳﻪ ﺑــ ‏( ﺇﻱ ‏) .. ﺭﺣﺖ ﻭﮔﻔﺖ ﻳﻢ ﺍﻟﻄﺎﻭﻟﻪ ﺍﻟﻜﺎﻋﺪﻳﻦ ﻋﻠﻴﻬﻪ ﻭﺍﺑﻮ ﺍﻟﺮﺯﺍﻳﻞ ﻳﺒﺎﻭﻋﻠﻲ ﺭﺍﻓﻊ ﺭﺍﺳﻪ ﻭﺍﻟﺤﺎﺟﺐ ﻣﻌﮕﻮﺩ ﻋﻮﺩ ﻣﺎﺭﺍﺿﻲ .
- ﻫﺎ ﺍﺳﺘﺎﺫ ؟
- ﺍﻛﻠﺞ ﺛُﺮﻯٰ ﺑﺲ ﺭﻭﺣﻲ ﺻﻴﺤﻲ ﺍﻟﻌﻤﻴﺪ ﺑﻼ ﺍﻣﺮ ﻋﻠﻴﺞ ﻣﺎﺍﻛﺪﺭ ﺍﻋﻮﻑ ﺩﻛﺘﻮﺭ ﻣﺎﻫﺮ ﻭﺍﺭﻭﺡ
- ﻫﺎ ﺍﻱ ﺣﺎﺿﺮ ﺍﺳﺘﺎﺫ
ﻧﺰﻟﺖ ﻋﻴﻨﻲ ﻋﻠﻴﻪ ﺷﻔﺘﻪ ﺑﻌﺪﻩ ﺧﺎﺯﺭﻧﻲ .. ﻭﻳﺮﺟﻊ ﻳﺨﺰﺭ ﺑﻤﻬﺪﻱ .
ﺭﺣﺖ ﻟﻼﺍﺩﺭﻩ ﻛﻠﺖ ﻟﻠﻌﻤﻴﺪ ﻳﺮﻭﺣﻠﻬﻢ ﻭﺭﺟﻌﺖ ﻟﻠﻘﺎﻋﻪ .
ﺷﻜﻮ ﺷﻌﻨﺪﻩ ﺟﺎﻱ ﺷﻴﺴﻮﻱ؟؟
ﺧﻠﺺ ﺍﻟﺪﻭﺍﻡ ﻭﺍﻧﻲ ﻃﻠﻌﺖ ﺍﻧﺘﻈﺮ ﺍﻟﺴﺎﻳﻖ .. ﺍﺟﻪ ﻭﺍﻟﺒﻨﺎﺕ ﺻﻌﺪﻥ .. ﺍﻧﻲ ﺭﺩﺕ ﺍﺻﻌﺪ ﻭﻣﺎﺍﺷﻮﻓﻠﻚ ﺍﻻ ﺍﺑﻮ ﺍﻟﺮﺯﺍﻳﻞ ﺟﺎﻱ ﺑﺄﺗﺠﺎﻫﻨﻪ ﻭﺍﻟﻨﻈﺎﺭﻩ ﺣﺎﻃﻬﻪ ﻋﻠﻰ ﻋﻴﻮﻧﻪ ﻭﻣﺒﻴﻦ ﻋﺼﺒﻲ .
ﺩﻧﮓ ﻉ ﺍﻟﺒﺎﺏ ﻭﺣﭽﻪ ﻭﻱ ﺍﻟﺴﺎﻳﻖ ﻣﻦ ﺍﻟﺠﺎﻣﻪ
- ﺭﻭﺣﻮ ﺛُﺮﻯٰ ﺍﻧﻲ ﺍﻭﺻﻠﻬﻪ
ﻋﻠﻲ .. ﻭﺍﻧﺖُ ﻣﻨﻮ ﻧﻌﺮﻓﻚ ﺗﻌﺮﻓﻨﻪ؟؟ ﻣﺎﺍﻛﺪﺭ ﺍﻋﺬﺭﻧﻲ ﺍﻟﺒﻨﻴﻪ ﺃﻣﺎﻧﻪ ﻳﻤﻲ ... ﺍﺻﻌﺪﻱ ﺛُﺮﻯٰ ..
ﻣﺎﻫﺮ .. ﻟﻚ ﻫﻲَ ﺑﻜﻴﻔﻚ
ﻋﻠﻲ .. ﺍﻛﻴﺪ ﺑﻜﻴﻔﻲ .. ﻳﻼ ﺻﻌﺪﻱ ﺛُﺮﻯٰ
ﺿﺮﺏ ﻋﻠﻰ ﺍﻟﺴﻴﺎﺭﻩ ﻭﻭﻛﻒ ﻣﺴﺘﻘﻴﻢ .
ﻣﺎﻫﺮ .. ﺭﻭﺡ ﺣﺒﻴﺒﻲ ﺭﻭﺡ ﺣﺮﻙ
ﻋﻠﻲ .. ﻣﺎﺍﺍﺭﻭﺡ ﺍﺫﺍ ﻣﻮ ﻭﻳﺎﻧﻪ ﺛُﺮﻯٰ ﺑﻠﻪ ﺗﺮﻳﺪ ﺗﺴﻮﻳﻠﻬﻪ ﺷﻲ .
ﺍﻟﺘﻔﺖ ﻋﻠﻴﻪ ﻭﺭﻓﻊ ﻧﻈﺎﺭﺗﻪ ﻋﺼﺮ ﻋﻴﻮﻧﻪ ﺑﻨﻔﺎﺫ ﺻﺒﺮ ﻭﻧﺘﺮ -:
- ﺍﺣﭽﻴﻠﭻ ﻛﻠﻤﻪ
- ﺷﺄﺣﭽﻲ؟؟
- ﺧﻴﺮﻭﺡ ﺍﻧﻲ ﺍﻭﺻﻠﺞ
- ﻻ ﺍﻧﻲ ﺍﺭﺟﻊ ﻭﻱ ﺍﻟﺨﻂ ﻣﺎﻟﺘﻲ .. ﺑﻠﻪ ﺷﻮﻳﻪ ﺧﻞ ﺍﺻﻌﺪ
ﺧﺰﺭﻧﻲ ﻭﺭﻓﻊ ﺣﺎﺟﺒﻪ
- ﺩﻗﺎﻳﻖ ﻣﻌﺪﻭﺩﻩ ﻭﺍﻟﮕﺎﭺ ﺑﺎﻟﺴﻴﺎﺭﻩ ﻣﻔﻬﻮﻭﻡ
ﻣﺸﻪ ﺧﻄﻮﺗﻴﻦ ﮔﺪﺍﻣﻲ ﻭﻭﺍﺛﻖ ﻣﻦ ﻧﻔﺴﻪ !! ﻫﻪ
ﺻﻌﺪﺕ ﺑﺴﻴﺎﺭﺓ ﺍﻟﺨﻂ ﺑﻌﺪﻧﻲ ﺗﻮﻧﻲ ﺍﺭﻳﺪ ﺍﺳﺪ ﺍﻟﺒﺎﺏ . ﻭﻟﺰﻣﻪ ﺑﻘﻮﻩ . ﺧﺰﺭﻧﻲ ﻭﻧﺘﺮ -:
- ﺍﻧﺰﺯﻟﻲ
ﻋﻠﻲ .. ﺍﻛﻠﻚ ﻧﻌﺮﻓﻚ ﺗﻌﺮﻓﻨﻪ ﺷﻨﻮ ﺗﺮﻳﺪ ﺗﺎﺧﺬﻫﻪ ﺗﺮﻩ ﺍﻫﻠﻬﻪ ﻣﺄﻣﻨﻴﻬﻪ ﻋﻨﺪﺩﺩﻱ
ﻣﺎﻫﺮ .. ﺍﻧﺖَ ﻣﺘﻌﺮﻓﻨﻲ ﻫﻲَ ﺗﻌﺮﻓﻨﻲ ﻭﻫﺎﻟﺸﻲ ﻳﻜﻔﻲ
ﻋﻠﻲ ﻓﺘﺢ ﺍﻟﺒﺎﺏ ﻳﺮﻳﺪ ﻳﻨﺰﻝ .. ﻋﺰﺯﻩ ﺭﺍﺡ ﺗﺼﻴﺮ ﻣﻼﻓﺦ ﻫﺬﺍ ﺻﺎﻳﺮ ﺯﺭﺯﻭﺭ ﮔﺪﺍﻡ ﺍﻟﻘﺎﺳﻲ .. ﻻﻥ ﺿﻌﻴﻒ ﻭﺍﻗﺼﺮ ﻣﻨﻪ .
ﺍﺑﻮ ﺍﻟﺮﺯﺍﻳﻞ ﻣﺎﺧﺬﻧﻪ ﻃﻮﻝ ﺑﻌﺮﺽ .. ﻛﻔﺨﻪ ﻭﺣﺪﻩ ﻣﻦ ﺇﻳﺪﻩ ﻳﻄﻴﺮ ﻋﻠﻲ ﻭﺍﺣﻨﻪ ﻭﻳﺎﻩ .
