في مستشفى الأمراض النفسية(بالهجة الجزائرية)

💟 الحلقة 42 💟

أولا حبيت نشكركم على دعمكم لهشام💪 و نحب نقلكم أنو أنتم أحسن عائلة يستطيع الإنسان الحصول عليها💓💓😘 و أنو أنا نكتب علاجالكم و نحبكم💟💟 ... خلاص خلونا من المشاعر😂😂😂 درك نرجعوا للقصة
.
.
.
دخل جود عند رنيم و كانت لابسة لبسة تاع سبيطار و راقدة ... راح قعد جنبها و عنقها
جود : كان تشوفي شحال توحشتك و توحشت ريحتك و ضحكتك توحشت كلش فيك
رنيم (فتحت عينيها): ممم كلش كلش
جود (شاف فيها و ضحك): وي كلش
رنيم : 😨 شبيه وجهك
جود : شبيه !!
رنيم : فمك مجروح و عندك دائرة زرقة في خدك
جود : وين
رنيم (حطت يدها على خدو): هنا
جود : اااه توجع صح 😁
رنيم : شح 😂
جود : رنيم سمحيلي
رنيم : على وش نسمحلك 😂
جود : وش نسيتي
رنيم : أنا لعشا تاع لبارح نسيتوا
جود : 😂😂
رنيم : ااا تفكرت لبارح ماتعشيتش
جود : هههه مالا راكي جيعانة
رنيم : وي راح نموت من الجوع و يدي توجع و راسي يدور
جود : صحا قوليلي وش نشريلك
رنيم : جيب وش تحب
جود : ما راكي باغية والو
رنيم : وي نحبك أنت 😁
جود : 😂😂 يزي بلا مشاكل راكي مريضة مانيش حاب نديرلك والو
رنيم : 😛😛 خلاص روح
جود : أوكي ني رايح درك يدخلوا الجيش الوطني كامل 😁
رنيم : 😂😂 وي وي
خرج جود و بداو يسقسوا
أمها : وش جود رنيم لباس عليها
جود : وي راهي مليحة
أمها : 😭 الحمدلله الحمدلله
سامي : وين رايح أنت
جود : رايح نجيبلها توكل
رامي : أوكي تقدروا ندخلوا لعندها
جود : وي راهي نايضة أدخلوا و متنساوش عيطوا لأحلام و غالية
رامي : راهم في الطريق جايين
جود : أوكي أنا نروح نجيبلها حاجة توكلها و نجي
دخلوا لعندها سلموا عليها و قعدوا و سامي قاعد جنبها في السرير و معنقها و رامي قاعد في آخر السرير 
رنيم : زهرة وين خليتي بنتك
زهرة : راهي مع فهد و راهو مسلم عليك قال مين تروحي يجي للدار
أم جود : إيه مرحبا بيكم كامل المهم بنيتي رجعت
أم رنيم : ربي يعيشك mais بنتي تجي تفوت عندي حتى سمانة
إبتهال : وعلاه ياك رانا معاها كامل و نتهلاوا فيها
أم رنيم : لا يابنتي مانقدرش نخليها درك
أم جود : خلاص أرواحي عندنا و أبقاي معاها
أم رنيم : لا و باباها واش نديرلوا نهملوا
رنيم : ماما نورمال أنا راني مليحة و زيد راهي عندك زهرة لازم تتهلي فيها
زهرة : 😂😂 وي وي باه دللني مليح ... أنا غدوة نروح لداري
سامي : وي نتهنوا من وجهك 😂😂
زهرة : مليحة هذي يا سي سامي
سامي : وي تهبل 😂 بنتك خرجتني من عقلي و زيد راح تجيبي طفل ثاني
أم سامي : هيا سامي خلي أختك
سامي : سكتت
رنيم : وي درك نشوفوا ولادك كيفاه يجو
أب رنيم : 😂😂 بلا ماتستني راح يجو شواطين كيما هو مين كان صغير
بقاو يڨسروا حتى دخلت أحلام و غالية سلموا عليهم .... غالية حطت كرسي و قعدت مقابلة رامي و يحكوا بالميساجات
رنيم : واش غالية حلبينا شوي 😂 راني كنت راح نموت و راني مريضة في حالة
غالية : 😂😂 اااا والله أنا جيت علاجال ولد أختي باه مايقولش حقرتوا
رنيم : وي راه قال جيتي و ماجبتيش ڨاطوا معاك
غالية : والله قلت مين تروحي لدار نجي نطل و نجيبلك لڨاطوا خفت مايخلونيش ندخل لڨاطو للسبيطار
رنيم : ممم أوكي 😁
أحلام : سامي أوقف خلي نقعد جنب حبيبتي
سامي : لا مانوقفش
أحلام : هيا أوقف
أم سامي : سامي أوقف خلي خطيبتك تقعد جنب صحبتها و زيد أنت راهي باقية معاك أشبع بيها في الدار
