نبي نوه على شي مهم..
هلبه منكم ملاحظ ان اسلوبي متغير واني قبل نزلت منشور لما حذفت كل رواياتي السابقه قلت ان اسلوبي حيتغير..نبي بإذن الله كل كتاباتي تكون بإذن الله نافعه وفي خدمة الدين ..والمجتمع متاعنا يحاول الواحد باللي يقدر عليه يصحح هلبه اخطاء..ويقوم المعوج..ويكتب شي نظيف تماما وخالي من الابتذال..
فمش عارفه علاش منكم يلمح اني مش نفسها جمان فريد ههههه يضحكوا فيا اقسم بالله معقوله لهالدرجه تغير اسلوبي ولاانتم تبالغوا!!..
مانبيش نقول كلام فوق هكي بالنسبه لهالنقطه..
واخيرا..
اي وحده ماتعجبهاش الروايه ومش ماشيه مع ذوقها تفوتها مرة وحده وبلاش منها التعليقات السلبيه لاني الفترة هادي مش متحمله بصراحه..فيقولي خير ياأصمتي مرة وحده..اللي عجبتها الروايه تقرا واللي ماعجبتهاش تفوت هكي اريح..
اعتبروني مانقبلش النقد..اني مانبيشي تمام ولانبي المجامله نبي اللي حب حاجه يكتب عنها الصدق..واللي ماحبهاش يفوتها وتمت....
وبارك الله فيكم جميعا..
💎💎💎💎💎💎💎💎💎💎💎💎💎💎💎💎💎
💓..
كانت تمشي بسرعه وهي ترجف وشاده دموعها بالسيف..
حاسه كل العيون محاصرتها حتى اللي ماشهدتش ع الموقف
اول مرة في حياتها يصيرلها موقف زي هدا..
لما وصلت للمكتب كانت كلها غضب من الطالب الغير منضبط والمصر على انه يطلعها من طورها..
ومن زميلها اللي حاشر نفسه في امور مالاش فيها خصوصا انها حاسه بيه قاعد يتقرب منها وهي تبي تكذب هالإحساس لأنه خطيب اخته وهو نفسه حقيقة زي هادي مش عارفها.
فتحت الباب بغضب وخشت..
وفجأة..
سكت عنها الغضب لما شافت شابه لابسه عبايه فضفاضه وشاربه كبيره لونها ياجوري واقفه ع مكتب جديد عاطيتها بالظهر وهي ترتب في حاجات فوقه..
التفتت وشبحتلها ابتسمت وقالت:سلام عليكم استاذه آمنه..
ابتسمت آمنه مجامله وقالت:وعليكم السلام..
هي قالت:اني هبه تعرفيني ولا؟
امنه بإبتسامه:ايه تصادفنا كذا مره ..وجتها صافحتها..
هبه:والله فرحت لما عرفت اني حنكون معاك في مكتب واحد..
امنه بإبتسامه:علاش؟!
طلقوا ايدين بعض وقالت هبه:لأني ملاحظه ان في تقارب في شخصياتنا..
ضحكت امنه.
ع خشة عصام وهو منفعل مايشوف في شي:استاذة آمنه لو تعرضلك البني آدم هدا مرة تانيه ماتسكتيش عنه ديريله مجلس تأديب..
ارتسمت ع وجه هبه ملامح الاستغراب..بينما امنه وجهها تلون..مشت لمكتبها وهي تقول:كان تعرضلي مرة تانيه نعرف كيف نتفاهم معاه بروحي ارجوك استاذ عصام معاش ادخل روحك في مشاكل مالكش فيها لاناقه ولاجمل..وقعمزت ع الكرسي..
هو قعد يشبحلها شويه بعدين تنهد وقال:ع راحتك.
ومشي قعمز ورا مكتبه وهدا كله مالاحظش وجود هبه اللي مشت قعمزت ورا مكتبها وتجاهلت اللي صار وقعدت تلهي في روحها بالاب توبها..
هو شبحلها وقال:كيف حالك استاذه هبه..
هبه يدوب شبحتله وقالت:الحمد لله..كيف حالك انت استاذ..
عصام:الحمد لله..وشبح لآمنه اللي لاحظ انها مازال معصبه ومتوتره من الموقف..وكذلك هبه شافتلها..
وقعدت تمرر في نظرها بينها وبين عصام وهي تفكر..
🌟🌟🌟🌟🌟
كان في الطريق..
يسوق بسرعه وهو معصب ع الآخر ويذكر في الموقف اللي صار بتفاصيله..
وكل مايذكر كلام عصام وتهديده يعصب بزياده ويزيد في السرعه..
وفجأة شد فرينو بقوة ووقف..
لما جت بتخطم قطوسه من الكياس..
كانت تشبحله..
هو رفع نظاراته واشرلها بايديه ع ايساره ويقول بشي من العصبيه:هي تفضلي...
وقعدت تمشي القطوسه ع مهلها لين فاتت من قدامه..
بعدين هو كمل طريقه وتنهد بعصبيه وخبط الدومان وقال:شن يبي هدا..شن يبي..واقف بيني وبينها شن يبي
اني عمري ماكنت متاع مشاكل ومانبيش نكون هكي..
............
ورب العزه مرة تانيه ماضال اللي عاطيهاله وحده في نص وجهه تعدمله الواجهه كلها..
اسماعيل بضحكه:هدي ياوحش هدي..
عبدالقادر شبحله ع جنب وقعد ساكت..
اسماعيل ضحك وقال:باهي باهي تو ندوي جديات..تو انت مش قلت تبي تخطبها..وهي وحده جديات ماعندهاش في الدوة الفاضيه..واني هكي هاه حاس ان في من ناحيتها شي..
معناها لو فتحت معاها الموضوع بعد تشحطك اسبوع تفكر حترد عليك وتقول موافقه وتمت الحكايه..بعدين لاعصام ولاغيره يقدر يقولك حول من الطريق..
