🌸...
بعد مرور أسبوع...
''لك الحمد يامن منحتني سعادة لامثيل لها..يامن وهبتني مالم اطلبه منك كرما ورحمة وفضلا..يامن اثبتني ع صبري فرحا وحبا...حقا..من يترك لأجلك شيئا تعوضه بخير منه..
تركت لأجلك أشياء كثيرة..وانت قد عوضتني عنها بقلب رجل لما يرى في الا كل شي جميل..خفق قلبي له وكدت اركن الى مالايرضيك كي احظى به..ولكنك لم ترضى لي الهوان والعصيان..فرددتني اليك ردا جميلا..واعطيت قلبي ماتمنى كما تحب انت...
لك الحمد...لاأجمل من حب يبارك فيه الرب من فوق سبع سماوات..حب مكلل بالعفاف...حب يبدا بمصافحة الحبيب ليد الأب...طالبا منه يد محبوبته ليحظى بها طيلة حياته ويعيشا العشق الحلال ولايوجد الذ من الحلال....
ياإلهي..قلبي يخفق بشده..فاليوم سينعقد قلبي على قلبه..
وسنكون زوج وزوجه...ااه..كم كان هذا الحلم بعيدا واليوم سيصبح واقعا جميلا...'''
"آمنه"
حطت البيرو وقالت:نعم ياحناي..
"هيا اطلعي افطري معاش في وقت"
ضحكت امنه وقالت:باهي باهي..
وناضت من مكانها ومشت طلعت من الدار..
توجهت للكوجينه لقت الطاوله معبيه فطور..
امنه بضحكه:لمني هدا كله؟..
تبرة:تعالى افطري تعالي قداش ليك ماكلتك مش عاجبتني..اليوم بالذات لازم تاكلي كويس..
ابتسمت امنه وقعمزت ع الكرسي وهي تقول:يعطيك الصحه ياعمري..
ابتسمت تبره وصبتلها طاسة العصير وحطتها قدامها..
امنه:صحيتي حنينه..
قعمزت تبرة وهي تقول:سلمك بنيتي..
امنه تنهدت وقالت:زعمه امي تجي اليوم؟.
تبرة ضحكت بتهكم وقالت:ياحنه ماصدقت راجلها طلع اكيد بتلصق فيه زي القراده..
امنه بضيق:ياريتها تجي..ساد المرة الاولى اللي جو فيها الناس خواتي منها حضروا وهي لا..الله اعلم شن قالوا عليها وعليا..
تبره:ماعليكش في حد ومادوري حد..المهم هو المهم الراجل..مادامه يبيك وهو عارف وضع بوك وامك وراضي ماتعدلي ع حد..بالله بنيتي..افرحي سادك نكد وبكي وهم..خلاص..اضربيهم كلهم في الحيط وعيشي فرحتك سلم بنتي..
ابتسمت امنه وهزت راسها بإيجاب بعدين خدت طاسة العصير وبدت تشرب..
🌟🌟🌟🌟🌟
"الله يبارك..اللهم صل على النبي"
نبيله بضحكه:الله يبارك ناقصه الحرير ويولي كسوة..
فتحيه وهي تتفرج:صدقتي..
تجديده بضيق:الله غالب وخلاص..
شبحولها وهما مستغربات..
فتحيه:خيرك يام؟.
تجديده بضيق:الحق ياربي تمنيتله وحده خير من هادي شن ناقصه وليدي بش ياخد وحده عايبه وكبيره..
فتحيه:كبيرة شني ربي يهديك!..وبعدين حني مش سكرناه موضوع عايبه ماعايبه البنت اخلاقها كويسه وسمعتها زي المسك..
نبيله:وشوفي كيف تغير حال قدري ع ايديها ياخالتي تجديده..قدري بالذات يبي بنت عاقله ومحترمه ورزينه بش تعقله..وبعدين البنيه جميله ماشاء الله عليها وعيبها حدا الباهي فيها ماينشافش..
"ونحبها هلبه"
التفتوا وشبحوله وهما متفاجئات..
عبد القادر:وحق ربي ياتوجي عمري ماحبيت غيرها..وتوا لما تعاشيرها تحبيها زيي واكثر وعيبها هدا تنسيه..
تجديده:عليك واحد لايستحي ولايتحشم شن القطاف اللي تقطف هدا قدام حناك وعمتك وخالتك!
شدوا ضحكتهم فتحيه ونبيله..
جاها وحاوط كتافها بذراعه وباس راسها بعدين قال بضحكه:عارفه تحبي اللي نحبه ونبيك تعرفي اني نحبها بش تحبيها ياحبي الاول والاخير..
ضحكوا عمته وخالته...
تجديده رفعت حاجبها وقالت:رد بالك تنسيك فيا ايوه نقعد اني الكل في الكل ايوه..
هو ضحك وباس راسها وقال:اكيد حبي من غير ماتوصي..ونوصيك حتى انتي قلبي..راك تجرحيها حناي..راه اللي تجرحها تجرحتي..واللي تهينها تهيني ولاتبكيها تبكي..بتولي مرتي هدا ياحناي معناها اني فاهمه عليا..
ابتسموا فتحيه ونبيله..
تجديده تنهدت وقالت:تريح مدام ماريت منها مش عاجبني مش طالقاته لساني عليها..
عبدالقادر:هادي حناي الحنينه...هي سمعيني زغروطه ياقلبي..
