أحلامنا و النصيب

الفصل الرابع عشر

《14》

نسرين بعد اغمي عليها جتها هند تجريلها نادت زينب و نور .. مسكت التليفون القت يوسف ينادي في نسرين خايف عليها يبي يفهم شنو صار ..حكت ليوسف انه نسرين اغمى عليها و سكرت .. رشو ميه على وجه نسرين .. وفاقت بعدها...
نور:خوفتينا عليك خيرك شنو صارلك..
زينب: وووه عليا يابنيتي نحسابك موتي..
نسرين تشبحلهم باستغراب: شنو فيه .. شنو صارلي..
هند : كنتي تكلمي في يوسف و بعدها اغمى عليك..
نسرين تذكرت شنو صار عيونها تغيرو و قعدو قلوب و هايمات..
نسرين: اااااه ... قالها ليا ... عطوني تلفوني بنقوله يعاودها..
زينب : شنو اللي قالها...
نسرين: قالي نحبك .. اااه ياقلبي ..حولو عني بنوض نرقص ..
زينب: تحشمي على وجهك يا بنت .. انتي من قبل مختشه يابال قالك يوسف هالكليمه..

نور و هند يضحكو على نسرين ...دقيقه و رن الجرس .. مشت زينب تفتح القاته يوسف جاي و قلقان و خايف على نسرين..
يوسف: وين نسرين .. خيرها؟شنو صار معاها
زينب: مافيها شي زي الجن داخت شوي و ناضت..
يوسف: نبي نشوفها لو ممكن..

دخلت زينب يوسف للمربوعه و نادت نسرين .. فتحت نسرين دولابها بسرعه و لبست حاجه حلوه دارت ميك اب خفيف..
نور: ياغبيه خليك بهيئتك المشفشفه انتي دايخه و هوا يبي يشوفك..
نسرين:مش كلهم زي خالد متاعك يحبو المشفشفات..
تحشمت نور و سكتت .. شوي و طلعت نسرين للمربوعه و القت يوسف مقعمز اول ماشافها ناض ..

يوسف: نسرين الحمدلله على سلامتك خيرك شنو صارلك..
نسرين عيونها هايماات و مركزه في عيونه و كانها في عالم تاني و مبتسمه ابتسامه بلهااا و عبيطه..
نسرين: مافيا شي ياسوفتي..
يوسف ركز في نظرة عيونها قريب داب .. حول عيونه عنها و قعمز .. جت قعمزت قريب منه .. يوسف بعد عنها...
يوسف: لالا ماتقعمزيش جنبي خليك بعيد..
نسرين حطت يدها على خدها و تشبح ليوسف بنظره حالمه : علاش؟ ماتقدرش تقاوم حبك ليا..
يوسف مايبيش يشبح في جيهتها: خلاص اسس ..توا بنطمن عليك و بنروح
نسرين: اشبحلي هني ..
يوسف مايبيش يشبحلها يبي يغير الموضوع
قال: الزواق عرفتيه شنو جوتن ولا ..
نسرين بصوت هادي : ياعيوون الزواق و ياقلب جوتن انت..
يوسف تلفتلها : خيرك انتي .. تي اني ..
سكت .. وقعد يشبح لعيونها..
نسرين: عاودهالي ..
يوسف:شنوو
نسرين: الكلمه اللي بكري ..
يوسف: اما كلمه..
نسرين: يوسف ..
يوسف قلبه يدق و العرق بدى يصب منه: نعم..
نسرين: نحبك..

يوسف وقف بسرعه و طلع يجري من المربوعه ..قلبه يدق و داهش .. و نسرين قعدت تضحك عليه ...
..............................
بعد وصلت ساره لحوشهم خشت لدارها تبكي و هي
تتذكر في كل شي صار معاها .. خااايفه و مرعوبه .. ومن تغيير عماد بعد اللي صار بينهم حست انه يمكن يسيبها .. عشان هكي قررت انها تسايسه لعند يوم العرس ..
..........................
حامد مقعمز في حوشه و يفكر .. يحاول ينسى هند بس مش قادر و في نفس الوقت مش قادر يسامحها ولا قادر ينسى كلامها ليه ..
حامد: مافيش حل الا انني نتزوج .. و مع الايام حننساها لاني مستحيل انردها ..معادش عندي ثقه بيها ..شنو عرفني اني مرات حتى تكون متصله بحبيبها الاول حتى لما كانت هنا معايا .. كنت عبيط و الميه ماشيه من تحتي ... واني نقول علاش معاملتها معايا جافه وقد ماحاولت ماباتش تلين ... افضل شي نقول لاختي الكبيره تدورلي بنت كويسه و نتزوجها ... و هند صفحه و تسكرت حننساها حننساها..ومافيش حد يموت على حد..