صلاح من المدرسة .. طوالي مشى على عوض في السوق .. ولقاهو منتظره قاعد .. ومشو قعدو الاتنين جم عشة ست الشاي .. صلاح قال ليهو والله ماعارف احكي ليك اقول ليك شنو؟
حصل كيت كيت .. تلفز ليهو الفيلم الحصل من اولو لي اخرو ..
عوض قال ليهو والله اقول ليك حاجة .. اولا" البت الجات بارياك دي.. بتكون ختت بالها عليك .. وده واضح من تصرفها ..بعد كدا اي بت تذكرها قدامها .. بتمسح ليك بيها الواطة .. كان سمحة كان كعبة .. يعني الكلام ده ما مؤكد ياصلاح .. والبت دي شهادتها عندي مجروحة .. بس كونها قالت بليدة ده كلام صاح ..
لكن الكلام الباقي ده ماعارف .. ماعارف والله ياصلاح .. وده كلام ما المفروض يتقال بدون تأكيد ..
لانو البت بكون موقفها مع ابوها حساس .. واخاف أكون ظالمها بي كلام ماحقيقي .. وانا لايمكن احكي لي خالي كلام مامؤكد ..
خلاص انسى الموضوع .. عاد نسوي شنو؟.. كل البنقدر عليهو عملناهو .. وما اتوصلنا لي نتيجة .. انا والله كل هدفي كان احمي عرض خالي .
المهم اخدو قعدتهم ديك.. ويحكو في امور البنات وحركاتن .. وكل واحد فات على جيهة .. المهم في الموضوع عوض ماصدق كلام البت بتاعة المدرسة .. لكن زاد شكوكو ..
اها باكر حصلت حاجة .. البت الاتكلم معاها صلاح البارح في المدرسة . لاقت سهام في المدرسة .. وقالت ليها ياسهام انتي عارفة؟؟ . في زول بتجسس عليك .. ماعارفة الزول ده عايزك .. ولا عايز يرميك في مشكلة ..
ولو كان عايزك معناها زول شكاك .. المفروض تعملي حسابك على تحركاتك .. لانك مراقبة ..
في ولد زي 27 سنة كدا .. جا امبارح هنا.. ولاقانا انا ورفيدة ..وعزمنا حاجة باردة من الدكان ده .. وجاء مخصوص عشان يسأل منك ..وسألني من اخلاقك وسلوكياتك .. وانا قلت ليهو مابعرف عنها اي شي ..
هنا طوالي سهام عرفت انو ده عوض.. جا لاحقا في المدرسة.. بتجسس عليها وبسأل منها .. وداير يثبت عليها حاجة ويرميها في مشكلة مع ابوها ..
وزعلت زعل شديد خلاص .. واصرت تنتقم منو ..
والبت وكت شافت سهام اتضايقت .. قالت ليها انتي يا سهام عرفتيهو الزول ده ..؟
قالت ليها كيف مابعرفو.. ده ودعمتي.. وقاعد معانا في البيت .. واليومين ديل مسبب لي ضيق .. وشكلو داير يعمل فتنة بيني وبين ابوي ..
لكن انا بطيرو ليك اصبري لي ..
اها في نهاية اليوم .. مشت البيت طبعا والليلة بالذات ابوها مافي .. في السوق.. كان المفروض يكون قاعد وكت هي تجي من المدرسة.. لكن مشى يرتاح في بيت واحد صاحبو قريب من المحل في السوق .. طلب منو يقيل معاهو لغاية المساء .. عشان مايمشي الحلة ويجي مرتين ..
المهم انتظرت ابوها لغاية المساء جا ..
جات قعدت جمب ابوها.. وتدعك في ايديها .. وابوها حس انو البت دي دايرة تقول كلام .. وخايفة منو..
قال ليها سهام؟؟ مالك في شنو؟
قولي اي حاجة.. انا ابوك .. وبيني وبينك مافي خوف.. نحن موش قلنا اصحاب ؟؟ احكي لي مالك..
قالت ليهو والله يا ابوي .. ماعارفة اقول ليك الكلام كيف .. قال ليها انتي وريني الكلام بتعلق بشنو؟ وانا براي بفهم ..
قالت ليهو عوض يا ابوي .. قال ليها خلاص فهمت .. اتضايقتي منو صح؟.. قالت ليهو للاسف.. والله يا ابوي انا اسفه اقول ليك الكلام ده ..
