💕..
"قدورة"...
"قدو"...
"قدري"...
"قاااادر"
عبدالقادر برفعة حاجب:نعم..شن تبي؟
جمان بضحكه:شن نبي يعني نبي نكملوا!؟
نزل حاجبه اليمين ورفع اليسار وقال:تبي تكملي!؟تو تبي تكملي..ع مزاجك هو امتى ماانتي تبي توقفي وامتى ماتبي تكملي!
جمان بإبتسامه:في الحقيقه والواقع ايه هكي ع مزاجي اني الكاتبه ماهو..
غمض عيونه وابتسم بعدين فتحهم وقال:ع حسابك ياستي واللي تبيه انتي يمشي علينا..
ضحكت وقلت:تمام..باهي نكملوا..
تنهد بإبتسامه وقال:نكملوا..
🌟🌟🌟🌟🌟🌟🌟🌟🌟🌟🌟🌟🌟🌟🌟🌟🌟
نزلت من سيارتها بعد درستها..
صكرت الباب..
ومشت طول للطريق..
قصت الكياس..في امان من الله..
فجاة..
صوت سيارة دارت فرينو..
هي سمعتها..
طيحت شنطة اللاب وحطت ايديها ع راسها وعيطت بأعلى حسها...
كانت السيارة حتوصل فيها خلاص وبتضربها..
فلحظه..
حست بشي حاوطها وغمها..
وزاحها مسافه عن نص الطريق..
هي..
كانت مش فاهمه شي وشبه بدوخ..
ريحة عطر..
تشم فريحة عطر مش غريبه عليها..
حاولت تذكر ع من شمتها..
شويه شويه بدت تتحرر من حصار الشي اللي كان محاوطها وغامها..
هي كانت مغمضه عيونها من الخوف..
فتحتهم فجأة ع وسعهم لما سمعت..
"وين عيونك وين"..
قامتهم..
وانصدمت من اللي شافاته..
عبدالقادر بإبتسامه ساحره:باهي اللي ربي جابني فطريقك..
💓هي قعدت تشوف لعيونه وخلاص..
ومازالت ريحة عطره محاصرتها ..
اما هو..
فنظرات عيونها السود..
كانوا مخليين قلبه يهيم بنبضاته..
عيونها سود فيهم لمعه..برغم الحزن اللي مغرقهم الا ان نظراتهم كانت تعبر عن شي تاني..
"أستاذه آمنه"..
هو..
تبدلت ملامح وجهه للإمتعاض..
اما هي استاقظت والتفتت..
جاوبت بركبه:نعم!
عصام وهو عاقد حواجبه:إن شاء الله ماصارلك شي..
قادر غمض عيونه بنفاذ صبر..
هي كيف جايه بترد..
سمعوا التلاته صوت حاجه اتكسرت دهسا..
شبحوا التلاته لمصدر الصوت..
لقوا سيارة ماشيه فوق شنطة اللاب..
آمنه شهقت بصدمه بعدين حطت يدها ع فمها...
عبدالقادر شبحلها وقال:ياخد سوك..
امنه حولت يدها وقالت بصدمه:كل شي فوسطه كل شي المحاضرات..شغلي....كل شي حي عليا..
عصام وهو يشوفلها:خلاص اهدي هدي روحك..تنحل..
امنه حطت ايديها ع وجهها..
بعدين نحتهم وهي مغمضه عيونها وحطت فنصها ..
فتحت عيونها وقعدت تشوف للشنطه..
عبدالقادر غير عيونه عنها ومشي للشنطة وهو يقول:بسيطه تنحل تنحل...وصل فيها وطبس بياخدها والتفت شبحلها..تنحل..
هي فجاة عيطت ع طول حسها..
وجاته تجري بدون وعي شداته من ذراعه وجبداته وهي تعيط وعيونها مغمضات..
وهو يشوفلها بصدمه..
ع خطمة سيارة تانيه اللي فيها دار كلاكس والله اعلم شن حط عليهم وكمل طريقه..
التلاته قعدوا معاها بعيونهم..
بعدين عصام شبحلهم
لقي آمنه شاده ذراع عبد القادر وهي تشوف للسيارة..
وعبدالقادر يشوف ليدها ويشوفلها وع وجهه ابتسامه خفيفه..
عقد عصام حواجبه وقال:استاذة..
هي شبحت لعصام..
بعدين عقدت حواجبها بإستغراب غيرت عيونها ليدها بعدين قامتهم فعبدالقادر..