ﻧﺰﻟﺖ ﺑﺴﺮﻋﻪ ﺧﺎﻳﻔﻪ ﻉ ﺍﻟﻮﻟﺪ ﺍﻟﻨﻮﺏ ﺗﺠﻴﻪ ﺳﺎﻟﻔﻪ ﻣﻦ ﻭﺭﺍﻱ .. ﻛﺘﻠﻪ -:
- ﻫﺎﻱ ﻫﻴﻪ ﺭﺍﺡ ﺍﺭﻭﺡ ﻫﻮَ ﻳﻮﺻﻠﻨﻲ
ﻋﻠﻲ .. ﺍﻋﺬﺭﻳﻨﻲ ﻣﺎﺍﮔﺪﺭ
- ﺩﻛﺘﻮﺭ ﻣﺎﻫﺮ ﻳﺼﻴﺮ ﻋﻢ ﻭﻟﻴﺪ ﻳﻌﻨﻲ ﺍﻗﺎﺭﺑﻨﻪ
ﻋﻠﻲ .. ﻭﺷﻨﻮ ﺍﻟﺪﻟﻴﻞ ؟؟
ﻋﺼﺮ ﻋﻴﻮﻧﻪ ﺑﻨﻔﺎﺫ ﺻﺒﺮ ﻭﻣﺪ ﺇﻳﺪﻩ ﻃﻠﻊ ﻣﺤﻔﻈﺘﻪ ﻭﻇﻞ ﻳﺪﻭﺭ .. ﻃﻠﻌﻠﻪ ﺍﻟﺠﻨﺴﻴﻪ ﻣﺎﻟﺘﻪ ﻭﺍﻧﻄﺎﻫﻴﺎﻩ .
ﻛﺎﻟﻠﻪ ﺑﺈﺳﺘﻬﺰﺍﺀ -:
- ﻫﺎﻱ ﻫﻴﻪ ﻟﻮ ﺑﻌﺪ؟؟
ﺗﺴﺎﻟﻢ ﻭﻳﺎﻩ
ﻋﻠﻲ .. ﻫﺎﻱ ﻫﻴﻪ ﺩﻛﺘﻮﺭ ﺍﻋﺘﺬﺭ ﻣﻨﻚ ﻣﺎﺟﻨﺖ ﺍﻋﺮﻓﻚ ﻻﻥ ﺍﻟﺒﻨﻴﻪ ﻋﻨﺪﻱ ﺍﻣﺎﻧﻪ
ﺣﭽﻪ ﻭﻳﺎﻩ ﻭﺃﺷﺮﻟﻲ ﺍﺭﻭﺡ ﻟﻠﺴﻴﺎﺭﻩ .. ﺭﺣﺖ ﻟﻠﺴﻴﺎﺭﻩ ﻏﺼﺒﺎً ﻋﻨﻲ .
ﺩﺧﻠﺖ ﻛﻌﺪﺕ ﻭﺭﻩ ﻭﻫﻮَ ﺍﺟﻪ ﻛﻌﺪ ﻣﺸﻪ ﺷﻮﻳﻪ ﺑﺎﻟﺴﻴﺎﺭﻩ ﻭﻭﻛﻒ ﺍﻟﺘﻔﺖ ﻋﻠﻴﻪ ﻋﺼﺒﻲ .
- ﺣﺮﺟﻌﺞ ﻟﻜﻠﻴﺘﺞ !!
ﻓﺘﺤﺖ ﻋﻴﻮﻧﻲ ﻭﺍﻧﺘﻔﻀﺖ
- ﺷﻨﻮﻭﻭﻭﻭﻭﻭ؟؟؟
ﺑﺎﻭﻉ ﺑﻌﻴﻨﻲ ﻭﺍﻟﺘﻔﺖ ﻳﺒﺎﻭﻉ ﻣﻦ ﺍﻟﺠﺎﻣﻪ ﻣﺎﻝ ﺍﻟﺴﻴﺎﺭﻩ
ﺳﻜﺖ ﻭﺗﻨﻬﺪ
- ﺍﻧﻲ ﻣﺎﺍﺭﻳﺪ ﺍﺭﺟﻊ ﻟﻠﻜﻠﻴﻪ ﺧﻠﻴﻨﻲ ﺑﻌﻴﺪﻩ ﻋﻦ ﺍﻟﻤﺸﺎﻛﻞ
ﺑﺎﻭﻉ ﻋﻠﻴﻪ ﺑﻨﻈﺮﺍﺕ ﻣﺴﺘﻬﺰﺃﻩ ﻭﻣﻘﻮﺱ ﺣﻮﺍﺟﺒﻪ .
- ﺗﺒﻘﻴﻦ ﻭﻱ ﻣﻬﺪﻱ؟؟
- ﻳﺎﻣﻬﺪﻱ ﻫﺬﺍ ﺍﻧﻲ ﺷﻌﻠﻴﻪ؟
- ﻣﺎﺍﺍﺷﺸﻔﺘﻴﻲ ﻧﻈﺮﺍﺍﺍﺕ ﻋﻴﻮﻭﻭﻧﻪ ﺷﻠﻮﻥ ﻳﺒﺎﺍﻭﻋﻠﺠﺠﺞ؟؟؟
- ﺳﺒﺤﺎﻥ ﺍﻟﻤﺎﻳﺒﺎﻭﻉ
ﺑﻠﺶ ﻳﻌﺼﺐ ﺷﻮﻳﻪ ﺷﻮﻳﻪ ﻭﺻﻮﺗﻪ ﻳﻌﻠّـﻪ
- ﺍﻟﻴﺒﺎﻭﻉ ﻏﻴﺮ ﻭﺍﻟﻴﻨﻈﺮ ﻧﻈﺮﺍﺕ ﻏﻴﺮﺭﺭﺭ ﺫﻧﻲ ﺍﻟﻨﻈﺮﺍﺍﺕ ﺍﻋﺮﻓﻬﻦ ﺍﻧﻲ ﺍﻋﺮﻓﻬﻬﻬﻬﻦ ﻛﻠﺸﺸﺶ ﺯﻳﻴﻴﻦ
ﺳﻜﺘﺖ . ﺻﻔﻨﺖ ﺷﻮﻳﻪ ﻭﻫﻮَ ﻳﺒﺎﻭﻋﻠﻲ
- ﺑﺲ ﺍﻧﻲ ﻣﺎﺭﻳﺪ ﺍﻋﻮﻑ ﻛﻠﻴﺘﻲ ﻫﻨﺎ ﻣﺮﺗﺎﺣﻪ .
- ﻟﻴﺶ ﺟﻨﺘﻲ ﻣﻤﺮﺗﺎﺣﻪ؟؟
- ﻻ ﺑﺲ ﻣﺎﺍﺭﻳﺪ ﺍﺭﺟﻊ
- ﻻ ... ﺗﺮﺟﻌﻴﻴﻦ
ﺑﺎﻭﻋﺖ ﺑﻴﻪ ﻭﺻﻔﻨﺖ .. ﻓﻜﺮﺕ ﺑﻌﻘﻠﻲ ﺧﻠﻴﻨﻲ ﺍﺭﺟﻊ ﻉ ﺍﻷﻗﻞ ﺍﺭﺍﻗﺐ ﺗﺤﺮﻛﺎﺗﻪ ﻭﺍﺷﻮﻓﻪ ﺧﺎﻃﺐ ﻟﻮ ﻻ .
- ﺍﺫﺍ ﺍﺭﺟﻊ ﺗﺮﺳﺒﻨﻲ؟؟
ﺭﺩ ﺑﻨﻔﺎﺫ ﺻﺒﺮ
- ﻣﺎﺍﺭﺳﺒﺞ
- ﻭﻣﺎﺇﻟﻚ ﺩﺧﻞ ﺑﻴﻪ؟؟
- ﻭﻣﺎﺇﻟﻲ ﺩﺧﻞ ﺑﻴﺞ ﻭﺍﻧﺖِ ﻫﻢ ﻣﻌﻠﻴﺞ ﺑﻴﻪ
- ﺧﻮﺵ ..
- ﻫﺎ ﻭﻣﺎﺗﺮﺯﻟﻨﻲ
ﺻﻔﻦ ﺑﻌﻴﻮﻧﻲ ﻭﺿﺤﻚ ﻋﺾ ﺷﻔﺘﻪ ﻣﺘﺤﺴﻒ
- ﻫﻬﻪ ﻻ ﻫﺎﻱ ﻣﺎﺍﮔﺪﺭﻟﻬﻪ
- ﻳﻴﻴﺤﺤﺢ ﻟﻴﺸﺸﺶ؟
- ﻫﻬﻪ ﻣﺎﺍﮔﺪﺭ ﺍﻧﻄﻴﺞ ﻛﻠﻤﻪ ﺑﺲ ﺣﺴﺐ ﺍﻟﻤﻮﻗﻒ
- ﻳﻌﻨﻲ ﺗﺮﻳﺪ ﺗﺸﺒﻊ ﺑﻴﻪ ﺭﺯﺍﻳﻞ
- ﻻ ﻻ .. ﺑﺲ ﺍﺫﺍ ﺍﻧﺖِ ﺗﻮﺭﻣﻴﻦ ﮔﻠﺒﻲ ﻣﺎﺍﺗﺤﻤﻞ
- ﻻ ﻣﺎﺍﺳﻮﻱ ﺷﻲ ﺍﮔﻌﺪ ﻋﺎﻗﻠﻪ
- ﺗﻤﺎﻡ ﻣﺘﻔﻘﻴﻦ
- ﺍﻱ ﺑﺲ ﺷﻠﻮﻥ ﻳﺼﻴﺮ ﺗﻨﻘﻠﻨﻲ
- ﻣﻌﻠﻴﺞ ﺍﻧﻲ ﺍﺗﺼﺮﻑ
- ﺧﻮﺵ
ﻭﺻﻠﻨﻲ ﻟﻠﺒﻴﺖ ﻭﻋﻴﻮﻧﻪ ﺑﺎﻟﻤﺮﺍﻳﻪ ﻋﻠﻴﻪ ﻣﺒﺘﺴﻢ .. ﺍﻧﻲ ﻣﺎﺍﺑﺎﻭﻉ ﺑﺲ ﺍﺣﺲ ﺑﻴﻪ ﺑﻄﺮﻑ ﻋﻴﻨﻲ ﺍﺷﻮﻓﻪ .
