طرابلس...
الساعه 8:30صباحا💓
اشرقت الشمس بخيوطها الذهبيه...
والعصافير تغني بأصواتها الشجيه...
والناس كلها تنفست مع الصبح...واللي يستعد بش يتوكل ع ربه ويشوف رزقه...
ومن ضمن هالناس اللي فايقه من الصبح وهما في قمة الحيويه والنشاط😎...
في احد احياء العاصمه طرابلس...
في عمارة متكونة من تلاته ادوار....
في الدور الأول تحديدا.....
نلفوا ع الحوش.....ايوه الروشن هدا المفتوح ع وسعه....
يااه😍😍😍😍...
[ جمان:حبيباتي ..حلوة ولا!!مساويه؟!ياوخيتي سلمكم😚]
احمم...
صباح الخيرات...
وهو واقف ومربع ايديه ويشوفلي : واخيرا ..
ليا ربع ساعه نراجي..عطلتيني يااختي..
جمان: لااني اختك ولاعمتك😍😍..احممم..ايه تفضل ليك المساحه...
: طيب فينا😒...
ابتسم و تنحنح وقال: صباحكم عسل ياعسلات...
شنجوكم...احممم..اني زي مايقولوا بطل رواية...الحق مانيش عارف كيف بس الاخت جمان هكي تبي..
يللا ماعلينا...
تعالوا معاي...
مشي توجه للباب وفتحته وطلع من الدار ويمشي وهو يقول: نعرفكم بيا..اني عبدالقادر الأمين...ينادوا فيا عبدالقادر وقدورة وقدري وقادر...وقدو...
واني الحق نحب من الاسماء هادي كلها قدورة لأسباب مجهوله للآن مش عارفها...
حك لحيته وقال..المهم....دار حوالين نفسه وهو فاتح ايديه..ساكن في هالشقه الكبيرة مع حناي وجدي من بوي...
ماهو..ابتسم بألم..اني يتيم..هييي هييي ماتتأثروش هلبه عادي راهو متكيف مع الوضع 💓...
احمم..المهم...
اني دلوع العيله...وقف..وحرك سبابته ايمين ويساروقال...من الجيهتين عيلة بوي وعيلة امي...
حك لحيته وضحك...وكمل ماشي وهو يقول...تو ماشي للكوجينه وين مانلقى حناي وجدي كل صبح يتناقروا...هههههه..قصدي يفطروا...قالها وهو يرمش فعيونه..
في الكوجينه...
تجديده"حناه":وباهي مادام ربي فتحها عليك وبعت البل كلهم..عطيه يشري سيارة جديده العفو...
فرج"جده" قال بتفنيصه : من هو؟!
"عبد القادر يابوعنب ضاق الحال عليا.
داوي حالي يابو عنب سيدي روف عليا"
فرج : غير والله اعبى..
عبدالقادر وهو مازال يرقص ومنسجم مع الاغنيه اللي قاعده فراسه: علاش ياجدي حرام عليك ليها عام عندي راه سكرت عام تحندبت وحندبتني..
تجديده بضحكه:باهي تعدل يادعوه وانت تدوي مع جدك..
فرج يفطر ومش معبره..
عبدالقادر وقف ويأشر عليه وهو ماط شواربه بإستياء..
تجديده بضحكه:غير ياحاج عطيه يشري وحده جديده والله منظرها مولي يحشم من كثر ماداهكها ليها عام راهو..
فرج شبحلها: وهو قداش ليه عام في الجامعه لتو...
شقلب عيونه وهو رافع راسه فوق..
فرج: الجامعه ليه فيها قريب 7سنين....وكل عام يقول هالعام نتخرج طلع يفوت فيه علينا..وهو من سنه تالته مازال ماطلع..
فنصت فيه تجديده...
طبعا هو عنده اسلوب للهروب وقلب الطاوله فنفس الوقت..
عبدالقادر وهويشح في جاكته ويرفع فيها وينزل: خلاص خلاص..معاش نبي شي خلاص..وطلع من حداهم وهو يقول..الله غالب عليا....وخلاص جيت يتيم لابو يحن ولاام اطبطب.. وطلع من الحوش ومكمل في الدراما متاعه وهو في الجنان..
