💓...
هي تشوفله بصدمه..
وهو بحقد..
واختها وصاحبه يشوفولهم بإستغراب..
⚡عبدالقادر..
[غير قوليلي خيرهم يشبحوا لبعض هكي ماتخلنيش واقف نشبحلهم زي العبيط مش فاهم شي..
جمان:تو يقولك صاحبك
عبدالقادر بضحكه:مكارة]
هي استاقظت من صدمتها لما خطر ع بالها خطيبها نزلت عيونها ومشت طول هاربه..
فاتت من حداهم الزوز وهما قعدوا معاها بعيونهم لين ادرقت..
سموعه:ياكلبه...
"ع مني انت!!"..
التفتوا الزوز لأختها..
كانت واقفه تشوف لإسماعيل بنظرات حاده وحاجبها مرفوع..
وعبدالقادر قعد يتأمل فنظرات عيونها..
اسماعيل:والنبي شن تقربلك هادي؟!
امنه:انت منين تعرفها؟!
اسماعيل ابتسم ع جنب وقال:مدام تعرفيها بري انشديها هي..
امنه بحده:اسمع انت رد بالك تجي فطريقها ولاتكلمها..لو شفتك فطريقها صدقني ندمك اللي شبحتلها حتى الشبح..
عقد عبدالقادر حواجبه وارتسمت ع وجهه ملامح ابتسامه اعجاب..
اسماعيل:تو انتي تعرفي شن صاير بيني وبينها اللي تهددي هكي!!
امنه ابتسمت بتهكم وقالت:عارفه كويس النماذج من امتالك
اللي مش مخليين بنات الناس فحالهم..رفعت حاجبها وبدت ع وجهها ملامح التهديد وهي تقول...واني اللي يقرب مني ولا من اي حد يخصني مانخليشي فحاله..
اسماعيل رفع حواجبه وشبح لصاحبه لقاه مستوه فيها وخلاص غمض عيونه وهو يحاول يهدي من روحه بعدين فتح عيونه وشبح لآمنه وقال وهو يهز فراسه مسايرة:معليشي معليشي...ع خاطر راس القومبالي هدا بنسكت..
امنه فنصت عيونها وشبحت لعبدالقادر..
هو استاقظ وقال بربكه:ان شاء الله لاباس ع الوالده.
امنه غمضت عيونها بنفاد صبر رفعت يدها ومدتها وهي تأشر بسبابتها القدام وتقول:خود الشلتوت اللي معاك واقلب وجهك...
سموعه برفعة حواجب:شلتوووت!..
عبدالقادر شده من كتافه ولفه ليه بعدين شد وجهه بإيديه وهو يشوف لعيونه:مراة مراة..وانتي ماتضربش فالنساوين...الراجل مايمدش يده ع مراة..
اسماعيل كور قبضات ايديه الزوز بشده من الغضب وغمض عيونه وهو يقول:اعوذ بالله من الشيطان الرجيم...
حط ايديه ع ايدين صاحبه ونزلهم..
وفتح عيونه وشبح لآمنه وقال:غير جيتي مراة بس وكبيدة صاحب..
حط عبدالقادر يده ع فمه وشبح لآمنه وقال بإبتسامة ارتباك ووجهه احمر من لون بالطوه اللي لابسه:اسفين ع الإزعاج..وان شاء الله لاباس ع الوالده..وجبد صاحبه وهو مصكرله فمه وهويقول..نتلاقوا فالكليه..
سموعه اشر بسبابته ع عبدالقادر بعدين اشر عليها ودار حركة القلب بإيديه..بعدين تحلف بيده وهو ضام السبابه والإبهام لبعض..
شبحله عبدالقادر فنص..
نزل ايديه وضمه بش يشد ايديه ومشي بيه بسرعه وسموعه يقول..
"احمدي ربك"..
اختفوا من قدامها...
هي رمشت عيونها بسرعه..
بعدين حطت ع صدرها خدت نفس عميق بعدين زفرت بقوة..
بعدين طبست خدت الشنطه..
ولفت ومشت لحجرة امها..
ومازال وجهها احمر ..
وقلبها يدق بقوة💓
💮💮💮💮
برا...
فباحة العياده...
روبين وهي تتكلم فالتليفون:والله لتوا نرعش نرجف مع بعضي يارتاج..
رتاج:كان تروحي احسنلك..
روبين:كيف نروح وامي من بيها!؟سيرين ماينعباش عليها..وبعدين اصلا مانقدرش نقعد بروحي فحوش فاضي..
رتاج:روحي لحوش حناك..
روبين رفعت حاجبها وقالت؛ايه صح...خلاص صكري صكري توا خل نكلم هديكا امنه..
رتاج:باهي طمنيني مش تنسي..
روبين:باهي..بايات..
صكرت منها واتصلت بآمنه وهي تشوف حواليها..
فوق...
سيرين:لااني بنروح مانقدرش نقعد وراي قرايه..
تبره:بتروحي لحوش مافيه حد!!
سيرين برفعة حاجب:نروح عندكم حنينه..
تبرة شبحت لآمنه..
