قضايا مجتمع

البارت الاخير " علي حافة الهاوية"

"ماتنسوش اللايك قبل ما تقرو"
.
سلسلة قضايا مجتمع
القصة الثالثة والاخيرة  "علي حافة الهاوية"
البارت الاخير
//
//
خشيت لقيتها طايحه في نص الدار معش عرفت شن ندير  قعدت انادي عليها بصوت عالي

انا >> ماما مااامااا ؟؟ وقعدت نخبط فيها علي وجها وعلي طول دموعي نزلن

خش اوس بسرعة لما سمعني نعيط  بصوت عالي لقاني حذا ماما وهي طايحه علي طول طيران ركب كلم امه نزلت قعدت تهدي فيا ولبست ماما علي خشت سالم انفجع ومعش فهم شي

رفعها وحطيناها في سيارة اوس ومشينا بيها شور المستشفي

//
//

بعد ساعتين

طلع الدكتوروقاللنا ان ماما جتها جلطة ومعش تقدر تحرك الجهة اليمين كلها و لازم تقعد فالمستشفي يومين عشان مازال في احتمال خطر علي حياتها

كنت مقعمزه عالكرسي و شكلي منتهي من البكاء ونفكر في ماما بس ما فيش في عقلي الا هي

مقابلني سالم حتي هو مقعمز بس في عقله مليون فكره اولهن ماما وثانيهن كيف بيدفع تكاليف المستشفي و العلاج وكل شي هي صح مش مستشفي خاصه بس اقل شي بدير صوره وتبي دوا وهذينا كلهن مش في مقدورنا ، رفعت راسي بحتت فيه وفهمت من نظرته كل شي يفكر فيه

اوس >> هاك اشرب
سالم>> تعبت روحك معانا والله خلاص اربح

برم اوس عليا ومدلي قهوة و رد بحت في سالم >> عيب ياراجل الناس البعضها

سالم>> بنشوف الدكتور انا تو نجي

مشا سالم للدكتور وجا اوس قعمز مقابلني في مكان سالم

اوس >> اوى
انا بحتت فيه
اوس >> الدكتور قال كويسه مش حايسير شي ماتخافيش
انا >> انت مش فاهم شي ، مش فاهم نحن كيف حياتنا ! نحن حياتنا كملت كلها كفاح و ذل .. ماشفناش يوم راحه ، فقر و قهر و ذل وكل شي شين شفناه وكافحناه مع بعضنا قدرنا نعيشو لعند اليوم عشان نحن مع بعضنا ، لو ماما يصيرلها شي انا حاندمر
نحن طول عمرنا عايشين علي حافة الهاوية بس لو ماما تصيرلها حاجه حا نكونو فالهاوية مش بس في حافتها .

اوس جا قعمز جنبي >> ماتخافيش عمره ربي ما ينسى حد وكل شي صارلك في حياتك وواجهتيه في اجر لكي واكيد تعلمتي منه واستفدتي منه

انا  بحتت فيه وتنهدت >> الحمدلله

//
//

مرة الليلة علينا وانا وسالم فالمتسشفي مع ماما ومقعمزين عالكراسي واوس ما سيبنش ولا ثانيه ، كان باين عليه واجعه حالنا سالم صغير وانا بنت بروحي ومش قد الحمل لي انا فيه .

فاللحظات هذينا كلهن والجو المتوتر لي انا فيه جت في بالي صورة لقمان ، ماكنتش عارفه ليش بس جت صورته بين عيوني و تخيلت روحي اني انا معاه و انه حياتي اسقمت احسن من هكي !
حسيت روحي نبي اي خيط نتعلق فيه عشان نطلع من الهم اللي انا فيه ! ضعفت بكل و حسيت روحي منذله فاللحظة هذي و عديمة فايده و كل المشاعر المش حلوه تجمعن في قلبي .
.
.
.
في الصبح ، قاللنا الدكتور ان ماما حالتها مستقره بس مازال الخطر ما نزاحش من عليها و لازم فيه صوره اديرها عالقلب عشان يتآكدو من صحتها والصوره تبي فلوس