تنهد عبدالقادر بضيق وقال:تي غير هي تعطيني فرصه ندوي معاها الزفت...وانت تقول في منها حاجه ناحيتي!!
اسماعيل:تبي الحق يابرو مش مصدقك ..انت قدو..قدقد اللي يرقص في قلوب البنات ع صوابعه وضارب الدنيا كلها في الحيط هكي يصير فيه..
عبدالقادر اشر عليه بسبابته وقال:ايوه هي هادي البنات ربي يخلص في حقهم مني وحده وحده..
اسماعيل ابتسم ع جنب وقال:صدقت كلنا حنخلصوا وخلصنا ياصاحبي
عبدالقادر مسح بإيديه ع وجهه بعدين شد راسه بيهم وقال:اوووففف...بعدين ضم شورابه لداخل وقال...واني اليوم مش مروح لين نفتح معاها الموضوع..
وناض لبس نظاراته ومشي لسيارته..
اسماعيل قعد معاه بعيونه وهو يشوفله بإبتسامه لين ركب سيارته وتحرك..
بعدين هو تلاشت ابتسامته لما خطرت روبين..
ضم شواربه لداخل بغضب وقعد يفكر..
🌺🌺🌺🌺🌺
في الجنان..
روبين في تركينه هي واختها يهدرزوا..
روبين بإنزعاج:بالله لو كنتي مكاني ياسيرين شن ديري..
سيرين:نرضى بنصيبي ونسكت..
روبين:طبعا مالا شنو ماهو انتي بس اللي تتمعشقي وتاخدي عن حب..
سيرين:مادخلكش بيا ولااني دخلي بيك انتي اللي اخترتي مافي حد ضربك ع مكاسيرك وقالك سيبي اللي تبيه ووافقي ع عصام ايوه..
روبين بإزدراء:اني الحماره اللي واقفه نشكي لحمارة زيك..
ومشت من حداها..
سيرين:ان شاء الله تتطربقي مالي بيك اني..بعدين رفعت تليفونها وفتحت ع الماسنجر بتشوف زيد اون لاين ولالا..
🍂🍂🍂🍂🍂
اطلع في حوايجه من الشنطه وهي تقول:كلمها اليوم وقوللها تجي غدوة بش تفتح معاها الموضوع..
عمران "اب آمنه"خدي الصلايه وفرشها وقال:باهي باهي..
رفع ايديه لمستوى وذانه وقال...الله أكبر...
والهاديه ترتب في الحوايج وتفكر في مخططاتها اللي بتبدا تنفدها..
🍂🍂🍂🍂🍂
"وشن قالولك عليا مدوشنه بش نخليها تاخد واحد زي هدا!!؟"
مريم:وخيره يام!! والله ماناقصاته حاجه وبعدين تحمد ربها اللي جاها..
تبره بتضييقة عيون:وعلاش ياحنه امنه شن ناقصها!!؟ عاقله ناشطه فالحه صلايه حافظه كاتبه الله الف واحد يتمنى ياخد واحد زيها..اسمعيني جاي انتي لما تعطيني بنتك نربيها حولت يدك من مسؤوليتها هدا علاش بنقولك انتي مادخلك بشي يخص آمنه ايوه خليك بعيد..
وقلبت وجهها عنها وهي معصبه..
اما مريم مطت شواربها لداخل بضيق وناضت من حدا امها..
تبره شبحتلها ع جنب وقالت:ماناقص امنه تاخد هالضايع!
🍂🍂🍂🍂🍂
في كلية العلوم..
مقعمزين الزوز تحت المكيف لاهيين بقرايتهم ع اللاب توب وهما يهدرزوا..
جلال:خلاص نتلاقوا عند نادر بعد العصر..
فاروق:تمام..بعدين صكر اللاب توب ومرر نظره حواليه وقال..قدو اليوم مش باين..
جلال قعد يشبح هني وهني:ايه بكري اتصلت بيه ماردش عليا..
فاروق:ان شاء الله خير..
شويه الزوز ركزوا بعيونهم ع مدخل الكليه من داخل..شافوا وحده خاشه تمشي بسرعه..
جلال ضيق عيونه وابتسم وهو مركز معاها لين ادرقت..
فاروق:ابن الحلال عند ذكروا بيبان..
شبح فاروق للمدخل لقي عبدالقادر جاي ناحيتهم..
وصل فيهم طق في ايديهم بعدين قعمز جنب فاروق..
هما استغربوا فيها ماتكلمش بكل وع وجهه باينه ملامح العصبيه..
فاروق:خير ياطير..
حول عبد القادر نظاراته وشبحلهم وهو يقول:الامتحانات امتى؟
جلال:السبوع الجاي..
وزع عبدالقادر نظره ع المكان فجأه فنص عيونه وناض طول
خش للمربع اللي جنبهم وقعد واقف عاطي بالظهر..
هما شبحوا لبعض بعدم فهم..بعدين شبحوا وين ماكان يشبح..
ضحكوا..
فاروق بضحكه:يعني كل مايشوف وحده من الإكسات بيدير هكي!
جلال يضحك وخلاص..
طبعا اللي شافوهم كانوا قروب بنات عبدالقادر مصاحب منهم تلاته في نفس الوقت والتلاته فاتهم مع بعض..
هو في المربع كان واقف شاد تليفونه ودايره ع الكاميرا الاماميه ويشوف وراه ويقول:تي غير شن لمكم ع بعض مرة تانيه..تي اني اللي نعرفهم مافيش وحده فيهم اطيق التانيه..
غير ع حظي اني بس..
شويه ركز ان وحده فيهم شبحت جيهته..فنص عيونه..
البنت:حي..قادر!
الزوز اللي معاها شبحوا وين ماتشبح..
عبدالقادر نزل يده اللي فيها التليفون ومشي كم خطوة وبعدين لف وادرق عنهم..