وآمنه كانت واقفه تشوف لأمها كيف راقده وملامح التعب ع وجهها..
رجعت تبرة شافت لسيرين وقالت:باهي..
ابتسمت سيرين ع جنب..
فجأة رن تليفون آمنه..
قامت يدها وشافت المتصل مط شواربها بملل وفتحت الخط وردت تقول:وينك انتي!
روبين:اسمعي انتي..بنروح مع حنينه اليوم وسيرين اكيد بتروح مش حتقعد اقعدي انتي مع ماما...بريها شويه..
ابتسمت تهكما وقالت:تمام..
نزلت التليفون وصكرت فوجهها بعدين شبحت لحناها وقالت:خالي جاي توا...روحي معاه حناي انتي وياهم خلوني اني نبات معاها اليوم..
هزت تبرة راسها وقالت:باهي بنيتي باهي..
وسيرين تشبح لآمنه من فوق لتحت...
🌟🌟🌟🌟🌟
مقعمزين الزوز ع كراسي فواحد من ممرات العياده..
عبدالقادر بإندهاش:حيي قصدك اخت الأستاذة وحده زي هادي!!
اسماعيل وهو متكي بإيديه ع ركابه:الكلبه كبدي عليها دم.
عبدالقادر بعقدة حواجب:ع مني انت!..
شبح اسماعيل بطرف عينه وقال:الكلبه اللي كنت نحكي عليها
عبدالقادر:اهااا..
شويه جتهم تجديده وقالت:بنروح مع عمتك حليمه ولدها جي بيروح بيها..
عبدالقادر :تمام توجه..
اسماعيل:خالتي تجديده ماتشبحيش فيا !!؟
تجديده شبحتله بعدين ضيقت عيونها وقالت:هو انت..
عبدالقادر شد ضحكته..
اسماعيل ابتسم وقال:ايه اني سموعه ضرتك.
تجديده شبحت لعبدالقادر وقالت:اني مروحه وانت ماطولش مع هدا..
شبحتله بإزدراء بعدين مشت...
عبدالقادر بضحكه:ماتواخدش توجه سمعه..
اسماعيل بضحكه:تعز عليا زي امي بالزبط مانحرجش منها..
حط عبدالقادر ع ظهر صاحبه طبطب عليه بعدين حول يده وقال:جعان..
اسماعيل:اشر منك..هي نوض نطلعوا..
عبدالقادر اتكى بظهره ع الكرسي وهو رافع حواجبه وقال:نطلعوا!!
اسماعيل وهو عاقد حواجبه بإستغراب:قصدك بتقعد..
غير عبدالقادر عيونه وشبح القدام وهو يتنحنح..
اسماعيل ضحك وهو يحرك فراسه ايمين ويسار وقال:باهي نطلع نجيب شن ناكلوا..
ابتسم وشبحله وهو يقول:نوااارة ياصاااحبي..
ضحك اسماعيل ومشي..
وعبدالقادر تنهد بإبتسامه..
بعدين ناض ومشي يدور ويدور "بكسر الواو" ع حد يعرفه يوصيه ع أمونه...
💮💮💮💮
اسماعيل وهو طالع..
شاف روبين واقفه ومعاها راجل ع عصام ويهدرزوا..
هي بالغلط جت عينها عليه طول غيرت انظارها عنه ووجهها مخطوف...
وهو مشي كمل طريقه وع وجهه ملامح الإستغراب ويتسائل فنفسه..شن موقف عصام عليها هي واللي معاها!!
ماخدتش منه هلبه تفكير بش وصل للإجابه..
"هو هدا الدكتور اللي فضلاته عليا"..
ابتسم بتهكم وطلع من العياده..
وهي معاه بعيونها..
🌟🌟🌟🌟
ايه عرفت وين ماتخممش..
عبدالقادر:قريبتي ياكويكه راهو توصي فيها..
مبروكه"ممرضه سمراء البشرة":من عيوني قدري..هي ماتبي شي تاني..
عبدالقادر بإبتسامه:لا..منورة كويكه..
مبروكه بضحكه:تسلم ياقدر...
ومشت فاتت من حداه وهو ضحك..
بعدين طلع تليفونه واتصل بجده...
عبدالقادر:ياآلو..
هو يتكلم بالتليفون ..
وفي دكتورة كانت واقفه ع الريسبشن تشبحله بإعجاب قريب تاكله بعيونها..
هو لما كان يتكلم عيونه جو عليها..
هي ابتسمتله..
وهو اللي كان بنظرة عقله يزوغ طول...
هالمرة ماتحركتش فيه شعرة برغم ان الدكتورة كانت جميله جدا وجذابه وعيونها كبار وبيضا...
⚡عبدالقادر...
[وفمها صغير لكن منفوخ شويه بلون الكرز وخدودها حمر وشكله شعرها يااحمر ياكستنائي.
جمان:هههههههههه..
عبدالقادر بضحكه:عاديه جدا..
جمان:هادي عاديه!!تي تجنن..
عبدالقادر ابتسم وقال:ماتبرقش فعيوني...
جمان:اممم...]