قال ليها خلاص خلاص.. الموضوع ده تاني ما تفتحيهو .. عشان امك ماتسمع.. تقوم تعيرني بيهو .. خليني انا بتصرف براي ..
قامت دايرة تمشي قال ليها .. الله يحفظك يابتي.. ابدا" ما خيبتي ظني .. انا عارف لو حصلت ليك اي حاجة ماياها .. بتجي تقولي لي طوالي .. كدا والله زادت ثقتي فيك وريدتي ليك ..
خلاص امشي على قرايتك ربنا يوفقك ..
البت مشت فرحانة فرحة.. لمن حست روحها دايرة تنطط وتكورك .. تقول للناس انا سعيدة انا انتصرت ..
دخلت غرفتها .. وعاينت في المراة وقالت (عوض يا مغفل لو داير تتعشى بي انا اتغديت بيك) انا بتك يا السر .
وعمك السر بقى متوتر وحالتو صعبة .. ومنتظر ليمتين يجي عوض.. عشان يوريهو الكلام المابعرفو .. عوض يازول طبعا" جاي مطمئن.. ومقرر جواهو يسيب الموضوع بتاع التحقق من البت ....
اها اول من جاء السر قال ليهو دقيقة انا دايرك.. اقعد هسي بجيك.. ودخل جوة قال لي فهيمة وسهام مافيكن واحدة تجي بيغادي.. انا عندي كلام مع عوض ..
وجا قعد .. قال ليهو والله ياعوض خيبت ظني الله يخيبك .. طلعت زول وسخان الله يخيبك .. ياخي انا ارسل ليك انت من دون اي زول.. عشان تجي تساعدني وترعى لي اولادي .. تجي تكون انت السفيه؟؟ ..تكون انت المرفعين البحرسوه الغنم؟؟ .. يخسي عليك وعلى تربيتك ..
طبعا" عوض اتفاجأ بالكلام ده .. أول مرة خالو الحبيب يقول ليهو كلام زي ده .. قال ليهو في شنو ياخالي ؟.. قال ليهو الخلا اليبلعك.. كمان بتقول لي ياخالي؟؟ .. انت متذكر انو انا خالك عليك الله؟؟ يخسي عليك ..
قال ليهو على الاقل فهمني في شنو؟
قال ليهو يعني عامل فيها ماعارف؟.. عامل فيها ماحاصل حاجة ؟؟ اساسا عارفك ح تنكر .. الشينة منكورة ..
قال ليهو ياخالي اديني فرصة ادافع عن نفسي .. اي زول في دي الدنيا غلطان . بوروهو غلطو .. وبدوهو فرصة يدافع عن نفسه.. ماتظلمني .. وريني مالي؟ .. واديني فرصة ادافع عن نفسي .
قال ليهو تدافع عن نفسك لو كان انا داير اعاقبك .. انا ماعايز اعاقبك .. ولا بتكلم معاك اي كلام .. ولا يمكن اقول لزول عن خيابتك.. لانو دي سمعة سيئة لي انا.. للاسف .. بس ح أسيبك كدا .. وده عقابي ليك .. وتاني ماعندك خال اسمو السر ..
عوض قال ليهو يعني ما ح تقول لي انا مالي؟ .. خير ياخال التقول عليهو يمشي .. بس انت هدي نفسك شوية.. انا باكر مسافر .. ماتزعل روحك انت عيان .. السر طبعا يرجف من الزعل زي القصبة ..وبتكلم بي انفعالية لامن مطلع زبد بي اطراف شفايفو .. وطلع من الغرفة طوالي مشى بيغادي ..
وعوض بدا يلملم في هدومو .. نزل البنطلون داك المعلق والقميص المطبق تحت اللحاف .. وكورك لي فهيمة تجيب ليهو باقي الهدوم .. ودفس النضيف على الوسخان .. وشال شنطتو في الليل داك ومرق طوالي .. كورك لي خالو ودعتك الله ياخال انا ماشي .. مع السلامة يافهيمة .. ولافي زول رد عليهو كلهم قاعدين بهناك ..
طلع طوالي .. في الشارع اتصل على صلاح .. قال ليهو انا جاي بايت معاك ياصلاح ..
قال ليهو انا مع ناس مصعب .. انتظرني في الحتة الفلانية .. اخلص واجيك .. ميادة دي تعبانة .. ومعانا زول بقرا ليها في قرآن .. بس نخلص واجيك ..