تجديده:تو بعدين نزغرطلك..
عبدالقادر برفعة حواجب:نطلب فيها منك ياحناي معقوله ترديني في يوم زي هدا اهم يوم في حياتي..
فتحيه:يما!
مطت شواربها بملل بعدين زغردت بس بدون نفس وقالت:هانا زغرطنا..
هو ضحك وقال:ياودي باهي رضينا باهي هادي الولولو من غير نيه لكن بعدين نبي نسمعها من اول الشارع ولا والله نتكند..ترضيها نتنكد في يوم زي هدا!؟
تجديده بانزعاج:ياودي باهي باهي برا شو شن في وراك وشن عندك ماتعطلناش..وقعدت ادف فيه..
عبدالقادر وهو يقاوم فيها ويضحك شبح لنبيله وفتحيه وقال:تي باهي زغرطوا انتم ديروا جو..
الزوز طلقوها زغرودة...
وبدوا يصفقوا بإيديهم ويشتوا..
فتحيه..
يامبروك عليه بيانه...جاب عروسه من ذرعانه..
وقعدت نبيله تغني معاها...بعدين غنت..
ياقدورة ياأمير..واللي تبيه يصير...
وقعدت تغني معاها فتحيه والزوز يصفقوا..
وعبدالقادر واقف يشوفلهم وهو حاط ايديه ورا ظهره والابتسامه شاقه وجهه..
ع جية اشرف جي وشاف الدنيا رابخه قعد يضحك وخش داخلهم خدي يد عبدالقادر وقال:هيا ورانا هلبه دوشه ياراجل شن بيحزها...
فتحيه:عندي وليد تقول غزال...نراجي في فرحه مازال..
تجديده:انا بناخدهاله ايوه..
جبد اشرف ولد خاله وهو يقول:تي تعالى ياراجل ماتخلنيش نحصل..
ضحك عبدالقادر وهو طالع معاه بعدين غنى..
اهو عطاني الله..وحن عليا العالي..
وربي كتبني ليه وكتبه ليا الغالي..
قعدوا يضحكوا وفتحيه قالت..
فتحيه:ربي يهنيه وليد خوي..
نبيله:يارب ويعوضه بيها عن فقدة بوه وامه...
ابتسمت تجديده وقالت:هادي اللي نبيها نبي نشوف صغاره..شبحتلهم وقالت بقلق..زعمه عيبها مش وراثي؟
فتحيه:صلي ع النبي يام وانسي هالموضوع شويه..
نبيله بإبتسامه:مش شرط ياخالتي تجديده..ربي يعطيهم الذريه الطيبه الصحيحه ان شاء الله..
تجديده تنهدت وقالت:ان شاء الله يابنيتي ان شاء الله..
🍂🍂🍂🍂🍂
"مانبيهاش تمشي"
الزبير:خليها تمشي وحتى انتي كان تبي تمشي امشي..
مريم:بعد اللي صارلك من وراها!؟
الزبير:اسمعي يامريم..حطي عقلك في راسك وحسني علاقتك ببنتك راهو اللي واخدها واحد هو وماليه مقعمزين ع جبل فلوس وواصلين في البلاد ديري حاجه تنفعك وتنفعنا مرة وحده في عمرك .
مريم بضيق:اني قاهرتني لتوا كيف تبلت عليك..
الزبير:اللي تبلى عليا خوي مش هي..واهو الحمد لله غير اقواله واعترف ان هو دار كل شي من راسه وطلعت..انسي اللي صار توا...وشغلي دماغك وافتحي صفحه جديده مع بنتك..
مريم رفعت حواجبها وقالت:معناها نمشي للبيان؟
الزبير:تي ايه وتي روحك انتي وبناتك وهي تو نوصلكم..
مريم تنهدت وقالت:باهي..
بعدين ناضت بتوتي روحها..
والزبير قعد مقعمز مع روحه ورجع يخطط من جديد لمشاريع في عقله يبي ينفدها وطامع يستفيد في المستقبل من امنه وعيلة راجلها..
🌸🌸🌸🌸🌸
وتمر ساعه ورا ساعه...
وامنه تستعد ليوم حيغير حياتها تماما...
حتولي النص تاني لحد يحبها بصدق وتعب بش ينولها...
شخص سكن قلبها غصب عنها..برغم انه كان بعيد في مواصفاته عن فارس الاحلام اللي تمناته..لكنها اكتشفت بعدين ان الانسان غالبا يحتاج من يكمله لامن يشبهه..
يحتاج من يحسسه بقيمته ويحبه بصدق يحبه لذاته وبكل احواله...
امنه زي ماشافت ان عبدالقادر الوحيد اللي يقدر يكملها شافت انها الوحيده اللي تقدر تكمله..
وانهم الزوز مع بعض حيعيشوا حياة متوازنه ومستقره...
🌹هي توا في دارها مع هبه صاحبتها اللي واخده دورات مكياج وشعر...امنه شافت شغلها ع قريبات ليها وعجبها وطلبت منها هي اللي تزينها..
في الوقت اللي فيه تماضر مع سيرين كانوا يعولوا ع الضيافه مع تبره..
بينما امها واختها مقعمزات وحاطات رجل ع رجل قدام التلفزيون ولاكأن الأمر يعنيهم...
🌟🌸🌟🌸🌟🌸
قبل الفاتحه بدقائق..
