كرامتي فوق كل شيء⁦❤️⁩⁦❤️⁩

الحلقة 6

رجع عمار وليليا لدار فرحانين ليليا خلصت 5 ملاين هو طاح 4 ملاين و600 مي نبيل قلهم مدولها 5 ملاين مي هي محبتش دات 4ملاين و600 حقها رجعت لدار قعدت مع يمها وخوتها تعشاو ومبعد راحت مدت لأية مئة ألف وأمين كيف كيف ومدت باباها 500 ويمها 500 ليليا دايمن هكذا كي تخلص تمدلهم كامل راحت دست هذوك 3 ملاين لي بقاو كشما تسحق ولا كشما تحبها كوموند وخدخرا تشري بيهم دوزان 
صباح نهار جديد ناضو كامل راحو يقراو راحت ليليا للجميعة تلاقات بروان وسعيدة قروا td  تاع engl ومبعد راحو عند للفوايي خلصتلهم ليليا واش حبو وقعدو فجردان مقصرين ويضحكو وهما قاعدين ليليا جاتها فكرة
ليليا: واش رأيكم كون نروحو للمناج 😍
سعيدة: مون راجلي ميبغيش
ليليا: رآه عاقد عليك واقيل
روان : لي يسمع تقول صح راجلك مشي يمشي معاك
ادريس: راكم تهدرو عليا واقيل
ليليا: سبحان الله هدر على سبع يهدف رانا رايحين للمناج وسعيدة تروح معانا
ادريس : وحدكم؟؟
ليليا: علاش رانا صغار واقيل
ادريس : ايه مكاش لمروح وحدكم نروح معاكم ولا مكاش
ليليا : شوف اسيدي حكم في حنونتك بزاف اااو لمهم رانا رايحين لي بغا يجي يجي
راحو كامل طريق كاملة وروان ليليا يديرو فسمير ويضحكو وناس كامل تشوف ليهم لي يشوفهم يحسبهم ذراري صغار ماتبهليل تاعهم  وادريس يمشي هو وسعيدة ويتمعشقو وساعة ساعة يزقي على ليليا وروان باش ينقسو تبهليل وسمير وصلو للماناج وتقلع ليليا وروان يجرو ومعلابالهم بحتى واحد وروان تمشي مع مسعود سعد تاعها أي حركة تعتبر غش ههههه مكاش كيفاش تتحرك قااع كي تكون معاه لمهم لعبو كامل لي جو ادريس هبلووه حلف ميزيدش يخرج معاهم وسعيدة فرغتلو جيبو من لعبة لعبة وروان خلصت عليها ليليا كملو لعب راحو شراو ماييز  ورجعو لدار مكانش معاهم ادريس كملو سمير تاع صباح ونضمت سعيدة للمجموعة تاع سمير يمشو ويتبهلو حتى فات عليهم جان
جان: واش واقيلا خصكم سوسات
روان : ديها لختك
جان:😦
ليليا: ضرك يلسق فينا
سعيدة : متخفيش يبان 106
سمعها هذاك جان كي قالت 106
جان: اااي انتي
وهوما غير شافو وجهو قاسو لماييز وهدو يجرو وهو يجري حتى قريب وصلو للحومة تاعهم كي بعدو قتلهم سعيدة صايي خاف راح
ليليا وروان : بلعييييي
سعيدة: وااش دخلني انا قتلو اجري مورنا
وطرطقو كامل بضحك على رواحهم على كبرهم يجرو فزنق كملو يمشو وراحت كل وحدة لدارهم
ادم بدأ لخدمة مع باباه ونبيل علبالو بل خطة تاع ادم رآه حافظ طبايعو
خرجو ادم ونبيل مشركة كيف كيف وراحو لدار فطريق نبيل : ادم هذا شهر مكاش خلاص علبالي واش راك دير
ادم : كيفاش مكاش خلاص هبلت واقيل نبقا هكذا ياك راني نخدم
نبيل: راني نعرف خدمتك كيفاش دايرة حتى نتأكد بلي صح راك ناوي تستعقل وتخدم من نيتك كيما خوك باش تخلص
ادم : 😡
وصلو لدار قعد نبيل مع مليكة فصالون مجمعين وبدا نبيل يحكي لمليكة على ليليا وعلى حلوتها وشطارتها وتربيتها
مليكة: نبيل دايمن تهدر تهدر على ليليا وعمار راني حابة نشوفهم سوغتو هذي ليليا بغيتها بلا منعرفها
نبيل: ارواحي لشركة وانا نعيط ليليا وجمعو وتعارفو
مليكة : لالا عيطلهم وعرضهم لفطور ولا عشاء عندنا فدار هكذا خير نتعرف على قاع لعائلة وزيد انت قتلي ناس ملاح
نبيل : صح هذي فكرة مليحة والله
مليكة: ايه باينة فكرة مليحة بسكو انا قلتها😌 هههه
نبيل : امم حوحو يشكر روحو ايه ق ليلي وقتاش نعرضوهم
مليكة : غير غدوة ليوم الاثنين يتسما نهار الاربعاء قلهم يجو 
نبيل: ميكون لاخاطرك غدوة نقول لعمار
مليكة :لالا قلو ضركا
نبيل : راكي مقلقة اس
مليكة: ايه
نبيل : الو عمار راك مليح
عمار : الحمد لله سوالا عليك ياك غير لخير مكان والو فل خدمة
نبيل: خير خير كون تنقس شويا متخمام فل خدمة  عيطت باش نقلك بلي راكم معروضين عندنا فدار للعشاء نهار الاربعاء انت ول عائلة
عمار: ان شاء الله  ياربي
نبيل : سلملي على ليليا بنتي وتصبح بخير
عمار : يوصل وانت من اهل لخير
عمار قال لعائلة على لعرضة تاع نبيل
فتيحة : واش ندولهم معانا
عمار : نبيل يموت على الماكلة
ليليا: واش يحب ياكل
عمار : بقلاوة بزاف
فتيحة : ليليا ديريلو سنيوة بقلاوة كيما لي درتيها لخالتك كي تزوجت
ليليا : نشاء الله

اذا عجبتكم لحكاية قولولي باش نكملهالكم 🙂