صلاح قال ليهو احكي لي الفكرة شنوياحافظ ؟ قال ليهو اسمع يا صلاح.. الموضوع ده داير اقوم بيهو انا.. من هنا ولي قدام .. بس انت خليني بي راحتي في البعملو .. انا عوض اخوي وقف معاي في مرضي.. وقفة كانت هي السبب في شفاي .. ابوي الولدني كان مشغول عني .. وبقول علي مستهبل . عوض هو الكان ساعي.. وبعد مابقيت كويس.. بتذكر كيف هو كان شفقان علي .. وانا والله كايس لي لي فرصة ارد ليهو الجميل .. عشان كدا انت لي هنا دورك انتهى.. وجاء دوري انا لكن اوعدك احيطك بي كل المستجدات في الموضوع ..
بس انا عايزك تحكي لي بالتفصيل .. مدى تمسك سهام بي عوض قدر كيف .. المهم يازول طبعا صلاح يعجبك في ترتيب الامور بي فهم والمنضمة المنظمة..
بعد حكا ليهو كل القضية .. بي ملابساتها من اولها لي اخرها
ياخي مكالمتهم ديك اظنها استمرت 45 دقيقة ..
حافظ قال ليهو خلاص ياصلاح .. انا عارف لو عوض عرف اي حاجة من البنعمل فيهو ده ح يخرب الدنيا .. انت ماحكيت لي وانا ماعارف اتفقنا ؟ قال ليهو اتفقنا ..
المهم يازول حافظ . تاني يوم رتب كلامو كويس واتصل على اخوه محمد في هجليج .. وتعال شوف الولد ده رص الكلام بي ياتو طريقة .. المهم سلم عليهو ..
محمد قال ليهو والله ياحافظ الليلة بسحروك.. ياخي انت مابتتصل علي اصلا .. الا اتصل عليك انا الليلة مالك؟ ان شاء الله بس مافي مشكلة في البيت ..
قال ليهو والله يعني مشكلة صغيرة .. بالنسبة ليك انت بتحلها ماغالباك .. ولو حليتها بتكون ريحتني انا اول زول ..
الموضوع بخص عوض اخوي ..
داك اتخلع قاليهو عوض اخوي ؟؟ .. مالو قول قول ..
قال ليهو لالا ماعندو عوجة .. بس انا دايرك توعدني عوض مايعرف انا كلمتك .. قاليهو بوعدك والله بس انت قول ..
قال ليهو يامحمد .. عوض اخوي دايما بيظلم نفسو .. وبتنازل عن حقوقو .. من زمان وانت عارف الحكاية دي .. عارف يامحمد .. عوض لمن سافر مدني علاقتو اتوطت شديد بي سهام بت السر وبقى يحبها .. بس عشان ظروفو وعدم شغلو ماقدر يتكلم مع ابوها .. اها يوم جاء يحكي لي امي الموضوع ده .. امي فاجأته قبل مايكلمها بي موضوعك ..
وهو طوالي سحب جنوده واتراجع .. وتاني ماجاب الكلام فوق خشمو .. واتصل على سهام قطعو معاها .. بدون ماهي تعرف السبب .. ونحن كلنا مافي زول عارف.. انا حكا لي صاحبو من مدني .. وقال لي الكلام ده سر .. واوعا عوض يعرفو .. وقال لي عوض اتنازل عن سهام عشان بقت من نصيب اخوهو الكبير .. وعوض قال .. لو اخوي محمد داير روحي بطلعها اديها ليهو .. وتاني مابعاين ليها .. لكن المشكلة انو سهام مجنونة بي حاجة اسمها عوض.. وبرضو كاتمة الموضوع في قلبها عشان ماتعمل مشكلة في الاسرة ..
وهسي عوض لو عرف انو انا قلت ليك كلام زي ده.. حيمسح بي الواطه ..
محمد قال ليهو كويس كويس .. خلاص فهمت .. بالله شوف عوض الحيوان ده .. انا موش اخوهو ماكان يحكي لي .. لكن هو اصلو كدي .. ديمة ظالم روحو الغبي ..
انا ياحافظ اساسا بت مدني دي ماراكبة لي في راسي .. ناس مدني ديل ناس متكبرين ساي.. انا بعرفهم من زمان .. امها المفترية الاسمها فهيمة دي.. انا بكجها من زمان بس ماداير اكسر كلام امي .. لكن انت ماتشيل هم .. انا بتصرف انت لي غاية هنا .. موضوعك انتهى .. وانا بكمل الباقي وبراك شوف ..