كان عبدالقادر مقعمز برا في السيارة ومعاه صحابه..
اسماعيل وجلال وفاروق..
اسماعيل:تي خلاص ياراجل وترتني فاتحه راهي فاتحه مش محكمه..
جلال بضحكه:والله حتى وترني..
عبدالقادر بإمتعاض:بيعيونا سكوتكم..
فاروق بإبتسامه:بجديات سهفتني نعيش شعورك..
عبدالقادر:برا عيشه من شادك!؟
فاروق تنهد بإبتسامه وقال:هو اني ناوي لكن بعد ماانت تم امورك نبي المدام تخشلنا في الموضوع..
اسماعيل بضحكه:لنقاني حتى اني نبي مدامتك تجيبلنا وحده من صحباتها..
شبح عبد القادر لجلال وقال:وانت ماتبي شي!؟
جلال بضحكه:لا اني الحمد لله اللي عندي عاجبتني..
فاروق:تي فوتهم وخليك فيا اني بجديات ندوي معاك..الحق الحق عاجبتني صاحبتها..وبصراحه مشيت سألت عليها واللي سمعته عنها مخليني مش قادر نصبر الحق افتح معاها الموضوع قدو طول بعد ماتنقرا الفاتحه..
عبدالقادر:والله!!بعد ماتنقرا الفاتحه طول صار!!؟..اسمع جاي مادام سألت عليها اكيد تعرف ماليها برالهم طول وكلمهم...مش خير مني انت..تمرمد شويه..
اسماعيل بضحكه:والله تبيها التمرميده ياجللو...
فاروق بضحكه:مرمد شويه حتى هو..ذوق من اللي درته..
جلال بإمتعاض:تي باهي ياقدو صحيت بالهلبه...ربي مايحيجنا لغيره..
اسماعيل:يبي سنكرس هو..
ضحكوا عبدالقادر وفاروق..
شويه رن تليفون عبدالقادر..
تلاشت ضحكته وقامه وشاف المتصل..رد طول..
عبدالقادر بلهفه:هاه اشرف!!
"مبارك ياقدري مبارك يبي يباركلكم ان شاء الله"
ضحك عبدالقادر بفرح وقال:يبارك فيك ياغالي العقبه لك..
"تسلم قدري تسلم شويه وطالعلك"
سكر اشرف..وعبدالقادر نزل التليفون وقعد يحرك فيه القدام ولتالي وهو يقول:هي انزلوا ياشويه عزبايه لاعاد نبي نعرفكم ولاتعرفوني..
التلاته تصنعوا الصدمه وقالوا بأصوات متقطعه:له له له..تس تس تس..هادي اخرتها!!
اسماعيل:عارفك بيوع اني هدا علاش خديت احتياطي..
وطلع من تحت الكرسي شيشه..
اول ماشافها عبدالقادر فتح باب السيارة وطلع يجري..في ساحه فاضيه قدام الجامع..
وهما التلاته نزلوا من السيارة وطلعوا يجروا في جرته..
ع طلعة اشرف من الجامع وهو مطلع فيده صفرة فيها عصير لوز وعبمبر..
وقف في مكانه لما شافهم قدامه في الساحه شادين عبدالقادر..
واسماعيل يصب ع راسه في في حاجه لونها احمر..
اسماعيل:احمد ربك جاتك في عصير رمان مركز..
عبدالقادر وهو مغمض عيونه بشده:عصير عينك ياخسيس خل هدا خل..ياتافهين..
وهما ميتين من الضحك..
واشرف يشوفلهم من بعيد وهو يضحك ويحرك في راسه يمين ويسار..
🌸🌸🌸🌸🌸
اما عند العروس...
اللي كيف كملت لبس قفطانها..
هبه:خيال القفطان الله يبارك..
امنه بإبتسامه:تعبت ع مالقيته مافيش قفطان تلقيه متاع مناسبه زي هادي ومستور...
هبه اكتفت بالابتسامه وهي تساوي فيه من تحت..
فجأه سمعوا اصوات زغاريد ودربوكه..
امنه التفتت للباب وقلبها بدق بقوة شديده..
هبه وقفت ع حيلها ومشت فتحت الباب..
لقت قدامها سيرين وتماضر واسيل..
خشوا وهما يزغردوا..
وامنه تشبحلهم وابتسامه حلوة ع وجهها والدموع معبيات عيونها..
جتها سيرين وضمتها وهي تقول:مبارك امونه..
امنه بضحكه فرح:الله يبارك فيك حبيبتي الفال ليك..
سيرين بضحكه:آااامين..
ضحكوا البنات..
جتها تماضر وهي تقول:مبارك ياسمحه..
بعدت سيرين وجت تماضر ضمت امنه..
امنه:الله يبارك فيك تومي يارب نفرح بيك..
تماضر:تسلمي حبيبتي..
اسيل:تعالي خل نقرصك ولاتقرصيني ولامش عارفه المهم نلحقك..
ضحكوا البنات..
وجتها حتى هي سلمت عليها وباركتلها..
ع خشة حناها وهي تزغرط...
وسعوا كلهم...
وقدمت امنه لحناها وصلت فيها وضمتها..
تبره بضحكه فرح ودموعها في عيونها:مبارك عليك بنيتي..ربي يهنيك ياربي ويسعدك عمرك كله..
امنه بإبتسامه حب ودموعها نزلوا:ويطول في عمرك ياقلبي ع الطاعه ويخليك ليا يارب..
