زُهُــــور ذَابِـــــــلهٌ بقلم يـاسـميـنا

البارت 22

كانت تجلس بجوار صغيرها الذي اغشي عليه من الألم
تضع له كمادات بارده علي وجهه لتخفف الم الصفعات
تبكي وتشهق بخفوت علي فلذة كبدها
تعلم انه اخطأ وله ان يعاقب
لاكن ما بيدها حيله ..
لا تستطيع الوقوف امام زوجها وابن عمه
مسحت دموعها عندما شعرت بتململ صغيرها بالسرير يأن بألم بدون وعي

يحيي :
ااااااه وووششي ب...ببيوجع..عني

عشق وهي تمسد علي شعره بحنان :
معلش ياحبيبي شويه وهتخف ..

بدأ يرمش عده مرات وعلي وجهه علامات الالم وايضا لازالت علامات الضرب طابعه علي وجنته

يحيي بألم وهو يضع يده علي رأسه :
راسي وجعاني قووي ياماما

عشق وهي تنهض لتجلب له من درج الكومود شريط دواء مسكن:
طب قوم ياقلب ماما خد الحبايه دي ... وراسك هتخف علي طول
اقتربت منه
رفعت رأسه بيدها ووضعت حبة الدواء بفمه .. ثم قربت منه كوب الماء ليرتشف بعض منه ويعود لوضعية نومه
يشهق ببكاء ليقول:
انا موجوع قووي .... ماما انا مبحبش عمو سيف ..
هو وحش قوووي

عشق وهي تنحني تقبل وجنته بلين :
بس عمو سيف بيحبك يايحيي....
وانت غلطت انت وسما صح ولا لا

كاد يحيي ان يجيب
يماما بس ... لكن قاطعته عشق:

مبسش
يحيي حبيبي انا ربيتك علي كده ..
ربيتك تأذي الناس بالطريقه دي !
هي دي الثقه اللي سبتهالك....تتصرف بيها كده
انت عارف لينا دي باباها ممكن يعمل فيها ايه
ممكن يقتلها

شهق يحيي بخوف :
يقتلها!!!!!

عشق  بهدوء وهي تحاول اخافته من فعلته هذه حتي لا يعيدها :
مش بس كده دا ممكن هو كمان يجراله حاجه ويدخل المستشفي ....
يبقي في ناس اتأذت بسبب ابني يحيي اللي ربيته كويس
وبابا سامر ييجي يحبسك ويبعدني عنك انت واختك تاني

هب يحيي محتضنا عشق بشده وخوف من ابتعاده عنها :
لا ياماما والنبي متبعديش انا مش هعمل كده تاني
بس علشان خاطري انا مصدقت انك رجعتي
والله والله مهعمل حاجه غلط تاني ..احنا بس كنا عاوزنها تمشي من البيت
مش بنحبها ورخمه

ابعدت عشق ابنها عنها ونظرت في عيونه بجديه :
هسألك سؤال يايحيي ..

اومئ برأسه بالقبول

اردفت عشق :
طنط لينا زعلتك في حاجه ولا أذتك او عاملتك وحش !!!

هز رأسه بالنفي بخزي

عشق بعتاب ولوم:
امال ليه عملت كده ... ليه انت أذتها بالشكل ده
عارف انت خليت الناس تقول عليها!!
خليتهم يقولو انها  انسانه وحشه ومش متربيه
ترضي حد يقول علي ماما وهمس كده !!

يحيي بغضب وعصبيه مشابه لغضب أبيه في رجولته :
لا طبعا كنت ضربته وموته ضرب

عشق :
شوفت !!!... هي بقا معندهاش اخوات يدافعو عنها زيك
تلاقيها دلوقتي بتعيط وباباها حبسها ومبهدلها ضرب وفاكر انها اللي عملت كده