استاقظت لنفسها طلقاته ومشت فاتت من جنبه وهي مرتبكه ومعصبه للشنطه..
وصلت فيها طبست وجبدتها ومشت لسيارتها وهي تقول:استغفر الله العظيم واتوب اليه..
وقعدت تمشي والزوز يشبحولها..
عبدالقادر لحقها طول..
وعصام كيف بيلحقها رن هاتفه تأفف وقال:المحاضرة..
شبح لقادر كيف ماشي وراها يكلم فيها وهي ماتبيش تعبره..
عصام بغضب:الولد هدا....سكت بعدين قال..تو نديرله حد كان طلع اللي فبالي صح..
ولف ومشي بعد تنفس بعصبيه...
من بعيد شويه..
من ورا الشجر..
سموعه اللي كان يراقب: تعرفوا حتى هي فيها شي..
فاروق بضحكه:حتى اني حسيت..
جلال:شوف كيف تكلم فيه..بتفنه كف وقولوا قالها جلولو..
سموعه ضحك..
وفاروق قعد يضحك وهو مركز معاهم..
💕💕💕💕
ياودي برا اقلب وجهك..اقلب وجهك..اقلب وجهك..
عبدالقادر:غير هدي روحك بالله عليك اني نبي نساعدك بس..
امنه غمضت عيونها بغضب وقالت :اففففففففف..
هو قعد يشوفلها ويضحك..
فتحت عيونها وشبحتله من فوق للوطا بعدين قالت:انت اخر واحد نقبل منه مساعده برا فحالك احسن ماأقسم بالله العلي العظيم نديرلك مجلس تأديب والله نديرها..
هو رفع حواجبه بصدمه وقعد ساكت..
وهي بعد شبحتله بحده لفت ومشت للسيارة فتحتها وركبت..
صكرت الباب بقوة شغلتها وتحركت بسرعه..
وفاتت من حداه وهي تحرق فالعجل والغبرة اللي دارتها عمتله عيونه..
غمضهم وقعد يحك فيهم..
شويه خطرت عليه لما جبداته من دراعه وبعداته عن طريق السيارة..
ابتسم..
وقلبه يدق بقوة💓
ع جية الأولاد...
سموعه خبطه ع ظهره وقال:مادورش ردة فعلها توا
فتح عيونه وهو مازال يحك فيهم قال:عارف..
جلال بضحكه:لكن والله لقطه حتى فالمسلسلات مادارو زيها..
فاروق بضحكه:بالذات والبالطو متاعه كيف يطير وراه وهو شادها..
عبدالقادر نزل ايديه وقال:شوركم ماغيبتوا جهد فالتعليقات والضحك..
سموعه بضحكه؛كلاب عارفهم انت..
فاروق وجلال قعدوا يضحكوا.
عبدالقادر:يجيكم يوم..
وطلع كلينكس من جيبه وقعد يمسح فعيونه..
صحابه لاحظوا انه زي اللي مضايق..
سموعه حط يده ورا رقبته وقال:وجهك هدا مش متعرف عليه قبل..
عبدالقادر قعد ساكت..
فاروق وجلال شبحوا لبعض بإستغراب بعدين شبحوا لسموعه..
عبدالقادر رشف وقال:ماشي مشوار ضروري بيناتنا آلو..
ومشي طول لسيارته..
سموعه:قدووو..
عبدالقادر وهو ماشي قام يده وهو رافع ابهامه بعدين نزله وكمل طريقه للسيارة..
فتح الباب وركب..
سموعه:ياودي والله التكبيد مايجيه من وراه كان الغم..
جلال وفاروق قعدوا بعيونهم مع سيارة قادر لعند ماطلعت من الساحه ومشت..
🌟فالسياره..
جمان:خيرك!؟
عبدالقادر:تلخبطت عندي هلبه...عصام الزفت هدا...وهي مش عارف علاش نضايق لما تهزبني..مانتحملش..
جمان بضحكه:ماهو هي توا تأثر فيك هلبه..قلبك بيولي حساس من اي حركه اديرها..
عبد القادر تنهد وقال:باهي قوليلي شن معناه هدا..
جمان:معناه واضح زين...
ابتسم وقعد يسوق وهو يتفكر فكل شي صار..
💕وهي نفس الشي..
كانت بتموت من الخجل
وين تذكر تصرفها التلقائي اللي داراته لما كان واقف فنص الطريق وشافت سيارة جايه تجاهه..