لين وصل في المصور وهو يقول:اففف استغفر الله..
خطم واحد خش المصور وهو يقول:اووو قدو..
هو ابتسم مجامله ورد عليه:اووو شادي شن جو..
الولد:تمام وخش المصور..
فجأة اختفت الإبتسامه متاعه لما شاف البنات نفسهم قدامه طول خش جري للمصور وهو يقول:شدوووو..غير راجي..
البنات شبحوا لبعض وضحكوا ووحده منهم قالت:ريتوه كيف هارب!..وراه يابنات..
ضحكوا ولحقوه..
وكانوا وراهم امنه وتماضر يهدرزوا..
امنه:لالا مش ماشيه لمزين بندير بروحي..
تماضر بإبتسامه:وعلاش اديري بروحك واني شن فايدتي..
امنه بإبتسامه:مانبيش نتعبك..
تماضر:بالله فكيني من جوك الرامض ترا.
ضحكت امنه ..
وصلوا الزوز في باب المصور وخشوا..
وكان زحمه..بس عيون امنه جو في هالزحمه ع عبدالقادر والبنات التلاته واقفه عليه ويهدرزوا..
تلاشت ابتسامتها وتبدلت بملامح الحده الممزوجه بالضيق بعدين مشت طول وقفت ع شباب اللي يصوروا..
وتماضر كانت تشبحله وتشبحلها..
عبدالقادر بإبتسامة ربكه:صارتلي ظروف المده اللي فاتت..
:باهي رديت ع الخاص شوف قداش مسج بعتتلك..
:اني ماخليت وين كلمتك..
:اني لقيتك مدايرلي تحويل مرة وحده..
عبدالقادر مرر نظره عليهم بعد ضحك بربكه وحك لحيته وقال:ظروف..
التلاته شبحوا لبعض بعدين شبحوله وكل وحده فيهم ع وجهها ابتسامة تهكم ومنهم قالت..
:اقل شي خليك راجل وانهيها عادي ماناش ميتات عليك راهو..
:خير ماتقعد تهرب من تركينه لتركينه عيب في حقك..
امنه سمعت الكلام هي وتماضر..
التفتت وشبحتله..
هو كيف جاي بيرد عليهم تلاقوا عيونه بعيونها قريب مات..
شبحتله من فوق لتحت..بعدين شبحت القدام..
هو قعد يشبحلها شويه بعدين عقد حواجبه وشبح للبنات وقال:ايه كنت مكسد عليكم التلاته ومفوت بيكم الوقت ومافيش وحده فيكم شديت عليها سلاح باش تكلمني..ضيق عيونه وكمل يقول..وبعدين شن لمكم ع بعض مرة تانيه..مش ع اساس ريمه ديما حاسداتك يابشرى وانتي قاعده معاها ع خاطر سيارتها!..وانتي يابشري مش اميره وحده منافقه وكذابه وعمرك ماصدقتيها في كلمه قالتها..وانتي يااميره مش بشرى نفاخه ودراه كبد..ولا انتي ياري.....
وحده منهم:خلاص صكر فمك..
ريمه:صار قاعده معاي ع خاطر سيارتي!!
بشرى:كذاب ياريمه تعرفيه..
مشت ريمه طول طلعت..
بشرى شبحت لقادر وقالت:حقير..
ولحقتها تجري..
اما اميرة شبحتله بحقد وجت بتتكلم لكن تراجعت ومشت طلعت حتى هي..
عبدالقادر وهو يشوف للباب اللي طلعوا منه:ودرة وسيل حدرة..
تماضر كانت شادة ضحكتها بالسيف..اما امنه فكانت ع اعصابها..
ماحستش الا وهو واقف جنبها ويقول:شن جو حسام..
المصور:مليح شن جوك انت قدري..
عبدالقادر وهو يسرق في النظر لأمنه:ملخبط..
المصور:علاش خيرك!
عبدالقادر:الفترة الاخيره خوك تلخبطت معاه وفيه هلبه حاجات ياحسو..
المصور:غير تدوي جديات!
عبدالقادر:والله جد لدرجة اني نويت نتزوج..
المصور واللي معاه وهمامتفاجئين:اوووو...لااااالااااا..معقوله!!!
تماضر شبحتله بدهشه..
اما امنه قلبها قريب تقلع من مكانه وزادت عصبت وقالت:لوسمحت استعجل..
المصور:خلاص كملت استاذه..
امنه مدتله اللي لقاته في الشنطه وخدت النسخ ومشت طول وتماضر وراها..
وهو قعد معاهم بعيونه..
حسام:ايه شن قصة الزواج منك جد انت!!
وعبدالقادر مشي وخلاه..
هو شبح للي معاه وهما شبحوله بعدم فهم..
اما هو طلع وراها ..
لقاها تمشي بسرعه هي والبنت اللي معاه..
وهو بيلحقهم تلقوه صحابه..
فاروق:وين رحت ياراجل..
عبدالقادر دفه وقال:فوتني توا..
ومشي في جرتهم..
ومن سرعته في المشي وقلة انتباهه خبط واحد كان شاد في يده طاسة فروبي كبير تبزعت عليه..
عبدالقادر:اسف اسف جدا..
:تي اسف شني ياراجل شوف شن درت يا####
عبدالقادر ماتحملش الكلمه النابيه اللي سمعها..وبدون سابق انذار ضرب الولد بوكس ع وجهه والولد رده وبدوا يتعافجوا..
والتموا عليهم الحزازة والمصورين..
[بش يصوروا العركه وينزلوها ع الفيس]
برا...
وصلوا امنه وتماضر في السيارة بعد ماكملوا الطريق مع بعض وهما ساكتات..
لما ركبوا رن تليفون آمنه..شافت المتصل زادت اضايقت وردت عليه:نعم بوي..
وتماضر تشوفلها بضيق...