قال ليهو سريع ياصلاح .. انا ذاتي داير لي زول يقرا لي قرآن .. انا تعبان نفسيا .. وفعلا ياجماعة عوض ده مضايق ضيق لامن بكى .
وهو ماعارف الحاصل شنو.. ايوة شاكي انو سهام او امها يكونو قالو عنو كلام ماياهو .. واتهموهو بي حاجة.. بس ماعرف التفاصيل وخالو ابا يحكي ليهو .. والحكاية تاعباهو تعب شديد .. وراسو داير يطرشق من التفكير ..
بعد نص ساعة بالضبط .. اتلاقو هو وصلاح .. ومشو البيت وبقى يحكي ليهو في الحصل ..
صلاح قال ليهو والله حاشاك يا ابو الرجال .. والله خالك مافاهمك بس .. انت ساعي عشان تصون عرضو .. يتهمك بي الخيانة؟؟ .. والله ده كلام صعب خلاص ..
قال ليهو خالي مسكين ياصلاح.. ديل الحريم بكونن غسلن ليهو دماغو بالكذب .. غايتو قالو ليهو شنو انا ماعارف .. لكن انا متأكد انو سهام خايفة مني.. اقول لي ابوها حاجة .. قامت لفقت فيني كلام .. لكن امري لله .. مافي مشكلة ربنا موجود يا صلاح ..
لكن انا خايف انو البت دي.. تجيب ليهو كفوة .. وبعدين يتفاجأ انو ظلمني .. ويندم وكت الندم مابفيد .. قال ليهو رايك شنو انا اتكلم مع خالك ده .. واوريهو انت شنو بالضبط .. والبت قالت فيك كدا ليه ..
قال ليهو لالا ماتقول ليهو .. نحن اساسا" ماعارفين الحاصل شنو.. ومين الاتكلم فيني .. البت ولا امها.. اوزول تاني .. وقالو شنو.. يعني نحن هسي بنخمن .. لانو هو ماصرح لي باي كلام.. وده الشي المتعبني .. لالا ياصلاح .. انت ماتقول اي كلام.. لو مشيت اتكلمت معاهو.. بتزيد الطين بله .. والمشكلة بتتفاقم ..
صلاح قال ليهو والله انت زول راجل يا عوض .. والله انت مكسب .. والله خالك هو الخسران.. ياسلام ياخ .. بالله الزمن ده فضل ناس زيك كدي ..
عوض قال ليهو ياخي ماتبالغ انت كمان.. انا شنو كمان؟ غير اني عوير ومغفل ساي .. والله كان شفتني قبيل ابكي زي الاهبل ههه ..
كدي خلينا من الموضوع ده.. البت العيانة بقت كيف ..
قال ليهو والله حكاية عجيبة خلاص .. ياخي الزولة دي طبعا انا ومصعب جبنا ليها واحد صاحبنا شيخ من اهل القران.. وقعد يقرا ليها .. بس قعدت تصرخ واتضايقت ضيق شديد .. وبقت تفرفر وتصارع .. والله جاتها قوة .. تقول اندرتيكر المصارع .. ولا نحن ولا الشيخ ماعرفنا الحاصل شنو .. عوض قال ليهو بكون يا عندها جن او مضروبة عين .. ولا عاملين ليها سحر .. جماعتكم الهنا ديل خطرين شديد .. لكن القران شفا يازول ان شاء الله تبقى كويسة .. ٌقال ليهو انشاء الله .. والله تصدق يا عوض سبحان الله البت دي انا من شفتها عيانة.. ومقابلتها لي اول يوم .. كانو اتزرع جواي حبها بدون مقدمات .. شوف مع انو وقتها الكانت كويسة وجميلة ما حبيتها .. حبيتها بعد لقيتها عيانة وشكلها متغير .. ده يكون شنو؟؟
عوض قال ليهو ده الحب الروحي يامعلم .. ده هو الاصل البكون مستمر مدى الحياة.. ان شاء الله تبقى كويسة يا صلاح.. قلبي معاك ومعاها ..
وبعد العشاء الونسة جرت.. واتكلمو في شتى المواضيع .. وصلاح نعس.. وبدا يتكلم بلسان تقيل .. عوض قال ليهو والله ياصلاح.. انت المكسب الوحيد في سفرتي لي مدني دي كلها .. ولو خسرت اي حاجة .. ما دام ربحتك انت انا ماخسران .. والله جد..
صلاح؟ هالو ؟؟ يازول ؟؟ ههه نام والله بالو فاضي فضيه ..
الى اللقاء ..
