عوض قال ليهم والله انا بفكر امشي معاكم مدني .. اشوف لي شغل هناك .. لاني بالجد مدني دي حبيتها .. وماعايز امشي ناس خالي نهائي . ولاعايزهم يعرفو عني حاجة .. صلاح قال لالا كدا ماصح ابدا اول حاجة الوالدة ح تسألك .. ولمن تعرف انك في مدني ومامشيت لي خالك .. اتخيل احساسها بكون شنو؟ ..
وسهام ماح تشتغل بيها ؟؟ قال ليهو والله يا صلاح يهدي الحاجة المحرقاني في قلبي .. انا قاعد هنا وحاسي اني مقلق عليها .. وخايف انها تكون ماشة ليها في درب غلط .. وانا ماعندي طريقة اتصرف .. صلاح قال ليهو يامعلم انت البت دي بتريدها ماتكابر .. شاغلة بالك ومحروق وحاسي بالغيرة .. ده ياحو الحبكان وطعم البمبان ههه ..
قال ليهو والله ياصلاح ماعارف .. صلاح سكت مسافة وقال ليهو خلاص يازول الصبر الجميل .. انا عندي راي ..
رايك شنو نسأل ميادة من سهام؟ اهي زميلتها وفي مدرسة واحدة ومستحيل تدينا معلومة كدا ولا كدا ..
قال ليهو.. طيب هل م ميادة عارفة انو سهام بت خالي؟؟ قال ليهو ابدا .. ولاجبت ليها سيرة .. ولاعندها اي فكرة بس عارفة انك صاحبي وساكن في الثورة.. وانا هسي الايام قاعد معاك ..
قال ليهو حلو ياصلاح .. انا عايزك تسألها بدون ماتوريها علاقتي بي سهام بتبقى لي شنو؟ .. عشان نعرف الحقيقة ليس الا..
قال ليهو ابشر ياعوض ..
اها يازول بعد انتهو من عشاهم داك .. وقامو من قعدتهم .. قالو لي مصعب اتصل البيت شوف ميادة صاحية ؟.. قول ليها صلاح عايز يتكلم معاك لو لقيتها صاحية ..
واتصل مصعب وقابلتو ميادة قال ليها ماتنومي الزول ده عايز يتكلم معاك..
قالت ليهو خلاص يلا تعالو بدري انا نعست ..
قال ليها نحن في الشارع .. حضرو القهوة كلمي المراة الاسمها زيزو دي تسوي لينا القهوة .. قالت ليهو مرتك من وين ياخوي؟ هو انت قايلو بالساهل كدي؟
يلايلا ارح ..
اها يازول وصلو البيت .. وصلاح قال ليها ميادة انا عايزك في كلمتين ياميادة .. المراة ست البيت ام الدكتورة قالت ليهم اقعدو في البرندة ديك ياميادة .. النور مولع كملو كلامكم .. والبن يكون جهز ..
ميادة قالت لي صلاح اها ياالغالي احكي .. والله انا ماعارفة افرح بشنو ولا بشنو .. قال ليها بيهم الاتنين هههه
اسمعي يا ميادة انا عايز اسألك من واحدة.. بتقرا معاكم اسمها سهام السر .. الزولة دي بتعرفيها كويس ؟؟
قالت ليهو ايوة بعرفها .. حق المعرفة . وبنقرا في فصل واحد .. وصديقة مقربة كمان .. واكتر زولة بتتصل علي في مرضي ده.. اول امبارح اتصلت علي .. مالك في شنو؟ عملت شنو تاني المسلطة ؟؟
قال ليها مسلطة كيف ؟ قالت ليهو قبل فترة حصلت ليها مشكلة قربو يحموها المدرسة ؟؟..
قال ليها كيف احكي لي .. قالت ليهو احكي ليك شنو ولا شنو؟ دي قصصها كتيرة .. بس انت عايز بيها شنو؟
قال ليها انتي احكي لي بعدين بوريك ..
قالت ليهو طبعا سهام زولة طيبة والله.. ودغرية وزولة عندها شهامة في الرجال مافي .. ودايما بتكون محضر خير ..واصلاح بين الناس .. وبتاعة اجتماعات .. وتحركات سياسية .. وكدا يعني .. واي واحدة من البنات عندها مشكلة.. سهام بتكون واقفة في راس المشكلة.. زي التقول المشكلة حقتها .. لمن تحلها حتى ترتاح ..
