أحلامنا و النصيب

الفصل الثالث عشر

《13》

طلعت ساره من الدار للصاله و هي تبكي .. تحاول تلبس ملابسها .... طلع وراها عماد و هوا يلبس في ملابسه ..
عماد: شنو يبكي فيك توا...
ساره : اللي درناه غلط يا عماد .. مفروض استنينه هما شهرين بس و نتزوجو..
عماد بعصبيه : اووووففففف توا ماتقعديش تنقي على راسي .. اني ما اغتصبتك ولا درتلك مخدر...كل شي درتيه بارادتك و برضاك ايوااه..

تفاجئت ساره من كلام عماد... بس سكتت لانه كل كلمه قالها صح ..
عماد: هيا هياا .. بنروحوو .. ورايا مشاوير..
ساره: بس ..
عماد:بس شنوو .. يا نوضي نروح بيك يا اقعدي و دوري كيف تروحي ..

سكتت ساره و دموعها ينزلو .. مسحتهم و ناضت عشان تروح مع عماد لحوشهم ...
..................................
جي المغرب و خالد قاعد يراجي في عماد من الطريق اللي ديما يخش منها لمنطقتهم ... بما انه الفتره الفاتت كاين يراقب فيه ..و لما شاف سيارته مرت .. قعد يلحق فيه و يديرلا في الضي .. لين توهه و دخله في زنقه .. نزل خالد لعماد ..
عماد: انت ؟؟... شنو تبي مني علاش تلحق فيااا..
خالد فتح باب سيارة عماد و طلعه منها .. و نزل فيه ضرب ..
خالد وهوا يضرب فيه و صوته داهش: هدا عشان انك زعلت نور يا ***** ...
عماد وهوا بين ايدين خالد :نور بنت فاسده ... اسألها عن عبدو ..ولياليها معاه يا*****.. ساره صاحبتها و تعرفها اكثر منك حكتلي كل شي
خالد زاد ضربه عشان قال عن نور الكلام هذا .. ضربه لين قريب مات بين ايديه .... لما كمل منه ..كاين عماد ملوح ع الارض وكله دم ..
خالد:كنت نقدر نقتلك ..بس مانبيك تنحسب عليا راجل وانت ***...
ركب خالد في سيارته و مشى ... قعد يخبط في يده ع الستيرسو .. تمنى روحه قتله و قطعه ... كل شي عنده ولا انه حد يوصل في نور....
.................................
نور تضرب على خالد ... خالد شاف رقمها .. درس سيارته هدى شوي ... و رد..
خالد:نورتي.. كيف حالك
نور: الحمدلله...وانت خالد..
خالد:الحمدلله انحس في روحي مرتااااااح
نور:علاش ..
خالد: تعرفي .. ع شوي كنت بنقتله .. بس وقفت .. عندي حياة نبي نعيشها معاك .. مانبيش نكون قاتل و نخرب حياتي ..
نور بصدمه: منوووو .. من بتقتل..
خالد:عماد.. بس يلا اهو خدا طريحه ماكنه ..
نور بخوف: خالد انت وين .. وكيف حالك توا..
خالد:مافيا شي زي الجن..
نور:علاش يا خالد علاش .. قلتلك اني خليتهم لله .. ربي كفيل بيهم..
خالد:مش هامتني ساره،كلبه و افتكيتي منها بس عماد لاا ..كلب و خدا جزاته..
نور: علاش هكي تخوف فيا عليك..
خالد بصوت عالي: وااااااك ياربي اللي تخاف عليااا..
نور: بشويه خيرك خلعتني..
خالد: نحبك ...
نور سكتت ...
خالد:معليش معليش حتحبيني حتحبيني ماهو ماعندكش غيري في الاخير ..
نور : يا واااثق ..
خالد: تو تشوفي ..

نور سكتت و خافت انه عماد يكون حكاله عن شي .. ماتبيش يسمع من عماد تبيه يسمع منها ..
نور: شنو قالك ..
خالد: منو .. عماد
نور:ايه..
فهم خالد من نبرة صوت نور انه فعلا فيه سر و هي خايفته يكون عرفه ..
خالد: يانووور يا وتيني .. مش هامني شنو قال .. ولا شنو يقولو ولا هامني شي .. اني تهميني انتي نور من لما عرفتك ليومنا هدا ... انتي و بسس .. ونعاود و نكرر لو فيك عيوب الكون كله نبيك و ما نبي غيرك .. ولا مليون ساره ولا مليون عماد يقدرو يغيرو اللي في قلبي ليك ....

