السحر القاتل .. طارق اللبيب

2

.....
طبعا المراة خلاس دايرة تكورك .. وعوض قال لها اوعك تفتحي خشمك اصبري .. بتكون غيبوبة ساي.. وبقى يرشرش فيهو بالموية .. ويقرا ليهو في الايات .. وقرايتو ذاتها مربوكه وملخبطة .. قال لي فهيمة عليك الله يافهيمة .. جيبي لي موية تاني .. دخلت ومرقت .. وجرت جاي.. وجرت جاي .. فتحت التلاجة . لقت باقي عصير من القبيل عملتو لي عوض .. وعوض شال منها الكباية وبقى يقطر ليهو في خشمو .. بعد شوية الراجل بقى يتمطق .. واتحرك .. ورمش عيونو .. وبلع ريقو ..
عوض قال ليها شايفة؟؟ بس عندو هبوط في السكر.. انا من قبيل.. من وقتو البقول لي بحس بي هبوط .. عرفت بكون عندو سكري ..خالي ده عندو مشكلة سكري.. وهو ماعارفها ..
اها غايتو سقوهو باقي العصير داك ..
وكلها عشرة دقايق ربع ساعة.. والسر قعد على حيلو .. فهيمة بقت تتكلم معاهو .. انت يا السر عندك سكري وماعارفو ؟
قال ليها سكري شنو يا مراة؟ انتي الليلة ماياكي؟ ..
قالت ليهو كويس.. شد حيلك شوية وامشي افحص .. براك بتعرف
عوض قال ليهو والله احتمال كبير ياخال.. لانو انت جاتك غيبوبة عديل كدا .. ايمكن خمسة دقايق انت مسحب ..
لامن سقيناك عصير حتى فتحت عينيك ..
قال ليهم وينا سهام ؟ سهام دي بتو .. فهيمة قالت ليهو مشت تذاكر مع صاحباتها .. جات من المدرسة.. واتغدت ولا ارتاحت كتير.. غيرت وطلعت طوالي . انت كنت نايم ..
والشفع طبعا قاعدين في الاوضة التانية ديك مشغلين توم اندجري وما مدركين حتى تعب ابوهم ..
المهم يازول لغاية المساء كدي السر بقى احسن كتير.. ربنا يواليهو بالعافية .. وعوض قال ليهو يا خال انا بمشي السوق . اشد القدرة . وباكر ادور شغل ..
قال ليهو مافي مشكلة شيل المفتاح .. وانت عارف محل الفول الفحم وكلو شي .. يلا ربنا يوفقك .. انا ان شاء الله كلها يومين تلاتة ..
وبقوم على حيلي..

المهم يازول عوض بعد اطمأن عليهو شوية .. وشال المسلتزمات ومشي على السوق .. والدكان طبعا" ليهو قريب العشرة يوم ما فتح .. عوض في الشارع كحل ليهو ركشة فيها بنات ..
عاين ليهم كدا .. وركز وقال براحة كدا .. أكان ما خاف الكضب.. واحدة فيهم سهام بت خالي السر .. لانو شبها ما بروح علي نهائي .. ايوة انا لي سنة ماشفتها.. وهسي من جيت مالاقيتها .. لكن اتخيل لي ياها تب .. بس المشكلة الواطه بالليل والحتة ماواضحة شديد ..
طيب البت دي البوديها في الشوارع البعيدة من الحلة دي شنو؟
موش قالت ماشة تذاكر مع صاحباتها .. الكلام ده كان قبل اذان العشاء..
وما انشغل بالموضوع ده كتير .. اي نعم عمل ليهو زنة في راسه لي بعض الوقت .. لكن واصل ومشي الدكان .. وغسل الفول وولع الفحم وقج القدرة غايتو..
ولفا في السوق شوية كدا وشرب ليهو شاي . وجا راجع ..
جا قريب الساعة عشرة .. ولقا خالو كويس ماعندو عوجة تب . وقال ليهو ياعوض انا باكر بمشي لمستشفى الشرطة عندي صاحبأ لي هناك .. يعملو لي فحوصات كاملة .