هبه:لالالا دموع لا..بالله عليكم...
ضحكوا وبعدوا عن بعض..
هبه:ارجوكم اطلعوا خل نكمل شغلي الناس قريب يجوا..
سيرين بضحكه:باهي باهي..هي نطلعوا نديروا شوط..
اسيل بضحكه:هيا..
تماضر بعتت بوسه طايره لآمنه وامنه ضحكت وردتها..
بعدين مشوا طلعوا البنات لباقي نساوين العيله اللي قاعدات برا..
تبره:الله يبارك عليها بنيتي..هي كملي مكياجك قريب يجوا الناس..
ولفت ومشت للباب ووراها هبه طلعت تبرة وهي صكرت الباب..
التفتت هبه لآمنه وقالت بإبتسامه:
بارك الله لكما وبارك عليكما وجمع بينكما في خير..
وجت لآمنه وضمتها..
امنه:الله يبارك فيك حبيبتي..والفال ليك يارب ونفرح بيك زي هاليوم يارب..
هبه بضحكه:آاااامييين..عطل سي السيد..
امنه ضحكت بعدين قالت:تو يجي في وقته..
هبه بإبتسامه:اكيد...ربي كريم..هيا خلي نكملوا شغلنا هيا بري قعمزي ع الكرسي..
امنه خدت نفس ومشت قعمزت ع الكرسي وهي تسمع فيهم برا كيف يدربكوا ويغنوا..
امها كانت تصفق بس..
وروبين مقعمزة معاهم وهي مربعه ايديها ماتبيش تشاركهم حتى بالكذب...
وباقي العيله اللي يحب آمنه واللي مايحبهاش يهيجوا ويغنوا.....
💎وهلبه منا وين يديروا مناسبه في ناس تجيهم مش حبا فيهم..في اللي حب فضول..وفي اللي جايين بش يهيجوا وياكلوا ويشربوا💎
🌟🌟🌟🌟🌟
الساعه 7:00مساءا..
كانوا في الطريق سيارات عيلة عبدالقادر قالبين الدنيا بالكلاكسات...
وهو كان اخر واحد فيهم يسوق ويشم في حوايجه..
عبدالقادر:دوشت مرتين ومازال نشم في ريحة الخل!!..
طلع الريحه متاعه..ريحه جديده غير اللي ماحبذتهاش آمنه..
غير عطره ع خاطرها..
عبدالقادر وهو يبخ في الريحه:ايه نغير العطر ع خاطرها كان ماعجبهاش..واي شي في مظهري الخارجي ماعجبهاش ماعنديش مشكله نغيره ع خاطرها..زي مامن حقي عليها حتى اني نفس الشي..مش ديما المراة هي بس اللي دور رضا راجلها ع كل شي يخص شكلها..حتى الراجل مفروض يكون هكي...قريت المدة اللي فاتت كتاب عن السيرة النبويه..لقيت انه من السنه الراجل يهتم بمظهره وريحته ع خاطر مرته..مش غير المراة بس.....
غسل روحه غسل بالعطر ورده للدرج متاع السياره..
وقعد يكلكس وهو يغني..
اهو عطاني الله وحن عليا الغالي..
وربي كتبني ليه وكتبه ليا الغالي..
🌟وصلوا لحوش جد من امها..
في سيارات خشت درست داخل في الجنان وفي اللي قعدت برا..
محمد وعمران وخال تاني لآمنه استقبلوا الرجاله ودخلوهم للمربوعه ...
والنساوين خشوا داخل بالسوابيت واستقبلوهم بالدربوكه والأغاني..
العيون كانت بتطلع في سوابيت البيان....
واختها كانت تشوف شن جايبين وقلبها ياكل فيه سوس الحسد ماكله..
اما امها فكانت متفاجئه في اللي تشوف فيه وتتفحص بعيونها في نساوين عيت االعريس..
🌸في دار آمنه🌸
كانت تصلي هي وصاحبتها في صلاة العشاء..
مافاتتهاش ولا صلاه..
🥀ويمكن هادي من اكبر التجاوزات اللي يديروها النساوين في الافراح..تتأجل الصلوات كلها هديكا الليله وتتصلى كلها مع بعضها..
بل في من ناس خلال اسبوع عرس كامل ماتصليش بكل..تقولك بعد العرس تو نقضيهم..
وكأنها ضمنت تعيش بعد اسبوع العرس!
ربي يرحمنا برحمته ويهدينا قداش حني مقصرين وغافلين ربي يتجاوز عنا ويردنا اليه ردا جميل ونحطوا الأولويات الحقيقيه في مكانها المناسب...🥀
🌸بعد ماكملوا صلاة..
دارت هبه ع صاحبتها دوره في مكياجها وشعرها..
وبعدين مشت فتحت الباب بش يطلعوها..
امنه بتوتر:جسمي صقع..
هبه بضحكه:طبيعي..حاولي ترخي روحك شويه..واقري سورة الكرسي في سرك وعاودي..
خدت امنه نفس هي تهز في راسها بإيجاب..
بعدين طلعت..وصاحبتها وراها..
وصلتها للصاله...
وخشتلها..
نساوين عيلة عبدالقادر لما شافوها تفاجئوا..
توقعوا عروسه عبدالقادر تكون اصغر واجمل من هكي..