عبدالقادر:لالا ياحاج.......تسلم فروجه....هههههههه.....تصبح ع خير ياغالي...بوسلي توجي...
بعد التليفون عن وذنه وهو مغمض عينه اليمين ويضحك..
بعدين رده بالشويه..مايسمع فشي..حوله من ع وذنه وشافه لقي جده مصكر عليه قعد يضحك..
"مساء الخير"..
رفع عيونه بشي من البطئ وحواجبه مرفوعات..
الدكتورة بإبتسامه وهي مضيقه عيونها:حسيتك زي اللي دور ع حد زي اللي رايح هكي..صح؟
نزل يده اللي فيها التليفون وفرد ظهره وقال وهو يوزع فنظره ع المكان:تس تس..
الدكتورة وهو تمرر فنظرها عليه وتشوف شن لابس في ايديه:اممم..باهي عندك حد هني نتوصولك فيه..
شبحلها بعدين ابتسم مجامله وقال:مشكورة عندنا هني من يتواصلنا..
الدكتورة وهي تمرر فنظرها ع ملامحه وهي مبتسمه:اممم..
▪▪▪▪▪
ماشيه فالممر وهي تتكلم فالتليفون..
آمنه:تماضر تقدري تجيني غدوة ان شاء الله فالكليه؟......................حاولي............خلاص بيناتنا تليفون..
طلعت من الممر ووصلت وين مافي الريسبشن..
وقفت فمكانها لما شافاته واقف ع الدكتوره وهوحاط ايديه ورا ظهره..
والزوز يهدرزوا مع بعض..
توقدت فوسط صدرها جمرة..
حست روحها كلها مع بعضها سخونه وكأن نار ولعت فيها..
قالت بنبرة توتر:سلام..تماضر..
نزلت التليفون من ع وذنها وهي تشوفلهم بنظرات اي حد يشوفها مش حيوصفها الا بوصف واحد..
الوصف اللي قعد يفكر فيه سموعه وهو جاي ناحية صاحبه وفيده كيسة وجبات سريعه
كان يشوف لآمنه كيف واقفه تشوف لعبدالقادر والبنت اللي معاه بنظرات غيرة واضحه وعيونها السود اللي تلمع معبيات دموع...
ابتسم ع جنب وهو عاقد حواجبه..
وقعد يمرر فنظره عليه وعليها..
وصل فصاحبه وقال:قدوو..
عبدالقادر شبحله وقال:جيت فوقتك..شبح للبنت وابتسم مجامله وقال...تسمحيلنا!..
الدكتورة:باهي خل نعطيك رقمي مرات تحتاج حاجه ماتندريش..
سموعه رفع حواجبه..
عبدالقادر وع وجهه نفس الإبتسامه:لا نندري..مش حنحتاج..شبح لصاحبه وقال..هي سموعه ..اشر ع الباب بيده..
سموعه وهو يشوف لآمنه:تمام
الدكتورة تكنطت شبحتلهم من فوق للوطا ومشت..
سموعه شبحله وقال بضحكه:شكلك مريض رسمي طرف زي اهيا ياراجل تفوتها!
تعكرش وجه عبدالقادر وهو يقول بإزدراء:بالله هيا اطلع..
سموعه غير عيونه لآمنه اللي ماحولتش عيونها من على عبدالقادر..
عبدالقادر بإستغراب:وين عيونك انت!!..
التفت وين وشبح وين مايشبح صاحبه..
لقاها واقفه تشوفله..
هو قعد يشبحلها شويه..بعدين شويه شويه ارتسمت ع وجهه ابتسامه خفيفه..
هي استاقظت لروحها لما ابتسملها..
غيرت عيونها عنه بإرتباك ومشت كملت طريقها بإتجاه الكافتيريا وهما الزوز بعيونهم معاها لين ادرقت..
وقعد عبدالقادر هايم بانظاره فالإتجاه اللي هي مشت فيه..
ضحك اسماعيل لما شاف حالته هبط بيده ع كتفه وقال:ماتبيش تطلع..
شبح لصاحبه..بعدين تنهد من قلبه وقال:مريض..
شد سموعه ع كتفه بقوة وقال:من هو المريض!!
عبدالقادر :اني..
ضحك سموعه بعدين حاوط كتافه وقال:تعال ياصاحبي تعال..
ومشوا الزوز طلعوا من العياده...
💮💮💮💮
فم دارها واقفه هي وولدها..
تبرة:اختك وحده مهبوله وخلاص..
محمد:يام قولي الحق..
كان في بينها وبين راجلها مشاكل بالك ندخلوا بالخير ونحلوها..
تبرة بإنزعاج:ياودي قتلك مافيش مشاكل مافيش اختك وحده وسواسه هو هدا توا خليني نخش لداري نرتاح طشه من الظهر واني واقفه ع رجل...
التفتت للباب فتحاته وخشت وصكرت وراها الباب..
محمد حرك راسه ايمين ويسار وبعدين لف ومشي لداره حتى هو...
وهو ماشي بطريقه لداره فات من حدا الدار اللي بايتات فيها بنات اخته..