ﻭﺻﻠﻨﻲ ﻟﻠﺒﻴﺖ ﻭﻧﺰﻝ ﺩﮒ ﺍﻟﺒﺎﺏ ﺳﻠﻢ ﻋﻠﻰ ﺇﺳﻤﺎﻋﻴﻞ ﻭﮔﺎﻟﻠﻪ ﺍﻧﻲ ﻭﺻﻠﺘﻬﻪ ﻭﺣﺎﭼﺎﻩ ﻋﻠﻤﻮﺩ ﺍﻟﻨﻘﻞ ﻣﺪﺭﻱ ﺷﻄﻠﻊ ﺣﺠﻪ ﻋﻠﻤﻮﺩ ﻳﺮﺟﻌﻨﻲ ﻭﻗﻨﻊ ﺍﺳﻤﺎﻋﻴﻞ ﻭﺍﺗﻔﻘﻮﺍ ﻳﺮﺟﻌﻮﻧﻲ ﻟﻠﻜﻠﻴﻪ ﻣﺎﻟﺘﻲ .
ﺭﺣﺖ ﺭﺃﺳﺎً ﺭﺍﺳﻠﺖ ﻧﻬﻰ .
- ﻧﻬﻰ ﻋﻠﻴﺞ ﺍﺑﻮ ﻓﺎﺿﻞ ﻣﺎﻫﺮ ﺧﺎﻃﺐ؟؟
ﻧﻬﻰ .. ﻳﺎﺍﺍ ﻳﺎﺍﺍ ﺷﺒﻴﺞ ﺧﻴﻪ ﺷﻮﻛﺖ ﻟﺤﮓ ﻳﺨﻄﺐ؟
- ﭼﺎ ﻣﻨﻴﻪ ﻫﺎﻱ ﺍﻟﺪﻛﺘﻮﺭﻩ ﺍﻟﮕﺎﻋﺪﻩ ﻳﻤﻪ ﺑﺎﻟﺼﺪﺭ
ﻧﻬﻰ .. ﺷﺪﺭﺍﻧﻲ ﻣﺮﺍﻗﺒﺘﻪ ﻗﺎﺑﻞ
- ﺍﺫﺍ ﺿﺎﻣﻪ ﻋﻠﻴﻪ ﺷﻲ ﻣﻦ ﻫﺴﻪ ﺍﺣﺠﻲ ﻋﻠﻴﺞ ﺍﻟﻠﻪ
ﻧﻬﻰ .. ﻻ ﻭﺍﻟﻠﻪ ﻭﺩﺍﻋﺔ ﺣﺴﻮﻥ ﻣﺎﺿﺎﻣﻪ ﻋﻠﻴﺞ ﺷﻲ ﻭﻭﻻ ﺍﺩﺭﻱ ﻣﻨﻴﻪ ﻫﺎﻱ ﺍﺻﻼً
- ﻫﺎ ﻳﻼ ﺧﻮﺵ
ﻇﻠﻴﺖ ﺍﻓﻜﺮ ﻟﻴﺶ ﻣﺼﻌﺪﻫﻪ؟؟ ﻭﺍﻟﻨﻮﺏ ﻣﺎﺍﮔﺪﺭ ﺍﺳﺌﻠﻪ ﻫﺴﻪ ﺷﻴﮕﻮﻝ ﻋﻨﻲ؟
ﺍﺳﺘﻐﻔﺮ ﺍﻟﻠﻪ ﻭﺍﻟﻠﻪ ﺍﻟﻘﻠﻖ ﻭﺍﻟﺘﻔﻜﻴﺮ ﺍﻛﻠﻨﻲ ﺍﻛﻞ .
ﺑﺎﻟﻠﻴﻞ ﺩﺯﻟﻲ ﺭﺳﺎﻟﻪ .
- ﺑﺎﺟﺮ ﻟﺘﺪﺍﻭﻣﻴﻦ ﻣﻦ ﺍﻧﻲ ﺍﻛﻠﺞ ﺩﺍﻭﻣﻲ ﺗﺠﻴﻦ ﺗﺪﺍﻭﻣﻴﻦ ﺑﻜﻠﻴﺘﺞ
ﻣﺎﺭﺩﻳﺖ .
- ﻫﺎ ﺭﺟﻌﻨﻪ ﺷﻨﻮ؟؟
ﺩﺯﻳﺘﻠﻪ -:
- ﺷﻨﻮﻭ؟؟
- ﻻ ﺳﻼﻣﺘﺞ ﻣﺎﻛﻮ ﺷﻲ .. ﺑﺲ ﻣﻦ ﺍﺩﺯﻟﺞ ﺭﺳﺎﻟﻪ ﺟﺎﻭﺑﻲ . ﻭﺍﻧﻲ ﺍﻧﻄﻴﺞ ﺧﺒﺮ ﻋﻠﻤﻮﺩ ﺗﺪﺍﻭﻣﻴﻦ ﺑﻜﻠﻴﺘﺞ ﻣﻮ ﺗﺪﺍﻭﻣﻴﻦ ﻣﻦ ﻛﻴﻔﺞ
- ﻳﺎﻛﻠﻴﻪ ﻣﻨﻬﻦ ﻛﻠﻴﺘﻴﻦ ﺻﺎﺭﻥ
- ﻛﻠﻴﺘﺞ ﺍﻷﺻﻞ
- ﻫﺎ ﻳﻌﻨﻲ ﺫﻳﺞ ﺗﻘﻠﻴﺪ؟
- ﺍﻱ ﻃﺒﻌﺎً ﺗﻘﻠﻴﺪ
ﺳﻜﺘﺖ ﺑﻌﺪ ﻣﺎﺩﺯﻳﺖ ﺷﻲ ﻭﻻ ﻫﻮَ ﺍﻟﺪﺯ .. ﻋﺮﻓﺘﻪ ﻳﺘﺨﺒﻞ ﻣﻦ ﻣﺎﺍﺟﺎﻭﺑﻪ ﻟﻬﺬﺍ ﺍﻟﺴﺒﺐ ﺭﮔﻌﻨﻲ ﺑﺤﻈﺮ ﺳُﺪﺍﺳﻲ .
ﺑﻘﻴﺖ ﻣﺎﺩﺍﻭﻣﺖ ﻭﻫﻮَ ﻛﻠﺴﺎﻉ ﻳﺠﻴﻨﻪ ﻭﻳﺎﺧﺬ ﺇﺳﻤﺎﻋﻴﻞ ﻭﻳﺮﻭﺣﻮﻥ .. ﻋﻤﻲ ﻭﺍﻟﻠﻪ ﻛﻠﻪ ﺑﺎﻟﻮﺍﺳﻄﺎﺕ ﻳﻤﺸﻲ ﺣﺘﻰ ﻟﻮ ﻣﺎﻳﺼﻴﺮ ﺍﻧﻘﻞ ﻳﺴﻮﻳﻬﻪ ﻏﺼﺒﺎً ﻉ ﺍﻟﻜﻞ .
ﻣﺮ ﻳﻮﻣﻴﻦ ﻭﻫﻮَ ﺩﺯﻟﻲ ﺑﺎﻟﻠﻴﻞ .
- ﺱ . ﻉ . ﺛُﺮﻯٰ ﺑﺎﺟﺮ ﺩﺍﻭﻣﻲ ﺑﻜﻠﻴﺘﺞ ﻛﻤﻠﺖ ﺍﻟﻨﻘﻞ
- ﻭﻋﻠﻴﻜﻢ ﺍﻟﺴﻼﻡ .. ﺷﻜﺮﺍً
- ﺗﺪﻟﻠﻴﻦ
ﻇﻞ ﺍﻟﺴﺆﺍﻝ ﻳﺎﻛﻞ ﺑﮕﻠﺒﻲ ﺍﺭﻳﺪ ﺍﺳﺄﻟﻪ ﺑﺲ ﺧﺎﻑ ﻳﮕﻮﻝ ﺫﺑﺖ ﻣﻴﺎﻧﻪ .
