أحلامنا و النصيب

الفصل الأول

《1》

رن تليفون ساره..شافت الرقم ..
ساره:اووففف لصصقه هالولد مش قلتلا خلاص انتهينا.. تي شنو هذاا..
نور:حرام عليك يا ساره يحبك ..
ساره سكرت ع المكالمه و حطت الرقم في الحظر ..
ساره:اهو حظرته ..
نور:سبحان الله ..الشباب مايجروش الا ورا اللي تفوتهم.
ساره: ااايه ..امالا كيف..هكي نجيب في روسهم..
نور:باهي مرات ناوي الحلال و يخطبك ..احني خلاص اخر سنه جامعه هذا وقت زواجنا..
ساره :اني مانتزوجش اي حد ..هذا تسليه و بس..
نور:عكسي اني ..لو فكرت نكلم حد يا نكلمه زواج يا مانكلماش ..
ساره:لانك هكي عمرك مابتتزوجي عن حب ..
نور:علاش؟؟
ساره:لأنه اللي بتكلميه بجديه و تبدي قاصده الحلال معاه ..حتهتمي بيه وتحبيه ..و لو اهتميتي وحبيتي انسسسي يتزوجك ..حيفوتك ..لانهم مايبوش غير اللي تلصقهم ع الحيط..
نور: يمكن ..مش عارفه..
ساره :تعرفي شنو؟ ..لما تلقي حد عاجبك قوليلي عليه واني نعطيك الخطوات باش اتطيحيه ..
نور قعدت تضحك :خلاص تمام..
ساره:غير السر امتاعك اللي حكيتيلي عليه ماتقوليش لأي حد تبي تتعرفي عليه ..
نور سكتت و عيونها بان عليهم الحزن ...
ساره:خيرك زعلتي ياعمري ..مش قصدي والله ..بس لمصلحتك يعني ..مافيش شاب بيتزوج بنت تعرضت للتحرش هلباا..
نور وعيونها في ساره: خلاص يا ساره ..معادش نبي نتذكر..
ساره طبطبت على صاحبتها: اااسفه خلاص خلاص ..
سكتت نور و عيونها سارحات في الماضي اللي عاشاته من لما صغيره ...!
......................
خديجه طالعه للجنان تعكز ...
خديجه:يوسف يا يوسف ..
يوسف طالع من المربوعه: نعم امي..
خديجه:وين خوك خالد.. روح من الجامعه..
يوسف: لا مزال ماجي ..قاعد شادها دهواري غادي..
خديجه: اسكت ماتقول على خوك هكي تو ربي يهديه ..
يوسف :هذا الحق..انداده تخرجو و خدمو ع راسهم و هوا قاعد عاله يشرب و ياكل بلاش ..
خديجه:تحسب فيها على خوك..هكي علمتكم اني .. قعدت عليكم عمري كله نربي فيكم و ف الاخير هكي تقول على خوك..
يوسف قرب من امه وباسها على راسها: لا يا امي..اني والله نبيه يكون راجل و يعتمد على روحه ويحس بمسؤليه شوي..
جت منار لخوها كرتلا شعره بالقوه وقعدت تضحك..
يوسف ينحي في يدها من شعره:اااي شعري ..خيرلك راهو..
منار:هيا ارفعني بناخد ادوات ناقصاتني للمدرسه..ونمرو ع المطعم نبي همبرغر حجم كبير ..
يوسف:و حجم كبير زياده ..مش شايفه وزنك كيف .. ياسرك يابنت مش كويس لصحتك و حتى منظرك هكي قريب تقعدي فيل ..

منار عصبت و مسكت روحها عن البكا ..منار تقرا اولى ثانوي،سمينه هلبا و تتعقد نفسيا لما حد يتنمر عليها و على وزنها ..وكانو ديما يتنمرو عليها في المدرسه ، حتى اهلها في الحوش ،بس اهلها كان قصدهم بصاره مايحسابوش انه الشي هذا يتعب فيها نفسيا ..

منار بصوت حزين:باهي شنو توا بترفعني ؟
يوسف :باهي بسرعه البسي باش نروح ب خالد حتى هوا..

يوسف ولد خديجه الكبير، المرا اللي اتطلقت و قعدت على صغارها عشان تربيهم و رفضت انها تتزوج و تلوح اطفالها، خالد الكبير فيهم عمره 34 سنه شخص جدي و ماعنداش في جو البنات ولا عمره كلم بنت ولا حتى عاكسهم ولايعرف كيف يتعامل معاهم باختصار معاملته جاااافه معاهم و كلامه "دفش" ،خدم على راسه بكري و يصرف ع الحوش كله، بعكس خوه خالد الفاشل الضايع اللي قاعد سنيين يدور من كليه لكليه مافي بنت ماكلمها، لسانه حلو و البنات يحبوه عمره 26سنه، ومنار الصغيره فيهم اللي تعاني من التنمر على وزنها حاولت تنقص بس للاسف كل محاولاتها فاشله..
.....................
روحت نور للحوش تعبانه ..غيرت ملابسها ..وكالعاده تسرح في الماضي متاعها و كل ماتسرح فيه تجيها حالة كره لأمها ..
قطعت شرودها اختها الكبيره نسرين ..
نسرين : هييييييه ..وين هايمه
نور وعيت على روحها: هاه .. تعبانه بس
نسرين :علياااا ..قولي قولي من اللي واخد بالك اكيد تعرفتي ع حد اليوم ..
نور: عارفتيني مش متع الجو هذا ..
نسرين: لانك غبيه ..
نور:تو اللي يسمعك يقول عنك مقطعتها تعارف ..
نسرين:ماهو ما القيتش اللي نبيه ..
نور:وشنو اللي تبيه ..
نسرين : نبيه واحد متع بنات ..في الكلام المعسول ماعنداش يما ارحميني ..
نور:من جدك انتي .. البنت مفروض تدور عن العاقل و انتي تبي الخفيف..
نسرين : هما اللي يعرفو كيف يدلعو البنت ياغبيه .. رومانسيين .. كلامهم حلوو ..اما العاقل جفاااف ياعفاااف ..
نور: سبحان الله تقول اني اكبر منك ع الرزانه اللي فيا مش العكس .. متفهك..
نسرين:وانتي كيف تبيه ياسمحه..
نور بنظره حالمه:نبيه رزين عاقل متعلم خلوق ..هكي الراجل يكون ..
نسرين: الرجوله ماليهاش دخل بالعقل و الخلق ياغبوو .. الرجوله مواقف ياماماا..
نور: ايه ايه صح يكون متع بنات و قوليلي عنه راجل ..
نسرين:تو يضربك الحيط و تقولي قالت اختي ..
شوي و خشت امهم زينب تنادي فيهم ع الغدى ...