تجديده دموعها نزلوا:والله ماتحس انت ولافي فقلبك رحمه..وطلعت من بحداه تبكي..
وهو مفنص عيونه : هالفرخ الكلوفي ...
برا..
بعد كمل وصلة الدراما ..
مشي لسيارته..
كانت نظام اللي من غير سقف...
نقز فوسطها...
"قدووورة"..
عبدالقادر : ريتوها اللي نادتني هادي ..هادي عمتي فتحيه ساكنه فوقنا هي وراجلها..راجلها هدا..قعد يعد ع صوابعه
..نفاخ..حشري...فيلسوف ع مافيش..وماعنده هم فحياته كله غير انه يصلح عبدالقادر ويخليه عضو فعال في المجتمع ..هو هكي يقول...مثقل طينة ام سلالته...
رسم ع وجهه ابتسامه ولف راسه وهو رافعه فوق قال: اوووووووو توحه...صباح الفل..
فتحيه :صباحك مبروك وعدوك مهلوك...وراس قدورة اليوم ترفعني للمه ابتسام بنت عمك..
عبدالقادر بضحكه: ولت وصار منها ودارت عيله وصغار هالقردة...بالله شن جابت ..ماتصدمنيش وتقولي بنت...مسكينه وجعتني من توا...من بيشبح فيها مسكينه..امها تشبه الآنسه منشن وبوها يشبه عشماوي المصري...ياقعادها في الرقبه ..
فتحيه: ههههههههه تي غير استاكه يادعوه...جابت وليد..
عبدالقادر تنفس بإرتياح: باهي الحمد لله...الراجل مايعيبه شي..
ضحكت عمته وقالت : باهي شن قلت..
عبدالقادر فكر شويه بعدين قال:امتى ...
فتحيه:مع 7..
عبدالقادر: 7...7ودقيقه بنمشي ونخليك..
فتحيه:6ونص تلقاني واتيه...
عبدالقادر ضحك وقال :تم...هي تشاووو توحه..
لبس نظاراته وشغل السيارة وتحرك....
انفتح باب الحوش اتوماتيكيا وطلعت السيارة....
في الطريق...
عبدالقادر: احمم..طبعا اني انسان مبدئي في الحياة فرفش تعش تنعتش...ايه عارف مش هكي..لكن اني نبيه هكي...
المهم...عايش حياتي ومش مدور شي لانحب نحرق دمي ولانضايق روحي ولانعرف نخمم ولاننشغل بشي..
الحياة هكي تبي...والناس بش تعيش بيناتهم لازم تكون هكي...
باااارد ومايهزك شي ولاتعب اعصابك معاهم..
هدا اشبح كيف شبحلي...هدا شن قصده بكلامه ..هدا شن يقصد بالحركه هادي..لااالا...ولاندور ولانعدل...
كان بنولي هكي نموت ناقص عمر..واني الحق نبي نعيش اطول فتره ممكنه...ضحك وقال..الا اذا عاد الأخت جمان ماعندهاش كلام تاني.
[جمان: انت غير بطل تقول اختي بس بش مانحطكش فراسي😒]
عبد القادر ضحك بريبه 😅...
🍃🍃🍃🍃🍃🍃🍃🍃
نخلوه هو يكمل طريقه للجامعه....
ونمشوا حني لمكان تاني في العاصمه....
في حي حلو ومرتب....
في حوش ارضي من دور واحد...
كانت في الكوجينه...واقفه ع بكرج القهوة...طابت ...
طول صبتها في فنجان ...ومشت للحافظه طلعت منها كعكه كبيرة شكلها حلو هلبه اشبه بالبريوش ومميزة...
ايه عاد هدا كعك هون😍...
ايه من الجنوب هي ..واصولها من مدينه هون...لكن انولدت وعاشت فطرابلس...
"آمنه ياآمنه"..
آمنه: في الكوجينه ياحناي...
عايشه مع حناها وخالها...مش لأنها يتيمه لا..لأن بوها وامها مطلقين...وكل منهم دار عيله ع حاله وخلوها هي ع حالها💔🍃
حناها تبرة: بتمشي اليوم الجامعه...