آمنه بخجل شديد:شن الحركات الحماره هادي!!لا وفوق هكي قدام استاذ عصام!!؟شن بيقول عليا توا وكيف بيفسرها!؟
ولا هدا الزفت البلوة اللي بلاني بيه ربي كيف نفتك منه بس!؟
تقول فكلامها عليه وقلبها يرف رفان من داخل 💓
💮💮💮💮💮
الساعه 11:00صباحا..
خشت للحوش بعد ماروحت من الجامعه..
لما صكرت الباب سمعت اختها وهي تقول بعياط..
"ماما..مامااا نوضييي"..
مشت تجري وقعدت تبع فصوت اختها لين وصلت لممر يرفع للديار..
لقت امها مقعمزة وهي منسنده ع الحيط وحاطه يدها ع صدرها وتاخد فنفسها بالسيف..
روبين بصدمه؛مااااماااا..
جتها تجري وقعمزت ع روس صباعها مقابلتها وهي تقول بذعر:ماااامااا..
سيرين ببكي:روبين..زوديلها ياروبين..
روبين ناضت وقالت:تو نكلم عمي.
سرين:اتصلت بيه مصكر..مصكر..
روبين :وااااك..
شبحوا الزوز لامهم بعد سمعوا صوتها تقول:آااه..
وبعدين فقدت الوعي..
روبين وسيرين بصوت واحد؛ماااماااا..!!
🍂🍂🍂🍂
صكري صكري الباب يخش منه صقع يالطيف.
امنه جبدت باب الحديد متاع الكوجينه وصكراته وهي تقول:الشتي جي بكري..
تبرة:ايه مع خشة شهر11..
امنه:فشن خاطره خالي للغدي..
ضيقت تبرة عيونها وقالت:غير كان نعرف شن خلاك تروحي بكري هكي..
امنه شبحتلها وقالت بضيق:تو مش ياحناي قتلك لابي طاح تكصر والمحاضرة لغيتها!؟
تبرة:مش عارفه ليش حاسه ان في حاجه تانيه..
امنه بشي من الإنزعاج:لا حاجه تانيه لاتالته حناي..وقوليلي توا شن نديروا غدي..
تبرة هزت راسها وقالت:ع كيفك...وكانك ع الغدي بري تريحي فدويرتك اني تو نديره..
تنهدت آمنه وقالت:ع راحتك..ومشت طلعت من الكوجينه...
وحناها حركت راسها ايمين ويسار وتوجهت طول لدولاب الكوجينه بش بتاخد طنجره..
🍂🍂🍂🍂🍂
في إحدى عيادات العاصمه..
يمشوا في الممر الزوز ويتكلموا..
روبين:شن دخلي اني باهي؟!
سيرين:قعدت تخمم فموضوعك الاحرف وتحرق فدمها لاتاكل ولاتشرب لين هبط ضغطها..
روبين:امي ماتخممش فيا اني..امك تخمم في بوك..
سيرين وقفت وقالت بنرفزة:والنبي فكيني من الدوة الفاضيه وبري عطيهم فلوس الدخول..
روبين:يبوا الف وخمسمية واني ماعنديش اكثر من 500اختك هديكا..
سيرين بتهكم:وبوك من كرمه ماخلاش اكثر من 300لماما اني خديت منهم 100اليوم الصبح..
روبين بعجز:باهي كيف نديروا؟!
سيرين برفعة حاجب:مش عندك خطيب!
شبحتلها روبين شويه بعدين قامت تليفونها ومشت من حداها..
سيرين:اني خل نكلم هديكا احتياط..
🍂🍂🍂🍂
راقده ع سريرها بالجنب..
حاطه ايديها الزوز تحت خدها..
وع وجهها ابتسامه خفيفه..
☆☆ باهي اللي ربي جابني فطريقك..☆☆
زادت ابتسامتها توسعت..
وقلبها يدق بقوة💓
تنهدت..
فجأة رن تليفونها..
تلاشت ابتسامتها واستاقظت لروحها..
ناضت قعمزت...
خدت تليفونها من ع الكامدينو..
شافت المتصل استغربت..
فتحت الخط وردت..
امنه وهي عاقدة حواجبها:ايوه................تبدلت ملامح وجهها للخوف بعدين قالت..وين وين قولي وين...........باهي هاني جايه توا...
صكرت عليها..
وناضت وقفت..
مشت لدولابها فتحاته وطلعت الكاصه متاع الفلوس...
