اها يازول طبعا في الشارع صلاح بقى يجرجر في عوض وكل مرة يطلع ليهو بي كلام ..مرة يقول ليهو كان كلمتك بتصدم .. ومرة يقول ليهو بكلمك تدفع كم . المهم لامن خلاص حسا بيهو تعب .. قال ليهو انا بديك مختصر الكلام ..وبفصل ليك الموضوع في البيت .. قال ليهو طيب قول . قال ليهو والله سهام طلعت انسانة نبيلة ونحن كنا ظالمنها ظلم شديد ..
قال ليهو كيف يعني ؟ انت متأكد من كدا؟ قال ليهو والله العظيم جد .. عوض رفع ايديهو وقال الحمد لله ياما انت كريم يارب .. كانو كان منتظر اللحظة بتاعة البراءة وما كان عايز يسمع غير كدا خالص ..
عوض قال ليهو اها احكي لي قالت ليك شنو؟ قال ليهو اتفقنا باقي التفاصيل في البيت .. عوض عاين ليهو كدا بي صرة وشي وقال ليهو خلاص عارفك لديح هه
المهم وصلو البيت .. وبدا يحكي ليهو من طقطق للسلام عليكم ..عوض فاتح خشمو وسارح معاهو .. ويسمع بيكل انتباه .. بعد صلاح خلص .. عوض قال ليهو اتاريها خايفة من ابوها .. ليها الحق تطفشني .. يازول مادام هي كدا.. انا عافي ليها في تلفيق اي تهمة .. مافي اي مشكلة .. المهم انها زولة حربية ..
صلاح قال ليهو ياعوض انت البت دي بتحبها والله ..
قال ليهو والله بحبها .. لكن ماكنت بعاين ليها بي عيني لو الظن طلع صح .. وهسي لو الطريق فتح قدامي ماعايز غيرها.. لكن المشكلة هي بوظت اي شي.. وخربت ثقة خالي السر فيني ..
يعني انا ماعندي حاجة في يدي اعملها .. قال ليهو يازول ربنا بحلها .. وان شاء الله ياعوض تلقاها ..
لكن انا بالجد ماعارفك عايز بيها شنو المفتريه دي ..
قال ليهو بحب الافتراء وبكرهـ البت الهبلة البتنقاد لكل من هب ودب ..
صلاح قال ليهو تصبح على خير.. انا داير انوم حنكاتي وجعني من الحكي ..
اها طبعا ياجماعة بكرة التلاتا .. مواعيد ناس ميادة مع الجلسة الاخيرة .. اللهي بنسميها جلسة الكشف التاكيدي والتحصين .. بتقري فيها كشف من الاول.. للسحر والعين والمس .. لو طلع في اي باقي تاثير .. يبقى الجلسات ما انتهت ..
ولو طلعت سليمة بعديها بكونوا ناس سفر ..
وفعلا اصبحت الواطا.. ومشو بحري.. اخدو الجلسة ومعاهم الدكتورة المخطوبة امس لي ود خالتها من امها .. والجلسة طلعت سليمة.. والكشف مافيهو اي تاثير.. لا ميادة ولا الدكتورة زيزو.. الاتنين تمام الحمد لله .. وعملو التحصين بتاعهم ووصاهم بأذكار الصباح والمساء ..
وياميادة ماتفرطي في صلواتك.. والتحصينات.. ابدا لانو ممكن الزول العمل ليك السحر يعملو ليك مرة تانية .. لو خليتي نفسك بدون تحصين تاني بصيبك .. وانتي كمان يادكتورة .. نفس الوصية ..
السحر ياجماعة كفر ..واي انسان يعمل سحر كفر بالله ورسوله .. وفي الحديث (حد الساحر الضرب بالسيف) مع ان هذا الحديث مروي عن النبي عليه السلام.. ولكنه عند أهل العلم ضعيف الإسناد.. والصحيح أنه موقوف على جندب بن عبد الله البجلي .. وقيل هو الذي قال: حد الساحر ضربه بالسيف، ولكن مثل هذا له حكم الرفع .. لأنه لا يقال من جهة الرأي،.. فلولا أن الصحابي عنده علم .. لما جزم بهذه الجملة العظيمة..
فدل ذلك على أن الساحر يجب قتله .. ولا يستتاب..
لأن فساده عظيم.. ولأنه يختفي في الغالب بسحره..
فيدعي التوبة، ولكن لا يصدق فيها.. ولانه قد يقتل بسحره وقد يقود المسحور الى الكفر ..
وقد راينا كيف شرع الساحر في قتل ميادة.. لولا لطف الله وبركة القران العظيم ..
..
وفي السعودية يطبق حد الساحر.. ويقتل في ميدان عام ويقطع راسه بالسيف .. على ملأ من الناس ..
نتمنى ان يطبق هذا الحد في السودان .. لان السحرة الان سارحين ومارحين على كيفهم .. يطلقو في الازواج .. ويربطو الرجل عن زوجته .. ويمنعو الفتاة من الزواج .. ويمرضو ويقتلو .. ويسعون في الارض فسادا والله لا يحب المفسدين .. ولاقين راحتهم .. لان الناس اهملو صلواتهم .. واهملو التحصين والاذكار وبقو بس مع الهواتف الذكية ..
