اول عوض وصل البيت .. ما وصل وقعد استرخى كدا .. لقى سهام قاعدة .. والليلة ما مشت تذاكر مع صاحباتها ..
والغريبة انو امها ما شاورتها في العايزة تعملو .. اها في برندة غربية كدا .. بقعدو فيها الاولاد بالنهار .. قريبة من الغرفة بتاعتهم .. مشت قعدت فيها وقالت لي الولد الكبير اسمو الامين . امشي عليك الله يا الامين نادي عوض الامين جرى ناداهو وجا ..
عوض لقاها قاعدة براها في البرندة .. في سرير مجلد بي بلاستيك عالي كدا .
مملصة سفنجاتها وبتلولح في كرعيها .. زي الزول المتوتر وماعايز التوتر يظهر عليهو .. اول من جا عوض قعدت تتبسم بالغصب . كدا البسمة ذاته معروفة بسمة زي بسمة الشافع وكت يناديهو الاستاذ . لي عقاب ..
وفي سرير تاني قعد فيهو عوض .. قال ليها ان شاء الله خير يا فهيمة .. القعدة دي الليلة بس ان شاء الله يكون فيها كلام ليهو ثمرة ..
قالت ليهو غايتو انت وخالك حاقرين بي.. وشايفيني ماعندي اي موضوع .. المهم ياعوض . طبعا" انت شايف سهام دي بعد ده بقت للعرس تب .. وفي القراية ذاتها مي ماشة لي قدام .. وما في اقرب ليها منك .. نحن قلنا كان انت عندك الرغبة .. نشاورك انت اول قبال مانديها لزول غريب ..
يازوووول عوض زي الفي زول الكبا فوقو موية صااااقطة في البرد الساعة 5 صباحا" ... هههه . لامن شهق ..
قال ليها انا؟؟؟ سهام؟؟.. بي استغراب .. بدون مايحس بس ديل الكلمتين القالن ..
قالت ليهو ايوة.. انت وسهام .. الغريب شنو يعني انت ماعايزها ؟
قال ليها انتي سألتيها؟.. قالت ليهو شن دايرة تقول؟؟ هي لاقياك وين؟
قال ليها بس انتي اسأليها من رايها وتعالي لي ..
قالت ليهو طيب انت وريني .. انا بسألها .. قال ليهاانا قاعد بس بعد تجاوب ليك هي .. انا بوريك راي ..
قالت ليهو كويس .. وقام مشى فات.. وقلبو مقطوع من الخوف .
مشت الام الغبيانة طوالي نادت بتها .. وارتكبت اكبر غلطة في حياتها .. قالت ليها يا سهام .. ودعمتك ده قال عايزك .. انتي رايك شنو ؟؟.. قالت ليها منو؟.. عوض؟ قالت ليها ايوة .. عوض نان منو؟
سهام ردت قالت ليها .. عوض؟؟؟ انا؟؟
هو قال ليك كدا؟.. قالت ليها ايوة قال .. انتي رايك شنو وريني بسرعة .. عشان هو منتظر ردك ..
سهام عاينت بعيد .. وسرحت واتبسمت .. وفي سرحتها قالت لامها براحة كدا.. انا ماعندي مانع .. (انا شخصيا ماعارف الابتسامة دي معناها شنو. هل هي ابتسامة فرحة ولا ابتسامة خباثة).. امها طوالي قامت من جمبها .. ومشت رسلت نادت عوض تاني .. والموضوع ده كلو .. والجرجرة دي عمك السر ماجايب ليهو خبر .. وكت شاف المناداة بتاعة عوض كترت ؟؟ قال ليهو في شنو ياعوض؟؟ انت كل مرة بنادوك؟؟ .. مالا فهيمة؟ ان شاء الله مافي مشكلة؟ .. معقول يكون السر نسى الموضوع.. ولا بتستهبل ساي عامل رايح؟
عوض قال ليهو موضوع عادي.. انت ماعارف مواضيع فهيمة ؟
اها عوض وكت جا المرة دي .. لقى فهيمة فرحانةعديل .. احتار في الاجابة المتوقعة ..
قالت ليهو اها يا عوض.. انا سألت سهام .. وسهام قالت قبلانة ماعندها اي مانع ..
قال ليها معقولة؟؟ والله انا مستغرب .. لاني بشوفها بالضبط زي اختي الصغيرة .. دي ما مشكلة المشكلة دراستها .. وانا شايفها لسه صغيرة في السن .. وبعدين فارق العمر بيني وبينها كبير ..