داخل الدار..
سيرين:ريتيها حناك كيف اول ماجينا مشت طول لدار العايبه وصكرتها بالمفتاح..
روبين:اسكتي معاش اذكريني بيها الخليقه اهيا..
سيرين؛علاش دارتلك حاجه؟
روبين بقرف:كالعاده عطتني محاضرة طويله عريضه مدعية المثاليه هادي..
سيرين بإزدراء:داره كبد...فنصت وقالت..راك تقوليلي خطيبك راها معاك..
رفعت حاجبها الإيسار وقالت:لا..وبعدين كان راها!؟
سيرين:كان راها معاك مجبورة تعرفيه عليها وكان تعرف عليها لازم تتكلم قدامه بعجرفه وتحدفلها عليك كلمة ولا كلمتين..
روبين وهي تفكر فكلام اختها:ايه ديرها وجه الشوم هادي..لكن تبي الحق مايهمنيش بكل..
سيرين:قاعده ع هبالك!
روبين تنهدت وقالت:تعرفي سيرين...شبحتلها بضيق وقالت..حاسه روحي..نحب..نحب اسماعيل..
سيرين بصدمه:شن هي!!!؟هداكا الصايع الفاشل متاع المشاكل!!حمارة انتي حمارة شن جاب اسماعيل لعصام ياغبيه..
قعدت ساكته روبين وهي مضايقه..
سيرين ناضت وقالت:خل نوض نشوف كان في حاجه تتاكل هني نجيبلك تاكلي لان باين عليك جعتي هلبه وسكرك هبط...شقلبت عيونها ومشت للباب..
فتحاته وطلعت..
وخلت روبين سرحانه بتفكيرها فوضعها المعقد..
🌟🌟🌟🌟
مقعمزين برا ياكلوا ويهدرزوا..
اسماعيل بلع وقال:خوتي نعرفهم زي بوهم بالزبط مصاصين دماء..ع خاطر الفلوس يبيعوا ارواحهم..
عبدالقادر وهو ياكل:اني..والله..ماواجعني..
قاطعه اسماعيل وهو يقول بقرف:ابلع قبل بعدين ادوي..
عبدالقادر ضحك وهو يبلع..بعدين شرب شويه من المشروب وشبحله وقال:امك الوحيده اللي واجعتني فالقصه كلها..
اسماعيل ضم شواربه لداخل بأسف وقال:ياريت نقدر نطلقها منه..
تنهد عبدالقادر وهو يوزع فنظره قدامه..
بعدين قام نصه ونتش منه نتشه اكبر من فمه..
واسماعيل كذلك سكت وقعد ياكل..
فجأه...
جي واحد يجري من بعيد اتجاههم وهو يقول:وراس امك وراس امك...
الزوز وقفوا مضع وفنصوا وهما يشوفوا للولد كيف وقف حداهم ..
قعمز ع روس صوابعه حدا اسماعيل وهو يقول بتوسل:بالله عليك خلصني منه..
بلع اسماعيل وحط نصه ع تركينه وناض وقف وهو يقول:من هو..
شويه جي واحد يجري وفيده عصا ثخينه تخوف..
الولد لما شافه فنص وادرق ورا اسماعيل وقال بهلع وقال:اهوا اهوا اهوا..
الراجل:تعال جاي ياكلب تعال...
عبدالقادر:صل ع النبي ياشيخ..
الراجل :عليه الصلاة والسلام..ترا اطلعوا منها وخلوني نربي ولد الكلب هدا..
اسماعيل:شن تبي منه..
الراجل :شن نبي منه!!؟شبح للولد بنظرة تخوف وقال..قوللهم شن نبي منك ياولد الكلب..
الولد :ساولتك بالله خليك بيني وبينه اني خشيت عليك راهو..خشيت عليك..
دم اسماعيل قعد يغلي فعروقه قال للراجل :اللي تبيه منه اني نتحمله كله..
الراجل:ابدا مامتحمله واحد غيره..
عبدالقادر:باهي فهمنا ياخوي شن دارلك هو..
الراجل شبح للولد وقال:قوللهم ياوسخ ياندل شن داير..
اسماعيل بنرفزة:قول وريح امنا حتى سمسامنا ماتهنينا بيه..
الولد:ساولتك بالله ماتخليني ليه ساولتك بالله..
عبدالقادر: ياودي مش مخليك ليه غير قول شن داير..
الراجل:مايقولش الكلب شن داير مايقولش..قدمله خطف وجاي بيشده ..
الولد يقول بعياط:اني خشيت عليك خشيت عليك.
دف اسماعيل الراجل وقال بعصبيه:برا غادي &&*¥الاحرف..
عبدالقادر ضيق عيونه بإشمئزاز...
والناس حواليهم يتفرجوا..
اسماعيل بغضب:وديني كان ماتقولش شن دارلك ندفنك فمكانك..
الراجل شبح للولد وقال:قول شن داير ياكلب قول..
التفت اسماعيل وقال بغضب:بتقول ولا نخبطك اني!
عبدالقادر:تكلم خير ماتندم انك خشيت عليه..