🍂🍂🍂🍂
طلعت من دارها وهي لابسه وشنطتها فيدها..
وكانت تمشي بسرعه وهي فقمة القلق..
وصلت فالكوجينه وقالت:حناي..
حناها شبحتلها وهي متفاجئة:وين ماشيه..
امنه:امي تعبت ياحناي ..
حناها خافت هلبه..طفت ع الغدي ومشت بسرعه وهي تقول بخوف:حي عليا بنيتي!..راجيني نلبس جلابيتي..
طلعت من حداها..
وآمنه قالت:نراجي فيك برا..
🍂🍂🍂🍂
ركب سيارته وهو يكلم فأخته..
عصام:اسمعي سقدي روحك ندرس قدام حوشك نلقاك تراجي فيا فالفم.......ياودي قالت مسافر مامسافر...باهي خليك من الدوة توا وتحركي وتي روحك..
صكر عليها..وصكر الباب..شغل سيارته وتحرك طول..
💮💮💮💮
وصلوا آمنه وحناها للعياده..
لما خشولها لقوا سيرين وروبين يراجو فيهم..
تبرة وهي داهشه:شن طرالها مريم..شن جاها بنيتي..
روبين:حالها باهي توا..شبحت لاختها وقالت...سقدي ادفعي فلوس الدخول..
شبحتلها آمنه من فوق لتحت..بعدين مشت...
تبره:ارفعوني لامكم..
سيرين تنهدت وقالت:تعالي معاي..
مشت سيرين ووراها حناها ..
وروبين وقفت تراجي فخطيبها..
شويه..
وخش عصام ومعاه اخته منى..
وصلوا فيها الزوز وقالوا:السلام عليكم..
روبين:وعليكم السلام..
منى بقلق:لاباس عليها ماما خيرها؟
روبين بحزن:روحت من الكليه لقيتها سايخه واختي حداها تعيط اني وياها طلعناها من الحوش وولد جيرانا جابنا هني..
عصام بحده:كيف يجيبكم ولد جيرانكم!؟
منى شبحتله..
روبين:ماعندنا حد يرفعنا شن نديروا؟!
منى:ماعندهم مايديروا هديكا الساعه ياعصام قاتلك أمهم كان مغمى عليها..
عصام بشي من العصبيه:باهي باهي بروا انتم توا..
روبين بضيق:تعالي منى..ومشت
منى مشت معاها وقالت:شن قالولكم ع وضعها؟.
🍂🍂
وصل عصام لوين مافي الحسابات بش يدفع فلوس دخول مريم..
تفاجأ لما شاف امنه جايه..
هي ماشبحتاش كانت لاهيه بشنطتها..
وهو معاها بعيونه لين قربت منه..
وين جت بتفوت من حداه وقفها لما قال:استاذة آمنه..
هي وقفت فمكانها ودورت منين جاي صوت شافت جنبها انصدمت لما لقاته هو..
عصام؛إن شاء الله خير..صارتلك حاجه من حادث الصبح؟
امنه حركت راسها بالنفي وهي متوترة بعض الشي وقالت:لالا..اصلا ماصارش حادث..
عصام ابتسم وقال:كويس معناها جايه تطمني ع روحك؟
امنه وزعت نظرها ع المكان وقالت وهي عاقده حواجبها:لالا..عندي..شبحتله وقالت..امي هني..
عصام:ان شاء الله لاباس خيرها؟
امنه:هبوط حاد فالضغط..
عصام بأسف:تس تس تس..لاباس عليها..
امنه:لايوريك باس..نستأذن..
ومشت طول وعصام معاها بعيونه..
بعد اختفت..
التفت القدام وكمل طريقه لمقصده..
وتفاجأ لما لقي الحساب كله مدفوع..
لكن ماوقفش هلبه ع الموضوع لأنه مايهماش..
كلم اخته نزلتله وطلعوا روحوا..
وقعدت امنه وحناها مع خواتها فالعياده..
🌟🌟🌟🌟🌟🌟🌟
الساعه 6:00مساءا..
كان فالجنان يسقي فشجر حناه..
وعمته فتحيه تتفرج عليه من فوق..
حست بيه اليوم مش مزبوط..
قبل لما كان يسقي لازم يفتح مسجل سيارته ويقلب الدنيا ع راسه قلب لين يشكوا منه الجيران..
لكن هالمرة كان مهفت مرة وحده..
