أم قاصرة

الحلقة التاسعة

هايدى : انتِ ارتبطتى بـ يوسف
مايا : لا طبعاً
هايدى : طيب حبيتيه او ليه مش عايزة تعرفى ندى انه جه اتكلم معاكى وسأل عليها
مايا : ندى مش ناقصة
هايدى : يعنى ايه
مايا : يعنى مينفعش حد يدخل حياتها ويرجع يخرج منها تانى
هايدى : انا مش فاهمه حاجة لما انتِ مش عايزة حد يدخل حياتها ليه روحتى قولتى لـ يوسف كل حاجه عن ندى
مايا : عشان يبعد عنها
هايدى : فى ايه يا بت انتِ عماله تتكلمى بالالغاز من الصبح ومش فاهمه منك حاجه
مايا : على فكرة بقى مش لازم تفهى (ومشيت وسابتها)
هايدى(راحت وراها ووقفتها) : لا بقى لازم افهم من امتى واحنا بنتعامل مع بعض كده لازم تفهمينى فى ايه وليه عايزة تبعدى يوسف عن سكة ندى
مايا : والله مش عايزة ابعده ولا حاجة بس هو بعد من نفسه
هايدى : ليه بقى قولتى له ايه خلاه يبعد
مايا : انا هفهمك كل حاجة يا هايدى
هايدي : ياريت
مايا : دلوقتى انتِ عارفة ظروف ندى وعارفة انها شالت مسئولية اخواتها بدرى وده خلاها تكبر بدرى وزى ما بيقولوا شالت الهم صح
هايدى : صح
مايا : انا حسيت ان ندى اُعجبت بـ يوسف وباهتمامه بيها رغم انها متعرفش اسمه
هايدى : حسيتى ازاى
مايا : بتتكلم عنه كتير ده غير انها قالتلى انها محتاجه حد فى حياتها يخليها تستحمل المسئولية دى
هايدى : تمام
مايا : انا بقى خوفت ان يوسف يروح يتكلم مع ندى ويعلقها بيه ولما يعرف ظروفها والمسئولية اللى هى شيلاها واللى هو اكيد هيشلها معاها فـ يبعد عنها بعد ما تكون هى اتعلقت بيه او حبته
هايدى : يعنى انتِ قولتى لـ يوسف ظروف ندى عشان يبقى عارف كل حاجة صح
مايا : ايوة عشان يبقى عارف ظروفها قبل ما يقرب منها ويفكر ويختار قبل ما يقرب برضه ، لانها لو حبيته وسابها هتتوجع اوى وهى مش ناقصة
هايدى : وهو عمل ايه
مايا : مظهرش من يومها
هايدى : الواطى ، بس انتِ عندك حق فى اللى عملتيه انا ظلمتك
مايا : ظلمتينى ازاى
هايدى : كنت فكراكى حبيتيه او ارتبطتى بيه
مايا : انتِ هبلة ولا ايه انا كل اللى عملته ده من خوفى عليها
هايدى : ماهو انتِ مكنتيش موضحة حاجه
مايا : يعنى يوم ما اتنيل واحب احب واحد بيحب صاحبتى وهى بتحبه ايه الوطينة دى
هايدى : مانتِ كنتى عماله تقولى زى القمر وواقعه واقفة
مايا : على فكرة مش معنى انى عجبنى شكله او حاجه فى شخصيته انى احبه او اروح ارسم عليه واخده من صاحبتى
هايدى : طيب اسكتى بقى لانها جاية
مايا : خالو قالك ايه
ندى : هيرفع الغياب برضه
هايدى : طيب يا حبيبتى كويس
ندى : همشى بقى واشوفكم فى الدرس (ومشيت وطلعوا هما الفصول)
*_____________________________________________**___________________________*
فى بيت رقية .....