ﺗﺠﺮﺃﺕ ﻭﺳﺄﻟﺘﻪ
- ﺯﻳﻦ ﺍﻧﺖَ ﻟﻴﺶ ﺍﺟﻴﺖ ﻟﻜﻠﻴﺘﻲ؟
- ﺷﻮﻛﺖ؟
- ﻣﻦ ﮔﻌﺪﺗﻮﺍ ﺍﻧﺖَ ﻭﺇﺳﺘﺎﺫ ﻣﻬﺪﻱ ﺑﺎﻟﻜﺎﻓﺘﻴﺮﻳﺎ
- ﺍﻫﺎﺍ .. ﻋﻨﺪﻱ ﺗﻘﺪﻳﻢ ﻟﺒﻨﻴﻪ ﺍﻗﺎﺭﺑﻨﻪ ﻭﻗﺪﻣﺘﻠﻬﻪ
- ﺟﺎ ﺷﺒﻴﻬﻪ ﻛﻠﻴﺘﻨﻪ ﻣﺎﻗﺪﻣﺘﻠﻬﻪ ﻋﻠﻴﻬﻪ
- ﻻ ﻻ ﺍﻧﺖِ ﻣﺘﻌﺮﻓﻴﻨﻲ ﺍﻧﻲ ﺩﺍﺋﻤﺎً ﻣﺎﺍﺧﻠﻲ ﺍﻷﻗﺎﺭﺏ ﻭﻳﺎﻱ ﺑﻨﻔﺲ ﺍﻟﻜﻠﻴﻪ ﻻﻥ ﺗﺼﻴﺮ ﻗﺎﻝ ﻭﻗﻴﻞ ﻭﺍﻗﺎﺭﺑﻬﻪ ﻭﻧﺠﺤﻬﻪ ﻭﺟﺎﺑﻬﻪ ﻭﺍﺧﺬﻫﻪ .. ﻑ ﺩﺍﺋﻤﺎً ﺍﻗﺎﺭﺑﻲ ﺍﺧﻠﻴﻬﻢ ﺑﻌﻴﺪﻳﻦ ﻋﻨﻲ
- ﻫﺎ ﭼﺎ ﺧﻮﺵ ﻫﻤﺰﻳﻦ ﮔﺘﻠﻲ ﺣﺘﻰ ﺍﺑﻘﻰ ﺑﻌﻴﺪﻩ
- ﻻ ﻻ ﻣﻌﻠﻴﺞ ﺍﻧﺖِ .. ﺍﺗﺼﺮﻓﻲ ﺑﺮﺍﺣﺘﺞ ﻣﻌﻠﻴﺞ ﺑﺄﻱ ﺃﺣﺪ ﻣﺎﺩﺍﻡ ﺍﻧﻲ ﺟﺒﺘﺞ ﻟﻠﻜﻠﻴﻪ ﻑ ﺍﻣﺸﻲ ﻭﺍﻧﺖِ ﻣﺴﻨﻮﺩﻩ
- ﻫﻬﻬﻬﻪ ﻣﺎﺷﻲ
ﺷﻜﺪ ﺣﺒﻴﺖ ﻛﻠﻤﺘﻪ ﻃﺮﺕ ﺑﻴﻬﻪ ﻳﻌﻨﻲ ﻫﻮَ ﺳﺎﻧﺪﻧﻲ .
ﻇَﻬﺮﻙِ ﺃﻧـﺎ . .
ﻓـﻜﻴـﻒَ ﺗﺨﺎﻓﻴﻦَ ﺍﻟﻌﻨـﺎﺀ؟
ﻳﻤﻴﻨﻚِ ﺃﻧــﺎ ﺍﻟﺘـﻲ ..
ﺳـﺘﻠﻤﺴـﻴﻦَ ﺑﻬﺎ ﺍﻟﺴـﻤﺎﺀ .
ﻛﻌﺪﺕ ﺍﻟﺼﺒﺢ ﺑﻜﺎﻣﻞ ﺣﻤﺎﺳﻲ ﻭﻧﺸﺎﻃﻲ .. ﺑﺪﻟﺖ ﻭﺍﻧﺘﻈﺮﺕ ﺍﺳﻤﺎﻋﻴﻞ .. ﺍﻟﻠﻪ ﺷﻜﺪ ﺍﺷﺘﺎﻗﻴﺖ ﻟﻬﺎﻱ ﺍﻷﻳﺎﻡ .. ﻳﻮﻣﻴﻪ ﺳﺎﻳﻖ ﺗﻄﻠﻊ ﺭﻭﺣﻲ ﺗﻌﺎﻱ ﺍﻧﺘﻈﺮﻱ ﻭﺗﻘﻴﺪﻱ .. ﺑﻴﻨﻤﺎ ﺍﺳﻤﺎﻋﻴﻞ ﻛﻠﺶ ﻣﺎﺧﺬﻩ ﺭﺍﺣﺘﻲ ﺍﻟﮕﺎﻩ ﻗﺒﻞ ﺍﻟﻜﻠﻴﻪ ﻛﻠﻬﻪ ﻣﻨﺘﻈﺮﻧﻲ ﻋﻠﻤﻮﺩ ﻧﻄﻠﻊ ﻭﻳﮕﻌﺪ ﻣﻦ ﺍﻟﺼﺒﺢ ﻋﻠﻤﻮﺩ ﻳﺎﺧﺬﻧﻲ .
ﺭﺣﻨﻪ ﻟﻠﻜﻠﻴﻪ ﻭﺻﻠﻨﻲ ﺍﺳﻤﺎﻋﻴﻞ ﻭﺭﺍﺡ .. ﺩﺧﻠﺖ ﻓﺮﺣﺎﻧﻪ ﻻﮔﺘﻨﻲ ﻓﺎﻃﻤﻪ ﺣﻀﻨﺘﻨﻲ ﻭﺻﺪﻳﻘﺎﺗﻲ ﻛﻠﻬﻦ ﺍﻟﺘﻤﻦ ﻋﻠﻴﻪ ﻳﺒﻮﺳﻦ ﺑﻴﻪ .. ﺍﻧﻲ ﻫﻢ ﻓﺮﺣﺎﺍﻧﻪ ﺭﺟﻌﺖ ﻭﻱ ﺍﺑﻮ ﺍﻟﺮﺯﺍﻳﻞ ﺣﺘﻰ ﻳﺼﻴﺮ ﮔﺪﺍﻡ ﻋﻴﻨﻲ ﻣﺎﻳﺮﻭﺡ ﻣﻨﺎ ﻟﻮ ﻣﻨﺎ .
ﺩﺧﻠﻨﺎ ﻟﻠﻤﺤﺎﺿﺮﺍﺕ ﻭﻓﺮﺣﺎﻧﻪ ﺣﻴﻞ ﺑﺮﺟﻌﺘﻲ .
ﻭﺻﻠﺖ ﻣﺤﺎﺿﺮﺗﻪ ﻭﺩﺧﻞ ﻫﻮَ .. ﺗﻔﺎﺟﺌﺖ ﺍﻟﻄﻼﺏ ﻛﻠﻬﻪ ﻭﻋﺎﻃﻮ . ﻭﺍﺣﺪ ﮔﺎﻟﻠﻪ -:
- ﻫﺎ ﺩﻛﺘﻮﺭ ﺷﻮ ﺭﺟﻌﺘﻠﻨﻪ
ﺿﺤﻚ ﻭﮔﺎﻟﻠﻪ -:
- ﻻ ﺑﻌﺪ ﻣﺎﺍﻋﻮﻓﻜﻢ
ﺍﻟﻄﻼﺏ ﻛﻠﻬﻪ ﻋﺒﺴﺖ ﻭﺟﻮﻫﻪ ﻭﻫﻮَ ﻳﻀﺤﻚ .. ﻇﻠﻴﺖ ﻣﺴﺘﻐﺮﺑﻪ ﺷﺒﻴﻬﻢ .
ﺳﺄﻟﺖ ﻓﺎﻃﻤﻪ -:
- ﺍﻛﻠﺞ ﺷﻜﻮ ﻟﻴﺶ ﻫﻴﺞ ﺗﻔﺎﺟﺌﻮ ﻣﻦ ﺷﺎﻓﻮﻩ؟
ﻓﺎﻃﻤﻪ .. ﻣﻮ ﺩﻛﺘﻮﺭ ﻣﺎﻫﺮ ﻏﻴﺮﻭ ﻣﻦ ﻋﺪﻧﻪ ﺟﺎﻥ ﻳﺎﺧﺬﻧﻪ ﺩﻛﺘﻮﺭ ﻋﺒﺪ ﻻﻥ ﺩﻛﺘﻮﺭ ﻣﺎﻫﺮ ﺍﺧﺬ ﺍﺟﺎﺯﻩ ﺷﻬﺮ ﻛﺎﻣﻞ ﻭﻗﺎﺑﻞ ﻳﺨﻠﻮﻧﻪ ﺑﺪﻭﻥ ﺩﻛﺘﻮﺭ ﻑ ﻏﻴﺮﻭﺍ ﻭﺑﻘﻴﻨﻪ ﻋﻠﻰ ﺩﻛﺘﻮﺭ ﻋﺒﺪ ﺑﺲ ﻫﺴﻪ ﺭﺟﻊ ﻳﻌﻨﻲ ﺭﺍﺡ ﻧﺮﺳﺐ
- ﻫﻬﻬﻬﻪ
ﻇﻠﻴﺖ ﺻﺎﻓﻨﻪ ﻭﺍﺿﺤﻚ ﻋﻠﻤﻮﺩﻱ ﻭﺍﻟﻠﻪ ﻋﻠﻤﻮﺩﻱ .
ﻛﻠﻤﺎ ﻳﺒﺎﻭﻋﻠﻲ ﻳﻀﺤﻚ ﻭﻭﺟﻬﻪ ﻣﺮﺗﺎﺡ ﻭﺍﻧﻲ ﺍﺯﻳﺪ ﻣﺮﺗﺎﺣﻪ .
ﺍﺑﺎﻭﻋﻠﻪ ﻧﻈﺮﻩ ﺧﺎﻃﻔﻪ ﻭﺍﺭﺟﻊ ﺍﺩﻧﮓ . ﻣﺴﺘﺤﻴﻪ ﻋﺸﺘﻮ .
ﻇﻞ ﻳﺸﺮﺡ ﻭﻛﻠﺴﺎﻉ ﻳﺒﺎﻭﻉ ﻋﻠﻰ ﻣﻜﺎﻧﻲ ﻣﻦ ﻳﺸﻮﻓﻨﻲ ﻳﺒﺘﺴﻢ ﺑﺮﺍﺣﻪ ﻭﻳﺮﺟﻊ ﻳﻜﻤﻞ ﺷﺮﺡ .
