عوض يازول النوم ماجاهو كلو كلو .. زعلان وحزين وخايف .. زعلان انو ماعارف الحاصل .. وحزين انو فقد خالو البحبو .. وخايف ان تكون البت لفقت فيهو تهمة .. وبرضو خايف عليها من الضياع .. لغاية قريب الساعة 2 صباح حتى شوية كدا عيونو شربكن ..
قام الصباح بدري اتوضا وصحى صلاح .. قال ليهو قوم صلي .. عشان انا طالع طوالي ..
صلاح قام مخلوع.. قال ليهو انت بي صحك يعني؟؟ مسافر الليلة ؟ قال ليهو اول انت قايلني بهظر؟
يلا يلا قوم اتوضا انا مارق ..
قال ليهو على الاقل اصبر اشرب الشاي .. واستحمى وخلي الواطة توضح شوية ..
عوض ولاشغال بالكلام .. قال ليهو عليك الله ياصلاح خارجني انا متضايق والله .. والله خلاص نفسياتي وروحي دارت القومة.. تاني مابقدر استقر .. خلاص قلقت .. انت اظنك ما حاسي بي..
قال لهو والله ياعوض حاسي بيك .. خلاص بس دقايق .. النتوضا نصلي ونطلع ..
المهم يازول بعد الصلاة .. وطلعو طوالي ركبو مشو البصات .. وشربو الشاي هناك في الموقف .. وعوض ركب وفي جيبو مافي غير عشرة جنيه ..
..بس ربك رب الخير .. صلاح بدون مايشاورو قطع ليهو التذكرة .. والا كان مامعروف يعمل شنو ..
اخر حاجة اتوادعو .. وقال ليهو عليك الله ياصلاح ماتقطع خبرك مننا .. انا اول من اصل بديك تلفون .. في امان الله في الله والبص دور وقام الى عاصمة البلد ..
عوض في الطريق بي نفس الهم والغم لكن برضو بحاول يصبر في نفسو .. يازول انا مادام ماعامل حاجة غلط المضايقني شنو؟ خلي السر يفتكر العايز يفتكرو اهم حاجة ثقتي في نفسي واحترامي ليها .. كتير من الناس بتظلم الناس .. بي كلام مالو اساس من الصحة بس الله في ..
عوض وصل البيت .. ووشو يلعن قفاهو وصل تقريبا زي الساعة 11 كدا ناس عوض ساكنين في الثورة الحارة 14 .. قريب مجطة حميدان ..
عندو اخويين اتنين وماعندو اخت .. اخوهو الكبير اكبر منو اسمو محمد مهندس بترول شغال في هجليج ..
واخوهو الاصغر منو اسمو حافظ طالب بقرا هندسة مكانيكا في جامعة السودان .. ابوهو الحاج ود الضريس عندو دكان بتاع توابل في سوق الطشاتة .. في سوق امدرمان ..
وامهم اسمها مهدية من المحس السكنو في توتي من بدري واستوطنو وهم تقريبا اهل توتي الاصليين .. زي ناس شمبات والحلفايا والصبابي وديل ناس الشيخ ادريس ود الارباب راجل العيلفون .. المراة مراة صالحة وبت صالحين بكل المقاييس .. والسر اخوها ود امها وابوها وبتريدو ريدة غريبة ..
اول عوض من جا طبعا عدى في مدني 18 يوم بالتمام والكمال ..
ومهدية بتسأل فيهو من اخوها واولادو .. عوض قال ليها ياسلاااام .. والله ناس ماشاء الله .. بعد سلم علي امو قال ليها دقيقة عندي اتصال وبجيك .. اتصل على صلاح وطنو قال ليهو انا وصلت تب ياعشا البايتات ..
وجاء راجع لي امو بحكي ليها قال ليها ..
اول حاجة يا امي طبعا لقيت السر خالي تعبان .. لكن الحمد لله كل يوم كان بيمشي احسن من اليوم القبلو .. وهسي تمام التمام ..وانا قلت لو ما بقى زي البمب ومسك شغلو براهو مابجي .. هسي الحمد لله ليهو يومين .. شغال في قدرتو زي الماحصل شي .. شكلو بقى احسن من زمان.. مايقوم يعمل ليهو عرسه فوق فهيمة .. وامو دي تسمع وتضحك.. سعيدة ومبسوطة ..قالت ليهو غايتو انت ياعوض طمستك دي اصلك مابتخليها .. اوعه يكون عوارتك دي قاعد تقولا قدام فهيمه .. قال ليها لالا يا امي ..ده هظار بقولو ليك انتي ساي ..انا عارف الحريم مابرضنو .. بعدين فهيمة زولة محترماني ومقدراني.. كيف اجرح مشاعرها ..
قالت ليهو اها عليك الله كيف سهام المسلطة ..والله مشتاقالا شوق .. قال ليها تمام التمام اليومين ديل مسكينة مدروشة شديد مع الدراسة لانها ممتحنة .. انا ذاتي ما لاقيتها كتير.. بس تسأل منك حد ..وتسلم عليك .. لالا كلهم تمام ..الحمد لله انتي كيف وابوي كيف؟ .. قالت ليهو نحن الحمد لله في امن وامان ..
تتذكر يا عوض الجماعة بتاعين الورشة الزمان اشتغلت معاهم ديك؟؟ جوك هنا يومين كدا بسألو منك..
قلت ليهم عندك مأمورية لي مدني .. وختو تلفونهم . قالو اول ماتجي تتصل عليهم ..