آمنه:لالا غدوة إن شاء الله..
تبرة قعمزت ع الكرسي: مش صعب عليك تقري في الجامعه نحس المدرسه اسهلك..
أمنه بعد كلت من الكعك: امم..وين اسهلي ياحناي...مفرخ قليلين ادب..والولاد بالذات في المدرسه ماتعرفيش تتعاملي معاهم مش زي الجامعه الوضع اسهل ..
حناها: باهي بنيتي ربي يفتح عليك ..بتمشي اليوم لأمك..
شبحت لفنجان القهوة بضيق: ايه..
تبرة:معليشي بنيتي بري لبيان اختك وغيري جوك ..
ابتسمت بأالم وهي تشوف لفنجان..بعدين شبحت للروشن:الجو حلو خل نطلع نقعمز برا...
مشت بتطلع..
حناها تشوفلها كيف تمشي وموجوعه عليها...
عندها عيب خلقي...رجلها اليمين اقصر من اليسار..وتمشي مشيه عرجا..وهالعيب هدا ماخلا حد يطق بابها..
برغم انها انسانه مثقفة وحلوة ومتدينه وست بيت..لكن مع الاسف الناس في مجتمعنا مادورش في الحاجات هادي...
🍃🍃🍃🍃🍃🍃🍃🍃🍃🍃🍃🍃🍃
وصل للكليه...
يقرا في كليه العلوم...
قسم الحاسب...
وطبعا بالواسطات والمعارف قاعد فيها برغم نظامها الصعب..
درس السيارة في الساحه..
ونزل منها...
وكمل يمشي...قص الكياس...
ووصل في الواجهه..
ركب الدروج..
في بنات قدام الواجهه مسهمات فيه 😍😍😍
حول نظاراته ..وشبحلهم...غمزلهم وهو مبتسم ع جنب..
هما حطوا ايديهم ع قلوبهم وقريب داخوا😍💓💓
وهوضحك وكمل طريقه..
عبدالقادر بإبتسامه غرور: الله غالب جيت قنين من ربي مش بيدي ....😎
كمل وهو ماشي...وبعينيه مدوب الكل حواليه..نظرة هيك وغمزة ولا حلوة بتفلت منك..
عبدالقادر بضحكه: قاعد نجبر بخواطرهم بس...😁
"قدووووو"
عبدالقادر: اووووو روووقه...
وحضنوا بعض...
عاد عبدالقادر وفاروق طيور ع اشكالها تقع...
صحاب صحاب...ومازال في زوز تانين يكملوا قروبهم...
عبدالقادر: في محاضرة توا..
فاروق:ههههههههه..شن تبت والتزمت..
عبدالقادر بضحكه: الحاج يارووقه حاط عليا جواسيس..
فاروق بضحكه : وصلتله منك حدها..
عبدالقادر برفعة حواجب: والله خلاص ..عارفه اخرته بيقطع عليا السيوله..خل نلتزم هالسمستر وامري لله..
فاروق ضحك وقال:ياسيدي مافيش محاضرة توا..كنت نهدرز مع استاذ مهاب قال الاستاذة بتجي غدوة مش اليوم..
عبدالقادر: ملييييح بكل..معناها الموعد متاع الهندسه بيصير منه..
فاروق ضحك بصدمه: مسرع!!
عبدالقادر حك حاجبه وقال: تعارفنا ع الفيس..في كذا قروب..
فاروق بصدمه:كدا قروووب!!؟
عبدالقادر بضحكه:ايه..وحده في الهندسه ووحده في الفنون ووحده في ابن منظور...يعني اليوم مشغول يابرو حتى شعري مانقدرش نحكه...سلملي ع الجيف... سوا حواجبه ولبس نظاراته وقال.....تشاووو..
مشي وخلا صاحبه يضحك عليه...
🍃🍃🍃🍃🍃🍃
هادي المقدمه.....
نستمر ولانوقف...
ههههههه خطروا عليا ايامات عقد الحب الفريد نكتب وخايفه من ردود الافعال 😂😅