قالت ليهو لالا.. ده ما عذر .. السر خالك اكبر مني ب 15 سنة .. بس هسي اديني . الراي الاخير .. قال ليها والله انا هسي ما مفكر في زواج.. وده اخر كلام عندي .. انا ماشي يافهيمة ..
وقام طوالي فات ..
فهيمة ماقدرت تعرف.. ده كلام حقيقي ولا كلام خجلة ساي ..
لانه سهام مافي زول ممكن يرفضها من جمالها .. وطعم كلامها ..
بس لانهم ماعارفين المانع عوض شنو..
طبعا" عوض لو ما شك فيها وشافا بي عينو .. ماكان برفضها ولا كان بيحلم بي عرض زي ده ..
على كل حال طلعت المعاينة الشافتها فهيمة .. من عوض لي سهام ما معاينة اعجاب وحب .. زي ماهي افتكرت .. وفهيمة اتاكدت من كدا ..
اها بعد عوض المساء طلع على السوق .. عشان يشد القدرة بتاعة بكرة .. فهيمة مشت قالت لي السر .. الزول ده ماداير بتك لي زواج .. لكن بعاين ليها ليه؟؟ الله اعلم ربنا يجيب العواقب سليمة ..
قال ليها انتي قاصدة شنو انتي يافهيمة ..؟؟ قالت ليهو يعني واحد بعاين ليهو لي بت سمحة زي سهام.. ومقهي فيها .. لامن فاتح خشمو .. والبت ذاتها ملاحظة للمعاينة وتتخجل .. ولامن يسألوه يقول ماداير عرس .. معناها الزول ده نيتو شنو؟؟ براك افهم يا مخلوق ..
المشكلة انو فهيمة بتقول في الكلام ده لي السر .. وسهام واقفة بي ورا الشباك بتسمع .. واستغربت جدا في كضب امها القالت ليها قال عايزك ..
على كل حال فهيمة فهمت السر انو عوض رغبتو في سهام مارغبة شريفة .. والكلام ده اثر في السر اثر شديد ..
وقال لي فهيمة اهو ده الكلام الكنت خايف منو.. انتي ذاتك غلطانة تمشي تسأليهو ليه؟
اما مسألة قصدو وماقصدو .. بتي براها زولة واعية.. وانا واثق فيها . لو شافت منو اي حركة.. بتجي تكلمنا انا متأكد..
هنا سهام قعدت تتبسم .. وقالت في سرها .. وقعت معاي ياعوض الاهبل ..
والله عوض يفتح خشمو يقول عني حاجة لابوي .. الا انا انسج فوقو من الخيال السينمائي .. واضيعو ليك بي شربة موية ..
مرت الايام .. ومافي جديد في موضوع صلاح الرسلوهو .. قام عوض ضرب ليهو.. قال ليهو ياخي انا منتظرك فوق جمرا" تهبو الريح الحصل شنو؟
قال ليهو انت وين ياعوض ؟
قال ليهو انا في السوق . يادوب خلصت ..
صلاح قال ليهو خلاص انا قريب منك .. جاييك هسي ..
صلاح وصل لي عوض في غضون ربع ساعة.. وسلم عليهو .. وعوض قال ليهو انت اتأخرت علي .. وانا احتمال الاسبوع الجاي اقوم الخرطوم .. لانو خالي السر ده متغير مني بلاسبب ..
وهو اصلا بقى كويس .. وباكر احتمال ينزل شغلو عادي .. الحصل شنوفي الموضوع الوصيتك عليهو ياصلاح ؟؟..
صلاح قال ليهو والله حصل شي فوق الحسبان .. اولا مشيت المدرسة تاني يوم طوالي .. وسألت من ميادة .. ميادة لقيتها مافي . قالو ليها اسبوعين ماجات .عيانة في البيت .. رجعت وتاني يوم اتصلت على مصعب اخوها .. زول صاحبي شديد .. وقلت ليهو انا جاييك في البيت .. وفعلا مشيت ليهو .. وما وضحت ليهو اني عارفها عيانة .. قام هو بعد دخل وجاب لي واجب الاكرام .
حكى لي .. قال لي ميادة اختي عيانة شديد .. عندها تكسير في كرويات الدم .. وتعبانة جدا وغالبها الكلام .. ومرات تجيها غيبوبة .. رقدنا بيها في المستشفى .. ونقلو ليها دم كمية .. انت ده كلو ماسمعت بيهو؟ . وهسي كانت تعبانة جدا ومحمومة ..وكت سمعت انك انت هنا .. فتحت عيونا .. وقالت مالو الزول ده طول مننا كدي؟ ..
عليك الله يا صلاح ادخل سلم عليها .. الزولة بتعزك معزة شديدة ..
