أحلامنا و النصيب

الفصل السادس

《6》

فرحت نور بكلام عماد ..تبادلو الارقام و حست انها و اخيرا قربت من تحقيق حلمها في انها ترتبط بشكل رسمي من راجل زي المواصفات اللي هي تحلم بيهم ...
و زي عادتها اتصلت بصديقة عمرها ساره عشان تحكيلها على اللي صار ...
نور: و اخيرا ياساااره ..عماد خدا رقمي و قالي حيبعت امه و اخته يتعرفو علينا ..خلاص عماد بيقعد ليا..
ساره مصدومه:بهالسرعه ... قصدي ...
نور:اايه ..ياساره و اخيراااا
ساره نصدمت و حست بالغيره ماتوقعتش انه عماد ببيعجب بنور بالسرعه هادي و ماتوقعت انه لدرجه بيبعت عيلته ليهم ..يعني بتنخطب نور قبلها ... وبشخص ممتاز ...
نور:الووو ..وين مشيتي...
ساره: قاعده ...🔥
نور:فررررحانه تعرفي تمنيتك معاي ...
ساره:اهو بكرا مرات بنولي توا نتلاقو بعد بكرا و نشوفه هدا عماد..
نور:طرررررررف .. تو تشوفيه و تقولي نفس كلامي
ساره زادت حسدت: اممم باهي .. غير لما تتصلي بيه و تتعرفي عليه راك تحكيلا عن السر متاعك ...

نور انطفيت فرحتها و سكتت...
ساره عرفت انه نور تضايقت : ايه ردي بالك مافيش حد بيرضى يخطب بنت هكي ...غير احمدي ربك انك مزال بنت ...
نور:خلاص ياساره .. علاش تذكري فيا ..بعدين اصلا السر اهوا ماحكيتاش لحد الا انتي بس لاني واثقه فيك ..حتى امي و اختي مايعرفوش ....
ساره: ايه باهي باهي ...
نور:هيا بنسكر توا .. سلام...

سكرت من ساره و قعدت تفكر و رجعت بذاكرتها للماضي ... لما كانت نور عمرها 8سنوات و ولد خالها عبدو عمره 13سنه ...

عبدو كان يتحرش بي نور اكثر من مره و كانت نور تهرب منه و تخاف تحكي لامها .. لانه كان ديما يقوللها امك كان تعرف تقتلك .. كانت ديما تهرب لامها وتجي تقعمز جنبها، بس امها للاسف زي اغلب الامهات اللي لما يلقو خواتهم ولا جاراتهم ولا سلفاتهم ولا اي هدرزه ،ينسو اطفالهم اللي هما امانه عندهم ، ومايعرفوش وينهم او حتى شنو صايرلهم ، ولما كانت تهرب نور لامها وتقعمز جنبها وهي خايفه ، كانت امها تلز فيها و تقوللها" بري العبي برا احني انهدرزو في كلام كبار" ،ولا كانت تقوللها "بري عني خير ياسر في الحوش مدرهيلي كبدي"، هذا رد امها و رد اغلب الامهات ....!!
و تذكرت فرحتها لما عبدو ولد خالها سافر مع عيلته للخارج، بس العذاب النفسي قعد معاها ليومها هذا ، قعد شي مأثر فيها نفسيا، و لما كبرت و وعيت حست بشعور كره لامها حست انه امها ما صانتش الامانه اللي ربي عطاها ليها ، خاصة لما تذكرت اللحظه اللي حكت فيها لصديقتها ساره عن اللي صار معاها ، وساره زادت خوفتها و قالتلها ضروري تمشي و تفحصي ، خافت و قعدت فتره و هي عايشه في رعب و خوف و قلق نفسي ، لحد ما مشت لوحده من الدكتورات حكتلها و فحصتها و طمنتها.....

وعيت نور من الماضي ... ركزت قدامها القت خالد واقف بعيد شوي و يشبحلها ... ركزت في نظرته ليها حاولت تفهم من نظرته شنو يبي منها .. بس ماقدرتش تفهم شي ... استمر خالد يشبحلها و يركز من شاف فيها او كان من ضايقها ..وكأنها شي يخصه هوا بس .. مايبيش حتى يفكر بينه و بين نفسه علاش يدير هكي ..وشنو السبب.......
...........................
منار مقعمزه في الفصل بروحها في وقت الاستراحه و ماسكه تليفون و تحكي مع نادر ...
منار: ماتعرفش انت قداش اني تعلقت فيك يانادر.. انت افضل انسان تشوفه عيني ..كلهم يجرحو فيا ويتنمرو على وزني و شكلي ...الا انت ... مانحسش بالراحه الا لما نحكي معاك ..كل يوم نحمد في ربي اني عرفت انسان كيفك يانادر...