احببتها بكل چوارحي

الفصل الاول

الفصل الاول من رواية(احببتها بكل چوارحي)
بقلم/مريم السيد

خطت مرام أولى خطواتها نحو الجامعه وهي تبحث عن صديقة طفولتها سالي فأمسكت هاتفها وقامت بالاتصال ع سالي فردت سالي فسارعت مرام بالتحدث وقالت بسرعه وعصبيه:انتي فين يازفته هانم انا بقالي ساعه بلف ف الجامعه مش لاقياكي ومش عارفه حاجه هنا وانتي عارفه أن ده اول يوم ليا ف الجامعه دي ياحيوانه
ضحكت سالي وقالت:طب فيه حاجه اسمها السلام عليكم مش الدبش بتاعك ده ع الصبح كده
مرام بعصبية:المهم انتي فين
سالي:هتلاقيني ف كافتيريا الجامعه يافالحه
مرام:طيب سلام بقا رصيدي هيخلص منك لله يا سالي يابنت طنط ام سالي وعمو ابوسالي
ضحكت سالي وقالت:كان زمانك وفرتي الرصيد ده يامعفنه
مرام:يلا سلام
سالي:سلام
وأغلقت مرام مع سالي وبينما هي تمشي تعثرت ف شخص ما وتبعثرت اشيائها فقالت بعصبيه وهي تنظر للشخص:انت يا متخلف ي غبي انت أعمى مش شايف قدامك ولا اي
عمار وهو الشخص الذي تعثر ف مرام قال بعصبيه:والله انا اللي متخلف ولا حضرتك يا مهزئه هانم اللي ماشيه تخبطي ف خلق الله ع الصبح وبعدين انتي ماتعرفيش انا مين ي غبيه انتي
مرام:انت ازاي ي حيوان تكلمني كده وبعدين هتكون مين يعني چون سينا ولا هولاكو تلاقيك حتى عيل صايع
عمار:اولا الحيوان ده تبقى انتي ثانيا بقا انا اتكلم زي ما انا عايز ثالثا بقا بكره تعرفي الصايع ده يبقى مين
وهنا جاءت سالي عندما لاحظت تأخر مرام فذهبت للبحث عليها ووجدتها تتعارك مع عمار فقالت:في اي ي مرام
مرام :المتخلف ده وقعلي حاجتي وخبط فيا
عمار:انتي اي بالعه راديو ع الصبح يابت انتي
مرام:بت ف عينك ي عديم الزوق والأخلاق بقا انت يا حُثاله تكلم بنت رقيقه زي وكيوت كده وبالطريقة دي
ضحك عمار بإستهزاء وقال:هي فين البنت دي معلش مش واخد بالي
مرام بعصبيه:اه يا حيوان يازباله انا مرام واحد قذر زيك يكلمني كده
عمار:اصل انا بصراحه مش شايف غير سواق ميكروباص بيتخانق معايا
مرام:انا سواق ميكروباص ي كلب البحر انت
عمار:انا اسف لان سواق الميكروباص أرق وانضف منك
سالي بصوت عالي نسبياً:خلاص بقا بقالكوا ساعه بتتخانقوا واقول هيخلصوا ودول ابدا ماعندكوش دم انتو الاتنين
مرام:هو اللي بدأ الاول يا سالي
عمار:طب بس ياهبله انتي بس بدل ما اجيبك من طرحتك دي دا انتي شوهتي سمعة الحجاب حسبي الله فيكي يا شيخه
سالي:يلا ي مرام وانا اسفه يا استاذ
مرام:انتي بتتأسفي ع اي ي حيوانه انتي
سالي:يلا يامرام
وأخذت سالي مرام وذهبوا حيث محاضراتهم ف اليوم هو اول يوم لهم ف جامعة القاهره ف هم كانو ف جامعة الإسكندرية ولكن انتقلوا القاهره بسبب أعمال والديهم ف والد مرام ووالد سالي اصدقاء وشركاء ف العمل وهم الآن ف السنه الثالثه كلية التجاره قسم اللغه الانجليزيه
دخلوا مرام وسالي حيث مكان المحاضره وجلسوا فسمعوا أحد الفتيات تقول:الدكتور أتأخر النهارده
فردت أحد الفتيات وقالت لها:بس يخربيتوا قمر اوي
فقالت لهم فتاه:بس بقا للدكتور يدخل دلوقتي ونسقط كلنا وهو اصلا نفسوا يسقط الدفعه كلها
فقالت سالي بهمس لمرام: ربنا يستر شكل الدكتور اللي بيتكلموا عليه ده صعب اوي
مرام: ربنا يستر بقا ويخلصنا منها ع خير
وماهي إلا دقائق ودخل الدكتور وكانت مرام تتحدث مع سالي فسمعت إحدى الفتيات تقول:الدكتور دخل يابنات
فرفعت مرام نظرها حيث يقف الدكتور وكانت الصدمه وسمعت سالي تهمس لها بخوف:يالهوي دا الواد اللي انتي اتخانقتي معاه تحت يعني ساقطين ساقطين بإذن الله
مرام تنظر لعمار بصدمه فوجدته يبتسم لها ويرفع حاجبه الأيمن ويغمز لها
فخجلت وشعرت بالخوف لأنها تمادت معه ف الشتائم