وفي النهاية بنقول .. لن يضروا احد الا باذن الله .. ورب العزة قال.. (وماهم بضارين به من احد الا باذن الله) ..
لكن ده مامعناها نحن مانعمل احتياطاتنا .. لان السيف لايقتل الابأذن الله ..فالسحر سبب زي ما الضرب بالسيف سبب .. وربنا قال (خذوا حذركم)
المهم الجماعة اخدو الاذن .. واتحركو من الخلوة .. والعجيب الدكتورة الكانت اول يوم متضايقة .. بدت مرتاحة ..ومبسوطة و حبت الخلوة والقران.. وكلو كلو ماراضية تمشي .. قلبها يقول ليها اخدي جلسة ساي كدا بس هه ..
وفيما بعد طبعأ جات وجابت معاها تلاتة طبيبات .. والقران يعلو ولايعلا عليه ..
عوض وصلاح في نفس اليوم برضو جو بحري يشوفو التشطيبات الاخيرة لي ميادة .. واتفقو مع مصعب انو ح يجو بعدين في المساء .. عشان يودعوهم .. وصلاح ح يسافر تاني يوم طوالي ..
المهم ياسادتي الافاضل .. الجماعة رجعو البيت .. وميادة سبحان الله بقت شخص مختلف .. تقول ما الزولة الجات من مدني هيكل عظمي ديك .. ماشاء الله وهي اصلا زولة نشطة وحركية .. وماعندها اي خمالة .. ربنا يحفظها من كيد السحرة .. وصلاح يستاهلا والله ..
اها طبعا طيلة اليوم ده وناس ميادة الفرحة والابتسامة لاتفارق البيت .. وبتكلمو عن صداقة صلاح وعوض .. وعن شهامتهم والطيبة الربنا حباهم بيها .. ومصعب بقول انا ياجماعة انا؟ انا برضي زيهم ولا شنو يادكترة ؟؟
والدكتورة بتقول ليهو انت الخير والبركة ياود خالتي ..
وميادة تضحك بي تحت لي الطرحة مغطية خشمها .. وتقول غايتو جنس تخلف.. الحب ذاتو مابتعرفو ليهو .. ههه
المهم بعد شوية كدا الباب دقة ومشو فتحو الباب لقوهم ديل صلاح وعوض
جوهم من الثورة يودعوهم على اساس بكرة ح يسافرو .. ميادة نادت صلاح.. قالت لي مصعب عايزاهو في كلمتين بخصن عوض.. وانت ذاتك تعال معانا..يا مصعب صلاح جا.. قالت ليهم. طبعا انا اتصلت علي سهام.. وحكيت ليها .. قلت ليها عوض ود عمتك طلع صاحب صلاح ..
يا العويرة ود عمتك بحبك وغاير عليك.. وماكان عندو اي نيه يكلم ابوك كان بس. هدفو يبعدك من الدرب الغلط .. لكن انتي باستعجالك خربتي شخصيتو قدام ابوك ..
سهام قالت لي.. منو هو ده ..؟ عوض؟ عوض عمرو مايحب.. ياخي الزول ده تقول ماعايش في الخرطوم.. عربشن كدا وجنو يلبس جلاليب.. هع هع هع ..(،اظنها عاجبنها ناس السيستم والشعر المفلفل..ومبروم .. قول ليها يا الغبيانة ناس الجلاليب ديل رجال والله والنقاء الفي قلوبهم ناادر)
و قالت لي ماعندو اي مشاعر .. لو قال بحبني بكون كضاب.. اصلكم ماتصدقيهو .. وهو بعرف صلاح من وين؟ .. قلت ليها اسمعي ياسهام.. خليهو بعرف صلاح من وين.. المهم يا انتي الزول ده عايزاهو ولا نقنعو يبعد منك ؟
اديني كلمة هسي .. سكتت مسافة.. وقالت لي والله هسي حسستيني بالندامة .. في كلامي مع ابوي .. لكن اقول ليك حاجة.. انا بقدر اعالج الموضوع ده اصبري.. بفكر في خطة اصلح بيها العلاقة بينو وبين ابوي.. وانا والله اساسا ماقلت لي ابوي اي كلمة في عوض .. والله ابوي براهو فسر كلامي .. عشان كدا ساهل كوني اصحح ليهو المعلومة ..
(شوف بالله المسلطة ..هه) ..
قلت ليها يعني عايزاهو ؟ قالت لي في النهاية هو ود عمتي ومافيهو عيب .. لكن ما اظنو هو عايزني..