الولد:نقول لكن عطيني الامان..
اسماعيل غمض عيونه بنفاد صبر بعدين فتحهم وقال:عليك 60 امان..تفضل..تكلم..
الولد وهو يشوف للراجل بخوف قال:كليت لحمته من صونية غداه..
اسماعيل وعبدالقادر وهما مضييقين عيونهم بصدمه:شنييي!!!
الراجل: ومازال تقول فيها ياولد الكلب انت!!
شبحوله الزوز..
عبدالقادر وهو مضيق عيونه بعدم استيعاب قال:جديات!!!
الراجل:مال شنو..بالله ياخوتي عمله زي هادي يستاهل ع خاطرها الذبح ولامايستاهلش..
اسماعيل حط ايديه فنصه وهو يشوف الراجل وهو مازال مضيق عيونه..
عبدالقادر وهو يمرر فنظره عليهم ويحرك فسبابتي ايديه الزوز عكس بعض وهو يأشر عليهم قال:تتسهوكوا!!
الراجل والولد ضحكوا مع بعض..
بعدين قدم الراجل لأسماعيل وحط يده ع ظهره وقال:حني برنامج كاميرا خفيه سماه"ضحكني وضحك الناس عليا"..
الولد مشي لعبدالقادر واشرله ع الكاميرا وقال:هوينا الكاميرا..
والراجل اشر لإسماعيل ع الكاميرا وقال:هديكا هي..نزل يده وقال..حينعرض ان شاء الله فرمضان..ويشوفوكم العيله وهما يفطروا ويضحكوا عليكم..وقعد يضحك..
تنهد اسماعيل والتفت لصاحبه..
شبحله شبحه عبدالقادر فهمها طول..
اسماعيل هز راسه و شبح للراجل وقال:ع اما قناة؟
الراجل:ليبيا فري..
عبدالقادر:فرييي!!؟اممم..
اسماعيل مد يده للراجل وقال:كل سنه وانت طيب من توا..
الراجل ضحك وصافحه وقال:كل عام وانت....لالالاااالا..
قبل يكمل الجمله جبده وشده من راسه..
وعبدالقادر شد الولد من راسه وخبطوهم فبعض..
بعدين شدهم سموعه وطاح فيهم ضرب وهو يقول:صياما...مقبولا....وصحه..فطوركم ..من توا...
عبد القادر خدي حكاك المشروب وصبهم فوقهم وهو يقول...
ولييييبياااا فرييييي...
🌟🌟
كان مش الناس التموا عليهم وحزوهم راهم بيتوا جماعة الكاميرا الخفيه فالعياده هديكا الليله...
🌸فالوقت نفسه..
كانت آمنه فوق فحجرة امها..
مقعمزة ع الكرسي وحاطه السماعات فودانها وتسمع فتونس مفتاح..
اغنيه"ريدي الغالي"..
وسرحانه بتفكيرها فطالبها الشويطين..
اللي مهناش روحه ولا ارتاح الا بعد ماخلاها رغما عنها تنشغل بالتفكير فيه..
وكل ماتفكر فيه وتذكر كل شي يخصه..
كلامه..
حركاته..
ضحكته...
اسلوبه..
نظراته..
هباله..وخفة دمه..
ومعاملته الخاصه ليها..
تحس بشعور من حلاوته مش قادرة توصفه حتى لنفسها..
شعور عمرها ماحست بيه فحياتها..
شعور مخلي قلبها ينتعش انتعاش..
وكل شي فيها يبتهج...بهجه...
تنهدت..
بعدين حركت عيونها لأمها..
شبحتلها شويه..
بعدين غيرت عيونها عنها ورجعت تشبح جهة الروشن ورسمت ع وجهها ابتسامه خفيفه وحلوة...💓
🌟🌟🌟🌟
قاعد قلبي مابردش..
عبدالقادر بضحكه:ياراجل مش عارف علاش الليبين مايبطلوهاش البرامج الهابطه هادي..ثقل دم..ع عبط...ع دراه كبد...
اسماعيل:حني فشن فالحين غير فالتقرقيز..
عبدالقادر بإبتسامه:صدقت..
اسماعيل:شن مازال مش مروح؟..
عبدالقادر غير عيونه عنه وميل راسه ايساره شويه وحرك حواجبه مرتين لفوق..
ضحك اسماعيل:باهي يامجنون ليلى...اني مروح.. ولف بيمشي وهو يشبحله قال..تصبح..
ابتسم عبدالقادر ع جنب ورفع يده وحيا صاحبه..
اسماعيل تلفت القدام وكمل طريقه ورفع يده ردا للتحيه..
حط عبدالقادر يده ورا ظهره..
بعدين التفت للعياده شبحلها بإبتسامه حلوه..
تنهد..
بعدين مشي خش داخل...
🌸🌸🌸🌸
موصيينا عليكم ياابله آمنة راهو..
ابتسمت امنه بإستغراب وقال :من وصى علينا؟
مبروكه بإبتسامه وهي تشوف ل"السيروم":واحد معرفه..
امنه قعد تشبحلها وهي تفكر..