ﻋﺼﺐ ﻻﻥ ﻣﻦ ﻳﺸﺮﺡ ﻭﻳﺬﻛﺮ ﺍﻟﻄﻼﺏ ﺑﺎﻟﺸﺮﺡ ﻭﻻ ﻳﺘﺬﻛﺮﻭﻥ ﺗﺨﺒﻞ ﺍﻻ ﺷﻮﻳﻪ . ﺃﺛﺎﺭﻱ ﻃﻠﻌﻮﺍ ﮔﺎﺿﻴﻨﻬﻪ ﻟﻌﺐ ﺑﻠﻌﺐ
ﻣﺎﻫﺮ .. ﺍﻛﻮﻝ ﻣﻜﻴﻔﻴﻦ ﻭﻣﻦ ﺩﺧﻠﺖ ﻭﺟﻮﻫﻜﻢ ﺗﻌﻔﺴﺖ ﺍﻧﺘﻢ ﻣﺎﺗﺤﺒﻮﻥ ﺍﻟﺪﺭﺍﺳﻪ ﺗﺤﺒﻮﻥ ﺗﻠﻌﺒﻮﻥ ﻭﺗﺠﻴﻜﻢ ﺩﺭﺟﺎﺕ ﻧﺠﺎﺡ ﻉ ﺍﻟﺤﺎﺿﺮ
ﻋﺼﺐ ﻭﻇﻞ ﻳﺮﺯﻝ ﺑﻴﻬﻢ
ﻓﺎﻃﻤﻪ .. ﻳﻤﻤﻪ ﺑﺪﺕ ﺍﻟﺮﺯﺍﻳﻞ ﻣﻦ ﻫﺴﻪ
- ﺍﺳﻜﺘﻲ ﻻﻳﻠﻮﺣﺞ ﻃﺸﺎﺭ
ﻓﺎﻃﻤﻪ .. ﻭﺍﻟﻠﻪ ﺟﻨﺖ ﻛﻠﺸﻲ ﻣﺎﻓﺎﻫﻤﻪ ﻭﺍﻗﺮﻩ ﺑﺲ ﺑﻴﻮﻡ ﺍﻻﻣﺘﺤﺎﻥ ﻻﻥ ﺍﻻﺳﺌﻠﻪ ﻣﺎﻱ ﻛﻠﻬﻪ ﻧﺎﺟﺤﻪ ﺑﺲ ﻫﺴﻪ ﺍﺫﺍ ﻃﻠﻌﺖ ﻣﻨﺰﻫﺎﻱ ﺍﻟﻤﺮﺣﻠﻪ ﻋﺎﺗﺒﻴﻨﻲ
- ﻫﻬﻬﻬﻬﻪ ﺍﺣﺴﻠﻠﺞ
ﻇﻞ ﻳﺸﺮﺡ ﺍﻟﻤﺤﺎﺿﺮﺍﺕ ﺍﻟﺴﺎﺑﻘﻪ ﻭﺟﺎﺏ ﻣﻼﺯﻡ ﻭﺯﻉ ﻋﻠﻰ ﺍﻟﻄﻼﺏ ﻛﻠﻬﻪ ﺑﺲ ﺍﻧﻲ ﻣﺎﺍﻧﻄﺎﻧﻲ !
ﻳﺎﺍ ! ﺷﺒﻴﻪ ﺍﺑﺰﺯ . ﻟﻴﺶ ﻣﺎﺍﻧﻄﺎﻧﻲ؟
ﺑﺎﻭﻋﺘﻠﻪ ﻋﻮﺩ ﻣﺎﺍﻧﻄﻴﺘﻨﻲ .. ﻣﺎﺑﺎﻭﻋﻠﻲ .. ﺑﺪﺕ ﺭﺣﻤﺔ ﺍﻟﻠﻪ .
ﻏﻨﺪﺑﺖ ﻭﺟﻬﻲ ﻟﻤﺎ ﻛﻤﻞ ﺍﻟﻤﺤﺎﺿﺮﻩ ﻭﻣﻦ ﺭﺍﺩ ﻳﻄﻠﻊ ﺃﺷﺮﻟﻲ ﺑﺈﻳﺪﻩ ﻋﻮﺩ ﺗﻌﺎﻟﻲ .
ﺭﺣﺖ ﻭﺭﺍﻩ ﮔﺎﻝ -:
- ﻣﻦ ﺗﺮﻳﺪﻳﻦ ﺗﻄﻠﻌﻴﻦ ﻣﺮﻱ ﻋﻠﻴﻪ ﻋﻨﺪﻱ ﻣﻼﺯﻡ ﺑﺠﻨﻄﺔ ﺍﻟﺴﻴﺎﺭﻩ ﺫﻛﺮﻳﻨﻲ ﺍﻧﻄﻴﺠﻴﺎﻫﻦ
- ﻫﺎ ﺧﻮﺵ
ﺍﺑﺘﺴﻢ ﺑﻮﺟﻬﻲ ﻭﺭﺍﺡ . ﻳﺎﺍ ﻭﺍﻧﻲ ﺍﺧﺬﺕ ﻏﻴﺒﺘﻚ ﺑﮕﻠﺒﻲ .. ﻳﻼ ﻣﻴﺨﺎﻟﻒ ﺗﺴﺘﺎﻫﻞ .
ﻗﺒﻞ ﻻﻧﻄﻠﻊ ﺭﺣﺖ ﻟﻼﺇﺩﺍﺭﻩ ﻋﻠﻤﻮﺩ ﺁﺧﺬ ﻣﻦ ﻋﻨﺪﻩ ﺍﻟﻤﻼﺯﻡ .. ﺩﺧﻠﺖ ﻟﻼﺇﺩﺍﺭﻩ ﻟﮕﻴﺘﻪ ﮔﺎﻋﺪ ﺑﻐﺮﻓﺔ ﺍﺳﻤﺎﺀ .
ﻣﻨﻬﻤﻚ ﺑﺎﻟﺸﻐﻞ ﻭﺍﻻﻭﺭﺍﻕ ﻣﻘﺎﺑﻴﻠﻪ ﻭﻳﺪﻗﻖ ﻭﻳﻨﻘﻞ .. ﻭﻻﺑﺲ ﺍﻟﻨﻈﺎﺭﻩ ﻳﺒﻮﻭ .
ﻣﻦ ﺩﺧﻠﺖ ﺭﻓﻊ ﺭﺍﺳﻪ ﻋﻠﻴﻪ ﺍﺑﺘﺴﻢ ﻭﺍﻧﺘﭽﻪ ﻟﻮﺭﻩ ﺍﻟﻜﺮﺳﻲ .. ﺭﻓﻊ ﺇﻳﺪﻳﻪ ﻳﺘﻤﻐﻂ ﻭﻋﮕﺪ ﺣﻮﺍﺟﺒﻪ ﺻﺎﺡ
- ﺍﺧﺨﺦ
ﻓﺘﺤﺖ ﻋﻴﻮﻧﻲ
- ﻫﺎ ﻫﺎ ﺷﻨﻮ
- ﻇﻬﺮﻱ ﻭﺍﮔﻒ ﻣﺪﺍﮔﺪﺭ ﺍﺗﺤﺮﻙ
ﻇﻞ ﻳﺘﺤﺮﻙ ﺑﺒﻄﺊ ﻳﻤﻨﻰ ﻭﻳﺴﺮﻯ ﻭﺍﻧﻲ ﺻﺎﻓﻨﻪ ﻋﻠﻴﻪ ﻭﻗﻠﻘﺎﻧﻪ .. ﺷﻨﻮ ﺷﺒﻴﻪ ﺧﺎﻑ ﻃﺎﮔﻪ ﻋﺼﺒﻪ ﺑﻈﻬﺮﻩ . ﺭﺩﺕ ﺍﮔﻠﻪ ﺍﻧﻲ ﺧﻮﺵ ﺍﺳﻮﻱ ﺍﻻﻋﺼﺎﺏ ﺑﺲ ﺧﺎﻑ ﺯﺣﻤﻪ .
ﺑﺎﻭﻋﻠﻲ ﺭﻓﻊ ﺍﻟﻨﻈﺎﺭﻩ ﻭﺿﺤﻚ
- ﺷﺒﻴﺞ ﻳﺎﺑﻪ ﻣﺎﺗﻜﻌﺪﻳﻦ
- ﻫﺎ .. ﻣﻮ ﻣﻨﺘﻈﺮﺗﻚ ﺗﻨﻄﻴﻨﻲ ﺍﻟﻤﻼﺯﻡ
- ﺍﻱ ﻫﺴﻪ ﺑﺲ ﺍﻛﻤﻞ ﺫﻧﻲ ﺍﻻﻭﺭﺍﻕ ﻭﺍﻃﻠﻊ ﻟﻠﺴﻴﺎﺭﻩ ﺍﺟﻴﺒﻬﻦ
- ﻫﺎ ﻳﻌﻨﻲ ﺷﻜﺪ ﺗﻄﻮﻝ؟
- ﺑﺲ ﺩﻗﺎﻳﻖ ﻣﺒﻘﻪ ﺷﻲ
ﻇﻞ ﻳﻜﺘﺐ ﻉ ﺍﻟﺴﺮﻳﻊ ﻭﻛﻠﺴﺎﻉ ﻳﺮﻓﻊ ﻋﻴﻨﻪ ﻋﻠﻴﻪ ﻳﺒﺎﻭﻋﻠﻲ ﻭﻳﺮﺟﻊ ﻳﻜﺘﺐ .. ﺍﺧﺮ ﺷﻲ ﺫﺏ ﺍﻟﻘﻠﻢ ﻭﻫﺰ ﺍﻳﺪﻩ ﻳﻀﺤﻚ
- ﺍﺫﺍ ﺑﻘﻴﺘﻲ ﻫﻨﺎ ﻣﺎﺍﮔﺪﺭ ﺍﺷﺘﻐﻞ ﺷﻲ ﺧﻞ ﺍﮔﻮﻡ ﺍﺟﻴﺒﻬﻦ ﺍﺣﺴﻠﻠﻲ .