أحلام : ربي يخليلي عجوزتي نشالله 😁
ضحكوا كامل ... شويا و دخل الطبيب
الطبيب : تقدروا تسامحوني برا لازم لمريضة ترتاح شوي و زيد راح نفحصها .... خرجوا كامل و دخلت فرملية تمشي فهذاك الجهاز تاع فحص الجنين ... ركباتوا و كان الطبيب راح يفحصها
رنيم : معليش تصبر شوي
الطبيب : وعلاه وش كاين
رنيم : راني باغية راجلي يكون معايا و يشوف البيبي
الطبيب : 😁😁 أوكي
و لهنا دق الباب
الطبيب : تفضل
دخل جود
جود : راني جييت و جبتلك الماكلة
رنيم : جود أرواح شوف الطفل
راح جود جنبها ... عمل الطبيب الدوا لرنيم في كرشها وجود  بقا يشوف في الشاشة و يتبسم
جود : وينوا
الطبيب : أصبر شوي
جود : أوكي .... راني شفتوا 😍
رنيم : هههه شباب كيما أنت
جود :😂😂 وي ماتبدلش عندنا سمانة مني شفناه لدرك ما كبر
الطبيب : madame لبيبي حالتو سيئة
رنيم : اه وعلاه شبيييه
الطبيب : هذا كامل من التوتر و الخلعة و الصوت العالي و قلة الأكل و النوم
رنيم : وي و درك وش راح يصرالو
الطبيب : لا ماتخفيش ... درك نعطيك دوا و لازم ترتاحي هكا باه الطفل مايصرالو والو
جود : أوكي و وقتاه تقدر تخرج
الطبيب : تقدر تخرجها حتى درك المهم لازمها عل الأقل أسبوعين راحة
جود : نشالله
الطبيب : وي و درك قوليلي تحسي بحاجة تضرب في كرشك
رنيم : وي أما ماشي ياسر
الطبيب : تقدري تعطيني رقم
رنيم : وي السمانة هذي بلاك كانت 9 ولا 10 مرات
الطبيب : في سمانة كاملة
رنيم : وي
الطبيب : أوكي درك نكتبلك الدوا و وقت عدد الضربات يزيد هذا معناه أنو الطفل بدا يخرج من الحالة السيئة و بدا يتحسن
رنيم : أوكي
جود : قولي شحال يلحق عدد الضربات عند الطفل العادي
الطبيب : 10 ضربات في 24 ساعة
جود : أوكي
كمل الطبيب و خرج و رنيم بدات توكل .... كملت و خرجوا ... راحو لدار بعد ما قرروا كامل يتلموا عندها غدوة و يفوتوا معاها نهار كامل .... وصلوا و جود هزها طلعها لبيتها لبسها بيجاما رقدة و رقد جنبها .... ناضت و كانت الساعة تقريبا 8 تاع الليل و كان جود معنقها تحسب راح تهرب
رنيم : جود
فتح عينيه
جود : وي وش كاين
رنيم : نووض
جود : شبييك
رنيم : جعت
جود : 😇 رجعنا للجوع
ناض و كان راح يهبط
رنيم : جود شعرك مكشرد ماتهبطش هكا 😂
جود : نورمال ما كاين حتى واحد 😁
هبط يجيب في الماكلة و سمع الحس راح للصالة لقا خالاتو كامل و بناتهم ثم
جود : مسا لخير عليكم
خالاتو : مسا النور
(عندو 3 خالاتو و كل وحدة جابت معاها بنتها)
فاطمة (هذي أم سارة تفكرتوها !؟!): جود لباس عليك ياوليدي مرتك لباس عليها
جود : وي لباس الحمدلله
سامية(خالتو): إيه وينها مرتك أنا لدرك ماشفتها
سعدية(خالتو): يا وليدي ياك ما صرالها والو
جود : وي تكسرت يدها
سعدية : إيه راهي حكاتلنا أمك و عيطتلنا باه نتعرفوا عليها و على عيلتها
جود : وي mais درك ماتقدرش تهبط راهي مريضة
سارة : هذيك راهي غير تدلل ... ما فهمتش كيفاه تزوجتيها
جود : أسكتي أنتي .... إبتهال معليش تجي تحطيلي الماكلة لرنيم
نور (بنت سامية): يااا جود إسمها يهبل باينة بوڨوصة
جود : 😁😁 وي وي تهبل
دعاء (بنت سعدية) : مانيش قادرة نصبر لغدوة باه نشوفها 😁
جود : إيه نعرفك أنتي تموتي الليلة تباتي تتخيلي فيها
سارة : ماتخافيش الليلة نوصفهالك ماتشبه لوالو
جود شاف فيها و ماحبش يحكي على جال خالتو
جود : نور .. دعاء خلي نطلعلها توكل و من بعد روحوا أقعدوا معاها
