كن لي حياة⁦❤️⁩🔞

3

بارت 3
فتحت عيوني الصبح لحظات وانتبهت لمكاني گلبي يدك حييل درت راسي وشفته نايم بصفي بالبنطرون ونازع التشيرت ونايم على بطنه وايده على خصري والاضرب شفته اطخ شفتي تخيلو فتحت عيني عل منضر حلكه وشفايفه اللي نازلة عليها سواريه وعيونه ورموشه عزززه  ...

كمت على كيفي اباوع للغرفه حلوة يتوسط الحايط المطل على الشارع شباك طويل مظلل. والسرير بوسطها. الغرفه بدون باب. هيج مفتوحه على درج ينزل عالصاله وبصف الصاله مطبخ،من الصاله باب مفتوح ع الطارمة صغير بس تصميمه حلو خاصه الغرفه شلون مفتوحه عالدرج وناصيه حييل مصممه بس للنوم وبرة استقبال صغير وكراج وطارمة،

رحت للمطبخ ادور شي اكله مالكيت واني جوعانه اتذكرت النساتل والكيك مال البارحه رجعت للغرفه احاول مااطلع صوت اخذتهن وطلعت امشي على كيف خطيه نايم لايكعد اكلت بس لعبت نفسي ماكو مكان اكعد بيه الكاع ترااب على حيلها ماتحملت اكلتهن وكمت عالبيت ردت انظف ماكو ادوات تنظيف عاد كنست الصاله ومسحتها بوصله لحدما اشوف وين ادوات التنظيف وابدي انظف بالبيت،

بقيت كاعدة اتصفن ياترى شصار هسة اموت واعرف اخبار الميتم وكل العايشين هناك شصار بيهم اشتاقلهم حييل مو بسهولة انساهم قضيت عمر وياهم نزلت دموعي اتذكر ماما نهاد مدااصدك الصار بيها، ليش ماما ليييش؟ مشتاقتلج هواية ماريد كليه بس ارجعي، رجعت للخنگه مو بيدي من اتمنى الموت،

شغلت التلفزيون احاول اقضي وقت بيه وتمددت على القنفه عيوني تباوع وعقلي بغير مكان عقلي يفكر شحيصير وبعدين؟ اني اشو بسرعه صرت متزوجه! ماشفت اي شي من مراسم الزواج لابدله ولا حفله ولااهل؟ گلبي وجعني من خوفي منه ومن الزواج هذا اني مااعرف عن زوجي شي ومدري ليش مخوفني سكوته، من يباوعلي نظرته تفزز!! شلون بيه شلووون! نمت واني بين افكاري ...

حسيت ابهام ايده يمشي على شفافي كمزت بسرعه خايفه عقد حواجبه يباوعلي وگال:اني اني شبيج كمزتي، شنو من شوكت كاعده؟
..ا گعدت من زمان تقريبا ب8،احجي مدنكة ومرتبكة
..شاف غلاف النساتل والكيك گال:تريكتي بهذول؟
..ااي
..خلص فد شويه اطلع اتسوك للبيت
..ردت اوصي هواي اشياء محتاجه للبيت والي بس استحيت ضليت ساكته وهو حس بيه گال تردين شي للبيت او الج انه مااعرف شي تره حيا الله اجيب مسواك وهذا هو

..اي محتاجه ادوات تنظيف وكم شغله
..ماشي كتبيلي ورقه لبين ما اسبح واطلع
..كمزت اكتب وافتر وكل شوي اتذكر شغله وارجع للورقه، طلع هو واخذ الورقه يباوع ويقره بيها ويتسأل شنو هذا ؟ والمن يستخدمونه؟ حتى جنت موصيته عطورات وشامبو وغراض للشهرية حسبت حسابها، هو قره وكال شنو هاي ؟ سكتت ميته من المستحه مااعرف شجاوب بودي امدده اشبعه بوكسات يمعود دخلصني واسكت، من احراجي گلتله :ماكو شي خلص لاتجيب

هو سكت من شافني هيج وطلع واني رجعت للتلفزيون
تأخر يلا رجع محمل بالعلاليگ اتلگيته اشيل وياه گال: هذا غده جاهز لان ماراح تلحكين تطبخين عوفي كل شي وحظري الغده جوعان
..وهذي جانت اول خدمة يطلبها مني حسيت بيها صرت مسؤله وام بيت وكل شي بيدي وهو فعلا كذلك شگد فرحت واني افكر هذا بيتي وحدي واسوي بيه اليعجبني لازم ارتبه بمزاجي ههههههه الللله،

جهزت الغدا واسمع عصافير بطني تزقزق! اووي ماما على كيفجن تلحكن، يا يا يعثرجن الله ولجن فضحتني، صفنت على روحي لا صدك الظاهر الكعدة وحدي خبلتني وخلتني اضحك على روحي !!

