ندى القلب

الفصل السادس

الفصل السادس

** في المستشفى

انهى مروره الصباحي على المرضى بوجه عابس وغاضب.. حتى بعض الممرضات قد نالو نصيبهم من عصبيته الشديدة وغضبه.. دلف الى مكتبه فتبعه هشام متأففا و مصدوما من تصرفاته

هشام : ممكن اعرف مالك وايه اللى مخليك جاى شايط كده ع الصبح؟ ماشي طايح ف العيانين والتمريض وكلو.. بقا واحدة م الممرضات جاية تعزمك على فرحها تقوم تكسفها وتقولها مبحبش الافراح ومش فاضي، والتانية الي بتطمن على حالة ابوها العيان تشتمها وتقولها ماانتى اللى غبية ومش عارفة تظبطيله الضغط... في ايه انت مكنتش كده وعمرك ماكسرت بخاطر حد بالطريقة دي؟

انحنى بسام براسه لأسفل بحزن ووضع وجهه بين كفيه قائلا :
امي عاوزه تجوزني.....
هشام يضحك ساخرا : وايه المشكلة ف كده مهى كل شوية تجبلك عروسة وانت بتبوظ الجوازة والليلة بتعدى.. مش شايف يعنى ان الحكاية مستاهلة كل اللي انت عاملة ده.. ياسيدي روح واعمل زي مابتعمل كل مرة وفكك من وجع الدماغ ده..

بسام : ما انت لو تعرف مين العروسة مش هتقول كده..
هشام : مين ياسيدي. ست الحسن والجمال المرة دي

بسام وهو يرفع وجهه وينظر بحزن : ندى بنت خالي..

هشام بصدمة : ايه؟.....

بسام : شوفت بقا اللي انا فيه..
ثم رجع بظهره للخلف واخرج تنهيدة كبيرة اخرج معها الكثير من الاوجاع التي تقطن روحه

آآآآااااااه.. من وقت اللي حصل زمان.وكسر قلبي وروحي.. قررت اقفل قلبي للأبد.. . وبعد ما بدأت اخرج م الحالة الزفت اللي كنت فيها.. . وامي كل شوية تزن عليا ف موضوع الجواز.. في الاول كنت برفض واتخانق معاها... بس لما بدات تتعب وضغطها يعلا بقيت اوافق عشان مزعلهاش وفنفس الوقت ارتاح من إلحاحها عليا... لدرجة ان بقيت احسسها ان انا ملهوف ع الموضوع اكتر منها عشان تصدقني.. وطبعا بعد مقابلة او ٢ بالكتير للعروسة واهلها بطلع فيهم القطط الفاطسة عشان ابوظ الموضوع.. دنا اوقات كنت بوصلها لمرحلة ان هى اللي تفركش الحكاية بنفسها... بس المرة دي مش هعرف اعمل كده المرة دي جايبالي واحدة مش هعرف اطلع فيها عيوب. لان مفهاش عيوب اصلا... ده كفاية انها بنت خالي اللي مربيني وف مقام ابويا الله يرحمه...

هشام وهو يربت على ظهره : طب ماتوافق وحاول تنسا اللي فات..وعيش حياتك بصراحة البنت متتعيبش ده كفاية الطيبة والبراءة اللي على وشها..

بسام : مينفعش.... اكيد هجرحها واكسرها حتى لو من غير قصد.. وهى متستاهلش كده... ندى دى اطيب وارق مخلوق ف الكون... وبعدين انا شايفها اختي اللي متربين سوا مش هعرف اشوفها زوجة اصلا...