《11》
فتحت عيونها..تفاجأت لما لقت محمد يشبحلها و مقرب يده يبي يلمسها .. فزعت و ناضت قعمزت تشبحله و هي مستغربه.. محمد لما شافها فتحت عيونها.. رجع يده مكانها و مزال عيونه معلقات في عيون حنان..
محمد: اااا كنت ..ااا ..." قعد يدور في سبله يبرر بيها موقفه"
حنان ساكته و تشبحله شافت فعيونه نظره حبتها حست بقلبها يدق بسرعه دقات حلوه ...
محمد نزل عيونه بسرعه ووقف: كنتي تشخري وانتي راقده كنت بنوضك باش ماتصمخيني..
حنان تنرفزت من كلامه: اني مانشخرش ولا عمره حد قالهالي..
محمد بعصبيه: حتى احمد ماقالهاش ليك..
حنان زادت نرفزتها حساته مستقصد يعصبها حبت تستفزه:احمد حتى شخيري كان يسمع فيه زي الموسيقى ..
محمد النار ولعت فيه ،الدم قعد يغلي في عروقه من غير مايعرف علاش وشنو السبب.. بعد عنها و شبحلها نظره من فوق للوطه وقال: قالوها الشباب ..عمرك ماتاخد وحده لمسها حد قبلك حتى لو كان لمسها بالحلال يا كون الاول في حياة زوجتك يا موت اعزب...
حست حنان بكلامه زي السم في عروقها ،عطاته نظره وجعاته في قلبه، رجعله احساس الضعف قدام عيونها الاحساس اللي يكرهه اللي يخلي فيه يهرب من قدامها كل مايحس بيه .. كان بيمشي بيهرب عطاها بظهره و مشى خطوات ..بس وقفه صوت ضحكتها الموجوعه..
حنان بضحكه موجوعه : هههههه.... لمسني ...هههههه.
تلفتلها محمد .. شافتلا و هي مزال تضحك و مشت رقت فوق .. خشت لدارها ..سكرت الباب عليها دفنت راسها بين الوسايد وقعدت تبكي ...😭
محمد واقف في مكانه مستغرب من ضحكتها و كلامها و ردت فعلها ،مستغرب من كل تصرفاتها ،و زااد حط علامة استفهام اخرى على قصتها اللي بالنسبه ليه زي اللغز ...
رقى محمد فوق و وقف قدام باب دارها ..سمع صوت حنان تبكي ..حس بالذنب ..وحس روحه قسى عليها في الكلام..تمنى يخش يتاسفلها و يفهم منها كل شي..تمنى يخش يمسح دموعها.. صارع نفسه و رجع خش لداره..حاول يرقد بس ماقدرش ..قعد يفكر في غموض حنان و شنو القصه اللي وراها ..و قرر انه غدوة بيفهم منها كل شي..
محمد عكس خوه احمد ..قلبه طيب وحنون و عنده مبادئ محافظ عليهم ،مايحبش يظلم حد ولا يستضعف حد ...
اما حنان قعدت تبكي واجعها خاطرها، لعند وصلها مسج من ايناس..
ايناس:ياالحب وينك ..
حنان:تعبانه يا ايناس ..
ايناس:شنو فيه ..ضربك محمد؟ شنو دارلك؟
حنان:يمكن الحاجه اللي فيه كويسه هوا انه مايضربش..
ايناس:امالا خيرك؟
حنان:كلامه زي السم ..تعبت من كل شي..
ايناس:شنو قالك؟
حكت حنان لايناس كل شي صار ..
ايناس:ياعبيطه ..انتي توا زوجته كيف تذكريلا زوجك الاول..
حنان:نعرف روحي غلطت..بس هوا استفزني ..و بعدين هوا زواج على ورق بس ..
ايناس:حتى كان ..والله لو راجل ثاني كسرلك راسك..
حنان:هففففف .. تعرفي شنو ..بنمشي نرقد..
ايناس:ديما خلي اعصابك هاديه ..الرجاله مايمشيش معاهم العصبيه ..
حنان:يلااا ..شهور و نفتك ..
ايناس: هاااانت 🤩..هيا بري ارقدي توا
حنان:تصبحي على خير ...
.........
في الصبح نزل محمد من فوق و هوا متكاسل ومزال فيه النوم لانه النوم بعد اللي صار امس ماشافه نزل وكان متوقع يلقى فطور و حنان مقعمزه تراجي فيه زي كل يوم بس مالقاش شي .. خاف عليها خاف ان يكون صارلها شي ..رجع رقى فوق وقف قدام بابها قعد محتار يخبط ع الباب او لا ..