المهم سهام بقت تلف وتدور.. لكن من كلامها انها مكسرة في الود .. بس كانت مغيوظه منه.. ومن تجسسو عليها في المدرسه .. وندمت اكتر لمن عرفت الجاها في المدرسة هو صلاح.. وسال مني اول.. وسال منها هي تانيا .. وانا قلت ليها صلاح سال منك سؤال عرضي.. عوض ماعارفو .. ربنا يغفر لي غايتو كذبت بس كذب اصلاح.. رايكم شنو؟
صلاح قال ليها والله دي اكبر خطوة يا ميادة.. ونحن ماشين مدني الناس ديل لازم نلمهم .. والحكاية دي مسؤليتك انتي .. قالت ليهو والله دي خليها علي انا .. غايتو سهام بقلب ليها مخها .. واخليها تجن بيهو .. الود ده ود ممتاز والله .. ظاهر عليهو من وقفتو معانا في العلاج .. بطل مشاغيلو وباقي معانا لغاية ماخلصنا .. يكفي انو هو السبب الورانا الطريق..
صلاح قال ليها كفاية خلاص يابت انا بغير ...
قالت ليهو عوض ده بقى اخوي .. زي مصعب ده بالظبظ.. تغير ولا ما تغير .. ربنا يحفظو .. صلاح قال ليها تسلمي انتي يا الاصيلة .. ويسلمو اخوانك .. طيب نحن نودعكم ونمشي.. نشوف الحاصل .. انا احتمال ما اسافر بكرة .. لانو عوض مصر يسوقني معاهو اصحابو لي توتي .. اهل امو هناك. بنمشي بكرة .. نفسي طبعا امشي توتي بالبنطون.. لكن هسي البنطون يحليلو عملو كوبري ..ميادة قالت ليهو والله حقو تحنس مصعب ده يقعد .. نمشي معاكم.. انا ذاتي نفسي اشوف توتي.. صلاح قال ليها ماينفع.. دي رحلة بتاعة اولاد بس .. ودايرين ياخدو راحتهم في الرحلة والونسة .. اي وجود لي بت بتكون مقيداهم .. قالت ليهو خلاص خلاص.. انت من هسي عايز تبسط سيطرتك علي وانا قبلانة .. قعدو يضحكو وقامو.. قال ليها خلاص يلا نحن عايزين نمشي.. النودع الحاجة ..
وطلعو برة ودعو الحجة.. وودعو الدكتورة وامها وبقية الاسرة ..واتحركو مشو ..
وبدا صلاح يحكي لي عوض في كلام ميادة.. واتصالها بي سهام والتطورات الحصلت في الموضوع .. وقال ليهو الشي المؤكد انو البت ندمانة .. وحلفت قالت ماقالت لابوها اي كلام .. بس جات تحكي ليهو هو قال ليها عوض مضايقك؟
قالت ليهو ايوة.. لكن مافسرت ليهو نوعية المضايقة شنو؟ هو براهو خالك فهم بي مزاجو ..
انا بشوف حاجة يا عوض .. مادام البت عايزاك وانت عايزها .. انت تقوم تفاجئ خالك بي تلفون.. تقول ليهو انا عايز سهام .. كدا اي اوساخ في راسو بتروح .. لانو لايمكن زول يكون داير يلعب .. يتقدم لزواج .. ودي الحاجة الوحيدة الممكن تبرء ساحتك ..
عوض قال ليهو لالا كلامك غلط .. اول مرة تجيب ليك كلام مهتوك ومعفن ..اوريك كيف ؟ ..
اول حاجة مستحيل انا اقدم على حاجة زي دي مالم اسمع تصريح بالقبول من سهام.. كويس؟..
ثم ثانيا ...
خالي السر عارف انا وهو اتفارقنا بي مشكلة .. ولسع ما اتصافينا.. ولارجعت المياة الى مجاريها.. وهو وصفني بابشع الاوصاف ..وعارف اني بكون زعلان منو ..
انا اقوم طوالي اطلب بتو.. ؟؟ تتخيل الحكاية دي بكون وقعها عليهو شنو؟؟ .. اول حاجة يفكر فيها اني عايز انتقم منو ومن بتو .. صح ولا انا غلطان؟؟
صلاح قال ليهو كلامك صاح.. والله فعلا انا ما حسبتها صاح .... طيب نتصرف كيف ننتظر بس ؟؟
عوض قال ليهو على حسب كلامك القالتو ميادة .. انو سهام ما حتسكت .. وميادة ما حتخليها تسكت .. نحن بس نصبر نشوف البحصل شنو؟؟
الكلام ده ياجماعة كان في بيت ناس عوض .. بعد الساعة عشرة بالليل ..
قامت ام عوض مهدية بت العوض .. كوركت لي عوض .. ياعوض.. ياعوض .. تعال ..
عوض جاها .. قالت ليهو في موضوع .. وانت لازم تكون عندك بيهو علم .. انا كلمت ابوك امبارح قلت ليهو دايرين نخطب سهام بت السر.. لي محمد اخوك .. واناقبيل اتصلت علي السر اخوي.. واتكلمت معاهو يتكلم مع سهام.. يشوف رايها شنو؟
طبعا عوض قرب يدوخ .. وقلبو ده انقلع من محلو .. وحس بالاوضة دي بقت تدور زي المرجحانية الفي المنتزه ديك .. وماعرف يقول لي امو شنو؟
بس قعد يعاين ليها ..
الى اللقاء ..
