السلام عليكم
اليوم وصلنه التحدينا الأخير ويه قصة
#زواج_في_زمن_الكورونا
كان ويانه كاتبات مبدعات
تونسنه وظحكنه
كانت فقره حلوه استمتعنه بيه واشكر جميع الكاتبات الي شاركن بلتحدي
وطبعا الكاتبه الي مشاركت ان شاء الله راح تشارك ويانه بلتحدي الجاي الي راح نعلن عنه بليل
طبعا هيه راح تكون مفاجئه او مفاجئتين
ان شاء الله راح تستمتعون ويانه
وطبعا الي تسأل ليش الكاتبه زينب ماجد مانزلت بارت
والله ما اعرف هيه گالت راح اشترك بس يمكن عده ضروف منعته من الكتابه
بس أن شاء الله راح تشارك بلتحدي الجاي
وهسه اخليكم ويه البارت الأخير من
#زواج_في_زمن_الكورونا
#البارت الاخير
بقلم نسرين الجبوري
اباوع على زينب كعدت تبجي...
اشبيج تبجين...
جنت فرحانه عبالي حامل و كلت راح نصير أب و أم...
كولي الحمدلله نلحك تحبلين و نصير أب و أم.... المهم انتي زينه و صحتج زينه...
غمزتلهه و شاورتهه... كومي نرجع للبيت و حضري نفسج الليله اخليج تصيرين حامل...
خليتهه ضحكت باوعت عليه عمتي ام زينب و ردت...
يااا اشبيكم مخابيل ساعه تبجون ساعه تضحكون ضحكونه وياكم...
ماكو شي عمه سلامتج... وصلنه عمتي للبيت و رجعنه البيتنه...
طبت زينب تسبح و جان يجي بخشمي ريحة هذا الشامبو الي يكولون عليه بالقصص مال فصليات...
كمت ذبيت هدومي و بقيت بس بالشورت انتظرتهه طلعت و لزمتهه...
هاي اشبيك حبيبي جفلتني...
ولج تعالي مو تردين طفل...
شتريد تسوي...
غمزتلهه و كتلهه على اساس متدرين شسوي أسوي شمبق لمبق... و بعد جهد و تعب كتلهه مبروك حياتي اعتبري نفسج حامل...
ضحكت بصوت...
خرب ابليسك حياوي...
أش ولج فضحتينه صوتج...
اوي و منو يسمع...
ولج هم حظر و هم ناس نايمه و صوت الليل مسموع...
اكولك حبيبي باجر وديني الاهلي ساعه و ارجع...
ولج وين ترحين اكعدي و سكتي بس الله يجفينه شر هل فايروس...
حباب والله ساعه بس....
الله كريم خلي نام هسه و الصباح رباح...
ثاني يوم كعدنه تريكنه و ديتهه الاهلهه... ولج زينب شنو بيت اهلج احتركوا...
لا يمه اسم الله...
دشوفي الدخان... دخلنه للبيت و منشوف غير بس الدخان و عمتي كاعده تبخر...
يمه هاي اشدسوين دتبخرين البيت لو المنطقه...
ولج دا ابخر البيت بالحرمل من ورا هذا كرونه مدري لاده حتى الي يدك الباب صرت اباوع من الزفر و ما افتح الباب...
هاي اشبيج يمه العمر بيد الله...
اي و الحذر هم واجب يبعد امج هذا فايروس مو لعب جعاب و انتي شعندج جايه ماكعدتي بيتج و سكتي مال طلعه و خواره هسه...
يمه غير اجيت اشوفكم...
ما نريد عود من يخلص الفايروس تعالي...
امشي زينب نرجع للبيت اذا ما متنه من ورا الفايروس راح نختنك و نموت من ورا حرمل عمتي...
رجعنه للبيت و مرت ايام و هل علينه رمضان شهر و الطاعات و دعيت الله يزيل هاي الغمه عن هاي الامه و يزيل هل وباء عن العالم أجمع...
مرت الايام و اليوم أخر يوم رمضان و انطوها عاجل بالتلفزيون انتهى فايروس كورونا من الوجود و باجر يرفع الحظر و ترجع الحياه طبيعيه مثل قبل و احسن و تقام صلاة العيد بالجوامع...
فرحتي بهل خبر سجدت لله سجدت شكر...
مصباح العيد رحت صليت بالجامع و جبت الكاهي و الكيمر لزينب وينج زينب اشون كيمر جبتلج...
ها حبيبي صباح الخير و كل عام وانت بخير...
و انتي بالف خير يا عمري... يللا حضريلنه الريوك...
حبيبي أريد اكولج شي...
كولي...
اني حامل...
زينب هم ذيج المره...
لا والله هل مره متاكده...
الله يبشرج بالخير... و أخيراً ضحكتلنه الحياه الحمدلله....
النهايه❤ انتظرونا في رمضان بقصة ثانيه مشتركه بين كاتبات العراق...