رقية : رانيا عايزة تخطب ندى لـ ادهم ابنها
فؤاد : طيب وايه المشكلة
رقية : حازم ابنك بيبحها
فؤاد : يادى حازم هو فى ايه
رقية : فيه ان ابنك بيحبها بجد وعايز يتجوزها
فؤاد : ابنك صغير ولسه بدرى اوى على اللى انتِ بتقوليه
رقية : ولا بدرى ولا حاجة احنا نروح نخطبله ندى وسنتين ويتجوزوا
فؤاد : هتجوزى عيال لسه بيدرسوا يا رقية
رقية : وايه المشكلة
فؤاد : وايه المشكلة !! ده انتِ اتجننتى بقى
رقية : ممكن تفهمنى ليه
فؤاد : ممكن تفهمينى انتِ هتموتى وتجوزى حازم وندى ليه ومتقوليش عشان حازم بيحبها
رقية : وليه مقولش كده اذا كان ده السبب اصلاً
فؤاد : لا انتِ بترغى فى الموضوع ده من زمان من اول ما مرات اخوكى ماتت
رقية : وفيها ايه يعنى لما ابقى نفسى اجوز ابنى لـ بنت اخويا
فؤاد : بصى يا رقية يا حبيبتى ، كونك بتحبى اخوكى ده شئ وكونك بتحبى ندى ده شئ تانى وكونك بقى نفسك تجوزى حازم لـ ندى دى شئ مختلف تماماً ، مش مهم يكون انتِ نفسك المهم يكون هما نفسهم
رقية : بس حازم بيحــ..............
فؤاد يقاطعها : بس ندى مبتحبوش وهو مش فى دماغها اصلاً وانتِ اللى قولتى كده
رقية : انا بس كنت عايزة.................
فؤاد يقاطعها : سيبها لـ ربنا يا رقية وبلاش تخططى لها
رقية : ونعمَ بالله
*_____________________________________________**___________________________*
فى بيت ندى ........
(. ندى نزلت تستنى محمد تحت العمارة ، الباص نزله وهو جرى عليها وحضنها .)
ندى : هاا بقى عملت ايه فى المدرسة
محمد : معملتث حاجة
ندى : طيب اتعرفت على حد جديد
محمد : لاااا
ندى : طيب تعالى نطلع عشان تغير وتتغدى
(. ندى بتنزل محمد من حضنها عشان يطلعوا فوق ، لقيت يوسف فى عربية وبيبص عليها ولما شافته هو ابتسم لها ، ندى اتلخبطت وخدت محمد وطلعت .)
بعد ما طلعوا ......
ندى لنفسها >> هو !! هو ولا انا بتهيألى !! ايه ده ممكن يكون هو
(. خرجت ندى البلكونة وبصت على العربية تانى واتأكدت ولقيته يوسف فعلاً ، وهو لما شافها ابتسم لها تانى بس هى دخلت على طول .)
ندى بفرحة >> ده هو بجد يالهوووى هو عرف مكانى منين !! هو اصلاً كان فين طول المدة دى
محمد : يا ماما انتِ فين كده
ندى : ايه يا حبيبى فى ايه
محمد : انا بكلمك بقالى ثاعة وانتِ مبترديش
ندى : معلش يا حبيبى كنت بفكر فى حاجة
محمد : طيب يالا انا جعان
ندى : طيب تعالى تغير هدومك لحد ما بوسى تجى ونتغدى سوا
محمد : بوثى هتتأخر
ندى : لحد ما تغير هدومك هتكون جت
(. دخلت ندى ومحمد اوضة نوم محمد عشان يغير هدومك .)
محمد : فى ايه يا ماما ما تجى بقى
ندى : مودى يا حبيبى اقلع هدومك وانا ثوانى وجاية
محمد : رايحة فين
ندى : هشوف حاجة بسرعة
(. وخرجت ندى من اوضة محمد وراحت تانى البلكونة تبص على يوسف بس ملقتوش ورجعت لـ محمد .)
محمد : تعالى لبثينى بقى
ندى : انت كبرت يا مودى المفروض تبدأ تلبس لوحدك
محمد : ازاى
ندى : بص انا هساعدك بس واحدة واحدة هعلمك تلبس لوحدك اتفقنا
محمد : ماثى اتفقنا
(. جت بسنت واتغدوا وبعد العصر .)
ندى : بسنت خدى بالك من مودى ومن نفسك لحد ما اجى
بسنت : ايه ده انتِ رايحة فين
ندى : رايحة الدرس وبعدين هنزل اجيب حاجات للبيت
بسنت : طيب ما تاخدينا معاكى
ندى : مودى نايم
بسنت : خلاص استنى لحد ما يصحى ونروح كلنا سوا
ندى : هى حفلة انا هروح الدرس وهعد السوبر ماركت وجاية على طول
بسنت : طيب لما مودى يصحى وميلاقيكيش ويفضل يزن هعمل ايه
ندى : مودى مش هيصحى قبل ساعتين ولو صحى قبل كده كلمينى هاجى
بسنت : يعنى هتلحقى
ندى : هلحق ايه بس دى اسماعلية كلها اوضتين وصالة اول ما يصحى كلمينى هتلاقيني عندك يالا سلام
بسنت : طيب هاتى معاكى تشوكلت
ندى : هاجبلكم كل حاجة باى (ونزلت)
*_____________________________________________**___________________________*
فى الكافيه المعتاد ........