وزياده ع هكي لاحظوا طريقة مشيتها انصدموا..
وهالشي كان بادي ع وجوههم...
غرفه"خالة عبدالقادر" وهي تهمس في ودن اختها نبيله؛خيره عبدالقادر ياكبدي مالقاش احلى منها..
نبيله:خيرها البنيه شن ناقصها؟.
غرفه:شكلك حتى انتي انعميتي..
نبيله مطت شواربها بملل..بعدين قعدت تصفق وهي تشوف لامنه بضحكه..
......
وحده من نساوين عم عبدالقادر:هدا اختيار قادر اللي لايعجبه العجب ولاالصيام في رجب ياعمتي!؟
تجديده:وخيرها البنيه شن تحولي منها ياحنه شعرها ولا عويناتها اللي كيف عيون الريمه..
ابتسمت مرت ولدها بسخريه وهي تشبح لسلفاتها اللي كانوا شادين ضحكتهم وهما يشوفوا لآمنه...
🌸آمنه..اللي لما قعمزت ومررت نظرها ع اهل عبدالقادر حست انها ماعجبتهمش..وانتبهت اكثر شي على بناتهم الصغار اللي كانت كل وحده فيهم اجمل من الثانيه نظراتهم ليها نظرات ساخره..
برغم انها اضايقت شويه..بس فيسع ماطردت شعور الضيق لما فكرت ان هو اللي اختارها وتعب عليها بش خداها..
قالت في نفسها ان هدا هو المهم والباقي كله لايقدم ولايأخر..
🌸🌸🌸🌸
"ماشاء الله عليك مكياجك يهبل عند مني درتيه؟"
آمنه بإبتسامه:صاحبتي هبه هي اللي دارتهولي..واشرتلها عليها..
شافت فتحيه وين مااشرتلها آمنه..لقت بنيه جميله لابسه قفطان حلو ومحتشم...شاده صفره عصير هافانا وتفرق ع النساوين..
شبحتلها شويه بعدين قالت:مزينه هي؟
امنه:لالا هي كانت استاذة جامعيه وتوا تقري معاي في المعهد اللي حولتله..
فتحيه:معليشي نسألك علاش حولتوا من الجامعه؟
امنه ابتسمت وقالت:المعهد اللي حولناله للبنات بس فقلنا نبعدوا عن الاختلاط خير..
ابتسمت فتحيه ورجعت شافت لهبه..
وآمنه تمرر في نظرها بيناتهم وهي مبتسمه..
🌸🌸🌸
اخت مريم:عليك سعد سعد امنه..
مريم:اممم..
اختها:خاطري نشوفه اللي خداها هدا شن شكله..
مريم:كان بيلبسها هو تو يخش وتشوفيه..
وروبين تسمع فيهم شن يقولوا وتشوف لآمنه بحقد...
اما مريم فكانت مرة مرة تسرق في النظر لهاديه مرت عمران وتشوف في لبسها وذهبها وهي تسحن في روحها سحن من داخل...
🌸🌸🌸🌸🌸
بينما الاجواء عند الرجاله كانت اريحيه اكثر..
هدرزة وضحك والنفوس ع بعضها طيبه...
وعبدالقادر يراجي في اللحظه اللي بيشوف فيها مرته ويتكلم معاها براحته ويعبر عن مشاعره دون قيود...
🌸🌸🌸
وبعد ساعه ونص..
جابوا العشي للمعازيم..
وخدوا امنه لدارها بش يلبسوها قفطان عربها..
هبه وهي تلبس فيها:تقول عارف ذوقك جابلك حاجه حلوة ومستورة..
امنه بإبتسامه:نتوقع مراة هي اللي اختارته مش هو..
هبه وهي تساويلها في شعرها:ممكن..
ع خشة تماضر:هيا امونه تعشوا وكملوا الناس..
هبه:هي لحظه..وخدت العطر وبخت لآمنه منه..
امنه وهي تشوف لتماضر:شن رايك..
تماضر بإبتسامه:الله يبارك في كل قفطان حلوة بشكل تجنني..
ابتسمت امنه وهي متحشمه..
هبه صفقت بإيديها وقالت:هي خلاص تمينا..
خدت امنه نفس عميق بعدين مشت طلعت وصاحباتها معاها..
🌸🌸🌸🌸🌸
يامبروك علي على الحبيب..سجلناها في الكتيب..
يغنوا في المقطع هدا..وتجديده تلبس في امنه الدبله وطقم الذهب..
ونبيله تصور..
بعد لبستها تجديده..امنه باست ع راسها..
وتجديده كانت تجامل وخلاص حتى ابتسامتها بالغصب..
سيرين..
نور العين وعاجبته...عليها درس كرهبته..
وتبرة تسلم ع حفيدتها وتبارك وهي بطير من الفرحه..
بعدين ناضت امها سلمت عليها مجامله قدام الناس بس..
وبعدها ناضت مرت بوها وسلمت عليها وباركت..
🥀مصعب شعور الوحده فينا لما تحس ان في مناسبه زي هادي ان اللي مش فرحان ليها اكثر من اللي حواليها..والأصعب..لما تكون امك من بين الناس اللي مش فرحانه لفرحتك...قداش في بنات في وضع امنه عاشوا شعورة زي شعورها الحالي..جبر الله قلوبكن حبيباتي🥀
ولكن الله بلطفه ورحمته..ياخد شي ويعطي في مقابله افضل من اللي خداه..