انا جاي بعد خمسة يوم عندي اجازة بجي وبظبط اي حاجة انت اصلك ماتفتح خشمك ده كويس؟
قال ليهو حاضر تسلم يامحمد وتجي بالسلامة ..
عوض طبعا متواصل مع صاحبو صلاح.. وكل مرة يقول ليهو ياخي والله انا مشتاق لي مدني.. ياخي خليني اجيك هناك ننتظر الدكان .. لامن يفضى .. والله مشتاق لي قعدة العصرية .. وشارع النيل . عليك الله مامشيت اتعرفت بي اسامة . (اسامة ده الحلاق لو بتتذكرو) قال ليهو والله مالقيت طريقة لكن بمشي ليهو والله ..
بعد خمسة ايام وصل محمد من هجليج .. محمد زول ضيق وصعب وكلاامو مسيخ خلاص.. البيت كلو بخاف منو .. امو وابوهو بعملو ليهو الف حساب .. بس مع كدا هو زول بحب اسرتو شديد ..
سلم علي ناس البيت.. وسأل امو قال ليها اخبار البت الفي مدني شنو؟ قالت ليهو راجياك وانا كلمت ابوها .. بس ابوها قال البت عندها رغبة تقرا .. لكن قراية شنو؟ بعد ما انت خلاص جاهز .. خليها تقرا وهي معرسة مالو؟
قال ليها يا امي انتي ماتشيلي هم.. انا طبعا سهام لسع ماعرفتها وماعرفتني .. انا لازم اسافر مدني واشوفها .. واتعرف عليها وتشوفني وتتعرف علي .. بعد داك لو اتفقنا كل شي بتحلا ..حكاية الدراسة دي اسهل حاجة .. ولو ما اتفقنا اخليها تواصل دراستها .. موش اهم حاجة نتوافق مع بعض؟ ..
بس انا بعد يومين بمشي ليهم زيارة في مدني .. قالت ليهو على خيرة الله ياولدي ..لكن انا مناي تعرس سهام وتجيبها لي هنا ..تبقى لي بنية ..انت عارف انا ميتة بشوق البت ..
ويعلم الله سهام بريدها زي عيوني ديل .. قال ليها ابشري يا الغالية مافي عوجة تب ..
عوض جا من برة ولقى محمد قاعد ..وسلم عليهو لمن سلم على محمد ..عوض عيونو اتملن .. محمد طوالي خت في راسو انو عوض ببكي على سهام .. لكن في الحقيقة عوض ببكي بي شوقو لي اخوهو ..
قام محمد قال ليهو ياعوض بتبكي مالك ؟ قال ليهو والله ماعارف من شفتك بكيت .. مشتاق لك انت طولت كدا ليه ؟
محمد قال ليهو بالله ؟ من متين قاعد تبكي لمن تشوفني ؟
قال ليهو والله ماعارف هسي بكيت غايتو.. امكن عشان طولت مننا ..
وعوض كان صادق في اي كلمة قالها ..بس محمد مامصدقو .. وحاسي بيهو وبي معاناتو .. بس الاحساس ده كان من مصلحة عوض .. وقرر يسافر مدني تاني يوم طوالي ..عشان يحسم الامر وينهي المهزلة دي ..
كلم عوض قال ليهو انا بكرة ماشي مدني اشوف الخطيبة .. ان شاء الله ماتطلع فشنك .. عوض قال ليهو يازول والله مافشنك ..على مسؤوليتي انا ..والله بت بي الف راجل .. انت بس امشي ساي .. وقول عوض اخوي ضراني ..
محمد قرب يبكي من الكلام ده .. ومبسوط من النقاء الفي قلب عوض .. وكيف عوض متمني الحاجة الاختارها لي نفسو .. انها تكون لي اخوهو .. ومبسوط جدا ..
عوض انسان خالي من الانانية تماما .. عوض موجود في زمن الاخو يخسر اخوهو عشان القروش .. وعشان الاملاك وعشان الورثة .. عوض موجود في زمن الشقيق ممكن يقتل شقيقو عشان مراة .. والله وكلها قصص حاصلة وبالهبل ..
لكن عوض كان نادر الوجود عشان كدا كتب اللبيب له قصة ..
على كل حال . محمد بقى مستعجل عشان يسافر وينهي الموضوع .
