أحلامنا و النصيب

الفصل الحادي عشر

《11》

نور قعمزت ع المقعد تحاول تسيطر على روحها:مافي شي خلاص ..
خالد بصوت هادي:نوور احكيلي .. شنو دارولك ساره و عماد ... ومنو عبدوو...
نور مسحت دموعها حاولت تهدا شوي .. ماعرفتش كيف بتحكي لخالد عن كل شي ..وهي ماتبيش يعرف ..تخاف يظن فيها ظن سوء زي عماد ولا يحس بالقرف ناحيتها زي ماحس عماد... خافت تنجرح مره تانيه ...
نور:ساره خانتني مع عماد .. فيه حاجات حكيتهم ليها هي وبس..بس هي استغلتهم ضددي ..وحكتهم لعماد ..وعماد سيبني ..توا هما على علاقه ببعضهم..

نور بكت و الدموع ينزلو من عيونها ساخنات ..
نور:خانووني ... معادش عندي ثقه فحد .. طعنوني في ظهري ياخالد...
خالد النار والعه فيه .. قعد يكرب في يده تمنى لو عماد قدامه باش يضربه لين يشفي غليله منه.. مسك اعصابه عشان يفكر كيف ياخدلها حقها .. حس روحه كأنه الوصي و المسؤل عليها .. نور شافت في عيون خالد لقتهم شرااار ..عرفت بشنو يفكر ..

نور: لأ ياخالد ..ارجوك ما تأذيهمش ..
خالد:مزال تخافي عليهم الحيوانات هما..
نور:في ستين داااهيه ... اني سلمتهم لله و ربي حينتقملي منهم .. حسبي الله و نعم الوكيل فيهم..
خالد يساير في نور:تمام تمام..
نور بصوت مبحوح:وانت علاش عيونك منفوخات ..شنو فيه..
خالد: اختي منار ...منار تصارع في الموت ... جيت بس عشان نشوفك ..نطمن عليك .. يمكن نرتاح..

نور ماقدرتش تمسك قلبها و روحها قدام كلمات خالد.. شافت الصدق فعيونه و في نبرة صوته ..شوي و تذكرت كلامه عن اخته منار..
نور:خيرها منار .. شنو صاير معاها
خالد: حاولت تنتحر..
نور:علااش ..وكيف..
خالد :علاش مانعرفش و كيف قصه طويله .. يجي وقت نحكيها لك..
نور:ربي يطمنكم عليها و يشفيها يارب ..
خالد:امين ... انتي ردي بالك على نفسك ..نبي نمشي توا.. مانبيش نمشي و نخليك هكي ..بس مضطر
نور تمسح في دموعها: اساسا اني بنروح توا ..
خالد فتح مذكرت نور و طلع قلم و كتب رقمه : هذا رقمي خليه معاك ..لو احتجتيني اتصلي بياا..
نور: ان شاء الله ...

خالد شبح لنور نظره حنونه طمنها بيها و مشى .. و نور منهاره .. قلبها يوجع فيها من خيانة ساره و عماد ... بس ارتاحت من كلامها مع خالد ...
................
كان يوسف مقعمز جنب امه قدام العنايه .. وصل نادر و عرف يوسف لانه ديما يروح ب منار بس ماقدرش يتكلم او يجي شورهم ولا قدر يسالهم عن حالتها ..قعد واقف يتفرج و خلاص .... لين جاهم الدكتور و كلم يوسف، لما قرب منه يوسف خبره بوفاة منار ....💔
يوسف انهار و جت خديجه تجري .. عرفت انه بنتها الوحيده ماتت قعدت تصرخ و تعيط بعلو صوتها .. و يوسف يبكي .. نادر فهم انه منار ماتت .. نزل على ركبيه يبكي ..حس بالندم على كل شي داره ..تمنى يطلب منها السماح ..بس خلاص .. ماتت و حقها حياخده الله...
......................
مر اسبوعين على وفاة منار ..
الاسبوعين هما نور ماجتش فيهم للكليه وماحاولتش تتصل بساره ولا تعاتبها ... عماد خطب ساره رسمي .. وحامد ما دورش هند بكل بس هند قعدت تفكر فيه و حست بالندم انها ضيعاته من يدها ... نسرين و نور مامشوش عزو على منار ..نسرين كلمت يوسف في التليفون و بس ...لعند قررت نسرين تمشي هي و نور تعزيهم ...