دعاء : ياااااس 😁 قدرت نقنعوا 😂😂
نور : صحيتي .. صحيتي .... Mais وشبيه شعرك تقول ضربك تريسيتي
سارة : خصك أصلا جود في حالاتوا كامل بوڨوص
حڨروها كامل واحد ماحب يرجعلها
(و كيما تشوفو سارة حتى بنات خلاتها ما يحبوهاش على خاطر مسمامة .... على فكرة نور عمرها 20 و دعاء عمرها 21 و سارة 23 )
المهم راحت إبتهال حطتلوا الماكلة هزها و طلع .... حط الماكلة و بدا يوكل و يوكل فيها على خاطر يدها ليمنى مكسرة mais هي مصيبة كل ما يوكلها تعضلوا يدو
رنيم : وعلاه طولتي
جود : اااا والو لقيت خالاتي لتحت
رنيم : تحكي صح 😁
جود : وي وعلاه
رنيم : عندي شحال راني باغية نتعرف عليهم
جود : ممم مالا جهزي روحك باه تتعرفي على أكبر زوج مصايب أما عاقلين عليك 😂
رنيم : شكون هاذو
جود : نور بنت خالتي سامية و دعاء بنت خالتي سعدية
رنيم : بففف ماتقوليش كيما هاديك السامطة
جود : لا ماشي كيفها mais وعلاه تكرهيها (كان يقلق فيها علابالو تكرهها على خاطر هي تحب جود)
رنيم : على خاطر تحب تدي حاجة ماشي تاعها mais غلطت أنا نخليها تدي كلش غير أنت
جود : يا طفلة حبسي ماتحكيش بالحنانة كيما هكا راكي مريضة مانيش حاب نكمل عليك
رنيم : ممم روح شوف فمك كيفاه ولا ماتقدرش حتى تبوسني
جود : 😁 وي مانقدرش نبوسك mais نقدر ندير حاجة خييير 😉
رنيم : خلاص شبعت
جود : 😂😂 صح
رنيم : وي روح جيب ڨلاس نحطو على وجهك باه ترتاح
جود : ماشي لازم
رنيم : ماتقلقنيش نقلك روح تروح
جود : 😁😁 أوكي
هبط جود لتحت راح للكوزينة و سارة شفاتوا راحت وراه كان فاتح لفريجيدار يحوس على لڨلاس لقاه قفل و كان خارج
سارة : واش جود نسيتينا كامل
جود : سارة لمي روحك أنا و أنتي ماكاين بيناتنا والو و زيد راني قريب نولي أب يعني غير نحيني من بالك
سارة : جود أنا نحبك و من المستحيل نخسر قدام هذيك الطفلة .. نكرها في حياتها تخليك برضايتها و لا بسييف عليها
جود : شوفي سارة إذا تحبيني صح خليني نعيش حياتي نورمال و بعدي علينا
سارة جات راح تحكي راح و خلاها دخل للصالون و لقاهم ملمومين
جود : واش قاسم لخدمة مليحة
قاسم : وي راني بعثتلك الملفات روح شوفهم
جود : أوكي درك نشوفهم
نور : جود و أنا و دعاء
جود : 😂😂 شبييكم
دعاء : مانشوفوش رنيم
جود : اااا أوكي هيا معايا
طلعوا و دخلوا لعندها و كانوا يدعوا تكون ناس ملاح و تاع ڨسرة
جود : رنييم شوفي شكون جبتلك
رنيم : هههه من وين صيدتيهم هاذو لحوتات
جود : هههه من الصالة
راح قعد جنبها و عطاها لڨلاس
رنيم : بنات شبيكم واقفين ... صحا قولولي شكون فيكم نور و شكون دعاء
عرفتهم و بداو يحكوا و هي دير في الثلج لجود
جود : ااا رنيم بشوي وجعتيني
رنيم : شفتوا ولد خالتكم هو ستوت و أنا أكثر 😂😂
نور : هههه وي وي
عطاتلوا لڨلاس حطوا في الدوش و رجع قعد في الكرسي جبد ال pc و بدا يخدم ... و لبنات يحكوا و يڨسروا تعرفوا مليح
رنيم : جود وش راك دير
جود : راني نخدم
رنيم : علابالك هذي ماشي بلاصة تاع خدمة روح أخدم في الصالون
جود : ياااا شفتي بنات خالاتي كرهتيني
رنيم : ياااو أنت لكبدة كامل مانكرهكش mais باه تركز في الخدمة 
جود : مممم معليش راني رايح
خرج جود و لبنات عجبتهم بقاوا غير يحكو معاها
نور : والله أنتي كعبة صح
رنيم : 😁 ربي يعيشك
دعاء : إييه كون غير أنا و خطيبي حياتنا كيما حياتك أنتي و جود 😁
رنيم : نشالله تكون خييير ....
