رجل كالنار

البارت السادس

دخل مهاب ومعه عدد من أصدقائه إلى غرفة إياد الذي ابتسم بيعادة واشتياق وهو يراهم يندفعون إليه بفرح..

صرخ عز وهو يحتضنه: وحشتنا يا حيوان كده تخوفنا عليك...

ابتسمت إحدى الفتيات: بجد يا إياد الكلية مش حلوة من غيرك...

ضحك إياد بفخر: طبعاً طبعاً مفيش كلام...هو العميد فين ليه مجبتهوش معاكوا...؟

عز: يابني اتوكس قال العميد بذات نفسه هيجيلك....

إياد: والله طب بتراهن إن هيجيلي ويسلم عليا ويقولي وحشتني يا إيادوو...

ضحك مهاب هاتفاً: هو من ناحية وحشته ف وحشته جداً قاعد بمكتبه عمال يهش الدبان من غيرك ملهوش شغل...

هتفت صديقته سمر: هترجع ع الدوام إيمتى يا إياد...؟؟

مط شفتيه: واللهي يابنتي مش عارف...أما يؤمر الكبير الأول...

مهاب بضحك: يبقى مش هترجع خالص...

دخلت في تلك اللحظة لينا...وهي ترتدي اللباس الطبي...ابتسمت ابتسامة متوسعة وألقت عليهم السلام...واقتربت من إياد تهمس بصوت ناعم: موعد الدوا بتاعك إياد بيه...

نظر مهاب لإياد يرفع حاجبيه بخبث ليضربه إياد بكتفه هاتفاً: دي لينا الممرضة اللي بعتهالي الدكتور...

ليهز مهاب رأسه بسخرية: أهممم أوك أوك ممرضة....أهلا يا لينا إزيك أنا مهاب....؟؟

ابتسمت بخفوت: الحمدالله أهلاً بيك...

قربت من إياد صحن الطعام الذي أحضرته معها لتقترب أكثر وتجلس بجانبه....رفعت الملعقة هامسة: يلا إياد بيه هساعدك...

ليرتبك إياد من فعلتها خاصة مع عيون أصدقائه التي تعلقت بهم بنظرات خبيثة وابتسامات متوارية...همس بتلعثم: ل لا معليش باكل لوحدي مش عايز أتعبك....

ابتسمت ابتسامة جميلة هامسة: ولا تعبك ولا حاجة حضرتك ده شغلي...

إياد: بس أنا قادر آكل لوحدي...

رمقته بنظرات متأملة لتهمس في النهاية: براحتك...اتفضل هستناك تخلص الطبق ده علشان أديك الدوا وقيس ضغطك...

مد يديه يأخذ طبق الطعام لتمده له وتتعمد ملامسة يديه...أخذه سريعاً بتوتر تحت نظرات أصدقائه التي زادته توتراً....

بقيت معه حتى أعطته أدويته ودخلت في أحاديث جانبية مع أصدقائه...وبعد خروجها التفت مهاب لإياد هاتفاٱ: قولتلي الممرضة...؟؟

إياد بعبوس: أه والله ممرضة وملهاش كام ساعة بس واصلة...

عز بضحك ودهشة: أوبااا هي الصنارة غرزت ولا إيه بالسرعة دي...؟؟

سمر بضحك: ده باينه حب من أول نظرة...

إياد بغيظ: بقولك إيه يا خفيف أنت وهو وهي بلاش تستفزوني لحسن أوريكوا الوش التاني...بقالي زماان مفشتش غلي بحد...