ﻣﻦ ﻃﻠﻊ ﻭﺻﻞ ﻟﻠﺒﺎﺏ ﻭﻛﺎﻟﻠﻲ
- ﻣﻮ ﺗﺮﻭﺣﻴﻦ ﺍﻧﺘﻈﺮﻳﻨﻲ
- ﺍﻱ
ﺩﻧﮕﺖ ﻭﺣﺴﻴﺖ ﻭﺟﻬﻲ ﺩﺧﻦ ﻣﻦ ﺍﻟﻤﺴﺘﺤﻪ .
ﻃﻠﻊ ﻭﺍﻧﻲ ﺑﻘﻴﺖ ﮔﺎﻋﺪﻩ ﺑﺎﻷﺩﺍﺭﻩ ﺩﺧﻠﺖ ﺍﺳﻤﺎﺀ ﺷﺎﻓﺘﻨﻲ ﺿﺤﻜﺖ ﻭﺳﻠﻤﺖ ﻋﻠﻴﻪ
- ﺷﻤﻮ ﻫﺎﻟﻐﻴﺒﻪ ﺛُﺮﻯٰ ﺍﺷﺘﻘﻨﺎﻟﺞ
- ﺗﺴﻠﻤﻴﻦ ﺳﺖ ﺍﻧﻲ ﺍﻻﺷﻮﻕ
- ﻫﻤﺰﻳﻦ ﺍﺟﻴﺘﻲ ﺑﻮﻗﺘﺞ .. ﻋﻨﺪﻱ ﺭﺳﻮﻣﺎﺕ ﻭﻣﺤﺘﺎﺟﻪ ﺍﺣﺪ ﻳﺴﺎﻋﺪﻧﻲ ﻭﺍﻧﺖِ ﻣﺎﺷﺎﺀ ﺍﻟﻠﻪ ﺭﺳﻤﺞ ﻛﻠﺶ ﺣﻠﻮ ﻑ ﺍﺭﻳﺪﺝ ﺗﺴﺎﻋﺪﻳﻨﻲ
- ﺍﻱ ﺻﺎﺭ ﺑﺲ ﺧﻞ ﺍﺷﻮﻓﻬﻦ
ﺭﺍﺣﺖ ﻓﺘﺤﺖ ﺍﻟﺪﻭﻻﺏ ﻭﻃﻠﻌﺘﻬﻦ ﺭﺍﻭﺗﻨﻴﺎﻫﻦ ﺑﻘﻴﺖ ﻣﺮﻛﺰ ﺑﻴﻬﻦ ﻭﺍﺣﻔﻆ ﺑﺎﻟﺘﻔﺎﺻﻴﻞ ﺍﺷﻮﻓﻬﻦ ﺻﻌﺒﺎﺕ ﻟﻮ ﺳﻬﻼﺕ ﻋﻠﻴﻪ .
ﺑﻬﺎﻻﺛﻨﺎﺀ ﺩﺧﻞ ﻫﻮَ ﺷﺎﻓﻨﻲ ﻣﺪﻗﻘﻪ ﺑﺎﻟﺮﺳﻤﺎﺕ .. ﻛﺎﻝ -:
- ﺷﻨﻮ ﻫﺎﻱ؟
ﺟﺎﻭﺑﺘﻪ ﺍﺳﻤﺎﺀ
- ﻟﮕﻴﺘﻠﻚ ﺍﻟﺮﺳﺎﻣﻪ ﻏﻴﺮ ﺛُﺮﻯٰ ﺭﺳﻤﻬﻪ ﻳﺠﻨﻦ ﺻﺎﺭﻟﻲ ﺷﮕﺪ ﻣﺤﺘﺎﺭﻩ ﺑﻴﻬﻦ ﺑﺲ ﻫﺴﻪ ﻣﻦ ﺭﺟﻌﺘﻲ ﻓﺮﺣﺘﻴﻨﻲ ﻭﺍﻟﻠﻪ ﻃﺎﻳﺮﻩ ﺑﻴﺞ
ﺗﻔﺎﺟﺊ ﻭﻓﺘﺢ ﻋﻴﻮﻧﻪ
- ﺍﺍﺍﺍﺍﻩ؟؟ ﺛُﺮﻯٰ ﺭﺳﺎﻣﻪ؟؟
- ﺍﻱ ﺍﺳﺘﺎﺫ
- ﻫﻬﻪ ﻛﻠﺶ ﺯﻳﻦ ﺑﺲ ﺷﻌﺠﺐ ﻣﺎﺍﺩﺭﻱ
- ﻫﻬﻬﻬﻪ ﻣﺎﺍﺩﺭﻱ
ﺿﺤﻚ ﻭﻛﺎﻝ -:
- ﺑﺎﺟﺮ ﺟﻴﺒﻴﻠﻲ ﺭﺳﻮﻣﺎﺗﺞ ﺍﺷﻮﻓﻬﻦ
- ﻫﺎ ﺍﻱ ﺻﺎﺭ
ﺑﺎﻭﻋﺖ ﺑﺎﻟﺮﺳﻤﺎﺕ ﺳﻬﻼﺕ ﺍﻛﺪﺭ ﺍﺭﺳﻤﻬﻦ
- ﺳﺖ ﺫﻧﻲ ﺍﺭﺳﻤﻬﻦ ﻋﺎﺩﻱ
- ﺑﺲ ﺍﺭﻳﺪﻫﻦ ﻛﺒﺎﺭ ﻋﻠﻰ ﻓﺎﻳﻼﺕ
- ﺍﻱ ﻋﺎﺩﻱ
- ﺣﺒﻴﺒﺘﻲ ﺭﺍﺡ ﺍﺗﻌﺒﺞ
- ﺗﻌﺒﺞ ﺭﺍﺣﻪ
ﺍﻧﻄﺎﻧﻲ ﺍﻟﻤﻼﺯﻡ ﻭﻃﻠﻌﺖ .. ﻣﻦ ﻃﻠﻌﺖ ﺭﻓﻌﻠﻲ ﺣﻮﺍﺟﺒﻪ ﻭﺿﺤﻚ
- ﻣﻮ ﺗﻨﺴﻴﻦ ﺍﻟﺮﺳﻤﺎﺕ
- ﻻ ﻣﺎﺍﻧﺴﺎﻫﻦ
ﺭﺟﻌﺖ ﻟﻠﺒﻴﺖ ﮔﻠﺒﺘﻪ ﮔﻼﺏ ﻋﻠﻰ ﺭﺳﻮﻣﺎﺗﻲ . ﺧﺒﺼﺖ ﺍﻫﻠﻲ ﺧﺒﻴﺺ .بيج قصص عراقيه حقيقيه من واقعنا.روعه الطائي
ﻭﺍﻣﻲ ﺗﺼﻴﺢ ﻋﻠﻴﻪ ﻭﺍﻧﻲ ﺍﻫﻢ ﺷﻲ ﺍﻟﮕﻪ ﺍﻟﺮﺳﻤﺎﺕ . ﺟﻤﻌﺘﻬﻦ ﻛﻠﻬﻦ ﻭﺧﻠﻴﺘﻬﻦ ﻳﻢ ﺭﺍﺳﻲ ﺣﺘﻰ ﺍﺗﺬﻛﺮ ﺑﺎﺟﺮ ﻭﺍﺧﺬﻫﻦ ﻭﻳﺎﻱ .
ﻛﻌﺪﺕ ﺍﻟﺼﺒﺢ ﺭﺃﺳﺎً ﺣﻄﻴﺖ ﺍﻟﺮﺳﻮﻣﺎﺕ ﻭﺑﺪﻟﺖ ﻭﻃﻠﻌﻨﻪ ﻟﻠﻜﻠﻴﻪ .
ﺍﻭﻝ ﻣﺎﻭﺻﻠﺖ ﻻﮔﻴﺘﻪ ﺑﺎﻟﺒﺎﺏ ﺍﻧﻄﻴﺘﻪ ﺍﻟﺮﺳﻮﻣﺎﺕ ﻛﺎﻝ -:
- ﺭﺍﺡ ﺍﺧﺬﻫﻦ ﻭﻳﺎﻱ ﻟﻠﺒﻴﺖ ﺣﺘﻰ ﺍﺩﻗﻖ ﺑﻴﻬﻦ
- ﺑﺮﺍﺣﺘﻚ ﺍﺳﺘﺎﺫ
ﺍﺧﺬﻫﻦ ﻭﻳﺎﻩ ﻭﻣﺮ ﺍﻟﻴﻮﻡ ﻋﺎﺩﻱ .. ﻣﺘﺤﻤﺴﻪ ﺍﻋﺮﻑ ﺭﺃﻳﻪ ﻳﻬﻤﻨﻲ ﺍﻛﻴﺪ
ﺛﺎﻧﻲ ﻳﻮﻡ ﺟﺎﺑﻬﻦ ﻭﻳﺎﻩ ﻭﺩﺯ ﻋﻠﻴﻪ ﻟﻤﻜﺘﺒﻪ .. ﺭﺣﺘﻠﻪ ﻟﮕﻴﺘﻪ ﺣﺎﻃﻬﻦ ﻣﻘﺎﺑﻴﻠﻪ ﻭﻳﺒﺎﻭﻋﻠﻬﻦ ﻣﺒﺘﺴﻢ .