ياخي مرة في استاذه .. راجلها طلقها في سوء تفاهم . وسهام جات لقت الاستاذة بتبكي لاول مرة .. سهام اصرت تعرف الاستاذة دي بتبكي مالا ؟؟ وكت الاستاذة حكت ليها سهام ساقت معاها بتين.. ومشو لي زوج الاستاذة في السوق.. وسمعتو ليك كلام زي السم .. ووضحت ليهو سوء التفاهم.. الماقدرت زوجتو الاستاذة توضحو ليهو .. لانو ما اداها فرصة وكانت قصة ليها صداها ..
والقصة دي سمع بيها ابو سهام اسمو السر .. وقال ليها انتي البحشرك بين المراة وراجلها شنو؟ ..
وحذرها تخت بالا في قرايتها.. وتسيب الامور السياسية .. والاصلاحات الاجتماعية الماقدرها ..
يوم برضو واحدة من البنات ابوها اتهمها بي الباطل.. بي سبب قوالة .. وسهام مشت لي ابو البت في السوق عندو دكان حبوب .. وحلفت ليهو في المصحف انو بتك بريئة.. وقالت ليهو بتك انضف بت في المدرسة وكلامها كان صاح والله ..
طبعا البنات في المدرسة مسمين سهام (جيفارا).. انا ذاتي ماعارفة جيفارا دي منو.. راجل ولامرة .. المهم ..
في واحد من ناس السوق القوالين ونقالين الاخبار.. شاف سهام في محل الراجل ابو البت ده .. مشى طوالي قال لابوها بتك مع فلان في دكانو .. اظنها بتدور تشري ليها شوالات قمح .. وقعقع قعد يضحك.. ابوها السر زول صعب خلاص ..
جاها في المدرسة ساقها.. وقال للمديرة امسحي اسمها تاني مافي ليها مدرسة .. بس يازول البنات كلهن اجتمعن مشينا ليهو في البيت .. ووريناهو سهام بتك مشت السوق لشنو ؟؟ وقلنا ليهو نحن مابنطلع من بيتك .. غير ما سهام ترجع لي مدرستها .. قال لينا بشرط واحد .. تاني لو سمعت بيها مشت ليها مكان غير المدرسة والبيت .. والله تاني مابتقرا ولايوم ..
وبرضو ما تابت ..
ها قبل يومين اتصلت علي قالت لي .. كان عندي ود عمتي عامل لي ضيق وشافني في السوق .. وخايفاهو يكلم ابوي ..
لكن هسي طفشتو وسافر الخرطوم .. وقالت لي البنات في المدرسة حكو ليها.. وقالو ليها ود عمتك جاء سأل من ميادة المدرسة بالاسم .. وتاني جا سأل منك ..
ود عمتها ده انا مابعرفو ياصلاح.. وسأل مني ليه ماعارفة ..
صلاح قال ليها ده ماود عمتها.. ده انا الجيت سألت .. قالت ليهو شنو؟؟؟
دقيقة دقية انا بقيت مافاهمة فهمني شوية .. قال ليها كويس بوضح ليك ..
وسكت مسافة وسرح .. وقال والله عوض كلامو صاح .. الزول اصلو مايستعجل يظن في الناس الظن الكعب ويظلمهم بدون ما يتأكد .. اتاريها البت ممتازة كدا ؟؟ .. وطفشت عوض عشان خايفة يحموها المدرسة .. سبحان الله .. ياربي تغفر لينا في الطنون ..
مرة طارق اللبيب قال :
اياك والظنون في المسلمين يا غالي ..
خل قلبك علي حسن النوايا موالي..
كل ما تشوف وتسمع إلتزم بالتالي..
قلبك خلو من ظن الرزايل خااااااالي ..
لكن والله يا ميادة صحبتك دي برضو خسيسة .. وبتتهم الناس بالباطل .. ولفقت كلام في ود عمتها بالكذب ..
قالت ليهو انت بتعرفها من وين؟ .. شكلك كدا بتعرفها معرفة لصيقة ..
قال ليها طيب انا احكي لي.. وبدا يحكي ليها في القصة انو عوض المعاهو ده.. السر ابو سهام يبقى خالو .. وكان ماسك الشغل بتاع ابوها ووو الى الاخر .. المهم حكا ليها لغاية يوم لقاها مع البنات في الركشة .. ويوم لقاها في السوق جم محل اسامة الحلاق .. وقالت ليهو جاية اتكلم مع خطيب صحبتي .. ميادة قالت ليهو ايوة كلامها صح .. حكت لي الحكاية دي والله .. واصلا سهام مافي حاجة بتوديها السوق الا حاجة زي دي ..