مبروكه شبحتلها وقالت:ان شاء الله لاباس ع اميمتك..
غمزتلها بعينها...
بعدين مشت للباب وفتحاته وطلعت وصكراته وراها..
ضحكت لما شافت عبدالقادر واقف ع بعد مسافة بسيطه من الحجرة..
ابتسم وهو يشوفلها بنظرات لهفه وقال:رقدت؟!
مبروكه حركت راسها ايمين ويسار وهي تضحك..
وصلت فيه وقالت؛مقعمزة حدا راس امها ماتبيش ترقد تبي تسهر عليها..
هو شبح لباب الحجرة وابتسامه حلوة مرسومه ع وجهه..
فجأة انفتح الباب..
توسعوا عيونه وحواجبه ارتفعوا..
هي لما شافاته انخلعت..
وقلبها بدي يضطرب بشده...
مبروكه شبحتلها..
هي حركت عيونها لمبروكه..
مبروكه ابتسمت وغمزتلها بعينها بعدين مشت..
امنه رقتلها..
صكرت الباب ومشتله بغضب..
صح مشيتها مش مساويه..
بس هو كانت تزيد تعجبه وهو يشوفها تمشي بالذات مشية الغضب..
وصلت فيه ووقفت قدامه وهي تقول:انت شنو بالزبط بش تفهم يابنادم انت..راك تجيبلي فالشبهه بتصرفاتك هادي..
هي تكلم فيه بعصبيه ومع هدا صوتها منخفض..
وهو يسمع فيها ويرمش فعيونه ويضحك من قوة هجومها عليه بالهزايب..
امنه:قاعده نقولك قاعده نحذر فيك ماتجبرنيش ع شي اني مانبيشي...
عبدالقادر بضحكه:شبهة شني بس ربي يهديك..انتي استاذتي واني طالب عندك واللي ندير فيه معاك واجب عليا...
الناس الأولى قالوا..ابتسم ابتسامه ساحره وهو مطبس راسه وقربه ليها وقال...من علمني حرفا..صرت له عبدا💓
نظراته....ابتسامته..قربه...عطره...
خلوها تتوتر هلبه...
ونبض قلبها المتسارع اللي مخلي حركة صدرها ملحوظه قاعد يفضح فيها..
مع احمرار وجهها الحنطي اللون....
برغم هدا كله كانت متماسكه وتحاول تكون تانيه من برا ع قد ماتقدر..
بعدت وردت عليه بسخريه تقول:غير امتى تعلمت مني حتى نص حرف انت!!؟تخش المحاضرة وتطلع منها ودماغك نظيف وناصع البياض...لامشاركه تشارك..لابحت درت..لاجهاز تجيب فيه..
رفع سبابته وقال:اهااا..لالالا..الجهاز جبته فأخر محاضرة..
امنه:ديكور...منظر بس..بش تسكتني..
عبدالقادر بضحكه:ديما ظالمتيني انتي..
امنه بحده:اسمع جاي بلا كترة قطاف..تصرفاتك هادي ماتمشيش معاي..برا ديرها للبنات اللي تعرفهم..ولاالدكتورة الحمرا هديكا اللي كنت واقف عليها بكري..النماذج هادم يمشوا معاك ويركبوا ع جوك..اما اني..ابعد عن طريقي خير مانخليك تندم انك جيت فيه...شبحتله من فوق لتحت بحده..
بعدين لفت ومشت للحجره بغضب..
وصلت فيها فتحت الباب وخشت وصكرت الباب وراها..
عبدالقادر ابتسم بتنهيده وقال:اااه ياقدري يامهزب..تسمع منها هالهزايب وكأنك تسمع فكلام حب وغرام..
ضحك وقال...شن دارت فيا بس..
تنهد بعدين زفر...وابتسم وعيونه ع الباب💓
🌸🌸🌸🌸🌸
تاني يوم الصبح..
الساعه 9:00صباحا..
كان الزبير راجل امها فالعياده..
لما سمع باللي صارلها ماتحملش حجز وروح طول..
مريم بدموع :وعلاش جيت!! قعدت غادي خير!..
هو فنص بعيونه فمريم بعدين حركهم جهة آمنه اللي كانت واقفه معاهم وتشوفلهم..
مريم شبحتلها وقالت:مش عندك خدمه انتي خيرك مامشتيش؟
امنه ابتسمت تهكما وقالت:ماشيه..ماتبي شي..
مريم:مانبي شي غير توكلي..
امنه غمضت عيونها وفتحتهم وهي مبتسمه بعدين قالت:لاباس عليك..
ولفت ومشت للباب فتحاته وطلعت وصكراته وراها..
دموعها طاحوا..
لكن هي فيسع مسحتهم..
بعدين لبست قناع القوة ومشت..
داخل...
الزبير بضحكه:اما انتي يامراة قداش مهبوله..شن ناخد عليك ماناخد عليك..وحق العالي فسماه اللي ماشي لخدمه في عندي مشاكل مابيتش نشغلك معاي بيها هو هدا...
مريم بنبرة زعل:حق!