ﺩﺧﻠﺖ ﻭﻭﺻﻠﺖ ﻳﻢ ﻣﻴﺰﻩ .. ﻛﺎﻝ -:
- ﺭﺳﻤﺞ ﻛﻠﺶ ﺣﻠﻮ ﻭﻣﺘﻄﻮﺭ ﺑﺲ ﺑﻌﺪ ﻳﺮﺍﺩﻟﺞ ﺗﺮﺳﻤﻴﻦ ﻫﻮﺍﻱ ﺣﺘﻰ ﺗﻄﻠﻌﻴﻦ ﻓﻨﺎﻧﻪ ﺗﻮﺏ .
- ﺍﻧﻲ ﺗﺎﺭﻛﻪ ﺻﺎﺭ ﺳﻨﺘﻴﻦ
- ﻻ ﻻ ﻟﺘﺘﺮﻛﻴﻦ ﺍﺳﺘﻤﺮﻱ .. ﻭﻫﺎ ﻋﺠﺒﺘﻨﻲ ﺭﺳﻤﻪ ﻋﺎﺩﻱ ﺍﺧﺬﻫﻪ ﺑﺲ ﺭﺳﻤﺘﻠﺞ ﺑﻤﻜﺎﻧﻬﻪ
- ﺧﻞ ﺍﺷﻮﻓﻬﻪ ﺑﻠﻪ
ﺷﻮﻓﻨﻲ ﺍﻟﺮﺳﻤﻪ ﺍﻟﻌﺠﺒﺘﻪ .. ﺟﺎﻧﺖ ﺍﻳﺪﻳﻦ ﺍﺛﻨﻴﻦ ﻣﺎﻝ ﺑﻨﻴﻪ ﻭﻭﻟﺪ ﻭﺣﺪﻩ ﺑﺼﻒ ﺍﻟﺜﺎﻧﻴﻪ ﻭﻣﺘﻼﺯﻣﺎﺕ ﺑﺎﻷﺻﺒﻊ ﺍﻟﺼﻐﻴﺮ ﻭﻣﺮﺗﺒﺘﻬﻦ ﺍﻧﻲ ﺑﺄﻟﻮﺍﻥ
ﻛﺘﻠﻪ -: ﺍﺧﺬﻫﻪ ﺑﺎﻟﻌﺎﻓﻴﻪ
ﺿﺤﻚ ﻭﻛﺎﻝ -:
- ﺷﺨﺒﻄﺘﻠﺞ ﺭﺳﻤﻪ ﻭﺍﻧﻲ ﻭﺍﮔﻒ
- ﻭﺍﻧﺖَ ﻭﺍﮔﻒ ﻫﻬﻬﻬﻬﻪ
- ﻻ ﻳﻌﻨﻲ ﻗﺼﺪﻱ ﺑﺨﻔﺔ ﺇﻳﺪﻱ ﻣﻮ ﺧﻮﺵ ﺭﺳﻤﻪ ﺑﺲ ﻋﻠﻤﻮﺩ ﻣﺎﺗﺒﻘﻴﻦ ﺗﻄﻠﺒﻴﻨﻲ ﺑﻤﻜﺎﻥ ﺭﺳﻤﺘﺞ
- ﻫﻬﻬﻬﻪ ﻋﺎﺩﻱ
ﻃﻠﻊ ﺍﻟﺮﺳﻤﻪ ﺑﻄﻪ ﻣﺪﺭﻱ ﻭﺯﻩ ﺭﮔﺒﺘﻬﻪ ﺷﻄﻮﻟﻬﻪ ﻭﻣﺪﻧﮕﻪ .. ﺍﻧﻲ ﺷﻔﺘﻬﻪ ﺻﻔﻨﺖ ﻭﻛﺘﻠﻪ -:
- ﻳﺎﺍﺍﺍﺍﺍﺀ ﺷﻮ ﻫﺎﻱ ﺭﮔﺒﺘﻬﻪ ﺷﻄﻮﻟﻬﻪ
ﻫﻮَ ﺍﻧﻲ ﻛﻠﺖ ﻫﻴﺞ ﻟﻮ ﻭﺟﻬﻪ ﺻﺎﺭ ﺍﺣﻤﺮ ﻭﺷﺮﮒ ﻣﻦ ﺍﻟﻀﺤﻚ .. ﻇﻞ ﻳﻀﺤﻚ ﻣﻦ ﺍﻋﻤﺎﻗﻪ ﺑﺼﻮﺗﻪ ﺍﻟﺮﺟﻮﻟﻲ .. ﻭﺍﻟﻠﻪ ﺣﺘﻰ ﺍﺳﺘﺤﻴﺖ
- ﻫﻬﻬﻬﻬﻬﻬﻬﻬﻪ ﻣﻮ ﮔﻠﻨﺎﻟﺞ ﺷﺨﺒﻄﻨﻪ ﻫﺴﻪ ﺍﻻ ﺗﻘﻠﺪﻳﻦ
- ﻫﻬﻬﻬﻬﻪ ﻻ ﻭﺍﻟﻠﻪ ﺑﺲ ﻫﻴﺞ ﺷﻮ ﺟﺬﺑﺘﻨﻲ ﺭﮔﺒﺘﻬﻪ
ﺭﺟﻊ ﻳﻀﺤﻚ ﺣﺘﻰ ﻋﻴﻮﻧﻪ ﺩﻣﻌﺖ .. ﺍﺷﻮ ﺍﻧﻲ ﻣﺎﺿﺤﻜﺘﻨﻲ .. ﻳﻼ ﻫﻮَ ﮔﻠﺒﻪ ﺭﻫﻴﻒ ﺑﺴﺮﻋﻪ ﻳﻀﺤﻚ .
ﻗﺒﻞ ﻣﺎﺍﻃﻠﻊ ﻛﺎﻟﻠﻲ -:
- ﺛُﺮﻯٰ ﺍﺫﺍ ﺗﺤﺘﺎﺟﻮﻥ ﺍﻧﺖِ ﻭﺻﺪﻳﻘﺎﺗﺞ ﻣﻲ ﻟﻮ ﭼﺎﻱ ﺗﺘﻌﺎﻟﻮ ﻟﻬﺎﻱ ﺍﻟﻐﺮﻓﻪ ﺳﻮﻳﻨﺎﻫﻪ ﻟﻠﭽﺎﻱ ﻭﺣﻄﻴﻨﻪ ﺑﻴﻬﻪ ﺗﺮﺍﻣﺰ ﺍﺣﺴﻦ ﻣﻤﺎ ﺗﺸﺘﺮﻭﻥ
- ﺧﺎﻑ ﻣﺎﻝ ﺍﻟﺪﻛﺎﺗﺮﻩ
- ﭼﺆﺅ ﻣﻌﻠﻴﺞ
- ﻫﺎ ﺧﻮﺵ
ﺍﺧﺬﺕ ﺍﻟﺮﺳﻤﻪ ﻭﻃﻠﻌﺖ .. ﻟﮕﻴﺖ ﻛﺎﺗﺐ ﻭﺭﺍﻫﻪ ‏( ﻻﺗﻘﻒ ﻋﻨﺪ ﻣﻐﻴﺐ ﺍﻟﺸﻤﺲ ﺣﺰﻳﻨﺎً ﻭﺇﻋﻠﻢ ﺇﻧﻬﺎ ﺳﺘﺸﺮﻕ ﻣﻦ ﺟﺪﻳﺪ . . . ‏)
ﺗﻮﻗﻴﻌﻪ ﺟﻮﻩ ﻭﺍﻟﺘﺎﺭﻳﺦ ﻭﺍﻟﻴﻮﻡ ﻭﺍﻟﺴﺎﻋﻪ .. ﻛﺎﺗﺒﻬﻪ ﺍﻟﺴﺎﻋﻪ ﺑﺎﻟـ 1:04 ﺑﺎﻟﻠﻴﻞ .
ﺍﺑﺘﺴﻤﺖ ﻭﺿﻤﻴﺘﻬﻪ ﺍﻟﺮﺳﻤﻪ ﻭﺍﻟﻌﺒﺎﺭﻩ ..
ﺭﺣﺖ ﮔﻠﺖ ﻟﻔﺎﻃﻤﻪ ﻉ ﺍﻟﭽﺎﻱ ﻭﻫﻲَ ﺗﻔﻘﺪ ﻋﻠﻴﻪ
ﻓﺎﻃﻤﻪ .. ﻫﻤﺰﻳﻦ ﺣﺘﻰ ﻛﻠﺴﺎﻉ ﺗﺠﻴﺒﻴﻠﻲ ﭼﺎﻱ
- ﺍﻱ ﻣﻮ ﺧﺪﺍﻣﺘﺞ
ﻓﺎﻃﻤﻪ .. ﺛﺮﺍﻭﻱ ﺍﻟﻄﻴﺒﻪ ﺷﻌﻨﺪﻱ ﻏﻴﺮﺝ
- ﺗﻠﻮﮔﻲ ﺑﺮﺍﺣﺘﺞ
ﻟﻠﻈﻬﺮ ﻭﻛﻮﻧﺖ ﻋﻠﻴﻪ ﺍﻻ ﺗﺠﻴﺒﻴﻠﻲ ﭼﺎﻱ .. ﻗﻔﻠﺖ ﺍﻻ ﺟﺎﻱ ﺭﺣﺖ ﻟﻠﻐﺮﻓﻪ ﺍﻟﮕﺎﻝ ﻋﻠﻴﻬﻪ .. ﻣﺘﺮﺩﺩﻩ ﺍﺩﺧﻞ ﻟﻮ ﻻ .
