أحلامنا و النصيب

الفصل الرابع

《4》

واقفه منار تراجي في خوها يروح بيها .. جي نادر قرب منها و كلمها ..
نادر:مرحبا منار ..
منار تلفتتله ونصدمت لما شافاته ماتوقعاته يتجرأ و يكلمها...
منار:اا اهلا ..
نار: اكيد وصلوك مسجاتي ولا ...
منار عيونها في الارض:ااي ..
نادر: منار اني معجب بيك ..ونبي نتعرف عليك اكثر .. حنعطيك فرصه لعند بكرا .. يا انك تردي على مسجاتي .. او اني حنتاسف منك ع الازعاج ..و حنوعدك اني معاد نضايقك..
سكتت منار و ماعرفت شنو ترد .. و نادر مشى و سيبها تفكر .. كانت منار خايفه و في نفس الوقت ماتبيش اتضيع فرصة تعرفها على نادر من يدها .. كانت جنبها مرام .. و سمعت كل شي ...
منار شبحت لمرام: ححي عليا شنو بندير ..
مرام: وافقي ياغبيه ..انتي مش خاسره شي ..
منار:بس خوتي ..حي كان يعرفو يقتلوني ..
مرام: مش حيعرفو ..وانتي قلتيلي مايفتشوش في تليفونك صح ..
منار:اايه اايه ..بس هما كويسين معايا مايستاهلوش ندير فيهم هكي ..
مرام:ع اساس هما مش مصاحبين ..خاصة خوك خالد منو مايعرفه ...
منار سكتت تفكر في كلام منار رفعت راسها القت نادر واقف و يشبحلها بنظرات حب و هيام .. لين جاه صاحبه وقف جنبه ...
صاحبه: تحسها هكي و هي تشبح فيك بتوخر و بتجي تنطحك ..
نادر:اسكت ماتضحكنيش ..تو تشك في مصداقيتي..
صاحبه:زعما توافق ..
نادر: اكيد بتوافق بعد نظراتي هما و مسجاتي ليها ..شن يبو البنات غير نظرات و كم مسج حلو...

شوي و جي يوسف وطلعت منار ركبت معاه و روحت ...
........................
حامد مقعمز مع روحه و يفكر في هند و وضعه معاها و علاش تعامل فيه هكي ...
حامد في خاطره: علاش ياهند علاش ..لو تعرفي حبي ليك من لما كنتي صغيره لعند كبرتي ولعند اخر يوم في عمري و اني نحبك و نموت فيك ..
مش حنخليك ولا بنيأس منك حنقعد وراك لين تحبيني ..

قاطع تفكيره و حديثه مع نفسه صوت هند ..
هند: بنمشي لحوش بوي بنهدرز مع اختي زينب و بناتها ..هيا ارفعني ...
حامد : من عيوني يا عيوني .. هيا نلبس و نرفعك..
هند شبحتلا من فوق للوطه و مشت ..
...................
هند مع بنات اختها نسرين و نور ...
نسرين: وهذا هوا يا هنوده ..غدوه بيجي و بنشوفه..
هند:وافقي كانو كويس ..انت هكي هكي مافيش حد في بالك ..يعني مش حيصيرلك زيي ..
نسرين: مش زي مانبي ياهنوده
هند: بري تزوجي ع حالك توا ياخدو في بنات ال 16 .. وزي ماقلتلك مافي حد تراجي فيه ..يعني تزوجيه وخلاص ..
نور:شنو جوك مع حامد ..
هند: اااااه يا نور ... اقسى شي لما تتزوجي انسان ماتحبيه ..تموتي و انتي حيه ..
نور: بس حامد يحبك .. انسي الماضي و حبيه..
هند:هي ماهيش كبسة زر ..بننسى و انحب.. هادي مشاااااعر مش في ايدينا ...
نور: الله غالب .. حلمتي بشي و نصيبك جاك شي ثاني..
هند: ياارب ماتجربوها .. انه يكونو احلامك مش زي نصيبك..
نسرين: خايفه نكون زيك ..نحلم بصفات معينه .. ونصيبي يكون شكل ثاني ..
نور: انتي سكري فمك ..قاعده تعيشي في مراهقه متأخره ..قال شنو تبيه شوارعي ..
نسرين: خير منك اللي تبيه متعلم و يتفلسف على راسك و مؤدب و دمه رزين وجاف...
قعدت هند تضحك عليهم كيف يتعاركو ...