عوض ربنا بدبر ليهو في امورو وهو ماجايب خبر .. ودي طبعا فكرة انا دايما بقولا .. وبؤمن بيها ايمان قاطع.. انو اي زول بساعد الناس ربنا بساعدو .. واي زول بهم بي امور الناس ويقضيها .. ربنا بظبط ليهو حاجاتو وهو نايم .. سبحانك ربي ..
صدق رسول الله (من كان في حاجة اخيه كان الله في حاجته) ..
شوف بالله الدنيا كلها شغالة تلفونات واتصالات وبظبطو ليهو في امورو وهو ماعارف ..لغاية ما امورو قربت على النهاية والنجاض ..
عوض قال لي محمد ياخي عندي صاحبي والله زي اخوي ود امي وابوي زيكم بالضبط انت وحافظ .. اسمو صلاح .. عليك الله عايزك تلاقيهو .. وتتعرف عليهو والله حتلاقي راجل ..
محمد قال ليهو ده موش الكان قاعد هنا معاك كم يوم كدا عندو قريبتو عيانة بتتعالج .. قال ليهو ايوة خطيبتو .. الكلمك منو ؟ قال ليهو كلمتني الوالدة ..ةحكت لي عنو وعن شخصيتو وطيبتو .. وكيف انو بقول لي امي يا والدة .. انا اصلا لازم اقابلو.. بس اديني رقمو اول ماأصل مدني بتصل عليهو ..
وبعد ما اداهو تلفون صلاح .. عوض قلق شديد وخاف انو صلاح يقوم يعتر ويقول اي حاجة لي محمد .. قام اتصل عليهو تاني .. وكرر عليهو قال ليهو اسمع .. محمد اخوي جاي مدني يتقدم لي سهام .. وزي ما اتفقنا اوعك تجيب ليهو سيرة .. قال ليهو انت ياعوض مخبول في راسك ده ؟؟ كيف يعني اجيب ليهو سيرة ..
قال ليهو خلاص.. عليك الله عندي ليك وصية تاني.. كلم ميادة تكلم سهام .. قول ليها اوعا تحسسي محمد بي حاجة ..وقول ليها انسي حاجة اسمها عوض .. لالا ماتقول ليها .. خلاص قول ليها .. أأأ والله ماعارف اقول ليك شنو ؟ .. خلاص مع السلامة .. صلاح قال ليهو ياعوض .. ياخي خليك متوكل على الله.. الحكاية دي مسطرة من فوق سبعة سموات .. والزارعها الله في الحجر بتقوم.. سيب الشلهتة والكلام الفاضي ..
قال ليهو يازول خلاص .. بس انا خايف انو محمد اخوي يسافر مدني.. وسهام تتعاور عليهو.. وموضوعو يفشل .. قال ليهو وفرضنا .. لو حاجة ربنا ما ارادها .. انت حتعمل شنو مثلا .. يازول ان شاء الله ماتحصل عوجة ..
المهم بكرة محمد وصل مدني.. ومشى ناس خالو طوالي وطبعا" السر كان مبسوط جدا جدا .. ووكت جا لقى فهيمة .. وسهام ماجات من المدرسة لسع ..
وقعد يتونس مع خالو .. وبس خالو يشيل ويشكر في عوض ..
وعوض بخدمني زي ولدي .. وعوض انا مابقدر على جزاهو.. .. وعوض زول اخلاقو ملايكة .. وعوض ده مافي زيو ..
محمد قال ليهو والله ياخال انت تستاهل كل خير .. وربنا يديك العافية .. بس اهم حاجة تكون .. محافظ السكري ده داير محافظة.. مابتجيك اي عوجة .. وفهيمة تدخل وتمرق ودايرة تقول حاجة وغالبها .. مامعروف سهام قايلالها شنو؟.. بس ربنا يستر .. ماتقوم المراة تقول ليها كلمة تبوظ الامور كلها ..
والشي المامعروف لسع .. محمد جاي لشنو وداير يسوي شنو؟
وهل ممكن تحركاتو دي تكون في صالح عوض.. ولا في ضررو..
محمد هدفو ينهي الموضوع .. بدون مايأثر على العلاقة الاسرية ..
وفي نفس اللحظة يعملو بطريقة تخلي عوض يرجع لي سهام..
عشان لو حصلت اي غلطة ممكن الاتنين يفقدوها.. اصلا السر راجل مقفول .. وممكن يركب راسو في لحظة لو حس باي ملعبة .. ومحمد عارف كدا كويس ..
طيب ياربي الزول ده ح يعمل شنو ..نشوووووووووف ...
الى اللقاء ..