بعدين شغلت امنه سيارتها وتحركت وهي تقول:حاضر ان شاء الله..وعليكم السلام..
وصكرت..
حطت التليفون قدامها وقالت:حتى كيف حالك ماقالها..
تماضر:حتى انتي ماقلتيهاش..
امنه بتهكم:تعودت..
وطلعت للطريق...
شويه وقفت لما شافت واحد بيفوت..كان اسماعيل..
هو حياها بحركة الراس ومشي طول..
اما هي شبحتله شويه بعدين شبحت القدام وكملت طريقها..
واسماعيل عاد خش الكليه وشاف قدامه العركه مازال قائمه وتلامح عبدالقادر فيها..
فتح عيونه ع وسعهم وقال:حييي ع امها..ولوح طايقته من من ع راسه ومشي خش فيهم بالطول والعرض..
وزادت كبرت الحكايه..
وفي النهايه انحزت انحزت لما جو امن الكليه وخدوهم كلهم حققوا معاهم وخلوهم كم ساعه وطلعوهم..
🌟وهما ماشيين للبركيدجو..
اسماعيل وهو يمسح في فمه:خير بلاك شن جاك مولي متاع مشاكل ونشاف..
هو لبس دجاكته وقال:هو اللي لبز في الكلام..
فاروق:نقولك قدو انت الفترة هادي جوك مش عاجبني برا سافر غير وجوه..
عبدالقادر وهو يمسح في حاجبه:والامتحانات ياباشا..
جلال:قدو اني لتوا قاعد نقول في عقلي هدا مش من جده..
عبدالقادر وقف ع سيارته وقال:هادي اول مرة ندوي جديات في حياتي..
وفتح الباب وركب..
هما شبحوا لسموعه اللي غمزلهم بمعنى "خلوه "..بعدين مشي لسيارته وهما مشوا لسياراتهم..
واللي هدا ركب وتسقد..
🍂🍂🍂🍂🍂🍂🍂🍂
الساعه 8:30 مساءا..
"يابيت العيله ياعالي ياعالي يامظلل بالحب
يلي فيك اجتمعوا عيالي بالروح وبالقلب"
في وسط حوشها كانت تغني الحاجه تجديده وهي مفرشة قدامها مفرش كبير وحاطه عليه طاولة لوح كبيره وتقرض في الخضرة..
وقدامها التلفزيون مفتوح ع برنامج عمي الهادي..
شويه خش عبدالقادر وقعد واقف في الباب ويشبحلها..
تجديده:ينصر دينك زيدهم زيدهم هاللفعات هادوما..اه كان نقدر نضرب ع ركمك ونحكيلك ع كنايني وولادي تقعد بقولي عشرة ولاخمسطاشل حلكه وانت تهزب فيهم..
ضحك وجاها وقعمز مقابلها وكيف جاي بياخد ربطة معدنوس خبطاته ع يده بالموس وقالت:غاسل ايديك!؟
عبدالقادر وهو يحسس في يده:ايه ياحناي تعرفيني انتي وسواس نظافه..
تجديده:مالا خود نقيلي المعدنوس ودير ثمرة في عمرك..
خدي الربطه وقال:بندير ثمرات ان شاء الله مش ثمرة وحده غير راجي انتي بس..
تجديده وهي تهز فراسها قالت:ايييه كان عباك ع الوجواجي ياقعادك ياتجديده تراجي..
عبدالقادر:منين جبتيها هادي!!
تجديده:مادخلكش واخدم وانت ساكت وخليني نسمع الراجل..
عبدالقادر قعد ينقي في المعدنوس ومرة مرة يشبح لحناه ويقول في نفسه"شكلها حتى حناي مش واخدتني جديات..لاهدرزت معاي في الموضوع ولانشدتني من نبي نخطب":احمم حناي..
تجديده وهي تقرض:هاااه..
عبدالقادر:مستغربك..كيف هكي ماعششتيش بش نعرفي من نبي نخطب..
تجديده: ع اساس صدقت انك تبي تخطب..
عبدالقادر بضحكه:لاحول ولاقوة الابالله..تو اني ياحناي عمري بصرت معاك في حاجه زي هادي!..
تجديده:ماهو هدا علاش قلت معاش لقي في شن يتسهوك كان الحاجه هادي..وشبحتله..فجأة شهقت بصوت عالي..
عبدالقادر بخلعه:خير! خيرك! شن جاك!!
تجديده بتفنيصه:حاجبك خيره ياولد!!
هو هدي شويه بعدين قال:هدا وين شفتيه ياحناي؟!
تجديده:تي اني وين ريتك اول ماروحت طول مشيت خشيت دارك وصكرتها عليك..خيرك باهي من ضاربك!؟
عبدالقادر:عركه عاديه مادوريش..
تجديده:ووك عليا عركه!!تي من امتى انت متاع عرايك!!
عبدالقادر:تي فوتي ياحناي ماتعشيش..وقوليلي..
تجديده بعصبيه:ماني مقايله شي..وهي نوض فز من حداي..
عبدالقادر:هههههه..تي غير باهي ياسمح وعد هادي اول واخر مرة..
تجديده تقرض ومش معباراته..
عبدالقادر رفع حاجبه اليسار وقال:توجي..انت شن عجبك في جدي!.
شبحتله وقالت بتفنيصه:الستر ياربي الستر!
عبدالقادر:هههههه..تي قصدي شن خلاك توافقي تاخديه..
تجديده:ترا نوض من حداي خير مانحدفك بيه.."تقصد الموس"
عبدالقادر:والله ندوي جد ياحناي....وين راك كيف ريتيه هكي يعني..
تجديده شبحتله شويه بعدين قالت:شن تحساب زماننا كيف زمانكم المليان عوج..
عبدالقادر:بالله فكونا من هالدسكه..زنقة الريح فضحكم وفضح زمانكم وطلع المدسوس..قولي الحق وين تلاقيتوا..
