قضايا مجتمع

البارت الاول "حب ظالم"

سلسلة قضايا مجتمع
القصة الثانية " حب ظالم " ✨
البارت الاول
.
.

هادي >> اوووو ريو
انا >> ايوا
هادي>> خميس اليوم مافيش سهرة
انا >> عمري حرمتكم من سهرة الخميس انا ؟
هادي >> انقنك يا ريو اصلي
انا >> تم يا معلم نتلاقو فالليل

سكرت الخط وكان في مكالمة ثانيه

انا >> ازززززح سكنان علي ام الصبح
جود >> ريان عصر !
انا >> مش قايل الامك ما ترنيش لعند نرن
جود >> ما تحكيش معايا هكي ؟
انا >> زمري شن تبي ؟؟
جود >> خلاص ياريان اوكي

صكرت من جود و عزقت التلفون وصبيت خشيت للحمام ندوش ....

شويه وطلعت من الحوش وانا راسي مصدع ، خذيت قهوة من الكافي و قعدت مقعمز فالسياره ومنزل الروشن

هادي >> كنك ما قتلي طالع
انا>> اركب ما تنفخهنش
هادي>> كنك فاصل
انا >> شي مصدّع بس

.
.
انا ريان ، بس معروف بـ ريو ، عمري ٢٦ سنه
هلي خاطبيلي بنت عمي " جود " علي امل اني ح نعقل يعني 🤷🏻‍♀️ نقوللكم حاجه انا مانعرفش نحكي علي روحي ، شوفو جود حافظتني حفظ
.
.
.
جود

انا جود بنت عم وخطيبة رِيو ، عمري ٢٢ سنه نقرا سنة ثالثة صيدلة ..اكيد رِيو دزكم هنا
ماهو عارفه مستحيل يفلح ف حاجه .

انخطبت الريان خطبة تقليدية ... بات ريان طلبني من بابا عشان ريان كثرن مشاكله ووجيجه ويبوه يعقل ، واللي ح تعقله من ؟؟ جود اللي هي اساسا ما فيهش عقل !

قبل ما يجي عمي ويخطبني الريان كنت انا معجبة بـ ريو ! ريان ما فيش مكان يجي فيه الا وهو فارض روحه فيه ، رغم انه ك شخص مش الحد الي البنات يتمننه !
محدش يتمني يكون اللي يحبه متاع سهر و بنات و شرب و كل حاجه وسخه فالدنيا !

قلت اكيد ريان ح يحبني ، وحـ يعقل زي ما هما يقولو كان كل يوم يمر وانا اللي نحب ريان ! انا اللي ننجن بريان ! علي قد ما كان وسخ بس كنت نحبه واصلة لمرحلة الهيام اللي هي اصعب مرحلة من مراحل الحُب واخطرها

حابين تعرفو شن وساخة ريان ؟ اليوم خميس امشو شوفو بروحكم 🤷🏻‍♀️

.
.
.

ريـان
لاء هنا تعالولي انا الكوره في ملعبي جود مش ح تعرف تحكي 😂

وصلت للمزرعة و كانو الشباب سابقيني غادي بنات و شرب و كل شي فيه

سعد >> وصل الكابو
انا >> كنك معبي المكان بنات من وين جايب امهن
سعد >> شغل نظيف ما دور شي
انا >> سعد فكني من ام المشاكل مش ناقصني
سعد >> غير فكني من عصبيتك الزايده وامسك

انا خذيت منه الكبايه و طلعت قعمزت برا

هادي >> لا اليوم الكابو مش رايق
ريان >> يارا مافيش شي مليت بس
هادي >> جوا كلهم يسألو عليك
ريان >> من ؟"وغمزله"
هادي>> رشا تبيك 😂
ريان>> قوللها جايك
هادي >> ايوه هكي انت ريـو صح 😂