،جان جايب للغده دجاج شوي ومقبلات وعصير برتقال ،حطيتهن بصينيه وطلعت للصاله جان هو كاعد يباوع بتلفونه حطيت الصينيه گدامه وهو عاف التلفون وبده ياكل وعيونه عليه، من غبائي كعدت كدامة گوة اكلت كم لگمة وطفرت للمطبخ اجر نفس بقوة عزززه شنو هالاحراااج،

سمعته صاح سوي جاي، حطيت القوري عالنار واباوع عالمطبخ لعبت نفسي الدهن ملزگ بكل مكان وحقه منو ينظفه البيت فارغ بس رجال بيه قابل يروح ينظف صفنت افكر معقولة تزوجني علمود اخدمه!! يوو هسة صار بيتي ومسؤلة بيه ،

المطبخ بيه بابين باب يطلع عالصاله والباب الثاني يطلع على مخزن جبير بيه غراض مشمورة كعدت اخطط ببالي هذا المطبخ سيراميك وجديد وتصميمه مو مال دهن ويخرب! شو خلي احول الطباخ للمخزن واسويه مطبخ حار وبارد ،اباوع عالطارمة هواي افكار ببالي للبيت، اتحمست حيل جنت فرحانه بيه بيتي هذا كله بيدي مسؤليتي وتعبي راح يكون بيه ويارب يكتبلي ايام حلوة بيه،

اخذت الجاي اله وهو متمدد عالقنفه يباوع عالتلفزيون ،شلت الصينيه ورحت ادور بالعلاليك وفعلا لكيت كلشي جايب اول شي سويته نظفت الثلاجه جلفته زين وعزلت المسواگ بيها وبديت بالمطبخ توني ابدي وسمعت وراي گال:هاي شتسوين
..ا الصراحه البيت كلش وصخ مبين جان مهجور ومااكدر اكعد بيه هيج لازم انظفه
..اي اعرف لازمة تنظفينه بس هسة!!!

..استغربت، شنو يعني لعد شوكت انظف جاوبته:اي لعد شوكت كتلك مااكدر اكعد بيه هيج
فرگ شعره ودار وجها وراح، خلاني بذهولي هذا شبيه اتمنى اعرف شيفكر ابد ماينطي ردة فعل هففففف!"
رجعت اعزل بالمطبخ وجلفته جلف من فوك لجوة بحيث ايديه تكسرن من الوحدة للظهر وهسة بالخمسه العصر، ظهري شكل گعدت ارتاح شويه ورجعت نقلت الطباخ وجان اكو ميز خشب صغير نقلتهن للمخزن ورتبتهن وجبت علب البهارات وادوات الطبخ بعد ماكملت كل شي اباوع عليه هذا انجازي مطبخي الصغير، للمغرب طلع من الغرفه يباوعلي رافع حاجبه،ومبين ضايج!

اني ماعلقت حظرت العشا برياني ومقبلات امشي واضوگ باكلي، اممم عاشت ايدي والله سمعت صاح يلاااا شطلع من عشا هذا بس كاعده تشعرين بطبخج، عزززه يسمعني
ركض اخذت العشا وطلعت وبدينه ناكل وهو يباوع للمطبخ من بعيد گال:هاي شنو هالهوسة شسويتي؟
..ما سويت شي نظفت وو شسمة المخزن البره سويته مطبخ حار حرامات السيراميك الجديد ينتلف،
فتح عيونه على وسعهن مامصدگ وكال :شنو هالافكار هاي انوب حار وبارد
...اي احسن وانظف مايتعبني هيح
...يلا عمي براحتج شعليه مايحتاج اكلج بيتج هذا واتصرفي بيه شلون مايعجبج، الي حجي وياج بس مو هسة من تخلصين. عاشت ايدج عالاكل كلش طيب، خلص كلامة وگام .....يتبع