بقات كل وحدة تحكي شوي حتى جبدو على سارة و شبعوا فيها تطياح و حكاتلهم مين قالتلها بلي تحب جود
دعاء : وي وجها صحيح
نور : وي وش يعجبني جود مين يحقرها
دعاء : هههه وي mais هي رخيسة تبقى وراه
نور : رنيم بالاك رانا باقيين سمانة هنا ماتخليهاش تقرب لراجلك خلاص في هذي السمانة
رنيم : وي وي ديجا نروح نجيبوا زيد تلصق فيه هذيك السامطة
نور : وي حتى نحنا نروحوا برك تصبحي بخيير
دعاء : أرقدي و أرتاحي باه غدوة تهبطي تقعدي معانا
رنيم : وي نشالله
وقفت رنيم بسييف كانت ميتت من التعب و خرجوا حتى هوما و راحت للصالون لقاتوا يخدم .... راحت لعندو قعدت على حافة لفوتاي و تكات على ظهروا و عنقاتوا
جود : 😇 تصدقي توحشت مين تعنقيني و نشم ريحتك
رنيم : مممم صح
جود : وي صح
رنيم : مالا أنا راني نعسانة و ولدك ماحبش يرقد حتى تجي أنت
جود : 😁😁 ني جاي
قفل ل pc و هزها و خرج وصلها للبيت و حطها في سرير
جود : أحمدي ربي على خاطر حاس بيك تعبانة
رنيم : 😂😂 لحمد لله
جود : سخانة .... أنا نروح ندوش خير مانوكلك ياطفلة
رنيم : جود وعلاه راك تقلي طفلة
جود : إيه على خاطر طفلة و صغيرة أنتي بنوتي مافهمتش كيفاه راح تجيبي بيبي و أنتي بيبي
رنيم : 😇 ها روح دوش
خطف بوسة خفيفة و راح لدوش دوش و لبس شورت و مالبسش تريكو ... خرج و شعرو مبلول و كان ينشف فيه
جود : ما رقدتيش
رنيم : لا
جود : وعلاه
رنيم : كنت ندفيلك في لفراش😁 ... هيا أرواح
جود راح لعندها عنقاتوا و هو بقا يفوت في يدو على شعرها .... رنيم هزت راسها و شافت فيه
رنيم : جود غمض عينيك
جود : وعلاه
رنيم : غمض برك راح نقلك حاجة
جود (غمض عينيه): إيه وش ...
ماكملش هدرتوا حتى حس شفافها فوق شفافو نحا يديه لقاها مغمضة عينيها ... تبسم و حط يدو ورا راسها و باسها حتى حس نفسها ضاق عاد بعدوا على بعض
رنيم : اااا جود فمك رجع تجرح
جود : أحلى جرح في حياتي هذا 😁
رنيم : ممم بركاك من لكذب و روح أغسل الجرح
راح و رجع لقاها راقدة .... عنقها و رقد
.
.
.
يتبع😂😂
هذا لبارت هدية لكل واحد يحبني و يدعمني و لكل واحد دعم هشام ... نحبكم يا أحلى جيش قراء في العالم 😘😘💓 يا أحلى عائلة ربي يخليكم و ربي يقدرني على تقديم الأفضل 😁 وش رايكم و كاش إنتقادات و لا حاجة راكم حابين تكون في لكرو !؟!