《18》
بعد ماحس محمد ان حنان ارتخت .. بعدها عنه و رفع راسها
محمد:حنااان ..حنااان ..
ضربها على وجهها يبيها تفيق .. بس حنان مافاقتش ..حركها ..مافاقتش .. خاف عليها قلبه قعد يدق حس روحه انه مستعد يخسر كل الدنيا بس حنان لاا..رقى فوق جابلها وشاح و دجاكه سترهم بيها و رفعها ب ايديه ..
ضمها لحضنه وكأنها طفل صغير .. حطها في السياره و مشى بيها للمستشفى.. وعيونه يدمعو من الخوف عليها.. في هديك اللحظه تاكد انه يحبها و انه مستعد يعطيها عمره كله عشان تعيش و مايصيرلها شي ...و انه مش حيخليها تمشي و اتسيبه لو مهما صار..
........
منذر في مكالمة فيديو مع آيه ...
آيه بصوت ناعم:حححبي ...
منذر:عيوونه..
آيه بدلع:مش قلت تبي تفتحلي مشرووووع..
منذر وعقله فيها:ايه قلت ..
آيه:وانت معودني انك رااجل قد كلمتك صحح..
منذر بفخر: طبعا ياعمري ..
آيه:اااامممم ..في ارض تجاريه صاحبها يبي يبيعها..نبيها نبي ندير عليها مشرووع ..
منذر سكت ..
آيه :هااه شفت كيف غيرت كلامك زعلت اني ..
حطت يدها ع خدها ومدت شفايفها ☹..
منذر:زعلتي حبي..
آيه ماردتش عليه ..
منذر سكت شوي .. وتكلم:حاضر حاضر اساسا بكرا بنفتح الخزنه متع امي وناخد منها فلوس و نفتحلك المشروع اللي وعدتك بيه..
آيه: امووووواااه نحبك اني نحبببك..
.............
محمد نزّل حنان من السياره و هي مزال مش واعيه .. خش بيها الطوارئ وهوا رافعها و يحكي مع الممرضات بالانجليزي ..
محمد:انها زوجتي ارجوكم ساعدوها..
جت ممرضه تجري دلاته على طريق غرفة الطوارئ بسرعه ماجاها دكتور و أشرف على حالتها و طلعو محمد برا من الغرفه..محمد سند ظهره ع الحيط و قعمز ع الارض و هوا في حاااله ،دموعه ينزلو وقلبه يدق من خوفه عليها ...
محمد:يارب رجعها ليا ..يارب ..البنت تعذبت فحياتها..يارب رجعها ليا باش نعوضها عن كل شي 💔
.........
فاطمه حطت راسها ع المخده تبي ترقد ..شوي و جتها كحه قويه ..
فاطمه:مش عارفه شنو هالكحه اللي شادتني من شهر..خذيت دوا ومابتش تمشي..
واستمرت اتكح اكثر من قبل ..حطت يدها ع فمها من قوة الكح ...نزلت يدها ..ولقت دم في يدها ..ثواني واستطعمت الدم في حلقها ..
فاطمه:دم ... من وين جي ..
سكتت اتخمم في الدم و السبب لين جاها النوم و رقدت ....
.............
بينما محمد قاعد على اعصابه يراجي في الدكتور يطلع و يطمنه على حنان..قلبه خايف عليها يتمنى يحطها في قلبه و يسمر عليها و يحميها من العالم كله .. دقيقه و طلع الدكتور ..
محمد بلهفه:اخبرني يادكتور كيف حال زوجتي؟
الدكتور: انها بخير الآن حالتها مستقره..
محمد:ماذا حدث لها؟ لماذا فقدت الوعي؟
الدكتور: يبدو انها تعرضت لعدة صدمات او تراكمات جعلت اعصابها تنهار..
محمد نزل راسه وسكت:حسنا يادكتور ..شكرا لك.
الدكتور:يجب ان تحافظ على حالتها النفسيه.. ..ارجو ان تعتني بها ..
محمد:هل استطيع رؤيتها الآن؟
الدكتور:نعم تفضل ..
مشى الدكتور ومحمد اعصابه تالفات مش عارف كيف بيخش و يشوفها بالحالة هادي...
استجمعت قواه و خش محمد ل حنان ..لقاها راقده.. في هدوء عكس الحاله اللي كانت فيها قبل ما اتدوخ .. قعمز على الكرسي اللي جنب سريرها و حط يدها بين ايديه .. باسها على ايديها ..وتذكر كلام الدكتور لما قاله انها متعرضه لصدمات و تراكمات..
محمد بصوت واطي وهوا يشبحلها و عيونه يدمعو:
سامحيني ياحنان اني ماكنتش معاك وقت كانو خوتك يضربو فيك..سامحيني اني ماوقفتش خوي وقت أذاك ..سامحيني اني ما منعتش امي من تدميرك.. ياريتني اني بوك و امك و كل الناس اللي قابلتيهم، ماكنتش خليت دمعه تنزل من عينك، ماكنت خليتك تتوجعي في حياتك ...