لاني فعلا .. زي ماقلتو انتو احتمال يكون عندي سكري .. لانو حيلي ده قاعد يموت .. وببول كتير .. وريقي بنشف.. وبعطش من الهينة للقاسية .. بس والله كنت مستبعد حكاية السكري دي ..
عوض قال ليهو عادي ياخال .. السكري بقى من افراد المجتمع .. اسمو المرض الصديق .. بس انت تحافظ وتعمل حسابك .. كدي انت امشي اول افحص .. لانو لسه مامعروف ..
واصلا عوض ماحاول يكلم ابو البت .. يقول ليهو لاقيت البت في الحتة الفلانية ..
شكلة عايز يتأكد بي طريقتو ..
بعد شوية عوض قال لي فهيمة .. وين سهام يافهيمة لسع ماجات من المذاكرة ؟ داير اسلم عليها ..
قالت ليهو لا لا والله ماجات ..لكن خلاص بعد ده بتجي.. بجن صاحباتها يجيبنها لاغاية الباب كل يوم وبرجعن .. البت ممتحنة ياولدى.. وباكر بعد باكر بتكون في الجامعة ..
غايتو انا سهام بتي لاهسع شايفاها شافعة .. وما ها قدر الدراسة الجامعية ..
اها ختو العشاء .. وفي اثناء ماعوض قاعد يتعشى مع خالو ..وخالو طبعا" بياكل حاجات معينة.. وممنوع من حاجات .. عشان اليرغان وكدا ..
الباب دق.. فهيمة مشت تفتح الباب .. لقتهم ديل ناس سهام وصاحباتها يادوب جن .. عوض عاين لي سهام كدا.. من جوة الاوضه . لقاها لابسة نفس البلوزة الشافها في الرقشة ..نفس اللون والتشجيرة ..
ياودوب الشك بدا يدب في قلبو ..لكن برضو سكت .. قال ياخي مافي داعي للفتن ..هسع انا جيت يادوب اقعد افتن البت في ابوها .. والراجل عيان .. وعندو سكري شكلو.. لالا ما من المصلحة اتلكم هسي ابدا ..
بعد العشاء جات سلمت على ود عمتها ..والموضوع مشى طبيعي ..
بس في ناموسة في قلب عوض ود الضريس .. ضد البت الاسمها سهام دي. ..
والايام مرت.. وعوض شغال في السوق في محل الفول بتاع خالو . والشعل ماشي كويس .. وكل يوم بجيب ليهو الايراد بتاع المحل .. الله يجعل البركه .. والخال طبعا فحص ولقى عندو السكري..
وهسي اليومين ديل راقد في اللبيت .. وعوض في السوق ..حلووو ؟
في يوم من الايام بعد ماعوض خلص الشغل..
ومشى على صاحبو بتاع صالون حلاقة في اخر السوق.. بمشي كتير بتونس معاهو ..
وفي بت بتعمل جبنة كدا مزبوطة .. في النيمة القدام الصالون.. بشرب عندها ..الجبنة وبقعد يهظر معاها .. ويكاويها ..
الكلام ده كان زي الساعة واحدة الا شوية ..
هو داخل على الصالون بتاع الحلاقة كدا .. عينو من بعيد تقع فوق ولد وبت.. قاعدين في ضل حيطة .. متقابلين ومتجيهين على الجيهة الشمال .. وشكلهم بتكلمو عن موضوع .. والبت مدنقرة وبتتكلم ..
بعد شوية البت رفعت راسها .. يلقاها ليك دي سهام بت خالو السر .. وراسو ضرب.. وجسمو ده كلو رجف . ودمو بقى يغلى في عروقو.. شوف بالله البت دي .. قبل ايام انا شفتها راكبة الركشة بالليل .. وهسي الليلة قاعدة تتونس مع الولد في نص السوق ..
البت دي خلي بالك .. ح تعمل فضيخة لابوها .. وتسود وشو في نص الرجال انا لازم اتصرف ..
طوالي جا ماشي عليها .. من هناك ..
قال ليها سهام؟؟ .. وكت شافتو . انزعجت.. . بس عملت فيها عادية .. وقالت ليهو دقيقة يا عوض جاياك .. وبقت مواصلة في كلامها مع الولد .. وفي نفس قعدتها .. دايرة تعمل الموضوع طبيعي ..