جت نبيله لآمنه وهي تقول:هيا ياعروسه نوضي راجلك يبي يشوفك..
بلعت امنه ريقها وقلبها بدي يدق بكل قوته..
تبرة:هونا في الدار متاع المعيشه دخله خالك..
نبيله:هيا نوضي..
ضحكت امنه بإستحياء وناضت..
خدتها نبيله ومعاها تبره ومشوا بطريقهم للدار..
🌟كان عبدالقادر اللي لابس عربي..
مقعمز وهو يهز في رجله طال انتظاره ومش قادر يصبر زياده..
في الوقت اللي وصلوا فيه نبيله وتبره وامنه لباب الدار..
تلاقوا هما ومحمد طالع..
نبيله ارتبكت هلبه...صح كانت بحجابها بس الموقف يقعد مربك..
هو لما شافها نزل عيونه وع وجهه ابتسامه خفيفه وقال:مقعمز داخل..
ومشي بسرعه..
نبيله:احمم..هي نخلوها تخش بروحها ياحاجه..
تبرة بإبتسامه:باهي..
ومشوا هما الزوز..
وخلوا امنه وهي تبلع في ريقها...
خدت نفس..بعدين مشت خشت بهدوء..
شافاته كيف مقعمز ويشبح في الفراغ..وقفت وهي تشوفله بإبتسامه..وبين عيونها ذكرى خطرت ع بالها وين شافاته..
《 هيييي هيييي انت .
عبدالقادر رفع حواجبه وتلفتلها واشر ع روحه: Me..
آمنه برفعة حاجب وهي تاشر بيده: لف وارجع من وين ماجيت..
قعد يشبحلها برفعة حواجب وحط ايديه ورا ظهره وابتسم وقال:Oowww...Good morning....My teacher》
🌸شدت ضحكتها وقالت:السلام عليكم..
هو ابتسم وقال:وعليكم السلام ..حسيت بيك لما خشيتي عندك علم..قعدت نوتي في الكلام اللي بنقوله..
هي ابتسمت..
هو تنهد ورفع عيونه فيها..
توسعوا عيونه وهو يمرر فيهم عليها اول مرة يشوفها هكي..
بشكل تاني مختلف..
هو ماحبش في امنه مظهرها..حب جوهرها بكل قوة وتأثر بيها لدرجة غيرت فيه هلبه حاجات..
وتوا شاف فيها جمال من نوع تاني ماطلعش الا في وقته المناسب..
وقف عليه وهو يضحك بعدين قال بصوت فيه شي من بحة الفرح:Myteacher...
ضحكت ونزلت عيونها لوطا..
هو ابتسم وقعد يتأمل فيها مد يده وقال...مبارك ..
هي قامت عيونها وشافت يده الممدودة..
ابتسمت ومشت بتسلم عليه...
🌸🌸🌸🌸🌸
طلعت هبه من دار امنه بعد مالبست جلبابها وشاربتها..
ومشت للصاله..خشت لتبرة سلمت عليها وهي تقول..
هبه:خالتي تبرة بنروح خوي جاني..
تبرة:راجيني راجي..
ومشت بسرعه من حداها وهبه وقفت تراجي فيها..
وعيون فتحيه عليها..
هي مررت نظرها ع الصاله جو عيونها في عيون فتحيه..
ابتسمتلها فتحيه..وهبه بادلتها الابتسامه..
ع جية تبره فيدها كيسه كبيره:خودي بنيتي..
خدتها وقالت:غير علاش هدا كله ياخالتي؟!
تبره:حصة امك وخواتك والله تمنيتهم جو..
هبه بإبتسامه:في العرس ان شاء الله..بارك الله فيك خالتي تبره..
تبرة:ربي يقوي سعدك يابنيتي ويحفظك..
هبه باست ع راسها وقالت:ويطول في عمرك ع طاعته ياخالتي تبره..سلمي ع امنه هلبه..تصبحوا على خير..
تبرة:قدامك كل خير بنيتي...
ومشت معاها بتسقدها...
وعيون فتحيه معاها...
🌸🌸🌸🌸🌸
ياودي راك مرتي ع سنة الله ورسوله..حلالي خليني نشوف لعيونك زي الناس!
امنه بضحكه:انت اشبح كيف تشبح ..
عبدالقادر وهو يقلد في صوتها:انت اشبح كيف تشبح..
ضحكت امنه...
عبدالقادر بضحكه:نشبح لمرتي عادي..ابتسم وكمل يقول..نبي نقوللها اللي في قلبي كله واني نشوف في عيونها..نبي نشوف في عيونها مكاني..اني شني عندها بالزبط..بش كان تحشمت وماقدرت تقول شي بلسانها نقرا كلامها في عيونها..
امنه رفعت حواجبها وقالت:ماشاء الله عليك تعرف تعبر..
عبدالقادر وهو يشوف لعيونها:يقولوا عليا ملسن ونعرف نعسل في الكلام..وعندهم حق..الكلام اللي مايطلعش من القلب ساهل ينصف جنب بعضه وينقال عادي لأي حد..لكن الكلام اللي يطلع من القلب...يطلع من القلب طول ع اللسان..وماينقالش بسهوله راهو..
امنه قعدت تشوف لعيونه وهي ساكته..
عبدالقادر تنهد وقال:نحبك..