محمد في حديث داخلي وصراع مع نفسه: نخبط عليها الباب.. لالا علاش بندورها شن دخلني فيها اني .. لا عيب ياراجل المفروض تدورها مرات شن صاير معاها.. شنو بيكون صاير يعني.. بس اني خايف عليها !!!.. لا يامحمد لا ماليك دخل بيها علاش تخاف عليها هي توا مزالها 3شهور و تروح و تفتك منها..
وهوا يفكر و يتصارع مع نفسه ..فتحت حنان باب دارها و القاته قدام الباب .. وقفت قدامه تشبحله باستغراب..
حنان: حتى توا شخيري نوضك من نومك ..!!
محمد شبحلها وهوا يدور عن جواب ومالقاش جواب...
حنان فاتت و خلاته واقف و نزلت تجهز في الفطور ..
محمد حس بالاحراج و انه منظره باااايخ .. نزل القاها تحط في الفطور ع الطاوله .. قعمز و شبحلها
محمد: قعمزي ...
حنان بلا ماتشبح فيه : علاش .. عندك اهانات تانيات تبي تقولهم ليا..
محمد بدا يتنرفز يكره معاملتها ليه وكأنه مفترس علا صوته و نبرته قعدت اكثر جديه: قلتلك قعمزي ...
حنان هذا وين تلفتتلا حست بالجديه في نبرته خافت و قعمزت: شنو تبي؟
محمد بلا مايشبح فيها: اني اسف ع الكلام اللي قلته امس ..
سكت شوي و بعدين شاف فيها و قال: وانتي؟؟
حنان ملامحها جامده و عينها ع الصحن اللي قدامها: اني شنو..
محمد: المفروض تتاسفي ..انتي غلطتي في امي ؟
حنان رفعت عينها فيه شوي و بعدها نزلتها : حكيت لامك ع اللي قلته عنها امس؟
محمد وهوا قايم حاجبه فوق 🤨: احني الرجاله مش زيكم الابره لما تطيح تجرو تقولوها لامهاتكم و خواتكم...
تنفست حنان براحه و كأن جبل و انزاح عنها و حمدت ربي ان محمد ماحكاش لامه ،مش زي خوه احمد اللي ابسط شي يضربها و يحكي بيه لأمه ... كبر محمد في عينها و زاد كبر اكثر لما تأسفلها .. سكتت شوي ..
وقالت: اني اسفه.. و ..
قاطعها : من غير ماتكملي ..كلنا ساعات نتنرفزو و نقولو في كلام ماصارش ..
قال كلمته الاخيره و شبح في عيونها بتركيز و كأنه يدور في مصداقية الاتهامات اللي قالتهم في حق عيلته و كأنه يبي جواب هل حق امي و خوي دارو هكي او لا ؟...
حنان لما القاته يشبحلها بتركيز..هربت من نظراته .. ناضت تكمل في تجهيز الفطور...
محمد ماقدرش ينزل عينه منها يركز في تفاصيلها حركاتها التلقائيه ..شعرها البني المطلوق..خشمها فمها حتى اصابعها .. وكأنه اول مره يشوفها..
حنان حست بنظراته ليها توترت ودارت روحها مش مركزه..حطت الفطور و قعمزت و بدو يفطرو..
محمد: شنو تديري في يومك ..قصدي من لما جيتي حتى طلوع ماطلعتيش ..
حنان: نت..تلفزيون..مطبخ.. وهكي
محمد: تلفزيون !!معناها تعرفي تتكلمي انجليزي؟
حنان: لالا نعرفش ..نفهم شوي شوي
محمد سكت يفكر : ممممم ..معناها توا نسجلك في كورس تتعلمي اللغه ..
حنان شافتلا بفرحه : بجديات..
ابتسم محمد لنظرة الفرح في عيونها ..اول مره يشوف شعاع الفرح فعيونها بعد ماكان يشوف في الحزن و بس ..حس روحه دار انجاز عظيم وماكان متوقع تفرح بشي بسيط زي هذا ..
محمد: ايه بجديات ..توا واني طالع نسجلك في كورس ..و بعد العصر جهزي روحك نرفعك تتعلمي..
حنان قعدت تشبحلا بحماس و الفرحه فعيونها..
وقفت حنان ..
محمد: وين نايضه؟ كملي فطورك؟
حنان: بنجهز ملابسي اللي بنمشي بيهم بعدين للكورس ..
ومشت وهوا قعد يضحك على حماسها ،شوي و رجعتلا ..
مسكت يده بين ايديها وبنظره كلها امتنان...
حنان: شكرا يامحمد..
ومشت رقت فوق ..وخلاته هوا في ناره 🔥🔥وقلبه اللي يدق و نفسه اللي بينقطع .. قعد يشبح ليده المتشنجه من لمسة ايدها و يرد في النفس بصعوبه سرحااان في عالم ثاني ❤
.....
