《12》
طلعت نور من المحاضره ..القت خالد واقف يراجي فيها و في يده كيس صغير.. شافاته ابتسمتلا .. قرب منها و وقف عليها.. طلع عماد و معاه ساره من القاعه .. شافولهم و مشوو ... بعد بعدو عنهم ..
قال عماد: مسرع لقت حد تاني هالفاسده..
ساره: بنت رخيصه شنو تستنى منها ..
عماد:خلينا منهم ..قوليلي ..شنو صار بتمشي تتغدي معايااا في الاستراحه..
ساره بتردد: قصدك اليوم ..باهي خليها يوم ثاني..
عماد: اياااا ..بتقعديلي هكي انتي تلفي و تدوري .. امالا فوتيني ..
ساره: اني ماقلت شي توا .. سالتك امتى بس؟
عماد: اليوم .. وتواا ..
ساره: آآ ..مزال عندي محاضره.. و اصلا مزال ع الغدى
عماد: نقعدو غادي لين يجي موعد الغدى .. و محاضرتك اني ناخدلك اذن ... هياا اني سابقك ..نراجي فيك في السياره ..
ساره بخوف:تمام تمام
مشى عماد و هلا ساره حاايره و خايفه و قلبها مش مطمنها...
بينما خالد و نور واقفين مع بعض و يتكلمو...
نور:اسفه ياخالد مش حنقبل منك الهديه..
خالد:علاش ..
نور: قصدي احني لعند توا مافيش بيننا شي ..
خالد:بعد اسبوع بنولي خطيبك..
نور:اني مزال ماوافقت..
خالد:بتوافقي لانك لو ماوافقتي بتعنسي..
نور:يا سلاااااام ..
خالد:ايه ..مش حتاخدي غيري ..
نور سكتت ... ديما تحس بالضعف قدامه و انها خايفه منه...
خالد:تمام حندسها الهديه لعند ماتقعدي خطيبتي ..و ارفضي بعدها و شوفي شنو انديرلك ..
نور:شنو بتديرلي يعني ..
خالد غمزلها : وقتها ساهل..
نور: باهي .. يلا ماشيه اني
خالد: عينك من روحك ..وتبي حاجه كلميني..
نور: حاااضر ..
..................................
مرام استلمت الرساله من ام منار ..قعمزت في ساحة المدرسه عشان تقراها ...
الرساله:
"مرامي حبيبتي افضل رفيقه و صديقه عرفتها في حياتي ..مرام مانبيك تزعلي ولا تبكي على فراقي ..انتي اكثر وحده تعرفي المعاناه اللي كنت نعاني فيها من الطلبه و الطلبات و تنمرهم عليا .. انتي تعرفي قداش مره خشيت لحمام المدرسه و بكيت من كلامهم الجارح و تعرفي انه اكبر جرح تعرضتلا هوا جرح نادر .. سامحيني ياحبيبتي .. و نبيك تقولي لنادر اني مسامحتك .. واني مش زعلانه منك ..لانه حرام عليا نظلمك بي ارتباطك بيا .. انت تستاهل بنت زي جوري و اللي زيي المفروض يموتو عشان يرتاحو من هزوة البشر و يريْحو البشر من شوفتهم"
غطت منار وجهها و قعدت تبكي بحرقه على كلام صاحبتها ..اللي للاسف كانت ضحية تنمر الجهلاء المتخلفين، مايعرفوش انه كل انسان يتمنى يكون بشكل مثالي و يسعى لتحقيق الشكل الجميل ، بس ربي خلقهم هكي عطاهم شي و خدا شي ..زي ماعطا جوري الشكل الجميل و خدا منها الاحساس بالغير و طيبة القلب والحنيه اللي عطاهم لمنار.. منار ماكانش ينقصها شي الا الثقه بالنفس و القناعه ..
" وما أكثر اللي زي منار ..اللي منهم ضعفو و استسلمو زيها، واللي منهم لبسو قناع القوه قدام الناس و في الليل على وسادتهم شأن آخر"
...................................
هند لبست ملابس حلوه و حطت عطر حلو و ميك حلو و اتجهت لحوشها اللي فيه مهند عشان تاخد ملابسها من غادي ... تبي تأثر في حامد و تطلب منه يردها .. ظنت انها بملابسها هادي و عطورها تقدر تأثر فيه و يردها ...خبطت هند ع الحوش ..
هند في داخلها: توا اكيد بمجرد مايشبحني بيطلب مني نرجعله اكيد هوا اللي بيعتذرلي ،نعرفه حامد مايقدرش يعيش من غيري ...
شوي و فتحلها حامد الباب ..كان شكله متغير ..مكبر لحيته و عنده هالات وضاعف ..
هند مع ابتسامه: مرحباا
حامد شبحلها .. وكأنه كان عطشان و لقى ميه .. قعد وقت يشبحلها ..
هند فرحت بنظرته: نبي نخش بنرفع حوايجي العاقبات ..
حامد من غير حرف خش و خلا الباب مفتوح..
أنت تقرأ
أحلامنا و النصيب
Roman d'amourدائما ما تتعارض أحلامنا مع نصيبنا ، نحلم و نتمنى و نرغب ، ولكن للنصيب رأي آخر ..
