#زواج_في_زمن_الكورونا
الحلقة 3
بقلمي
#همسات_الليل_ام آيه العبدلي
بعد العشا كعدت اباوع عالتلفزيون وهي كاعده يمي تباوع ويايه فلم عمر وسلمى الجزء الاول مليان رومانسية ، ونويت هالليلة افض الشغلة عيب من أمها ..
مديت ايدي على جتفها وسحبتها لحظني
حسيت بيها خجلت من نظراتي ورجفة صوتي ...
بخجل بعدت شعرها ودارت وجهها ....
درت وجهها بايدي وكتلها :
شنو هالحسن ..
ابتسمت ابتسامتها الي ثارت كل رغباتي وسقطت أسيرة للمساتي ، وصدتها بشباكي وصارت مرتي ...
رفعت وجها بخجل باوعتلي كتلها :
مبروك .
يحيى ..يحيى ..يحى
ها ها زنوبة
كوم نام بفراشك أنكسرت ركبتك على القنفة
كمت افرك بعيوني واحجي ويه نفسي ، هاي شنو يا الله ؟ شو بعدنة على نفس الكعدة وبعده فلم عمر وسلمى مو خلصان ..
اخ يالحظ العاثر هذا جان كله حلم ..
بس والله احلى حلم والا اطبقه على ارض الواقع ..
زنوبتي ..
نعم حياوي ..
تعاي ...
شنو ...
تعاي دكلج ...
شبيك ترة والله اخجل ...
فديت الخجلان ....
شلون راح نكضي الليل كله تعاي وانتي تتدلعين ، ولا يهمج اني اجيج ..
كمت وكلي طاقة وفيض وشوق ولهفة واباوع لخدودها الموردة المفضوحة بخجلها ..
تقربت منها وهمست بأذنها احبج ...
وماحسيت الا باب المشتمل انهجم تكول طبول الحرب قرعت ، وصوت الاسعاف ...
لبست كلابيتي وهي ركضت حطت شال والرداء على جتفها ..
طلعت اريد اوصل الباب بعد ما اكدر من طول المسافه الحسيتها ولا عبالك طرمتي كلها شبر ونص ...
فتحت الباب وشفت منظر مرعب ...
الاسعاف والدورية والناس ملتمة بكد الدود ، شبسرعة متجمعوا ..فجأة اجاني صوت أجش..
صيحلنه يحيى ...
تفضل أني يحي ..
بالعجل ألبس كمامة لو لفلف روحك بالشماغ وتعال ..
ليش اخي شكو شصاير ..
عيني اتصلتوا علينة وبلغتونه اكو حالة كورونا والمصاب هو انته ..
ياكورونا رحمة لوالديك ، اكيد مشتبهين ...
اخويه لتجادل وتماطل انت رحمة لوالديك ، ترى هالافلام بزعانين منها ، يوميه ناس تتصل وتبلغنا ومن نوصل لبيتهم يكومون يجرون بنفسهم ..
وتالي من ناخذهم يطلعون حاملين للفايروس ...
يابة كلامك على راسي بس اني كلشي مبية ، صخنت يومين من الحصوة والحمد لله بالدوه والاعشاب تحسنت ...
ديلة استلم الاخ مصخن ويكول كلشي مبية ..
دتفضل ويانا ياعيني بالتي هي احسن ، احسن مناخذك بالقوى ...
يحيى...عمي واكف بصفي وعيونه حايرة وتالي كلي ..
روح وليدي شوف تاليها وان شاء الله مبيك شي وتطلع سلامات ...
يحيى ..صار عمي
طبيت وجار بذيالي خيبتي والقهر ، شنو هالحظ النحس مالتي ، راسا دكت براسي سالفة ام زينب من تكول لبنتها مربوط ..
زينب ...خير حياوي شكو وجهك صاير ليمونة ..
يحيى ..والله يبنت الناس مااعرف شكولج حظج مدري حظي العاثر ..
ما ادري ياشريف مبلغ عليه بيه كورونا وجاية المفرزة الطبية تاخذني للحجر ...
زينب ...لطمت على وجهي ، على فينة حظي وبجيت
يحيى ...زنوبة اوكفي بظهري وسنديني حبيبة ...