مايا : فى ايه يا ندى
ندى : مفيش
مايا : شيفاكى سرحانه وكأنك مش قاعدة معايا
ندى : بصى يا مايا انا جيت هنا على امل انى اشوف الشاب الغامض فكراه
مايا : يــوســ..... ، قصدى اه اه فكراه ماله
ندى : اصلى شوفته النهاردة عند بيتنا
مايا : انتِ بتتكلمى جد
ندى : اه والله
مايا : يعنى كان معدى بالصدفة ولا جه عندكوا البيت ولا ايه بالظبط
ندى : هفهمك انا انا كنت نازلة اجيب مودى من تحت لما باص المدرسة جه ببص لقيته فى عربيته وبيبص لى وابتسم كمان ، ولما طلعت فوق بصيت تانى من البلكونة واتأكدت انه هو وبص برضه وابتسم
مايا : اووووبااا ده الموضوع شكله بجد بقى
ندى : تفتكرى بيحبنى فعلاً !!
مايا : المهم انتِ ايه نظامك
ندى : مش عارفة
مايا : مش عارفة ايه
ندى : بصى يا مايا انا حياتى مش ملكى وبعمل كل حاجة لوحدى ، مطلوب منى اهتم واطبطب وادادى فى حين انى محتاجة حد يطبطب عليا ياخد باله منى زى ما تقولى كده يدينى دفعة عشان اقدر اكمل ، عشان اقدر اتحمل المسئولية واوصل اخواتى لـ بر الآمان
مايا : تمام
ندى : بس طبعاً فى كذا مشكلة
مايا : اللى هما
ندى : اللى هما انى مش عارفة هل السن اللى احنا فيه ده سن ارتباط وحب ولا لا
مايا : بصى يا حبيبتى هو اه احنا فى سن مراهقة ومشاعرنا مش ثابته ومنقدرش نحكم عليها دلوقتى بس انتِ مُختلفة عن اى حد
ندى : مُختلفة ازاى ؟
مايا : يعنى بحكم المسئولية اللى انتِ شلتيها فانتِ سبقتى سنك بـ حوالى عشر سنين بناءاً على كده عقلك سبق سنك ومشاعرك بقت ثابته برضه
ندى : تفتكرى ؟
مايا : ده واضح من تصرفاتك وطريقة تعاملك مع اخواتك
ندى : حتى لو كده المشكلة التانية هى المشكلة الاكبر
مايا : اللى هى ايه
ندى : اللى هى ان اللى هيتجوزنى مش هيتجوزنى لوحدى هيتجوزنى انا واخواتى مين بقى هيقدر يشيل المسئولية دى او هيستحملها ده ممكن اصلاً يرضى
مايا : انا واثقة انه هيقدر وهيستحمل وهيشيل معاكى المسئولية دى
ندى : يا سلام !!
مايا : انا واثقة خدى منى
ندى : وجايبة الثقة دى كلها منين
مايا : مالكيش دعوة بس بكرة تقولى مايا قالت
ندى : طيب لو فرضنا مثلاً ان الشخص الغامض ده بيحبنى وهيستحمل زى ما بتقولى فـ هو شكله كبير و........
مايا تقاطعها : على فكرة شكله مش كبير اوى يعنى ٢٣ او ٢٤ سنة
ندى : اياً كان عمره اكيد كلها كام سنة وهيبقى عايز يتجوز وانا مش هقدر اتجوز قبل ما اطمن على اخواتى
مايا : اخواتك ايه وجواز ايه اللى بتتكلمى عليه يا ندى لسه بدرى على الكلام ده ، انتِ لسه حتى متعرفيش اسمه
ندى : عندك حق بس انا كنت جاية على امل انى اشوفه
مايا : هو شكله كده مبيجيش الا عشانك وبما انه عرف بيتك فـ مش هيجى هنا
ندى : بس تفتكرى هو منين ، من هنا من اسماعلية ولا منين
مايا : مش عارفة بس ممكن نسأل
ندى : هنسأل مين ، انا عمرى ما شوفت معاه حد دايماً لوحده
مايا : ماهو عشان كان بيجي يشوفك فاكيد مش هيجيب صحابه يتفرجوا عليكي
ندى : على فكرة عربيته ملاكى القاهرة
مايا : ممكن تبقى بتاعة واحد صاحبه
ندى : ما علينا هروح انا بقى زمان مودى صحى
مايا : هتروحى على طول
ندى : لا هعدى على السوبر ماركت اجيب شوية حاجات
مايا : طيب انا هاجى معاكى (ومشيوا)
*_____________________________________________**___________________________*
بعد مرور اسبوعين .....