والولد رفع راسو كدا عاين لي عوض معاينة طبيعية.. مافي اي استغراب .. وعوض واقف منتظرها .. قال ليها يابت قومي تعالي بتكلم معاك .. قامت جات ..
سهام ما اكتر 17 سنة ..وبت جميلة حسناء لحد بعيد.. ويادوبها طبعا في طور التكوين الطبيعي للمراة ..
وعوض اكبر منها بي عشرة سنوات تقريبا .. وكت جاتو ماشة بي كل ثقة ..وشايفة نفسها ماعاملة اي شي ..
وعوض دمو من جوة يغلي ..وكت وقفت قدامو.. كان مو شايفها شينة ..كان داير يرشها كف في نص السوق ..
قال ليها ده منو. يا سهام؟؟ وعلاقتك بيهو شنو؟ والبقعدك معاهو في السوق شنو؟ وجيتي كيف هنا؟؟ .. ومدرستك بعيدة من هنا؟؟ ..
جاوبيني على الاسئلة دي سريع ..قبل ما ارشك بونية هسي افرتك ليك حنكاتك ..
قالت ليهو اهدا.. اهدا ياعوض .. انا من شفتك من بعيد اتأكدت انك ح تظن بي الطن الكعب . لكن والله انا ماغلطانة .. الزول ده اسمو يوسف . وهو حبيب صاحبتي . وهم مختلفين وهي بتحبو شديد .. وعندو معاها مشكلة.. وهسي متقاطعين ..ومن يومو القاطعها .. هي عيانة . ومنهارة ولا قادرة تاكل ولاقادرة تشرب لاقادرة تقرا .. وهسي انا جيت مخصوص معاي صاحبتي التانية .. عشان نلاقيهو هنا ..ونسأله من سبب المشكلة ..ونشوف لو في طريقة نرجعهم لي بعض .. لانو والله صحبتي حالتها تحنن ..
طوالي عوض صدقها .. والزعل الجواهو كلو راح .. وقال ليها الله يجزيك خير طيب .. طيب انتي كان تكلمي امك او ابوك ..بالموضوع ده وتخليهم في الصورة ..
قالت ليهو انت عارف خالك يا عوض ..صعب كيف ..ومابفهمني اصلو ..
عليك الله الكلام ماتقولو ليهو.. هو مابقدر يتفهم الامور زيك .. انت زول واعي وبتفهمني .. قال ليها وهسي اتوصلتي معاهو لشنو الزول ده ؟
قالت ليهو والله هو جايبين ليهو فيها كلام ..وشكلو هو مصدق الكلام ..
وانا هسي لمن بقول ليهو الكلام ده كذب .. بقول لي انتي عشان صاحبتها ..دايرة تبرري ليها اي حاجة .. وتتستري عليها ..
عوض عاين كدا للولد لقاهو فات مشى ..
قال ليها خلي صاحبتك تحل مشكلتها بطريقتها.. اتحركي طوالي امشي علي البيت .. وينها البت الجات معاك؟؟ ..
قالت ليهو مشت البوتيك القدام داك.. انا بغشاها وبنمشي البيت.. انت ماتشيل هم .. امشي مشوارك انا بصل ..
وهو طبعا صدقها برضو.. ومشى على الصالون .. ولاشاف البت الجات معاها دي منو .. سهام كانت بتتكلم بي ثقة وثبات عجيبة.. اي زول يسمعها بصدقها طوالي ..
المهم هو مشى اخد قعدتو مع صاحبو بتاع الصالون الاسمو اسامه ده .. وعوض فكرو برضو مشغول بالمموضوع ده .. اتاريهو اسامه وهو بحلق شاف عوض وكت بتكلم مع سهام ..
قام سألو قال ليهو .. البت دي بتعرفها من وين ياعوض؟
طبعا" عوض اتخلع معناها البت دي مشهورة ...لدرجة بتاع الصالون بعرفها ..
عوض قال ليهو انت بتعرفها يا اسامه ؟؟
..........الى اللقاء ...........