تجديده:وحق من خلق الحق جدك هدا ماريته كان ليلة الفرح..وهو جي خطبني بوي بعد دلوه علينا حوش خواله الله يرحمهم يعرفوا بوي الله يرحمه وعاجبهم وقالوله برا خود من بناويته وهكي هلبه تزوجوا في وقتنا..لاتقولي زنقة الريح ولازنقة الغبيري..
عبدالقادر بإبتسامه:اممم..
تجديده تنهدت وقالت:وليدي الزواز مش كلمة ساهله تنقال في الفم..نبي نتزوز وخلاص..لا وليدي راهو مسيوليه..حوش ومراة وصغار..راهو حاجه كبيره هلبه..والمراة وليدي تبي راجل يخاف ربي فيها ويكون معاها راجل بالحق يتحمل معاها المسيوليه..ايه..ويخدم عليها وعلى عويلته..
عبدالقادر بضحكه:والله حتى اني قدها المسيوليه ياسمح..
"ماقديتها الا انت"
تجديده:اللطف امتى روحت..
فرج جي قعمز حداها وهو يقول:توا.
عبدالقادر بضحكه:وعليكم السلام حاج فروجه..
تجديده تفنص فيه..
فرج؛اسمع جاي ياولد انت كانك ناوي الزواج حق..وحق المعظم ماني خاشلك في موضوع وحناك هادي نحلف عليها بالطلاق كان خشتلك..لو ماوليتش راجل وبديت معاي في الخدمه..
تجديده؛بطلقني ياحاج!!؟
فرج:ياودي قلت نحلف بالطلاق..
تجديده:قصدك تبيه يقعد طول عمره بلامراة!!
عبدالقادر بضحكه:توجي حبي..اطمني لاهو مطلقك ولاحالف عليك..شبح لجده وقال..حاضر..
فرج وتجديده شبحوله وهما متفاجئين..
عبدالقادر؛نبي نتعلم نتحمل المسيوليه..
تجديده:بطل تعجيب ع كلامي خير ماني اللي نحلف!
عبدالقادر بضحكه:بتحلفي ع جدي بالطلاق!؟
فرج:خليك من البصارة البايخه وقولي تدوي جديات؟!
عبدالقادر بإبتسامه:وجد الجديات..
فرج من داخله فرح ع الأخر وقال:خلاص مالا من غدوة العشيه تبدا..
عبدالقادر:غدوة غدوة..خلاص..بإذن الله نبدوا مع بعض من غدوة..
تجديده وهي متعجبه في امره قالت:ان شاء الله ديما ربي هاديك ياوليدي..
فرج:كان نعرف من هي بنت امها هادي اللي خلاتك تجي للطريق..
تنهد بإبتسامه وقال:عن قريب تعرفوها ان شاء الله..وناض وهو يقول..ماشي لحوش خالتي متعشي غادي..!؟
فرج:مربوحه..
تجديده:سلم عليها...
مشي عبدالقادر طلع من حداهم وهو يقول:يوصل..
تجديده:هدا مش بلاش راهو!..
فرج:ياودي بارك الله فيها حتى كان سحراته هادي دارت فينا خير..
تجديده:شن بارك الله فيها انت التاني ع الكفر!!
ضحك وقال:ياودي ولد ولدك مسحور لكن سحره حلال زي اللي انسحر بيه جده..
تجديده بحشم:الستر وانت وين ريتني!!؟
فرج:بالله!!! ع اساس ماتندري ع شي!! وانتي كل يوم توصبني وتنشري في الدبش فوق السطوح..
تجديده ولت تقرض وهي مرتبكه وقالت:نوض نوض اركب لبنتك بلا خراف زايد..
فرج؛هههههه..بعدين شبح للتلفزيون شاف الهادي..تبدلت ملامح وجهه للامتعاض وناض خدي الريموت وحط ع قناة اخباريه..
وتجديده تقرض وهي شاده ضحكتها..
🍂🍂🍂🍂🍂
فهالوقت..
كانت تماضر تحط في لمساتها الأخيره ع شعر امنه..
وامنه كانت لاهيه بتليفونها خاشه تشوف في حساب هبة ع الفيس لأنها كيف ضافتها وعجبوها منشوراتها قعدت تقرا فيهم واحد ورا التاني..
بس وقفت عند واحد فيهم مكتوب فيه..
"فلتحفظي رحيق الحب حتى يأذن الله ويأتيك زوج صالح..
وحتى وأن تقلبت الأشواق في صدرك فأحفظي نفسك كم حفظتها زينب"...ل...حنان لاشين..
ارتسمت ع وجه آمنه ابتسامه حلوة..
تماضر:خلاص امونه كملت..
امنه استاقضت وشافت للمرايه بعدين ضحكت وقالت:تسلميلي تماضر نتعبلك في الفرح ياربي...
تماضر بضحكه:ان شاء الله..هي نوضي خلاص وقت عليك..
ناضت امنه وقالت:بالله العباية...
جابت تماضر العبايه لآمنه خدتها منهاو لبستها بعدين اتصلت بخالها يجيهم..
وشويه وجي خالها..
وطلعوله..روح بتماضر لحوشهم بعدين رفع امنه للصاله..
🌸🌸🌸🌸🌸
في الصالة كانت حفلة دخول ولد خالها..
والصاله كانت معبيه والبنات فيها اشكال الوان..واللبس والمناظر حدث ولاحرج..
شي الحياء يحول بينه وبين الوصف..
وطبعا خوات امنه ع راسهم..
وامهم ولامدورة عادي عندها زي هلبه امهات مايركزوش مع بناتهم كان لما يبوا يجوا يزوجوهم..
فهاللحظات..
خشت امنه للصاله..
رفعت خمارها وسألت العامله اللي قابلتها ع مكان الحمامات..