ضحك وقال:حلفت يامراة..
هي ابتسمت من بين دموعها وهو قعد يضحك..
🍂🍂🍂🍂
طلعت برا العياده..
كانت ماشيه طول لسيارتها..
وصلت فيها..
فتحتها وركبت..
وكيف جايه بتصكر الباب شبحت برا..
شافت شي خلاها تتفاجأ ع الآخر..
شافاته راقد فسيارته قدام العياده..
قعدت شبحله هلبه وهي متفاجئة ع مصدومه...
ومشاعر حلوة فداخلها تتحرك بقوة...
وقلبها..وجعها عليه..
هي لتوا ماتبيش تفهم هو علاش يديرهكي..
او نقولوا تفهم وتفسر عكس ماهي تبي تفهم..
هي ممكن تكون قويه وتحملت هلبه حاجات فحياتها..
لكن من الصعب جدا تتحمل جرح الحب..
اللي ممكن يقضي ع قلبها المرقع من كتر مافيه جروح مخيطه..
حطت يدها ع الكلاكس..
وضغطت بقوة..
هو ناض مفزوع..
شبح لسيارتها طول..
هي صكرت الباب بسرعه بدون ماتشوفله وشغلت سيارتها وتحركت ع طول..
قعد مع السيارة بعيونه وهو مبتسم ابتسامه مشرقه وقال..
Good morning My teacher💓
🌸🌟🌸🌟🌸🌟
تحرك وراها طول...
وقعد وراها لين وصلت للحوش..
بعد خشت توجه لحوشهم...
لما وصل حوشهم وخش شاف جده وحناه فالجنان..
نزل من السيارة طول..
وصكر بابها ..
وجاهم وهو يغني وهو يأشر عليهم بسباتيه..
نا وياك يا عز الرفاقه..
ناوياك ياعز الرفاقه...
وصل فيهم..
باس راس جده وغنى..
ياعز الرفاقه..ترررم..
والتفت لحناه اللي كانت تضحك..باس راسها وغنى..
ياعز الرفاقه...ترارارارا..
ولف ومشي خش وهو يغني
ربيع وحب..انننن..اسبابه..
والباقي مش حافظه..
ياعز الرفاقه..
فرج:خاطري يفوت عليا يوم نشوف فيه البنادم هدا بعقله!..
تجديده:ماتقوليش ياراجل خيرك حاط راسك من راس العيل ماتقولش ولد ولدك بكل..
فرج:تو احني شن قلنا الشفاعه يارسول الله!
تجديده:خليه فحاله..معاش تقعدله ع الوحده وتركبه عقده تكرهه فحياته..
فرج بتعجب:لاإله الالله!
وفتحيه تسمع فيهم وهي مقعمزة فبالكونتها تشرب فالقهوة وهي تضحك ع مناقراتهم الروتنيه...
🍂🍂🍂🍂🍂
فجنان حوش جداها...
سيرين بتذمر:تي هيا وينها هادي..
تبرة بحده:اهي جايه..
شقلبت سيرين عيونها..
ع طلعت امنه...
سيرين لماشافتها تفاجئت هلبه...
كانت هالمرة مختلفه..
آمنه اللي كانت ماتحبش تلبس غير الألوان الغامقه الغير ملفته..
هالمرة ع بلوزة بيضا طولها للربكه وتحتها سروال جينز لونه ازرق كحلي..وفوقهم دجاكه جلد سودا كانت لابسه وشاح ازرق مزركش...
ودايره فعيونها اللي جانب الكريم اليومي اللي تحط فيه ع وجهها قبل ماتطلع...كحل ومسكرة..
حناها كانت مصدومه هلبه..
وفرحانه اللي واخيرا حفيدتها لبست ودارت شي من اللي هي كانت ديما تشريلها فيهم وتعرم ع امل يجي يوم وتستعملهم..
نظرات عيون سيرين اللي نخصت اختها اللي كانت لاهيه بالتليفون وخلتها تشوف معاها وتندهش حتى هي اخجلتها واربكتها فنفس الوقت..
لبست شنطة اللاب متاعها وقالت:ماتبي شي حنينه؟
تبرة بإبتسامه فرح:مانبي شي غير نشوفك فرحانه..
ابتسمت آمنه..
بعدين مشت طول لسيارتها
وبدون ماتشوف لخواتها قالت..اركبوا سقدوني..
هما الزوز مشوا ركبوا وعيونهم يشوفولها بنظرات شك..
بعد ركبوا..
شغلت سيارتها وتحركت..
ودعوات حناها مرافقتها هي بروحها...
🍂طول الطريق خواتها كانوا يهدرزوا مع بعض وفايتينها..
ولاهي كانت مهتمه من اصله...
وصلت كل وحده فيهم لمكانها وتوجهت لجامعة طرابلس..
لما وصلت لكليتها..
قلبها بدي بالإضطراب من اول جديد..
كانت تتسائل فنفسها لو خشت توا تلقاه ولالا...
المهم..
هي تبي..تشوفه..
💓فتحت باب السيارة ونزلت...
نزلت معاها حاجاتها وصكرتها كويس..