خافت عليه لأن هادي مش طبيعته..والإنسان لو تصرف ع غير طبيعته معناها فيه شي..
فجأة..
انفتح باب الحوش البراني وخشت حناه تجديده تجري.
تجديده بهلع:قدورة..قاااادر..
هو انخلع..
ومشالها بسرعه يجري باالطوبو وهو يقول بخوف:خيرك حناي خيرك..جدي دارها!؟
ضمت شواربها لداخل بغضب وجبدت منه الطوبو وبخاته بيه
هو وخر يجري وهي تقول :ان شاء الله فعدوينه..
عبدالقادر وهو يهرب منها ويتقي فروحه:معناها راجل عمتي..
فتحيه بخلعه:ووووه عليا حييي عليا
لوحت تجديده الطوبو وهي تشبح فوق:ضمي فمك يامتخلفه انتي...خالتك حليمه خالتك حليمه..
عبدالقادر بإبتسامه فرح:الله..واخيرا!
تجديده شبحتله وقال:يامنجوه المرة سكرها راقي تحرك ولع سيارتك بنرفعوها..
عبدالقادر برفعة حواجب:والله!!وقبيلة الكواسر اللي جايبتهم وينهم؟؟!!
فتحيه:تي سقد سلم ولدي المراة سكرها راقي لاقدر الله تصيرلها حاجه..
تجديده وهي ضاغطه ع سنونها بغضب:تي هيااا..
طبست قامت الطوبو وهي تقول:هيااا..
عبدالقادر وهو يشبحلها بتفنيصه :حيي حيي حي ..وخش يجري للحوش..
🌟🌟🌟
فالطريق..
ياتجديده فهمي ولد ولدك....فهميه......هو يجري واني سكري يعلا..
تجديده:قاااادر..
عبدالقادر وهو شاد الدومان بإيديه الزوز وع وجهه ابتسامه مكر :والله هكي باهي ليها ياحناي لما تخاف سكرها ينزل..
حليمه وهي حاطه يدها ع قلبها:ووووك عليا وووك يبي يقتلني زايد ناقص....يبي يقتلني هالمطفوش المطرشق..
زاد السرعه..
تجديده بصدمه:عبدالقادر!..
حليمه:يااااربي بنموت بنموت ياناس..
عبدالقادر:والله ماصايرتلك حاجه انتي تسقدينا كلنا وتسقدي اللي بعدنا والدور مايجيكش..رفع حاجبه..الموت توازي راهو.
حليمه:سكتيه ياتجديده سكتيه..
تجديده قرصاته من ذراعه..
عبدالقادر:ههههههههههه...
🍂🍂🍂🍂🍂
وصل للحوش..
لما خش سمع اصوات عراك جايه من داخل..
ارتسمت ع وجهه ملامح الغضب ومشي بسرعه للباب الدخلاني
داخل
وردة ببكي:هدا رزقه ياراجل هدا رزقه مانقدر نجبره ع شي..
عبدالفتاح:ايه مالا شنو ولدك الغالي بتجي معاه واني وولادك الاخرين...كلاب مانسووا شي..نقعدوا غير نراجو فرحمته والفتافيت اللي يلوحلنا فيهم!!
"فتافيت!!!"
التفتله
وامه قريب ماتت من الخوف لما شافاته.
قدملها وجي وقف قدامها وقال بعصبيه:عمرك طلبت مني وقتلك لا..انت تاخد من وراي مايعبي المصرف المركزي واني ندير فروحي احول وعبيط ونقول معليشي ماراحش لغريب هدوما عمي وخوتي..لكن انت..اشر عليه بسبابته وقال...انت ماينفعش فيك الطيب..
عبدالفتاح بشي من الربكه:اسماعيل ولدي مش زي ماانت فاهم...
قاطعه وهو يقول:ايه صح..مش زي مااني فاهم..مش زي مااني كنت فاهم..انك عمي زي بوي مستحيل تطعني فظهري ولاتغدرني..اني هكي كنت فاهم..لكن خسارة طلع مش زي مااني فاهم..
امه ببكي:اسماعيل!
سموعه بتهديد:تعرف..كان مرة تانيه ريتك تعارك فيها ولاسمعت صوتك عالي عليها...اقسم بمن أحل القسم
ناخد منك كل ونلوحك فالشارع ولانقول عمي ولاغنته...
شبحله عمه شويه بنظرة حاقده..
بعدين لف ومشي..