زينب ...الله كريم ابن عمتي ...
يحيى ...لبست كمامتي وشلت محفظتي ...
زنوبة لتطلعين من البيت شوية وارجع ، راح اوصي عمي وغصون بنت عمي تبقى يمج بين مااجي ..
دنكت عليها وبستها من راسها وطلعت ..
عمي واكف بالباب وصيته على مرتي ياحسرتي وهي لسم مو مرتي وطلعت ..
اباوع الناس كلها تجنبني واليكول عبالك صدك بي كورونا حتى خلوني اشك بروحي ..
صعدت بالسيارة مال الاسعاف وحدي ليورة واخذوني كبل للمستشفى ..
وصلت واستلموني يرشرشوني مدري بشنو والكل مستنفر ، كرهت نفسي بساعتها ولعنت حظي الاغبر الي من يومه طايح حظ ومطيحني وياا..
فوتوني بغرفة وحدي بيها سرير واحد وعليه غطا ، بقيت نص ساعة صافن على الحياطين من الوحدة والهدوء بس صوت مي الحنفية ينقط مال حمام الغرفة
حسيت روحي متضايق ورحت للحمام وبالعجل لعبت نفسي وطلعت من القرف البي ..
رجعت على كعدتي وصافن ..
ياترى منو بلغ علية ومنو من مصلحته يأذيني
والله مالي أذية على احد
بقيت استرجع ذاكرتي...
كلت معقولة ابو السيطرة بلغ عليه هو يعرف سجاد ابن عمي ؟
لا لا مو معقولة البارحة شفته يم ابو الصمون واتحمدلي بالسلامه وكتله رمل وحصو ومن هالسوالف ..
اوف ياربي أوف ...
رديت عصرت دماغي وبالي راح لبعيد كلش ، معقولة ام زينب خافت على بنتها وعبالها اني مو رجال وهيج سوت حتى اطلك بنتها ...
سألت روحي وجاوبتها ، لا مو معقولة ، مترضه لبنتها تطلك با أول اسبوع من زواجها، شتكول للعالم ، اكيد محد يصدكها وتوكع العيبة عليهم بنتها...
مر وكت مو قليل وطب علية المضمد .
الله يساعدك...
هلا بيك ، يابة متكولولي شنو القضية ...
لتخاف عضيد اجراءات روتينيه وان شاء الله ماكو شي...
تسلم رحم الله والديك ...
مديت ايدي وسحب دم ، وضربني ابرة وطلع ..
مرت فترة قليله وبدت عيوني تسورب وراها محسيت بروحي الا مجضوع على السرير ونايم..
زينب ...طلع حياوي وكعدت بالكاع ابجي على حظي المنحوس ، اندكت الباب وصحت ..
منو..
اني غصون ..
اي عيني جاية ..
فتحت الباب وطبت غصون تصير بنت عمه ليحيى
طويلة وسمرة تكبر حياوي بسنة ..
دائما احس عيونها بيها لؤم واحسها متحبني من ايام خطوبتي ...
غصون...ابوية دزني ابقى يمج ، خطية سلامته عريس ومتهنه
زينب ..الحمد لله بس يطلع سالم كلشي ما أريد
زينب .. كالتلي هالكلمتين وراها عم الهدوء ، اني ساكته من قهري وصدمتي ..
كلما ارفع راسي اشوفها تباوعلي بنظرات حقد تخوف وبس تاكل با اظافرها ..
زينب...وبهالصمت كلة اجتي كلمة بأذاني بصوتها المليان رجفة...
أخذج ؟؟؟؟
زينب ...مستغربة سؤالها وجاوبتها
وين اخذني ؟؟؟
غصون ...أخذج يعني اتزوجتوا
زينب ...بلعت ريك وجاوبتها
!!!!!!!
#يتبع..
شكرا على هذه الفقرة اللطيفة واتمنى اكون وفيت با اعطاء الفقرة حقها ...
ختاما اتحدى الكاتبة اماسي الليل مريم يوسف ان تكمل تسلسل احداث القصة ...
Athraa Ali،ام حنين العاني انار محمد رحيق الورود Chra Kirkuki غدير وسام نازك الحمراني
#تحياتي
#ام ايه العبدلي