هي رمشت عيونها ونزلتهم وبدت ترجف من شدة الحياء وقلبها بيطلع من مكانه..
ضحك وقال:اقسم بالله مانقالت لوحده قبلك..ولاقدرت نقولها قبل لاني ماحسيتهاش كان معاك انتي..
قامت عيونها وقالت..وعلاش اني؟!
عبدالقادر بإبتسامه:لانك غير عنهم كلهم ماتشبهي حد..
امنه ابتسمت وقالت:كيف يعني؟
عبدالقادر بضحكه:مش عارف نشرحلك هلبه..لكن...مش عارف شن نقول...بصراحه...حسيت معاك شعور بالذات لما تهزبيني ولا لما توجهيني هكي..حسيت انك امي..
تفاجئت امنه..
عبدالقادر بإبتسامه؛ولما تتحشمي مني وعيونك يهربوا عني..
نحس اني مأثر عليك..لكن انتي كنتي تسيطري ع روحك وتمنعي نفسك من انك تضعفي لانك ماتبيش تغلطي..وهدا اكثر شي جذبني فيك..غيرك عندهم جرأة توصل لمراحل تصدم الراجل نفسه..
امنه بحده؛هادي قلة أدب مش جرأة..
هو ضحك وقال:اهيا النظره هادي ونبرة الكلام متاعك اهيا..قداش نحبها..
امنه غلبتها الابتسامه وقالت:باهي..وشن اللي خلاك تقرر تخطبني..
عبدالقادر:هديكا الكلمه اللي لما قتلهالك قريب اغمى عليك..ومانبيش نعاودها بش ماتهربيش بعيونك عني..
امنه ضحكت وقالت:باهي نبيك تجاوبني بصدق..
عبدالقادر ابتسم وهو يغمض في عيونه ويفتح فيهم..
امنه حطت يدها ع رجلها وقالت:وهادي..
شبح لرجلها وقال:خيرها؟
امنه ابتسمت وقالت:عندك علم ان اهلك لما شافوني نعرج كلهم شفت في وجوههم ملامح الصدمه والاستغراب..وكأنهم يقولوا..شن دار في عمره اللي خدي هادي!؟
عبدالقادر بضحكه:حبيبتي..مش كل الناس عندهم ذوق غالي..يعني اني في عيلتنا مافيش مني هلبه..
غلبت امنه الضحكه..
عبدالقادر ابتسم وقال:احسن اصلا اني مانبيكش تعجبي حد غيري..نبيك تكوني في عيوني اني بس حلوة..
ابتسمت وهي تشوف لعيونها..
وهو كذلك بادلها نفس النظرات...
امنه بإبتسامه:نطلب منك طلب..
عبدالقادر:أمر..
امنه بإبتسامه:لحيته معاش تقربها..اطلقها وهذبها لكن معاش تحلقها..زينتكم في اللحيه انتم الرجاله..
عبدالقادر عقد حواجبه وقال:رجالة!؟
امنه بضحكه:فيك انت بس..
عبدالقادر رفع حاجبه وقال:ااه..ردي بالك راني حزار ومغيار للوح...هدا علاش فرحت لما سيبتي الكليه..
امنه برفعة حاجب:باك تكون فرحان ع خاطر حاجه تانيه تاخد راحتك متلا..
عبدالقادر:ورحمة امي وبوي عيوني هادم معاد مازال يشوفوا غيرك..معاش يقدروا خلاص..
امنه بإبتسامه:معاش تحلف بغير الله..
عبدالقادر بإبتسامة احراج:طلعت مني هكي...متعود عليها..لما نحلف ع شي ونكون صادق..
امنه:ولما تكون عكس هكي تحلف بربي!؟
عبدالقادر بضحكه:لا براس اللي نكذب عليه..
امنه ضحكت وهي تقول:استغفر الله...المهم من اليوم وبرا عود روحك ماتحلف بحد غير ربي وبصدق..وبعد عن الكذب فوته الكذب..فكنا منه تمام!
عبدالقادر:حاضر ماما..
ضحكت امنه وقالت:مافيكش فايده..
وعبدالقادر يشوفلها وهو يضحك بعدين ابتسم وقال:عجبك القفطان؟.
امنه بإندهاش:راك تقول اختيارك.!
هز راسه بإيجاب وقال:يس..
امنه ابتسمت وهي تشوفله..بعدين تنهدت وناضت وقفت..
وقف معاها وهو يقول:وين وين!؟
امنه بضحكه:شن وين هادي خلاص ساد..
عبدالقادر:مازال ماقلت شي!؟
امنه ضحكت بعدين قالت:الايام جايه ان شاء الله تو تتكلم فيهم لين تعيا..
ومشت...
عبدالقادر؛ايام شني هادي..بعد نروح نكلمك طول..
وقفت والتفت شبحتله وابتسمت وهزت راسها بايجاب بعدين لفت ومشت طلعت..
هو تنهد وقال:نحبك...
🌸🌸🌸🌸🌸🌸
وروحوا اهل عبدالقادر..
وبعدهم روحوا باقي الاقارب والاصدقاء..
وحتى مريم وروبين..وقعدت سيرين مع اسيل يعانوا في امنه وتبره ع ضمان الحوش..
قعدوا يضموا فيه وهما يهدرزوا ع اجواء الحفله..ويقصقصوا في امنه ع العريس وهي تجاوب بإقتضاب وخجل..
وبعد ماتموا ضمان...