وردة وهي تمسح فدموعها؛تو يعبي روس خوتك عليك ولدي..
اسماعيل بتهكم:ولاده زيه يام مايمشوش الا بالفلوس ماتخافيش..
التفتلها وطبس باس راسهاوقال:في ماناكل..
ابتسمت من بين دموعها وقالت:فيك كل الخير ولدي..
ومشت طول للكوجينه..
وهو ابتسم ومشي قعمز ع المندار...
🌟🌟🌟🌟🌟
تي والله ماصايرتلها حاجه الله
تجديده برفعة حاجب وهي تتحلف فيه:العبيتر اللي درته فالسيارة وراس جدك ماك مفوته..
عبد القادر ضحك..
شويه رن تليفونه قامه لما شاف المتصل قال:اللي ديما تحلفي براسه وتحنثي
قرصاته مرة تانيه..
عبدالقادر:اححح هههههه...ومشي من حداها فتح الخط ورد...هاه فروجه...
▪▪▪▪▪
ماشيه بطريقها لباب العياده..
امنه"اول مرة تتعب هكي..اشبح شن صاير معاهم..وانتي مالك بيهم ياآمنه..في مرة حد دورك ولافكر شن صاير معاك..ولا مرة مرضتي فيها ولقيتي امك فوق راسك حتى منين تسمع بيك تتصل خمسه دقايق ومنها معاش تندري عليك بكل.."
تنهدت وقالت: ع خاطر ربي..
▪▪▪▪▪
عبدالقادر بضحكه:ياودي باهي ياحاج..شويه ومروحين..
صكر وهو يضحك بعدين قال:مايقدرش ع فراق توجه نعرفه..
رفع عيونه وتنهد بإبتسامه..
هالإبتسامه تلاشت بعد شافها..
وقف فمكانه ماقدرش يتحرك ..
وهي كانت واقفه تشوفله وهي فاتحه عيونها ع وسعهم..
والزوز..قلوبهم في حاله 💓💓..
لكن هي فيسع استاقظت لروحها...
غير عيونها ومشت فاتت من حداه..
هو ابتسم ولحقها وهو يقول:ان شاء الله لاباس استاذة !؟
هي كانت تسرع في مشيتها ومتوترة ع الآخر..
عبدالقادر:هو اني متأكد ان بكري ماصارلك شي الصبح..لكن بنسألك ان شاء الله غير مش منه..
مابتش تعبره..
عبدالقادر:استاذة..انتي استاذتي من هالباب خاشلك نسأل فيك..
امنه شدت ضحكتها بالسيف..
وصلت فالباب وطلعت..
وهو وراها...
لما جي طالع رن تليفونه..
عبدالقادر قامه وهو يشوفلها كيف ماشيه بإتجاه سيارتها..
فتح الخط ورد:ايوه..
سموعه:شنجو توا..
عبدالقادر:احلى منه مافيش..
سموعه ابتسم وهو رافع حاجبه اليسار:خير!!.
عبدالقادر تنهد وقال:ال.....
سكت وعقد حواجبه لما شاف لما شاف عصام جاي ناحيتها..
وقف عليها وهي وقفت وبدوا يهدرزوا..
"الو..قدو..قاااادر"
عبدالقادر:عندك مادير؟
سموعه بإستغراب:توا لا..علاش!؟
عبدالقادر:تعالي لعياده ****** توا..
سموعه هز راسه وهو مازال مستغرب قال:تمام جاي..
صكر عبدالقادر منه وهو مازال يشوف لعصام وامنه..
💮امنه:مشكور جدا..لكن مافيش داعي اتعب روحك اني تو نتصرف..
عصام بإبتسامه:مافيهاش تعب نهائي...وبعدين يجيني يوم ونطلب مساعدتك حتى اني ومتأكد انك ماتقصريش..
امنه قعدت توزع فنظرها ع المكان بعدين ابتسمت مجامله وقالت:تمام..
عصام وهو مبتسم:نتلاقوا غدوة فالكليه..
امنه ؛إن شاء الله..نستأذن..
عصام:تفضلي..
كملت آمنه طريقها لسيارتها..
وعصام توجه لباب العياده..
وهو ماشي لاحظ عبدالقادر..
استغرب..
وعبدالقادر كان يشوفله بإمتعاض...
لعند ماوصل فيه..
عصام وقف وقال:عبدالقادر!؟شن عندك هني!!؟
عبدالقادر ابتسم مجامله وقال:قريبتي تاعبه شويه..