ﻻ ﺧﻞ ﺍﺩﺧﻞ .. ﺩﺧﻠﺖ ﻟﮕﻴﺘﻪ ﻧﺎﺯﻉ ﺣﺬﺍﺋﻪ ﺑﺎﻟﺒﺎﺏ ﻭﻣﺘﺮﺑﻊ ﻭﻣﻘﺎﺑﻴﻠﻪ ﺣﺎﻓﻈﺘﻴﻦ ﺗﻤﻦ ﻭﻣﺮﮔﺔ ﻓﺎﺻﻮﻟﻴﺎ ﻭﻳﺎﻛﻞ ﺑﻨﻬﻢ .
ﻇﻠﻴﺖ ﻭﺍﮔﻔﻪ ﺍﺑﺎﻭﻋﻠﻪ ﺷﻠﻮﻥ ﻳﺎﻛﻞ .. ﺭﻓﻊ ﺭﺍﺳﻪ ﺷﺎﻓﻨﻲ ﺍﻟﺨﺎﺷﻮﮔﻪ ﻭﻛﻔﺖ ﻳﻢ ﺣﻠﮕﻪ ﮔﺎﻡ ﻻ ﻳﺎﺧﺬ ﻭﻻﻳﻨﻄﻲ .
ﺍﺑﺘﺴﻢ ﻣﻨﺤﺮﺝ ﻭﻧﺰﻟﻬﻪ .. ﺩﺧﻠﺖ ﺍﻧﻲ ﺻﺒﻴﺖ ﭼﺎﻱ ﻭﻛﻠﺴﺎﻉ ﺍﻟﺘﻔﺘﻠﻪ ﻛﻠﻤﺎ ﻳﺮﻳﺪ ﻳﺎﻛﻞ ﺍﻟﺘﻔﺖ ﻳﺮﺟﻊ ﺍﻟﻠﮕﻤﻪ .
ﺍﺧﺮ ﺷﻲ ﻛﺎﻝ -:
- ﺛُﺮﻯٰ ﺭﺣﻤﻪ ﻟﻠﻤﻴﺘﻴﻦ ﻟﺘﺒﺎﻭﻋﻴﻠﻲ ﺍﺭﻳﺪ ﺁﻛﻞ ﺟﻮﻭﻋﺎﻥ
- ﻫﻬﻬﻪ ﺍﻧﻲ ﺷﻌﻠﻴﻪ
- ﻟﺘﺒﺎﻭﻋﻴﻦ
- ﻫﻬﻬﻬﻪ
ﺩﺭﺕ ﻭﺟﻬﻲ ﻋﻨﻪ ﻭﺍﻧﻲ ﺻﺎﺭﺕ ﺳﻮﻟﺘﻲ ﺍﻻ ﺍﺑﺎﻭﻉ .
ﺍﻟﺘﻔﺘﺖ ﻋﻠﻴﻪ ﻭﺿﺤﻜﺖ .
ﺍﻛﻞ ﻭﻛﺎﻝ -:
- ﻳﻼ ﻗﺎﺑﻞ ﺍﺳﺘﺤﻲ ﻣﻨﺞ ﺑﺎﻭﻋﻲ ﺑﺮﺍﺣﺘﺞ
ﻇﻠﻴﺖ ﺍﺿﺤﻚ .. ﺻﺒﻴﺖ ﺍﻟﭽﺎﻱ ﻭﻃﻠﻌﺖ ﻣﺒﺘﺴﻤﻪ .. ﺍﻧﻄﻴﺖ ﺍﻟﭽﺎﻱ ﻟﻔﺎﻃﻤﻪ .. ﺷﺮﺑﺘﻪ ﻭﻛﺎﻟﺖ ﺭﺟﻌﻲ ﺍﻻﺳﺘﻜﺎﻥ .
ﺷﻠﻮﻥ ﺳﺎﻟﻔﻪ ﻫﺎﻱ .
ﺍﺧﺬﺕ ﺍﻻﺳﺘﻜﺎﻥ ﻭﺭﺟﻌﺘﻪ .. ﻟﮕﻴﺘﻪ ﮔﺎﻋﺪ ﻭﻳﻤﻪ ﺍﺳﻤﺎﺀ ﻛﺎﻟﺘﻠﻪ -:
- ﻫﺎﻱ ﻣﻨﻲ ﺍﻟﺠﺎﻳﺒﻬﻪ ﺍﻟﻔﺎﺻﻮﻟﻴﻪ
- ﻣﺎﺍﻋﺮﻑ ﺑﺲ ﻛﺎﻟﻮﻟﻲ ﺭﻭﺡ ﺇﻛﻞ
ﻛﺎﻟﺘﻠﻲ -:
- ﺛُﺮﻯٰ ﺗﻌﺎﻟﻲ ﺗﺎﻛﻠﻴﻦ
ﺑﺎﻭﻋﺖ ﻋﻠﻴﻬﻪ ﻭﺑﺎﻋﺘﻠﻪ
- ﻻ ﻣﺎﺍﺭﻳﺪ ﺻﺎﺭﻟﻲ ﺳﺎﻋﻪ ﻭﺍﮔﻔﻪ ﺑﺎﻟﭽﺬﺏ ﻣﺤﺪ ﻛﺎﻟﻠﻲ ﺗﻌﺎﻱ ﺍﺟﻲ ﻣﻦ ﺗﺎﻟﻲ ﺷﻨﻲ
ﻋﺮﻑ ﻗﺼﺪﻩ ﻋﻠﻴﻪ .. ﺭﻓﻊ ﺭﺍﺳﻪ ﻭﺃﺷﺮ ﻋﻠﻰ ﻧﻔﺴﻪ
- ﺍﻧﻲ؟؟
- ﻫﻬﻪ ﻭﺍﻟﻠﻪ ﻣﻤﻨﺘﺒﻪ ﺍﻟﺘﻬﻴﺖ ﺑﺠﻮﻋﺘﻲ ﺻﺎﺭ ﻳﻮﻣﻴﻦ ﻣﻤﺎﻛﻞ .. ﻳﻼ ﺗﻌﺎﻟﻲ ﺍﻛﻠﻲ ﻫﺴﻪ
- ﻻ ﻣﺎﺍﺭﻳﺪ
- ﺗﺘﻌﺎﻱ ﻳﻤﻌﻮﺩﻩ
- ﻻ ﻭﺍﻟﻠﻪ ﺍﺑﺪﺩ
- ﺗﻌﺎﺍﺍﻱ ﻳﻔﻮﺗﺞ
- ﻻﺍﺍ
- ﺧﺐ ﺩﺭﻭﺣﻲ ﻫﻬﻬﻬﻬﻬﻬﻬﻬﻪ
ﻇﻠﻮ ﻳﻀﺤﻜﻮﻥ ﻋﻠﻴﻪ ﻭﺍﻧﻲ ﻫﻢ ﺍﺿﺤﻚ ..
ﺭﺣﺖ ﻟﻠﻘﺎﻋﻪ ﮔﻌﺪﻧﻪ ﺍﻧﻲ ﻭﻓﺎﻃﻤﻪ ﻭﺍﻟﺒﻨﺎﺕ ﺍﻟﻮﻳﺎﻧﻪ .. ﻇﻠﻴﻨﻪ ﻧﺴﻮﻟﻒ ﻟﻤﺎ ﻳﺪﺧﻠﻠﻨﻪ ﺩﻛﺘﻮﺭ ﻭﻣﺎﺍﻋﺮﻑ ﻣﻨﻮ ﺍﻟﺮﺍﺡ ﻳﺠﻲ .
ﺷﻮﻳﻪ ﻭﺩﺧﻠﺖ ﺳﺎﺭﻩ ﺑﺈﻳﺪﻫﻪ ﻋﻼﮔﺔ ﭼﻜﻠﻴﺖ ﺷﻜﺒﺮﺍﺗﻬﻪ ﻳﻤﻜﻦ ﺑﻴﻬﻪ 4 ﻛﻴﻠﻮﺍﺕ .
ﻛﻠﺶ ﺟﺒﻴﺮﻩ ﻭﺗﻮﺯﻉ ﭼﻜﻠﻴﺖ .. ﺍﺟﺖ ﻳﻤﻨﻪ ﺣﻄﺖ ﻋﻠﻰ ﺳﺘﻴﺠﺎﺗﻨﻪ .
ﻣﺎﻧﻌﺮﻑ ﺷﻨﻮ ﺍﻟﻤﻨﺎﺳﺒﻪ !
ﻭﺣﺪﻩ ﺻﺎﺣﺘﻠﻬﻪ ﺑﻮﺳﻂ ﺍﻟﻘﺎﻋﻪ
- ﺳﺎﺭﻩ ﺷﻨﻮ ﺍﻟﻤﻨﺎﺳﺒﻪ ﺗﻮﺯﻋﻴﻦ ﭼﻜﻠﻴﺖ؟؟
ﺇﻟﺘﻔﺘﺖ ﻋﻠﻴﻪ ﺗﺒﺎﻭﻋﻠﻲ ﺑﺈﺳﺘﻬﺰﺍﺀ ... ﻭﺭﺟﻌﺖ ﺑﺎﻭﻋﺖ ﻟﻠﺒﻨﻴﻪ ﻛﺎﻟﺘﻠﻬﻪ
- ﺑﻤﻨﺎﺳﺒﺔ ﺧﻄﻮﺑﺔ ﺛُﺮﻯٰ ﻭﻣﺎﻫﺮ !!!!!!!
ﻳﺘﺒﻊ
عبرات العباديه