وتوجهت للكياس..
داخل..
فالكليه..
فمربع الكليه المشهور..
كانوا هما التلاته واقفين يهدرزوا..
فاروق:هههههههههه..
جلال بضحكه:زعمه كان مشينا للقناة نلقوا الفيديو قاعد عندهم ليا وقت ماشفتش سموعه عاطي طريحه لحد..
فاروق بضحكه:جو عليه لما يضرب..
عبدالقادر:كان مش ربك تقى عليهم راهو دفنهم فمكانهم.
فاروق:عاد مالقوش غير سموعه اللي ماعنداش الريح وين ادور يديروا عليه كاميرا خفيه!؟
جلال :وشن بيعرفهم بيه..
عبد القادر بضحكه:حظهم ونصيبهم ياكلوها مشلحه مملحه من سمعه...
هما كانوا مابين زوز عرصات..
جلال وفاروق مقابلين الممر اللي يجوا منه اللي يخشوا للكليه من داخل..
وعبدالقادر كان واقف قدامهم وعاطي بالظهر..
جلال وفاروق الزوز شافوا فنفس اللحظه امنه جايه ومعاها عصام والزوز منسجمين فالهدرزة..
هو شبحلهم كيف مركزين بنظرهم مع بعض ع شي معين..
التفت طول..
وشافهم..
هو ماركزش التغيير البادي فمظهر آمنه..
شعور الغيرة اللي تحرك داخله خلاه مايركزش الا ع تبادلها الإبتسامات واطراف الحديث بينها وبين عصام..
ارتسمت ع وجهه ملامح الغضب تلقائيا وعقد حواجبه...
وهو قليل النادر مايغضب...
🌸بس هو الحب هكي..يغيرنا للنقيض..ويخلينا نديروا حاجات مش متعودين عليها وممكن فحياتنا مادرناها🌸
جلال شبح لصاحبه ..
نخص فاروق..
شبح فاروق لقادر طول..
بعدين شبح لجلال وجلال شبحله..
عبدالقادر قعد بعيونه مع امنه وعصام لين خشوا لمكان الأقسام...
اختفوا من قدام عيونه..
هو نزل عيونه شويه..
بعدين رفعهم وشبح القدام وقال:اني ماشي مشوار ضروري نص ساعه ونولي..
الزوز هزوا روسهم وهما ساكتين..
اما هو لف ونزل نظراته ع عيونه ومشي طول قاصد يطلع من الكليه..
جلال:شكله طاح رسمي قدو..
فاروق:طيحة الشاطر بألف زي مايقولوا..
ابتسم جلال..
🌸🌸🌸🌸🌸
فالمكتب..
قعمزت ع الكرسي وقالت بإبتسامه:شكرا استاذ عصام وسامحني فتعبك..
عصام وهو مقعمز ع كرسيه: ولايهمك..حني هني زملاء عمل ونحتاجوا بعض يعني زي ماساعدتك توا يجيك يوم وتساعديني..
امنه ضحكت بخجل وقالت:ان شاء الله..
هو ابتسم لما شاف ضحكتها جذباته هلبه..
اما هي فكانت لاهيه تفتح فاللاب متاعها ..
عصام:باهي اللي عندك بديل..
امنه وهي تركب فالفلاش :لازم يكون عندي بديل..صح بجودة اللي هداكا الجهاز لكن اهو يأدي الغرض مؤقتا..
عصام :كويس..
رن تليفونها..
سيبت اللي فيدها وخداته شافت المتصل لقتها تماضر..
فتحت الخط وردت وهي تشوف للاب توب:صباح الخير تماضر..
تماضر وهي راكبه دروج الواجهه:صباح النور..وينك امونه وقتي ضيق هلبه راهو..
آمنه:خشي الكليه؟
تماضر وهي تمشي وتشوف حواليها:ايه..
امنه:تمام كملي طول...
وقعدت امنه توصف لتماضر لين تماضر زبطت النعته..
تماضر بإستعجال:هاني جايتك..
صكرت وقعدت تمشي بسرعه..
وهي ماشيه ماكانتش مركزة..
خبطت يد واحد بكتفها طيرتله تليفونه وطاح بعيد شويه..
هي مشت تجري للتليفون طبست خداته..
بعدين ولت للشاب مدتهوله وقالت:اسفه وهي مازال مستعجله..
خداه منها وهو يشوفلها بإبتسامه...
طول هي مشت تجري لوين مافي الأقسام..
والشاب قاعد واقف فمكانه شاد لتليفونه وهو يشوفله بإبتسامه غريبه..
ع جية صاحبه اللي كان يدير فمكالمه..
شبحله وهو مستغرب فوضعيته..
فاروق:جللو..جلاال..
شبحله جلال وقال:اممم..
فاروق:خيرك واقف هكي!؟
جلال ضحك بعدين تنهد وقال:مافي شي..هيا تعال تمشوا للقاعه..
فاروق وهو مازال يشوفله بإستغراب مشي معاه..
وجلال كان يمشي وهو يبتسم ويحرك فالتليفون فيده...
...يتبع...