نور قلبها دق دقة حب .. حست انه خالد عمله نادره و انه راجل عن حق .. و انه زي ماقالت نسرين الرجوله مش شهادات ..الرجوله مواقف و بس..

نور: بس يا خالد فيه شي نبيك تعرفه .. مهما كان حيقعد كلامهم يتردد في خاطرك .. ضروري تسمع مني و تعرف..
خالد: لا كلامهم ولا هما ..مافيش في خاطري غيرك..
نور:بس نبي نحكي ..
خالد:لو تبي تحكي براحتك .. بس نقولك من توا فكرتي عنك نفسها مش حنغيرها ...
نور: تمام...
تنهدت نور شوي .. شدت على اصابعها تحاول تنضم الكلام قبل ما تطلع سرها ليه ..
نور: لما .. لما كنت صغيره .. كان عندي ولد خالي عبدو .. كان ... عبدو تحرش بيا ..
خالد عصر يده و اليد التانيه يكرب فيها ع الستيرسو..
نور: ساره استغلت الشي هدا ... و .. الفت عليا كلام وزادت من عندها لعماد .. وهوا صدقها و سيبني..

خالد بصوت واضح عليه العصبيه: و وين عبدو هدا؟
نور:في كندا .. من لما صغير سافرو برا..
خالد:ماعنداش رجعه هني..
نور:خالد .. القصه ليها سنين .. خلاص كلنا نسينا اللي صار ..
قاطعها: انتي ما نستيش .. قاعد مأثر فيك نفسيا..
نور سكتت ماعرفت كيف ترد..
خالد: نور .. هذا موضوع تافه .. اي طفل مش لاقي ام تهتم بيه و تنتبهله حيتعرضله .. انتي كنتي طفله ماتقعديش تلومي نفسك ووتعذبي فيها بيه لانه مش بارادتك .. وصدقيني حتى لو جتني ساره قبل ماتجي لعماد و الفتلي كلام عليك ..مش حنصدقها و حنعطيها زوز شلابيخ يغيرولها ديكور وجهها .. انتي حبيبتي و اللي اخترتها تكون زوجتي و ام صغاري ...

نور اطمنت مع كلامه وحست انه حمل و انزاح عنها .. هدرزو شوي و سكرو من بعضهم ...
خالد: عبدووو ... امتى بتروح ياعبدوو..!
..............................
نسرين : بالله عليك تبي يجيني فشل كلوي ..توا هدا مسج يبعتوه لخطيبتهم..
يوسف: هااه ..بدينا في النق..
نسرين: الصبر ياربي .. الصبر ..
يوسف يبي يغير الموضوع:شنو حال خالتك هند ...
نسرين: الحمدلله اهي راقده..
يوسف: معليشي تو تنسى..
نسرين: توا كان تزوجنا و صارت مشكله بيناتنا ..تطلقني هكي زيهم؟؟
يوسف رد بسرعه : مستحيل..
نسرين: علاش..
يوسف: لانك في القلب و اللي يخش لقلبي مستحيل يطلع الا بطلوع الرووح..
نسرين صرخت على طول حسها و قعدت تنقز ع السرير لين هند ناضت ...
نسرين :وووووووووه ...ووووووووه ...الحقوني ..قال كلام حلووو .. ووووووه علياااا وووووووه ...
يوسف يسمع فيها و يضحك رغم رزانته لكن يحب هبالها و حركاتها الغريبه ...

لوحت نسرين التليفون و مشت تحضن في هند ..
هند: اسس يا مجنونه الراجل يسمع فيك..
نسرين :اليوم بنسجله في التاريخ و اخيراا نططق ..
مسكت التليفون و كلماته..
نسرين: ترا عاود شنو قلت ..عاود ..
يوسف : نحبك..

نسرين طاح منها التليفون و اغمى عليها 😂
.............................