زواج في زمن الكورونا

البارت الخامس

#زواج في زمن الكورونا
سوزان المندلاوي
الحلقة 5
خرب بيومج زينبة
صرخت بكل صوتي اااااخ يابه تفلشت..
زينب فوك راسي يمه حياوي..حبيبي شبيك
ولج رجلي يابويه يايابه
ماعرف شلون حتى سعدون ابو الفرن وكف فوك راسي حاتم وامه كلها هااااا يمعود خيرك
كوموني كوة استندت ع حاتم اريد اثبت رجلي بالكاع ماكدر..يابويه وجع وجع قوي العظم يون
من يم الساق الم قوي..
اخذوني للهول.. نوموني..
.. يمه اسم الرحمن شجاك ياحياوي عرس الاكشر صار وتخزر بعيونها..
حاتم قاطع الكلام كال امشي انودي لمجبرجي هذا انكسر..
ام حاتم /ضربت ع صدرها عززة وصخام بس لا الرجال حوضه انكسر.. اي اعرف حوضة وهل ولد طااح حظه وهل كعدة
.
عاط بيها حاتم شبيج يمه صدك جذب مابي شي رض بسيط
اباوع يمنة يسرى ماكو زينبة.. مسكينه هالبنيه مشافت يوم حلو وياي..
طلع حاتم كال راح اشوف منو يعرف لرجلك واذا ماكو نروح للطوارئ بس خاف هم يجلبون بيك
بقيت مدد...
كل شويه امد راسي وينها زوبه..
ام حاتم.. امممم زوبه وتهز باديها بعدك يمه توك ازوجت
نصت حسها وتقربت مني شوف اني اعرف صايج وتعبان بس اني مثل امك وقلب الام دليلها هاي كصتها فكر والي مثلها تكرط زلم..
جفلت... شتكرط..
عوجت بحلكها.. ودنجت قريب تلفيك جوة التراب.
كتلها ي بس لا هم شغلولج فلم جايسون..
شهكت..
طب حاتم وكال يمه سوي درب اجه المجبرجي..
كامت ام حاتم وطب..
السلام عليكم..
اباوع علية رجال سمين.. دعبل.. ولابس دشداشة.. رصاصي..
تقرب مني..
بصوت خشن الله يساعدك.. سلامتك وين الالم..
كتله هنا ماكدر اضغط عليها..
لزمني صرخت اخ ع كيف..
اندار ع حاتم كله هذا من كسر يصرخ وتكولي عريس
وكام يضحك..
خزرت حاتم
حاتم كال لا سبع يحيى
كال لازم اجبرة بس الاول ارجع الكسر..

كتله شنو ترجعه اوكف احاجيك..
حاتم ودوني للطوارئ احسن..
بين ماداحجي لزم رجلي.. جر العظمه بس شنو حسيت روحي طلعت من مكانها ورجعت..
لا بيه اعيط ولا بيه اسكت...
احس راسي صار نار من الالم جبرهاوكمل..
كال عيني راحه ومتضغط عليها ابد وريح جسمك لا عريس ولا عتريس راحه زين..
ويضحك.. هسة الي يعرس الا هسة بهل وكت الاغبر..
كتله اي فهمت..
كال يعني ارتاح
انداريت ع حاتم.. كام يضحك هااا اي شكرا عيني
وحاول يجرة يطلعه
صدك عرس المصخم.. ادري بس بقى بالشرقيه اطلع..

وع حظي المصخم نمت بالهول مابيه اتحرك..
وهذا حلمي.. وزواجي
من مرض لكورونا لكسر
شدعي عليج ياكورونا سبيتي العالم..
زينب مدري فشلانة مدري خجلانه تجي شويه وتروح..
غفيت محسيت ع روحي.. من الوجع والتعب
حسيت وجهه الفجر عطشان..
كمت اتوجيت.. وحاولت اكوم
امشي واتوجى وصلت للباب فتحتها..
اجاني هوى عذب اخذت نفس
كتله ربي عديها الي وع امه محمد وخلصنا من هل وباء
وكون اعرس هسة انعل ابو كورونا الي يزرع غير يحصد..
شو ما حصدت شي.. عفيه شعب من ضيم لضيم ماواحد بينا ارتاح
هم نرتاح بيوم.. ضحكت كلت تعدي عدينا الامر
حاولت اطلع بعد..
بس الالم زاد..
رجعت وكفت ومنتجي ع الباب اشوف ضوة الشمس ديطلع.
قبل كورونا هيج وكت.. اسمع صوت تركع البوب الزلم تروح تصلي..
وينترس الدرب ريحه خبز حار.... وتبدي الناس تطلع لشغلها..
هسة.. جنها كبور.. واحدنا يخاف يسلم ع اخو..
حسيت احد يمي.. جفلت..

انداريت زينبة..
حياوي شبيك بس لا بيك شي
جاوبتها لا لا بس اختنكت.. ورجلي تون عليه

تقربت مني..سودة علية حبيبي بيه ولا ببك
كتلها لا اسم الله عليج
كالت اني مو فكر..
ولا اني السبب..
ابتسمت الها ولج شعليج بهل الحجي وجريتها بحظني حضنتها..
زينبة كالت حياوي لا احد يجي..ولك مو عظمك يون
كتلها ونه عظم ولا ونه روح اليوم اليوم عساه ما انام بردهه الكسور
ضحكت لا بجي احد
واذا اجوي حلالي..تحاول تبتعد مو هنا ورجلك
كتلها مابيه شي لا تخافين..
دتعالي.. وجريتها الي تحسست نبضها دكاته سريعه
حضنتها وقربت شفتي ع شفتها..

اسسمع احد يكول..
اعوذ بالله
فزيت رجعت نفسي ام حاتم
تهز باديها امممممممم
هم كرونا وهم مكسور وهم فاتج باب وكاعد يتمعشك
دخيلك ربي...وتريد متكلبها بينا

كملي بعدي

شمس السعدي