دلتها..وهي مشتلهم طول..
حولت عبايتها وساوت شكلها شويه بعدين مشت طلعت للقاعه..
واول ماخشت..
شافوها مرت خالها وبنتها وتفاجئوا بشكلها هلبه وعجبتهم.
هي جتهم تبارك..
اسيل:عسل طالعه امونه تهبلي..
امنه بإبتسامه:انتي احلى..
اسيل:تسلمي قلبي..بري لطاولة حنينه من بكري تراجي فيك..
امنه ضحكت وقالت:ان شاء الله ماتهزبنيش ع تعطيله..
اسيل بضحكه:لاياحنه بري تلقي وعدك..
امنه:ههههه..
ومشت لطاولة حناها..
تبرة كانت معصبه منها لانها تأخرت خافت ماتجيش..لكن لما رتها كيف طالعه فرحت هلبه ونست علاش عصبت منها..
امنه وصلت فيها وباست راسها وقالت:سامحيني حنينه غير كنت مشغوله وشويه وعطلت ع ماوتيت روحي..
تبرة:عادي حنينه عادي المهم جيتي بنيتي..
قعمزت امنه وهي مبتسمه..
وحطت جنبها عبايتها والشنطه..ومررت نظرها ع الصاله..تلاشت ابتسامتها لما شافت لبس خواتها وانصدمت فيه..
تبرة:ريتي بالله لاحشم لاجعرة حتى المخطوبه زادت كلبت..وامك وين كلمتها قالت زيهم زي بنات جيلهم..
امنه قعدت تشوفلهم بضيق وهي ساكته..
وشويه وبدت اجوا الحفله مزبوط وخواتها ماقعمزوش بكل..
وحناهم طول الوقت نازله فيهم..
اما امنه فكانت تبي تستمع بأجواء الحفله بدون ماتفكر في اي شي يضايقها..
لعند ماجي وقت العشي..
كانوا البنات مقعمزات يعشوا ع طاوله وجنبهم طاوله فيها نساوين يهدرزوا..
:ريتي هديكا اللي مقعمزة حدا الحاجه تبره بنت مريم من راجلها الأول..
:ايه ريتها..ماشاء الله عليها زي امس زي اليوم طالعه زي الغزاله...وحتى لبسها نازك ومحترم..
:رباية حناها حتى هي الحاجه تبره ماتحبش العوجه وتعرف تربي..
روبين شبحت لسيرين...وسيرين شبحتلها..
بعدين رفعت روبين حاجبها وشبحت لتليفونها وبعتت رساله لاختها..
وصلت الرساله لسيرين قرتها..بعدين شبحت لأختها والزوز ابتسموا بمكر..
🌟🌟🌟🌟🌟
"وهادي يابلبله الحكاية كلها "
نبيله؛اممم..شوف انت كيف ماقتلي انها بنيه جديات هكي وماعندهاش في التسهويك الزايد وديما هازيه وماسحه بكرامتك الوطا..
هوفنص وقال:امتى قلته هدا اني!!؟
نبيله؛واضحه اصلا من غير ماتشرح..المهم اسمع جاي..كان تبي البنيه ترضى بيك ماتقعدش تجري في جرتها زي مفرخ اولى اعدادي..خليك راجل واملا عيونها..
عبدالقادر:شن قصتكم مع خليك راجل!!؟ لهالدرجه مش مالي عينكم!!
نبيله بضحكه:لاوخيتي سلمتك وليد اختي راجل راجل لكن حني نبوك تولي راجل اس 10..
عبدالقادر رفع حواجبه..
نبيله:افتح دماغك معاي سلم ولدي باهي..ارزن اثقل واشحط..
عبدالقادر:شن نشحط!؟
نبيله:خلي نكمل كلامي وبلاش اسئله غبيه تربح..
عبدالقادر بضحكه:باهي ياقنين كمل كلامك.
نبيله:احمم..المراة اللي زي الابله متاعك يعجبها الراجل الرزين اللي تحسه راجل حق مالي مكانه عنده مستقبل خادم ع راسه يفكر في الحياة بجديه..ماتحبش الفرافيش والمتروشقين والضايعين اللي لاحاضر ولامستقبل..
عبدالقادر بضحكه:صحيتي خالتي..كملي..
نبيله برفعة حاجب:ايه..ورد بالك تخليها تشوفك تبلحق في البنوت وحق ربي لو تقعدي هكي ماتحلم تشبحلك حتى الشبح ودورة تسمع بيها مخطوبه لهداكا الأستاذ..
عبدالقادر:ايه بس ندير في رقبتي رقبه..
نبيله بضحكه:غير بالشويه عليك ياعنتر بن شداد..
عبدالقادر شبح القدام وهو معصب..
وخالته ضرباتن ع ذراعه وهي تضحك وتقول:ياوالله قدورة طلع يعرف يحب ويغار...وخيتي سللللمه..وقرصاته من خده بقوة..وهو يتوجع ويقول:أي اي لالا يابلبله مش هكي..ااي..
🍂🍂🍂🍂🍂🍂
وجت العروسه..
وزفوها لكن من غير عريسها اللي ماباش يخش ع النساوين..
وبعد قعمزوها ع الكوشه..
بدوا ياخدوا معاها في الصور ويسلموا.
حتى من الحاجه تبرة عاد جدة العريس ..
اما امنه فكانت تتفرج من بعيد وبس..
تبرة:باهي قنينه مش خاطيه..
امنه بضحكه:احلا منه..
نبرة ضحكت وقالت:لا وين احلا منه حرام عليك..
ضحكت امنه وقعدت ساكته..
ع جية روبين طبست ع امنه وقالت:ماما قالتلك نوضي سلمي ع العروسه..
امنه شبحت لأمها لقتها تشبحلها وتأشرها بعيونها.
تبرة:نوضي بنيتي وعرفيها عليك.
امنه تنهدت وناضت..