قال ليها ديل كمان الذكرهم لي شنو .. ديل انا فارقتهم وتلفوني مون عارفنو .. يا امي الناس ديل مانافعين معاي .. ولابشتغل معاهم تاني ياخي ديل كلهم حرامية .. انتي ماعارفة الحاصل ساي ..
قالت ليهو مالهم كدي وريني ماتتهرب ساي .. ديل ناس الظاهر عليهم ناس طيبين .. قال ليها طيبة انتي بابت العوض .
عارفة ديل بجيهم الزول بي عربيتو ..يقولو ليهو محتاجة للاسبير الفلاني ..والاسبير الفلاني .. ويجيبو ليهو فاتورة عديل من محل الاسبيرات .. ويدفع القروش ..وهم ولا يكونو ركبو ليهو اي اسبير .. ولا اشتروه من اساسو ..
ومرات لو العطل بسيط ..يقولو لي سيد العربية حاجة تشيب الراس .. والعربية ولا تكون فيها مشكلة كبيرة ..بس عشان يدفع .. وماهم كدا براهم ..غالبية ناس المنطقة شغالين بالطريقة دي ..
قالت ليهو طيب ياولدي ..هسي انت ح تعمل شنو يعني؟؟ ده الشغل الرابع انت تمرق منو ..
قال ليها والله يا امي انا في البص فكرت لي في فكرة غايتو .. عارفة انا بي شغلي الاسبوعين ديل مع خالي اكتسبت خبرة كبيرة في القدرة والفول .. والله انا القى لي محل بتاع فول . والله ابوي ده تاني سوق امدرمان ده مايقيل فيهو ..
والله يا امي القروش والربح الفي القدرة دي.. لاحكت ولابقت وانا عرفت ليك سر الموضوع ..وبقت واقعة لي تب..
قالت ليهو اها تلقى المحل وين؟ .. قال ليها كدي يجي ابوي وانا بتفاهم معاهو ..
...
طبعا فعلا ياجماعة .. بدل الزول مايبقى عاطل وعالة على ناس البيت .. يشوف ليهو اي صنعة يشتغل فيها.. حتى لو عامل بسيط .. والاجرة مابتغطي معاهو .. ليكسب الخبرة ..ويتعلم الصنعة ..
والظروف مامعروفه.. يعني الزول احتمال تتاح ليهو فرصة في عمل كبير ..يكون جاهز وعارف الرصة ..
احكي ليكم القصة العجيبة دي ..في نفس الموضوع ..ونجي نواصل مع عوض ..
كان في راجل متزوج وعندو ولد وبت اطفال يعني البت 9 سنة والولد تقريبا خمسة سنة .. البت اسمها سارة ..
المهم الراجل حالتو المادية بسيطة ..ورزق اليوم باليوم .. الراجل ده حصل ليهو حادث واتوفى في الحال .. ومراتو انسانة جميلة وصغيرة في السن ..بقت تمشي تشتغل في البيوت ..وتغسل هدوم الناس .. وتعيش في اطفالها بالشرف والعفة .. وطبعا ما مغطي معاها على حسب البلد البقت قاتلة .. نسأل الله السلامة ..
يوم كانت بتفتش لي شغل في واحد ناداها يشغلها في بيتو .. وكان البيت فاضي ..عشان كدا ساقت معاها بتها ..والراجل طلع حقير ادا البت عقار منوم ..وحاول يستغل الام استغلال قذر .. والمراة بت رجال ضربتو وشالت بتها نايمة .. وطلعت . ومن الزعل جاتها جلطة وقعت في الشارع .. ورقدت مستشفى ..وانشلت شلل نصفي ..
عندها جارتها مراة صالحة شغالة حنانة.. مسكت الاولاد عندها .. وبقت مراعية الام في المستشفى .. والبت بقت تراقب في الحنانة .. وتلقط في الصنعة .. وحبت العملية شديد .. وبقت تحنن صاحباتها الصغار ..
وكانت البت فنانة لدرجة ملفتة .. لدرجة انو الناس لاحظو ليها والحنانة بقت مراعياها .. شوية بقت الحنانة وكت تمشي المستشفى بتخلي البت تحنن ليها النسوان الكبار .. طيلة فترة الاربع شهور الراقداهن المراة في المستشفى ..البت سارة بقت حنانة ماهرة.. وعندها فنيات اكتر من المراة المعلمة ذاتها .. والحريم بقن يقولن لي المراة نحن عايزين تحننا سارة .. والمراة الحنانة فرحت انو البت دي حتعيش امها .. وفعلا حصل ..البت لامن امها اتخرجت من المستشفى ..ورجعو بيتهم ..الحريم بقو يجوها في البيت بالعشرات .. وطول اليوم شغالة حنة ..وعاشت امها وقرت اخوها .. وعالجت امها لغاية ما بقت في امان الله .. والبت اتطورت.. لغاية ما اشترت بيت لمعلمتها من الحنة ..والان البت دي كبرت واتزوجت وعندها محل مشهور.. والعرايس بطلبوها طلب وحنتها بالشي الفلاني ..
وربنا كريم مابضيع عباده.. وزي مابقولو اهلنا ..ربنا ماشقالو حنكأ ضيعو ..
المقصود هنا من القصة دي ..انو مرات شغلك مع اصحاب الصنعة ..حتى لو ما مغطي معاك ماديا . يكفي انك تكسب خبرة وماتسمعو لي حكاية سبع صنايع والبخت ضايع .. ده كلام فاضي .. اذا عندك سبع صنايع مستحيل بختك يضيع ..
ونحن منتظرين الحاج ود الضريس يجي من السوق وعوض يطرح عليهو الفكرة الجديدة .. ونشوف الحاج رايو شنو؟
في امان الله .. الى اللقاء ..