تبرة خشت رقدت...واسيل وسيرين قعمزوا ع التليفزيون..
اماامنه..
توضت ..وصلت لله ركعتين شكر..
بعدين خدت المصحف وقرت شويه..
بعدها مشت اتكت في سريرها وهي تسبح..
لعند مارن تليفونها..
ابتسمت وقاماته وشافت رقم غريب..
ماردتش وخلاته لين فصل..
جتها بعدها طول رساله..
(ردي راجلك)
ضحكت...اتصل تاني..
خلاته ينادي شويه بعدين فتحت الخط ..
امنه:السلام عليكم..
عبدالقادر:وعليكم السلام معلمتي الحلوة..
امنه بضحكه:مصر تقولي معلمتي كان مش معلمني Myteacher!
عبدالقادر بإبتسامه؛ماك انتي معلمتي حق علمتيني هلبه حاجات..غيرتني فيا كل شي..ومازلتي تعلمي فيا..ومازال بتعلميني..
ابتسمت امنه..
🌸وكملوا هدرزتهم وعبد القادر هو اكثر من يتكلم ويعبر عن شعوره..وهي مرة مرة ترد وتسأل..
لعند ماحست النوم بياخدها ..
عبدالقادر:باهي اني مش جايني نوم شن يصير فيا..
امنه بنعس:حاول ترقد..حاول....
عبدالقادر:من فرحتي بيك النوم طاير اقسم بالله..
مافيش رد..
عبدالقادر..امنه...امونه....معلمتي..Myteacher...Mywaive..
ضحك بعدين قال...نوم العوافي..
وصكر...
وانطرح ع المخده وهو يشوف للسقف وسرحان بإبتسامه..
لعند ماغلبه النوم...
🌸🌸🌸🌸🌸
الساعه 5:20فجرا..
رن التليفون...
ناض مخلوع..جبد التليفون وشاف المتصل رد طول..
عبدالقادر:هاه حبيبتي..
امنه بضحكه:نايض!.
عبدالقادر:احمم..لا كنت راقد...
امنه:باهي نوض صحصح ..الفجر بيأذن خلاص...
فجأة اذن المؤذن..
امنه:هيا صحصح ونوض.جهز نفسك وبرا مشي للجامع منها تتريض..راهومافيش احسن من رياضه المشي..ومنها تكسب اجر..
ابتسم وع وجهه ملامح النعس وقال:حاضر..
امنه بإبتسامه:سلام..توا...
عبدالقادر:راجي راجي شويه..ماشيه المعهد اليوم؟.
امنه:اكيد..
عبدالقادر:اني بنرفعك ..
امنه:مش لا...
قاطعها وقال:معاش في طلوع بروحك لولا مكان من اليوم وبرا غادي..تمام..
امنه ابتسمت وقالت:تمام..هي برا ماضيعش وقت..
عبدالقادر:حاااضر...
امنه بضحكه:سلام..وصكرت..
وهو بعد صكرت..شفشف شعره وهو يضحك بعدين ناض...
🌸🌟🌸🌟🌸🌟🌸🌟
الساعه 8:30صباحا..
في الكوجينه..
امنه تفطر ع الواقف وحناها مقعمزه حداها..
ع جية خالها قال:هاتي مفتاحك نسخنلك سياره..
امنه:امم..لالا بيجي عبدالقادر يرفعني..
ابتسمت تبره..
محمد:قالي امس لكن اني شكيت توافقي..
امنه بإبتسامه حياء:خلاص هو توا زوجي يعني مانقدرش نقوله لا في اغلب الامور..
ابتسم خالها وقال:كويس..يللا اني ماشي ماتبوا شي..
تبرة:سلامتك وليدي..
محمد:السلام عليكم..ومشي..
امنه:مالا وين اسيل وسيرين؟!
تبره:سهروا البارح للفجر ريتهم وين صلوه وركبوا رقدوا..
امنه ضحكت..فجأة رن تليفونها..شافت المتصل ابتسمت وقالت..ماتبي شي حنينه...
تبرة:سلامتك بس ياحبيبة حنينه..
ابتسمت امنه ومشت وهي ترد ع التليفون..
امنه:السلام عليكم....طالعه توا...
تبره تنهدت بإبتسامه وهي تقول:ربي يهنيكم ..
🌸🌸🌸🌸
برا..
فتحت الباب وطلعت..
شافاته فسيارته كان لابس نظارات ابتسم اول ماشافها..
هي ابتسمت ومشت للسياره...
فتحلها الباب...هي ركبت جنبه وصكرت الباب وهي تقول..
امنه:السلام عليكم..صباح الخير..
عبدالقادر بإبتسامه:وعليكم السلام..صباح الفل..
ابتسمت...مدلها شكلاطه وقال:شن جو..
امنه خدتها وهي مبتسمه وقالت:تمام الحمد لله..
هو ابتسم وقال:الحمد لله..وتحرك طول....
🍂🍂🍂🍂🍂
كان راقد في نوم عميق قبل ماينوضه صوت رنين هاتفه..
ناض وهو يتأفف بعدين خداه من ع الكامدينو ورد..
اسماعيل بنعس:ايوه..
"زود يااسماعيل للمعرض متاعك ولعت فيه النار"
توسعوا عيونه بصدمه..
بعدين لوح الغطا وخدي مفاتيحه ومشي طلع من دار يجري...
...يتبع...