عصام:اها لاباس عليها..
عبدالقادر:وانت؟..
عصام بإبتسامه:حتى اني قريبتي تاعبه شويه..
عبدالقادر رفع حواجبه وقال:اها لاباس عليها..
عصام : لايوريك باس..نشوفوك..وخش..
وعبدالقادر معاه بعيونه لين اختفي من قدامه..
بعدين رجع عيونه وين مافي سيارة آمنه لقاها مهناش..
تنهد بضيق وولى خش..
⚡جمان:فشن خاطرك توا..
عبدالقادر:نعطي عصام طريحه..
جمان:وعلاش..
عبدالقادر:تسألي فأسئلة انتي عارفه اجابتها..
جمان:حتى كان نعرف نبي نسمع منك..
رن تليفونه..
ضحك وقال:اهو جاك اللي يبيك تسمعي منه من هني للعام جاي..
جمان بإزدراء:ماناقص..
فتح الخط ورد وهو يضحك:ها وصلت.....تمام طالعلك..
صكر ولف ومشي للباب..
وصل فيه وطلع..
قعد يمشي وهو يشوف فسيارة صاحبه خاشه..
وقف ع بعد مسافه وهو يشوفلها..
لعند مادرس وفتح الباب ونزل..
صكر الباب وجاه طول..
وعبدالقادر قدمله..
وصلوا فبعض..
تصافحوا بطقان ايدين بعض..
بعدين جبد عبدالقادر سموعه ومشوا مع بعض للباب..
سموعه:شن عندك هني..
عبدالقادر:جارتنا النفاخه هديكا رقي عليها السكر حصلت فيها اني وجبتها..
سموعه بضحكه:وعلاش جايبها خليتها راك افتكيت منها..
عبدالقادر:الود ودي لكن شن بندير لحناي..جويرتي وجويرتي ووخيتي وعشرة عمر ومش عارف شني..حناي مستعده تخسر جدي ولاتخسر حليمه..
سموعه قعد يضحك بعدين قال:ايه حقه خيرك بكري لما كلمتني صوتك ماعجبنيش..
تنهد عبدالقادر وقال:اااخ وخلاص ياصاحبي اااخ غير شن درت فعمري اني بس..
وقف سموعه وهو عاقد حواجبه وقال:احكي احكي بسرعه..
💮💮💮💮
مهبوله من يوم يومك مهبوله..
مريم ببكي:يام والله الرجاله مافيهم امان مهما ديرلهم ماينفع فيهم
روبين:صح
سيرين:هدا علاش ديما نقولك معاش تتعاملي مع بابا هكي زي المذلوله..
تبرة:ترا ضمي فمك انتي وياها وانتم ماتعرفوا تقولوا خير بكل..
روبين شقلبت عيونها وسيرين قلبت وجهها عنها..
مريم مسحت دموعها وقالت:معاش اتصل تاني..
الزوز قالوا:لاااا..
مريم ببكي:هاه ريتي يام ريتي..
خبطت تبرة ايديها ببعض وهي تقول:تي غير شن ريت بس!
ومريم حطت ايديها ع وجهها وقعدت تبكي..
شويه رن تليفون روبين
شافاته
لقت المتصل عصام..
مريم حولت ايديها وقالت:بوك!
روبين بإنزعاج:لا ياماما لااا..
ناضت ومشت للباب فتحاته وطلعت وصكرت الباب وراها..
وامها لت تبكي مرة تانيه..
وتبره تشوفلها وهي تحرك فراسها ايمين ويسار بأسف..
برا..
كيف جايه بترد شافت عصام جاي ناحيتها.
عصام:مساء الخير..
روبين:مساء النور..
عصام:شن حالها امك توا..
روبين:الحمد لله احسن من بكري..بس نبي نطلب منك طلب..
ضيق عيونه وقال:شن هو؟..
🌟🌟🌟🌟🌟
ماهو اني قتلك خلاص انت كبدت تملك السو..
عبدالقادر:معقوله بسرعه هكي!؟مش قادر نحولها من راسي الهم بكل..ووين نشوف حد واقف عليها يهدرز عليها وهي تعامل فيه كويس...مسح بيده ع صدر وقال..نحس بجمرة والعه محطوطه هني..نبدا خاطري نشد اللي سماه عصام هدا....غمض عيونه بعدين فتحهم وقال..حالتي خطيرة اني بجديات..
سموعه؛ههههههههه..