قعمز جنبها ع السرير و ضمها لحضنه بهدوء ..باسها على راسها ..
محمد:نوعدك اني من اليوم ندير المستحيل عشان تكوني فرحانه و مرتاحه و عشان انسيك كل الهم اللي عشتيه..نوعدك اني نكون معاك و وراك و قدامك ولو فكر حد مجرد تفكير ان يأذيك ..حنحفر قبره ب ايدي ..
حنان :نزلت دمعه من عينها و هي راقده ..
حس بيها محمد ..عرف انها كانت تسمع فيه ...زاد محمد ضمها عشان يحسسها انه
"موجود هنا و انها في حمايته"❤
...........
ايناس ماشيه للكافي متع العمل لاقاها مهند في الطريق..
مهند:مرحبا ايناس ..
ايناس وهي متحشمه منه:اهلين استاذ مهند
مهند عرفها منحرجه: ايناس عرفت من هوا صاحب الرقم ..
ايناس رفعت عينها و هي تراجي في الاجابه ..
مهند:تعالي ..
مشى مهند لمكتب ايناس و منى،و ايناس وراه ..
خشو المكتب و كانت منى مقعمزه ع مكتبها ..
مهند :اهلين منى ..
منى ابتسمت:اهلين استاذ مهند..
ايناس مستغربه من تصرف محمد و علاش جابها لمكتبها هي و منى ...
مهند طلع ورقه مطبقه .. فتحها و حطها على طاولة منى ..
منى مافهمت شي .. بس بعد ركزت القت خريطة فيها موقع حوشهم من شركة الاتصالات و في راس الورقه مكتوب الرقم اللي تبعث منه في الرسايل ل ايناس ..و تحت الورقه كشف بكل الرسايل اللي بعتتهم ل ايناس ..
ايناس ركزت و عرفت ان اللي كانت تبعت في الرسايل منى ..ايناس تشبح ل منى بصدمه
ايناس: انتي ؟؟؟؟ ....وعلاش؟؟
منى انحرجت وعرفت انهم كشفوها .. كانت تبي تطلع من المكتب بس وقفتها ايناس و مسكتها من يدها.. تلفتت منى ل ايناس ..
و ايناس ماقدرتش تمسك نفسها عطتها كف على وجهها "زي مايقولو كف لايقرا ولا يكتب😂"..
ومهند واقف يتفرج ماسك ضحكته من تصرف ايناس..
منى سكتت لانها عارفه روحها غلطانه و ماعندهاش تبرير لعملتها الا الحسد و الغيره .. كانت تبي تطلع ..وقفها هالمره صوت مهند يوجه في كلامه ليها بس عيونه في عيون ايناس
مهند:دقيقه يامنى .. انتي أذيتي شخص مهم عندي مانرضاش فيه حاجه ... عشان هكي خودي شنطتك و لمي حاجاتك..وفوتي على قسم الحسابات خودي اتعابك ..و وجهك معاد نبي نشوفه هني.. انتي مطروده
..
ايناااس عيونها قلوووب و قلبها محزم و يرقص من كلامه عنها و نظرته الساحره ليها نستها منى و اللي داراته منى ..
منى زادت ماتت من الحسد و الغيره و عرفت روحها انها فشلت وانها بالعكس ماكانت الا "كوبري" قدرو بيه مهند و ايناس يتقربو لبعضهم ❤..
طلعت منى من المكتب ومن العمل .. وخلت مهند و ايناس في المكتب ..
بينما مهند شاف لايناس و قال :
ايناس.. اني شاب دغري ومانحبش انلف و ندور..
انتي عاجبتني من فتره ..لو ممكن تعطيني فرصه نتعرف عليك اكثر ..تعرفي طبعي و نعرف طبعك ..نيتي صادقه و ناوي الحلال معاك..
ايناس نزلت راسها وابتسمت: تمام ..يصير خير..
ابتسم مهند و تبادلو الارقام❤
..........
محمد مزال حاضن حنان يراجي فيها تنوض و يفرح قلبه بشوفتها.. رنت عليه امه ..سكر عليها... حس روحه ما يبي يسمع صوتها ،بعد ماعرف حقيقتها ..امه اللي رباته تطلع في الاخر ظالمه..
حط يده على شعر حنان و قعد يحرك فيه باصابعه..غطاها كويس و قعد يشبحلها ..خايف يرقد ويغفى عنها و يصيرلها شي ..وكأنه يبي يحميها بعيونه ..مايبيش شي يأذيها ولا يجرحها ولا يخدشها حتى الخدش .. محمد حب حنان حب صادق، حب تحلم بيه اي بنت من شخص زي محمد، حنان البنت اللي عاشت طول عمرها في خوف و تعنيف و تعذيب من الذكور ،ربي عوضها بحب راجل يبيع الدنيا عشانها ❤