فـى الكافيه المعتاد .....
يوسف : اذيك
ندى : الحمد لله
يوسف : ممكن اتكلم معاكى شوية
ندى : ممكن ، ايه !! قصدى لا مينفعش
يوسف (سحب كرسى وقعد) : مش هاخد من وقتك كتير
ندى : خير !!
يوسف : انا يوسف وانتِ ندى صح ؟
ندى : انت عارف اسمى منين
يوسف : انا عارف عنك حاجات كتير اوى بس اسمك ده عرفته لما كان اخوكى بينادى عليكي فاكرة
ندى : هااا !! لا مش فاكرة
يوسف : قبل ما تسافروا العريش
ندى : انت كمان عارف انى كنت فى العريش
يوسف : بصى يا ندى انا يُعتبر عارف عنك كل حاجة وده لانى مهتم بيكي اوى
ندى : وانت مهتم بيا ليه
يوسف : مش عارف بس نفسى نقرب من بعض
ندى : يعنى ايه ؟
يوسف : مش عارف ايه اللى انا بقوله ده !! بصى يا ندى انا معجب بيكي جداً والفترة اللى كنت بشوفك فيها اتعلقت بيكي جداً ومحتاج اقرب منك يعنى نرتبط مثلاً او نتخطب شوفى انتِ عايزة ايه
ندى : نتخطب !!! انا عندى ١٧ سنة
يوسف : على فكرة السن مش فارق معايا واصلاً انتِ قربتى تكملى ١٨ سنة يعنى ممكن تتجوزى عادى
ندى : هو فى ايه ، انت مش طبيعي
يوسف : اسمعينى يا ندى للاخر عشان عايز اقولك اقتراح كويس
ندى : اقترااح ايه
يوسف : انتِ دلوقتى عرفتى مشاعرى تجاهك وبتهيألى انتِ فهمتى انا عايز ايه فكرى وشوفى
ندى : افكر فى ايه انا معرفش عنك حاجة
يوسف : ماهو احنا لو قربنا لبعض او ارتبطنا هيبقى قدامك فرصة كويسة انك تعرفيني وتحبينى كمان
ندى : ايه اللى انت بتقول ده
يوسف : انا عارف انك محتجالى بس انا محتاجلك اكتر
ندى : افندم !!!
يوسف : بصى انا هقولك حل كويس ، احنا ممكن نقرب من بعض ونتكلم عشان نعرف بعض اكتر بس انتِ هتبقى قدامى مش مُلتزمة باى حاجة يعنى هتعاملينى زى ما اكون واحد قريبك لحد ما تعرفيني كويس لو حسيتى انى مناسب ليكي وفى مشاعر يبقى نرتبط ولو حسيتى انى مش مناسب ومفيش مشاعر هنسحب من حياتك بهدوء . ولو انى واثق ان هيبقى فيه مشاعر ان شاء الله
ندى : انت بتتكلم على اساس ايه
يوسف : فكرى الاول وبعد كده هقولك كل حاجة انا هظهرلك فى الوقت المناسب ، خدى بالك على نفسك (ومشى)
ندى لنفسها >> ايه ابن الهبلة ده !!!!!! يعنى يوم ما اكون مُعجبة بـ واحد ويقرب منى يبقى مجنون كده ده ايه الحظ ده بس
( واتصلت ندى بـ مايا وطلبت منها تقابلها حالاً ، وجت لها مايا وحكت ندى لـ مايا كل اللى حصل مع يوسف .)