ضربه ع كتفه بقبضة يده وقال:الحق مش فيك..
سموعه بضحكه:والله جو عليك وانت مكبد..
قادر شبحله بربع عين من فوق لتحت وسموعه يضحك عليه..
بعدين وقف ضحك وقال:ايه تعال جاي قولي شن صار فموضوعي..
عبدالقادر :اما موضوع..ماعندكش معاي مواضيع بكل..انسى...
سموعه رفع حواجبه وقال:متأكد!! اخر كلام..
رفع حاجبه وغير عيونه عنه وقال:ماعنديش غيره..
شويه رخي حاجبه وقال:اهيا جت..جت..جت..
سموعه جاي بتلفت..
عبد القادر شد ذقنه ولفه ليه وقال:ماتشبحش..
سموعه ضحك بصدمه؛ياوالله عليك حاله حالتك..
قعد يسرق فالنظر لآمنه وهي نازله من السياره وفيدها شنطه حوايج صغيره..
صكرت الباب..
بعدين مشت جهة الباب..
وهي ماشيه شبحاته..
هو غير عيونه لصاحبه طول..
هي وجهها ولا احمر وتوترت مرة تانيه..
عبدالقادر:بنضحك توا اضحك معاي باهي..
سموعه:ههههههههههههههه..
عبدالقادر انصدم وقعد يضحك بربكه..
هي فاتت من حداهم وخشت وهو معاها بعيونه..
لين اختفت..
سموعه بضحكه؛حمار اقسم بالله تو تقول يضحكوا عليا..
شبحله بعد تعكرت ضحكته..
ضربه بقفا ايده ع صدره وهو يقول:هدا وين تقول ياتافه..
سموعه بضحكه:سألتني انت ههههههه..
داخل..
هي كانت ماشيه بعصبيه وتقول فنفسها"ع شن يضحك التافه هدا!!لما شافني بدي يضحك!!تافه وفاضي.."
وصلت فالممر اللي فيه غرفة امها..
لقت اختها واقفه برا..
جتها وقالت:خيرك واقفه هني..
روبين:مايخصكش بري خشي..
امنه:لا مش خاشه..وتوا قوليلي امك خيرها شن صاير معاها بش وصلت لهالحاله..
روبين بتهكم؛خشي انشديها..
امنه:روبين..نكلم فيك بإحترام ردي عليا بإحترام..
▪▪▪▪▪
عبدالقادر:سألت من هني ومن هني وعرفت هي من عندها راقد فالعياده..طلعت امها..
سموعه:اها..
عبدالقادر : تعال من هني..
مشوا للممر اللي يرفع للغرفه اللي فيها ام امنه..
وقفوا الزوز لما شافوها من بعيد شوي واقفات هي واختها يتناقشوا..
اسماعيل بصدمه:حيي!!
عبدالقادر بإستغراب:خيرك..
اسماعيل:البنت اللي معاها!!
"والله كان تهمك امك راك تجيها كل يوم تشوفيها مش لين يهزبوك بش تمشي تشوفيها"
امنه:مانبيش نضيع وقتي فقطافك الفارغ..بس بنقولك اخر كلمتين عندي..اهتموا بأمكم..ردوا بالكم منها..هي ماتبنيش اني ولاعمرها تقبلت اني بنتها..همها كله انتم..لهدا اعطوها زي ماعطتكم..
روبين:طروحك والجو اللي ديري قداش يكسرلي فرقبتي..
امنه بتهكم:مافضاني حتى اني..
وكيف جت بتمشي من حداها..
شدت ذراعها وقالت:راجي..
وقفت امنه وهي تشبحلها شن دير..
فتحت شنطتها وطلعت منها 500 دينار مدتهولها وقالت:هادي اول دفعه من فلوسك وعن قريب نردلك 1500 متاعك..ولايقعد فرقبتي جميل من وحده زيك انتي..
لوحتهم قدام رجليها..
وامنه تشوفلهم بحده..
وروبين شبحتلها من فوق لتحت ومشت..
خطوتين بس بعدين وقفت وهي جامده فمكانها.
وامنه طبست للفلوس خدتهم..والتفتت بتشوفلها..
تفاجئت وين شافت اسماعيل وعبدالقادر واقفين وراهم بمسافه بسيطه..
بس مافي حد تفاجأ قد روبين نفسها..
مفاجأة دخلت الرعب لقلبها بالذات و ان خطيبها موجود فنفس المكان...
...يتبع..
.