ومشت مع اختها..
لين خشوا للممر للي يرفع للكوشه..
فجأة..
اشتغلت اغنيه شعبيه اسمها"وخيتي"
شدت روبين اختها وقعدت ترقص وترقص فيها..
بعدين جت سيرين حتى هي وقعدت ترقص..
وامنه انصدمت في الموقف ومعاش عرفت شن دير.
روبين:هيا ارقصي خيرك..
سيرين تغني:هيا يا وخيتي..
وهما يرقصوا وامنه تشوفلهم ماقدرتش تتحرك..
ولاتقدري تجاريهم صعب عليها..
قعدت يدوب تصفق وهي واقفه تشوفلهم..
الناس كلهم يتفرجوا عليهم..وعرفوا علاش امنه مارقصتش معاهم..
وامنه كانت حاسة وقتها ان الناس كلها تشبحلها وتدوري عليها..
بعدين قالت:خلاص بنمشي نسلم..
ومشت من حداهم والكل قعدوا يشوفوا فيها كيف تمشي وقعدوا يتهامسوا..
وامنه وقتها كانت كأنها تسمع في همسهم عنها..
اما خواتها فكانوا يشبحولها وابتسامه خبث ع وجوههم.
هي سلمت ع العروسه بسرعه بعدين ولت طول قعمزت حدا حناها وكان تلقى اطير وتطلع برا القاعه المهم تهرب من نظرات الناس ليها..
قعمزت حدا حناها وهي شاده دموعها بالسيف.
حناها تشبح لبنات بنتها ببغض شديد..
🍂🍂🍂🍂🍂🍂
برغم انها شدت روحها هلبه لين روحت مع خالها وحناها للحوش..
ولين خشت دارها..ولين بدلت حوايجها ومسحت مكياجها..
وخشت للحمام توضت للصلاة..
لكن مجرد ماوقفت ع الصلايه وقالت..
"الله اكبر"
بدوا دموعها ينزلوا وقعدت تبكي بصمت..
ماكانتش تبي حد يشوف انكسارها وحزنها غير ربي لان مافي حد يقدر يخفف عنها ويطبطب عليها غيره..
لما سجدت امنه قالت..
"ياربي عارفه ان عيبي ابتلاء من عندك واني راضيه بيه..بس عطيني قوة صبر بش نتحمل كلامهم وآذاهم ياربي ساعدني"
وقعدت تبكي في سجودها زي الطفله الصغيرة بالعبرة..
وبعد ماكملت صلاتها وشكوتها...
مشت لسريرها وانطرحت عليه بالملايه وماهي الا لحظات ورقدت ودموعها في عيونها..
🍂🍂🍂
وتاني يوم الجمعه..
مشت لحوش بوها الصبح بكري..
كانت المشيه ع قلبها ثقيله بش مجبورة تمشي مادام بوها طلبها..
وين وصلت غادي استغربت في استقبال مرت بوها الحلو..
بس ماوقفتش عنده هلبه..
ولما تلاقت مع خوها سلموا ع بعض بحرارة ولهت معاه بالهدرزة لين جاها بوها..
سلمت عليه وهدرز هو وياها شويه بعدين فطروا مع بعض..
وبعدها بوها وخوها تجهزوا للصلاة ولما جي وقتها مشوا..
وهي بعد مامشوا خشت للصاله لبست ملايتها وقعمزت تقرا في سورة الكهف ومرت بوها في الكوجينه توتي في الغدي..
امنه بعد صلاة الظهر..
مشت خشت لمرت بوها في الكوجينه تعاون فيها..
الهاديه:الجامعه شن جوها..
امنه وهي توتي في الصواني:تمام كويسه..
الهاديه:مافي شي مضايقك غادي؟كان في قولي نقول لخوي عنده اصحاب في الكليه اللي تقري فيها..
امنه بإستغراب:لالا مافي شي مضايقني صحيتي..
🌸وروحوا بوها وخوها..
وحطوا الغدي وتغدوا مع بعض بكل هدوء..
بعد ماتموا غداهم رفعت الخدامه الماعين بش تغسلهم..
وخو امنه ركب دراه بش يقرا.
وامنه قعمزت مع بوها ومرته يشربوا في الشاهي..
امنه:خير ان شاء الله!؟
عمران:احمم..زي ماتعرفي انتي بنتي الكبيرة والوحيده ومصلحتك مهمه عندي..وهمي كله نشوفك مرتاحه ومستقرة مع راجل كويس يخاف ربي يصونك وتعيشي معاه مرتاحه..
امنه بلعت ريقها وحطت طاستها وهي تشوف لبوها بخوف..
عمران:من الاخير في واحد خطبك مني..وراهو شاب ممتاز ونعرفه كويس..
امنه عقدت حواجبها وقالت:من هو هدا؟
الهاديه:خوي..
امنه شبحت للهاديه بصدمه وقالت:خوك اللي نعرفه وماعندكش غيره متزوج!
عمران:وماجاشي صغار ويبي صغار.
امنه:اها قصدكم يبي ياخدني ع خاطر الصغار..
الهاديه:مش هدا المهم..المهم انه اختارك انتي بالذات..
امنه:وعلاش اني بالذات!!؟
عمران:امنه..اهدي شويه واسمعيني..الراجل مافيه مايتعيب وقالي حنعيشها احسن عيشه ومش حنقص عليها شي..
امنه بحده:لا..
الهاديه:لا!!؟.
امنه:ايه..لااا...
عمران:شن تصكير راس هو!؟ يابنت راهو العمر يجري..وانتي بكل صدق وصراحه مايطق فى بابك حد وماصدقت من جي قالي شن في عندكم..لهدا حتوافقي من غير ماتزيدي وتعيدي في الدوة..
امنه قعدت تشبحله بصدمه..
