ខ្ញុំដើរចុះឡើង មិនស្រណុកក្នុងចិត្ត។ ចម្ងល់ជាច្រើនត្របាញ់រត់ពេញ ខួរក្បាលរបស់ខ្ញុំមិនឈប់។
«គេជាអ្នកណា? បើគេនោះ មិនមែនជាម៉ីរូបពិត តើគេជាអ្នកណា? ហេតុអ្វីគេមានមុខមាត់ដូចគ្នាបេះបិតយ៉ាងនេះ? មានតែគេជាកូនភ្លោះ? កូនភ្លោះ? មិនអាចទេ តាំងពីធំដឹងក្ដីមកខ្ញុំមិនដែលដឹងថា មីងសំអាងមានកូនភ្លោះនោះទេ...ហឺយ! ឈឺក្បាលណាស់! »
ខ្ញុំប្រាស់ខ្លួនទៅលើគ្រែ ព្រោះតែមិនអាចរកចម្លើយពីអ្វីដែល ខ្ញុំមិនអាចដោះស្រាយចេញ។
«មិនបានទេ ខ្ញុំត្រូវទៅសួរម៉ែទើបបាន...ក្រែងលគាត់ដឹងអ្វីខ្លះ!»
ខ្ញុំរត់តាំងៗ មកសួរម៉ែ ដែលកំពុងបង្រៀនប្អូនខ្ញុំបត់ផ្កាឈូក ព្រោះស្អែកនេះជាថ្ងៃសិល។ ខ្ញុំមកអង្គុយគៀកនឹងគាត់់។
«ម៉ែ...មានរឿងមួយខ្ញុំចង់សួរម៉ែ»
«មានរឿងអីនិយាយមោ!»
«ម៉ែ...ម៉ែស្គាល់មីងសំអាងយូរប៉ុណ្ណាហើយ? ហើយគាត់ជាអ្នកភូមិណាដែរ?»
ម៉ែខ្ញុំដាក់ផ្កាឈូកចុះងាកមកចាប់អារម្មណ៍ហ្នឹងខ្ញុំ។
«កូនកើតអីហ្នឹង ម៉េចមកសួរម៉ែពីអ្នកសំអាងទៅវិញ? កូននេះធ្វើអីប្លែកៗ...កូនមានបញ្ហាអី?»
«មែនហ្នឹងចែ....ចែឯងកើតអី? ខ្ញុំឃើញចែមួយរយៈនេះចូលចិត្តនិយាយម្នាក់ឯងណាស់ ឬមួយចែត្រូវស្នេហ៍នាយប៉ុយ!» ខ្ញុំលោមកចាប់ថ្ពាល់ប្អូនស្រី
«គ្មានទេ....អូនឯងកុំតែនិយាយ! បងគ្មានទៅចាប់អារម្មណ៍អ្វីជាមួយនាយប៉ុយស្អីនោះទេ។ ណ្ហើយ! ម៉ែប្រញាប់ប្រាប់ខ្ញុំមកថា មីងសំអាងមានប្រវត្តិអ្វីខ្លះ?»
ម្ដាយរបស់ខ្ញុំសម្លក់មុខខ្ញុំបន្តិច រួចក៏រៀបរាប់ដំណើររឿងរបស់មីងសំអាងមកកាន់ខ្ញុំ។
«អ្នកអាង មិនមែនជាអ្នកស្រុកយើងនេះផ្ទាល់នោះទេ គាត់ជាអ្នកចំណូលថ្មី! គាត់បានមកនៅក្នុងភូមិនេះ ព្រោះមានសាច់ញាតិសាច់ឆ្ងាយមានដីនៅក្នុងភូមិយើង ក៏ឱ្យអ្នកសំអាងមកនៅទៅ»
«ចុះប្ដីគាត់ ម៉ែមានដែលឃើញឬអត់?» ខ្ញុំប្រញាប់សួរបន្ថែម
«មិនដែលទេ កាលណោះមានតែគាត់ និង កូនប្រុសគឺនាយម៉ី គេដូចជាមានអាយុទើបតែ១ខួបប៉ុណ្ណោះ ហើយគ្រួសារអ្នកអាងពុំមានអ្នកណាផ្សេងទៀតនោះទេ! កូនសួររកប្រវត្តិរបស់គ្រួសារអ្នកអាងធ្វើស្អី?»
YOU ARE READING
ឃាតកម្មផ្ដើមស្នេហ៍ (Completed)
Romanceរឿងហេតុដែលគ្មានអ្នកណាស្មានដល់ អំពីការបាត់ខ្លួនរបស់ម៉ី។ វិញ្ញាណវិលវល់ព្រោះតែមិនអស់អាល័យនិងពាក្យសន្យាណាត់ជួបពេលរាត្រីជាមួយមនុស្សដែលខកលួនស្រលាញ់។ ណារីស្ទើរទទួលយកមិនបាននៅដំណឹងដ៏ភ្ញាក់ផ្អើល មនុស្សដែលនាងជួបមិនមែនជាគេ តើគេជាអ្នកណា? ចុះបុរសដែលនាងណាត់ជួបតើគេ...