وبعد مرور ساعتين انتهت المحاضره الاولى وذهب كل الطالبات والطلاب وبقى ساره ومرام وعمار فوقفت مرام وساره لكي يذهبوا فأقترب عمار من مرام وهمس لها قائلا: عرفتي بقا العيل الصايع يبقى مين
حاولت مرام تدارك الأمر فقالت بضحكه بلهاء: انت يتصدق يا أستاذ يادكتور يا باشمهندس دا انا كنت بهزر معاك
عمار وهو يحاول كبح ابتسامته قال: لا والنبي بقا موشح التهزيئ اللي كان تحت ده كان هزار
مرام:يووه جاتك اي ي دكتور
عمار وهو ع وشك الانفجار من الضحك قال:انتي بتقولي للدكتور بتاعك يووه جاتك اي
سالي:خلاص اسفين يادكتور
مرام بهمس لسالي:بردو هتتأسفي ي حيوانه للدكتور الأهبل ده
سمعها عمار وقال لها: نهارك اسود منقط بكحلي ان شاء الله بقا انا دكتور اهبل يا متخلفه لاحظي اني الدكتور بتاعك يابت انتي
مرام وهي تضرب ع صدرها بطريقه مضحكه قالت:يالهوي ياخراشي يامصيبتي هو انت سمعتني يا اسمك اي انت
عمار:اسمي عمار ياختي
مرام:ماشي يا استاذ يادكتور ياباشمهندس تستأذن احنا بقا علشان ننزل نفطر لأننا جعانين وانا لما بجوع بتحول زومبي
عمار:طب يلا يابت من هنا قبل ما اعملك فصل من الجامعة كلها
مرام:ماخلاص يا ابني عرفنا انك دكتور وتعرف تفصلني وتسقطني وكل الكلام الفاضي ده
عمار:ابنك 😮
مرام: يعني انت سبت كل ده ومسكن ف كلمة ابني
عمار:يا بنتي انا لو كنت اتجوزت السنه اللي فاتت كنت جبت واحده قدك
مرام:والنبي انت حلو وقميصك حلو وخساره ف الجواز
عمار:انتي هبله يابت
مرام:لاء انت اللي اهبل يادكتور
وذهبت مسرعه ولحقتها سالي فانفجر عمار من الضحك وقال:البت دي هبله بس يا انا يا انتي ي مرام هانم ياللي عملالي فيها چنكيز خان ف نفسك

بعدما نزلت مرام ظلت سالي تضحك وقالت لمرام:انتي مصيبه يامرام دا الدكتور مش بعيد يفصلنا من مصر كلها مش من الجامعه بس
ضحكت مرام وقالت:دا اهبل اوي بس بصراحه موز وقمر كده ف نفسه بصراحه تحسيه نضيف كده ف نفسه تتوقعي بيستحمى بشاور چل ولا بصابونه لوكس
انفجرت سالي ضحك وقالت:يخرب عقلك يا مرام دا لو سمعك هيعلقك ع باب الجامعه
فسمعوا صوت يقول:بس انا كنت عايز اقولك يامرام اني بإذن الله هعلقك ع باب زويله
نظرت مرام خلفها وقالت: يخربيتك هو انت عفريت ولا فُرقع لوز ولا اي بالظبط انت بتطلعلي ف كل حته
عمار بإستفزاز:تقدري تقولي اني عملك الاسود ف الحياه يا مرام هانم
مرام:اللهم طولك ياروح
عمار:انتي لحقتي تزهقي مني اومال هتعملي اي السنين الجايه وبعدين دا انا حتى حلو وكيوت وقمر
مرام:طب مش ممكن يادكتور تسيبنا بقا تقعد مع بعض انا والبت الغلبانه دي
سالي بضحك:اوالله انا غلبانه اوي معاكم
ذهب عمار فقالت مرام:شوفتي قليل الزوق مشي من غير ما يقول حتى سلامو عليكو تحسيه إن كان قاعد مع كفار
ضحكت سالي وقالت:طب يلا ياختي خلينا نروح نكمل محاضراتنا

بقلم/مريم السيد
اتمنى الروايه تعجبكوا وتقولولي رأيكم لان دي اول روايه اكتبها فرأيكم يهمني جدا وبإذن الله لو لقيت تفاعل هكمل واقولكم ع المواعيد اللي هنزل فيها البارتات
بحبكم ف الله💙