الهاديه:احمدي ربك راك محظوظه اللي خوي شبحلك وفكر فيك اصلا..ماتعفسيش ع النعمه برجليك..صدقيني بعدين حتندمي اشد الندم..
امنه وهي تتلقى في سهام كلامهم المسمومه تماسكت ومابتش تنزل قدامهم دمعه..
حدها ناضت وخدت شنطتها بتطلع وهي تقول:نقعد بروحي طول عمري ولا ناخده خوك..
وهي ماشيه قال بوها:امالا تنسيني وتنسي ان عندك بو بالمرة..
وقفت وقالت: ولايهمك ..اني نبي ننسى اصلا..
ومشت طول للباب لبست في رجليها وطلعت من الحوش..
الهاديه بصدمه:رضينا بالبين والبين مارضاش بينا..
وعمران مشي من حداها وهو معصب وخش للدار وصكرها عليه..
🍂🍂
وامنه طول الطريق وهي تبكي في السيارة..
ومعاش عرفت وين تمشي..
ماتقدرش تروح وهي بهالحاله وتشغل حناها وخالها عليها..
لهدا خدت طريقها للبحر فهالجو الخريفي..
لما درست سيارتها..
نزلت طول ومشت للشط وقفت قدامه..
غمضت عيونها..وقعدت تاخد في شهيق وزفير...
بعدين فتحت عيونها ومررت نظرها علي البحر..ودموعها طاحوا من جديد...
وكلام بوها ومرت بوها يتردد في وذانها..
والموقف اللي داروهولها خواتها في الصالة بين عيونها..
ورجعت تبكي من جديد وقلبها المكسور يتألم..
🌟🌟🌟🌟🌟
"هي سمي بالله وخش"
عبدالقادر:بسم الله..وخش المعرض وهو يقول..لكن زي مااتفقنا ياحاج القرايه الاولى..
فرج بضحكه:ياودي باهي غير تعالى خل نوريك رزق بوك وتعرف شن دار بش كون روحه بعيد عليا وع رزقي..باك تتعلم تعتمد ع نفسك شويه..
ضحك عبد القادر وقال:ان شاء الله..
وقعد جده يدور بيه في المكان ويهدرز عليه..
وعبدالقادر يسمع وهو حاس بشعور حلو لأنه لاول مرة يسمع حاجات عن سيرة بوه العمليه خلاته تلقائيا يحس بالفخر وخلاته ولأول مرة كذلك يتمنى يولي زيه...
🌟🌟🌟
بعد ماروح من المعرض توجه طول لحوش صاحبه نادر بش يقرا هو والولاد للامتحانات النصفيه..
شيطوا ريق نادر شويه بس في النهايه طلعوا منه فاهمين كل شي...
وخدوا مواعيد للمواد التانيه..
🌟🌟🌟
وبدت الامتحانات..
ولأول مرة عبدالقادر يقرا ويتعب بمعنى الكلمه..
⚡عبدالقادر..
[عارفه لما الواحد يحط قدامه هدف يبي يوصله يدير المستحيل..
جمان:ههههه..عارفه عارفه]
في اول يوم..
كان الامتحان في مادة للدكتور عصام..
اللي طلب من امنه تجي تراقب معاه وهي وافقت ع مضض..
في القاعه..
عبدالقادر بتوتر:شن هدا قريب نبكي ياهو..والله قبل لما ماكنتش نقرا ونخش بالبركه ماصارش فيا هكي..
فاروق بضحكه:هدا شعور جماعة السوس ع فكرة..
جلال بضحكه:ايه بعد يطلع من الامتحان يقول ماجاوبت شي ودموعه فعيونه وهو معبي الورقه كتيبه..
عبدالقادر يضحكه وبإزدراء في نفس الوقت:يععع..
ضحكوا الولاد..
ع خشة عصام وهو يقول:السلام عليكم..
وشبح لعبدالقادر بحده..وعبدالقادر تجاهله..
ع خشة امنه...
لما شافها عبدالقادر تفاجئ..
اما هي مابتش تشبح جيهته من غير شي كانت حاسة روحها تعبانه ومجهده وجيتها للكليه كانت هربا من اسئلة حناها المتكرره عن اللي صار في حوش بوها وخلا حالها ينقلب..
عصام:فاروق..
شبحله فاروق..
عصام:برا غاااادي..
فاروق ناض ومشي وين ماقاله..
بعدين عصام شبح لجلال وقال:وانت..غااادي..
جلال ابتسم بتهكم وناض ومشي وين ماقاله..
هدا كله وعبدالقادر مبتسم ابتسامه جانبيه ومرة مرة يشبح لآمنه..
عصام ركز عليه وتنرفز..
بعدين مشي يوزع في الوراقي وهو يقول:ابسط حركه غلط نشوفها حرمان من الامتحان طول..
بعد ماتم توزيع..
وقف بعيد وهو يراقب..
اما امنه بدت ادور حوالين الصفوف وتراقب..وعيونها مرة مرة يجوا ع عبدالقادر اللي كان مغطس راسه في الورقه يكتب وبس..
وعصام مستغرب فيه لأبعد حد..
شويه امنه وهي ادور حست بدوخه بسيطه لكن شدت روحها..
ومشت وقفت بعيد وقعدت تراقب..
عصام:تفضلي قعمزي استاذه..
هي شبحت للكرسي وكانت فعلا محتاجه تقعمز..
وعبدالقادر معاها بعيونه..
هي مشت للكرسي..وحست روحها فشلت مع بعضها..
والرؤية قدام عيونها بدت تتشوش..
عصام كان يراقب ماشبحهاش..
لكن عبد القادر كان مركز ع مشيتها مش مزبوطه..
عقد حواجبه..
ولحظات..
وبنت قالت:استاذه!!؟
وبعدها عبدالقادر وعصام قالوا بصوت واحد بعد ماشبحوا امنه طاحت من طولها..
"آمنه"....
...يتبع...