مايا : طيب وانتِ مستغربة ليه
ندى : انتِ مش شايفة اى حاجة تستدعى الاستغراب
مايا : واحد بيقولك مُعجب بيكي واتعلقت بيكي ومحتاج اتعرف عليكي اكتر او اقرب منك ايه الغلط فى كلامه
ندى : يا بنتى انا معرفش عنه حاجه
مايا : ماهو بيديلك فرصة كويسة تعرفيه اهو وكمان بيقولك تعرفيه بدون التزام
ندى : انتِ ايه رأيك
مايا : انا شايفة انك تقربى منه كـ اصحاب حسيتى انك مرتاحة كان بها محستيش خلاص
ندى : طيب ماهو كده ممكن ياخد عنى فكرة وحشة
مايا : بلاش سوء النية الرجل شكله محترم واكيد هو قبل ما يتكلم معاكى سأل عليكي وعرف انتِ مين وبنت مين
ندى : بصى انا لو شوفته تانى هقوله على ظروفى عشان نبقى على نور من اولها
مايا : يعنى هتحكيله قبل اى ارتباط اشمعنى كده
ندى : قبل اما اتعلق بيه ويرجع هو يرفض
مايا : وانتِ كده متعلقتيش بيه ؟
ندى : مش عارفة يا مايا والله انا متلخبطة جداً ومش عارفة ايه بيحصلى
مايا : ده الحب بغباوته
ندى : حب !! ربنا يستر
*_____________________________________________**___________________________*
فى بيت ندى ....
(. ندى قاعدة فى البلكونة بتكلم نفسها .)
ندى >> اشمعنى يوسف اللى قررت اغير مبدأى عشانه ؟ اشمعنى هو اللى وافقت اديله فرصة ؟ فعلاً انا بحبه زى ما مايا بتقول ولا مجرد انى عايزة حد يشجعنى على حاجات كتير ولا عشان محتاجة سند فى الدنيا يخلينى اتحمل مسئولية اخواتى واخلص فيها اكتر !! بس واضح كده انى بحب يوسف فعلاً احساسى بيه مختلف عن اى احساس حسيته قبل كده لاى حد ، بس لو اديتله فرصة واستريحنا حياتى هتبقى ماشية ازاى ؟ هل هقدر اعيش حياة طبيعية فى وجود مسئولية اخواتى وهل هو هيقبل بكده !! احسن حاجه ان قبل اى تعلق او ارتباط افهمه حياتى ماشية ازاى وهتبقى فى المستقبل ازاى
(. فاقت ندى من شرودها على صوت جرس الباب ، وبسنت فتحت .)
ندى : مين يا بوسى
بسنت : دى خالتو رانيا وأدهم
(. خرجت ندى من البلكونة وراحت تستقبلهم .)
رانيا : الناس اللى مبيسألوش
ندى : اذيك يا خالتو وحشانى اوى
رانيا : وانتوا وحشتونى اكتر امال مودى فين
بسنت : نايم
ندى : طيب اتفضلوا ادخلوا
بعد ما دخلوااا .....
ندى : اذيك يا ادهم عامل ايه
أدهم : الحمد لله انتوا عاملين
ندى : احنا بخير الحمد لله ، عن اذنكم اجيبلكم حاجه تشربوها
رانيا : تعالى بس احنا جايين نعقد معاكوا شوية ، خدى بس الاكل ده دخليه الفريزر
ندى : حاضر (وشالت شنطة من الشنط)
أدهم : استنى هدخلهم انا دى شنط تقيلة
ندى : تسلم
(. ندى وأدهم فى المطبخ ، أدهم بيناول ندى الاكل من الشنط وهى بتحطه فى الفريزر .)
ندى : متشكرة اوى يا أدهم تعبتك معايا
أدهم : تعب ايه يا بت انتِ احنا بينا الكلام الفاضى ده
ندى : اكيد لا طبعاً
أدهم : ندى انا كنت عايز اتكلم معاكى فى موضوع
ندى : موضوع ايه خير
أدهم : هنتكلم فى المطبخ
ندى : اممم لا لا طبعاً ، طيب روح البلكونة وانا هجيب عصير واجى
أدهم : اوكى
(. قدمت ندى العصير لـ بسنت وخالتها واستأذنت منهم وراحت لـ ادهم البلكونة .)
ندى : هاا خير بقى فى ايه
أدهم : بصى يا ندى الموضوع اللى عايزك فيه ده حساس جداً وعايزك تتفهميه انا عارفك ذكية
ندى : اتكلم دُغرى يا أدهم متقلقنيش
أدهم : ...................................