والله ياعوض وكت دخلت اسلم عليها.. لقيت ميادة البتشبه التفاحة ديك . بقت ضعيفة وسودا.. وعيونا ديل مغورقات .. والله حنيت عليها لامن بكيت .. وكت شافتني .. دايرة تقوم على حيلا .. وفرحت فرح .. لامن الفرح ظهر فوق وشيها .. وناس البيت ذاتهم فرحو معاها .. اصلا هي متعلقة بي من زمان .. واظن ناس البيت كاشفين الحكاية دي ..
وانا جريت الكرسي وقعدت جمبها .. وبدون ما أحس قلت ليها والله العظيم ياميادة انا جيت مخصوص عشانك.. ماعشان مصعب .. والله ماكنت عارفك عيانة .. ان شاء الله تقومي بالسلامة.. وانا في انتظارك . عارف ناس البيت كلهم بسمعو في كلامي .. وقلت الكلام بدون ما احس ..
اها تاني مالقيت طريقة أسال من موضوعك.. والظروف ذاتها ماكانت مساعدة .. وهسع انا جاي منهم ..
انت الحصل في موضوعك شنو ؟
قال ليهو والله موضوعي هسي كلو طار من راسي بي موضوع البت الحكيت لي بيها دي ..
لكن بالجد انا في ورطة كبيرة .. عارف حصل حصل .. حكا ليهو موضوع فهيمة القالتو ليهو .. وقال ليهو والله انا بقيت في وضع لا أحسد عليه .. وهسي خلاص غيرت راي داير اسافر ..
لكن داير اعمل عملية اخيرة ابرء بيها ذمتي .. وماعارف تنجح او ما تنجح .. قال ليهو قول .. النشوف فكرتك ..
قال ليهو نمشي المدرسة عديل.. ونلاقي اي بت من بنات الدفعة بتاعة سهام .. ونحاول نفهم منها الحاصل ..
انا البت دي لو بقت بريئة من شكوكي دي .. والله اجدع فوقها الحبل تب واعرسها .. ما نداير اخير منها ..
ولو بقت زيها وزي باقي البنات الفي الزمن ده .. بكلم خالي بالحقيقة وبسافر ..
صلاح قال ليهو خلي الموضوع ده علي انا .. انت ممكن سهام تشوفك في المدرسة ..
انا باكر بجيك هنا .. ومشى منو ..
اها صلاح باكر مشى المدرسة .. صلاح زول وجيه ولبيس .. البنات لمن شافنو اليوم الاول الجا يسأل من ميادة .. كلهن جنن فيهو.. قعدن يعلقن طبعا .. بنات الثانوي .. عندهن هوس غريب ..
اها وكت جا تاني يوم .. عرفن انو الزول ده ماجاي لي ميادة .. عندو هدف .. مشى طوالي على المديره .. وسأل من حاجات كدا .. عشان يبرر دخولو المدرسة .قال ليها عندو بت اخوه داير يجيبها يسجلا وشنو وشنو .. كلام فاضي ..
ولاحظ انو البنات بعاينن ومقهيات فيهو ..
مشى طلع الشارع وقف جم دكان . جن اتنين من البنات عاملات دايرات يشترن حاجة ..
سلم عليهن وطوالي وقال لي بتاع الدكان .. اتنين بارد لو سمحته..
وهن طبعا" يعجبنك .. لالا ماممكن مشكور .. وبتاع ..
قال ليها شيلي يابت بلا كلام فاضي .. اشربي وتعالي وراي .. مشى وقف هناك كدا .. واحدة فيهن جاتو والتانية ابت ..
اول من جات وقفت تتخجل وتتعاور .. قال ليها ياخي اسمعي باختصار .. انا داير اسألك من زولة بتقرا معاكم .. قالت ليهو اسمها منو؟
قال ليها اسمها سهام السر .. قالت ليهو بتسأل عن شنو ؟ قال ليها بسأل عن اخلاقها وسلوكها وسيرتها في المدرسة ومستواها الدراسي ..
قالت ليهو سهام تافهه وبتاعة اولاد وحقيرة وبليدة .. وقالت ليهو جنس كلام ولا بتقال فوق الخشم .. بدون اي حياء ..
قال ليها خلاص خلاص .. فهمت .. طيب ومياده ؟؟
قالت ليهو ميادة كويسة لكن قوالة .. اي كلام تشوفو تتلفزه وتنقلو بي ضبانتو ..
قال ليها على الاقل ما بتزيد عليهو كلام فاضي ..
قالت ليهو هسي انت ولاعرفتني بي نفسك .. قال ليها .. انا اسمي ابويزيد البسطامي .. حلي عن افكاري يلا ..
وفات طوالي ..
الى اللقاء ..