قال ليها طيب البت دي ماعندها اي علاقات كدا ولا كدا ؟؟ قالت ليهو حرام عليك.. والله دي بتشاكل البنات البعملن علاقات .. ودايما بتقول لينا الاولاد ديل.. كلهم خداعين وانا مابثق في اي واحد .. وماعايزة احب نهائي .. (ههه والله ياسهام طلعتي شفتة عديل) ..
صلاح قال ليها طبعا ياميادة ..سهام كانت متخيلة انو عوض بتهمها.. وداير يرميها في مشكلة .. لكن ظنها موفي محلو لانو صلاح كان خايف عليها.. من الدرب الكعب .. والله ولا كان ناوي يكلم ابوها نهائي .. قال لو اكتشف اي حاجة بعالجها براهو لانو خالو عيان .. بس والله الزول ده بحبها محبة ماعادية وشكلوو بغير عليها وبس ..
وهسي لو هي مابوظت العلاقة بينو وبين ابوها كان يكون في خير كبير لكن هي استعجلت .. يلا خيرا في غيرا ..
قالت ليهو يخاف عليها من شنو ؟ والله سهام دي زولة ثقة على مسؤوليتي انا دي مافي زول بعرفها قدري .. لكن هي شكلها بتكرهو عوض ده وماعندها ليهو حاجة.. لانها بتتكلم عنو بي غيظ ..
والله انا ما كنت قايلة ود عمتها البتحكي لي عنو ياهو عوض المعاك ده .. سبحان الله ..
قال ليها ما مشكلة هي دايراهو ولابتكرهو دي مافرقت .. المهم انو هو مقلق عليها .. وخايف عليها جدا .. والله عمرو ما اتهمها وقدر مايجيهو ظن .. بقول لي دي ما الحقيقة .. حتي عارفة يوم انا مشيت المدرسة وسألت منها..
في بت قالت لي سهام تافهة وقليلة ادب وبتاعة اولاد.. وقالت لي فيها كلام اسكتي خليهو ساي .. ولمن مشيت كلمت عوض .. قال لي مابنصدقها .. احتمال يكون عندها هدف واتهمت البت ساي ..
ميادة قالت ليهو والله فعلا كلامو صح البت السالتها انت دي اسمها هاله.. كل ماتشوف ليها ولد تقوم ساكاهو .. ونحن بنقول ليها هالة القوالة .. كضابة كضب .. وجات قالت لي سهام انا سألني منك وانا قلت ليهو مابعرف عنك حاجة هههه
شوف اللخبطة دي بالله ..
صلاح قال ليها بس انا يا ميادة داير اثبت ليك انو عوض ماكان متهمها .. وحتى ماصدق كلام البت فيها .. قالت ليهو فهمت ياصلاح ..
قال ليها خلاص انا بمشي اكلمو بي كلامك ده وهو ح يرتاح شوية من قلقو ده ..
الوكت ده كلو عوض كان قاعد مع مصعب برة بتونسو .. والدكتورة كل مرة تجيهم برة تجيب ليهم حاجة .. مرة عصير مرة قهوة .. وكل ما تمشي تجي داخلة غرفتها تعاين لي روحها في المراية .. وتقول تمام مافي كلام يازيزو هه غايتو جنس حالة .. الله يشفي ..
صلاح جا ء طالع من جوة راسو ملان .. لامن بسرح وعوض بعاين ليهو في وشو .. داير يستشف الكلام القالتو ميادة من خلال تعابير وشو ..
لكن ماقدر وبقى يستعجل في القومة .. عشان يسمع الخبر من صلاح .. وكل مرة يقول ليهو قوم ياصلاح الوقت اتاخر .. انت عارف الحاج ود الضريس بقفل الباب من جوة .. تاني الانتلب بالحيطة ..
قال ليهو بندخل بي باب مهدية هههه.. اقعد شوية.. اصلا امك مابتنوم لو انت ماجيت ..
قال ليهو ياخي قوم .. كدا امي ذاتها بنديها السهر .. وصلاح فاهم وعارف عوض مستعجل لشنو.. لكن داير يتغاتت عليهو ومن جوه قاعد يضحك ..
المهم في النهاية طلعو .. وماشين كدا قال ليهو اسمع.. انا ما ح احكي ليك اي حاجة الا في البيت .. قال ليهو والله انا بقوم اخنقك .. انت ماعارف انا راجيك كيف .. وصلاح اصلو ابا يضحك .. عامل جادي .. كدا ومن جواهو ميت بالضحك ..
الى اللقاء ..
