#انت_نعمتي2
#Hanan_Adil✒
الصباح صحيت بدري قبل سامح حضرتلو الشاي وصحيتو كان متجدع ونايم نوم زول تعبااان ي حليلو صحى لي بعد تعب قالي مالك ف شنو من الدغش
انا : دغش الساعه 7 الا ي استاذ قووم حصل الصلاة ودوامك ، قام مخلوع وجري عالحمام وانا بوراه بديت ارتب الغرفه لم صلى وعاين للساعه قال باقي تاني ساعه عالدوام حقو ارجع انوم
انا : تنوم شنو ارح نشرب الشاي وعايزاك تغشيني سمر
سامح : سمر منوووو
انا : سمر صحبتي عندي كم سمر ؟
سامح : اممم وليييه ؟
انا : يعني عايزني اقابل ليك الحيط زهجانه ياخ ماشه افرق وعندنا برنامج كده
سامح : اللي هوو؟ انا :ما يخصك برنامج بنا اااات
سامح : عشنا وشفنا بقيتو تعملو برامج
انا : 😒 سامح : خلاص خلاص ارح ما تعملي حجه من الصباح
انا : انا ولا انت بالله
سامح : اسفييين يا اللخت شربنا الشاي وضايرنا المطبخ والهول مع بعض ومشينا نلبس بالله شعري ما سرحتو جاني لابس يلا اطلعي
انا : سااامح هو انا لحقت اعمل حاجه
سامح : ياخ عليك الله انتي ماشه وين اقلبي جلابيتك دي واطلعي سريع
انا :لاا دقايق والنبي
سامح : طيب بديك تلت ساعه بس انجزي
انا : خلاص يلا اها سيبني اكمل ، وابتديت البس وهو مشى فتح التلفزيون التلت انتهى والتلت التاني انتهى وسامح ينبح ي حنان ما تطلعي ياخ والله امشي واخليك وانا بقولو بس كدي اعملا الليله برد لي : وكمان جايبه طولة لسان اطلعي ياخ خشيتي في زمني طلعت بعد.سليت روحو ولسه الطرحه ما دبستها ظبطها فالعربيه وكرهتو فالمرايه كل ما يعدلها الفها منو قالي انتي متاكده ماشه لسمر وبس؟
انا : بتشك في أخلاقي
سامح : حمر لي اخلاقك دي تربية منووو؟
انا : والله ماشه لسمر
سامح : هههههه حلاتك لم تهرشي ، اها اسي نصابح الناس من الدغش يقولو علينا شنو
انا : دغش شنووو الساعه 8 ي استاذ يعني اليوم انتهى
سامح : 8 دي في ناس بكونو لسه نايمييين ي استاذة انتي
انا : الا ناس سمر وبعدين هي من امبارح عارفاني جاياها استرييح ، لم وصلنا نحن بنتناقر قبل انزل سمعت اسطوانة كل يوم خلي بالك من نفسك ثم نفسك وما تتاخري وما ترجعي بالمواصلات ولم تطلعي اضربي لي فااهمه ؟وووو...
انا : خلاص خلاص فهمت والله فهمت اطمن انت وخلي بالك من نفسك يلا يلا سلام ، وجريت قبل يسمعني كلام تاني هو كان بضحك ودور العربيه ومشى ضربت الجرس كم مرة سامعه صوت لين جايه وبتقول خلاص سمعنا والله سمعنا هي اخت سمر الصغيرة بتقرا في سابع فتحت لي الباب عين مغمضه وعين مفتحه والشعر منكوش وبتتثاءب اول من شافتني : بيسس دي انتي اصبحنا بالله والرسول ، اتحسست يخواني شكلو كلام سامح صاح جريتها من شعيرتها وقلت اتعلمي حسن الضيافه ي رمه اصبري لي سمر زحي كده اخش
لين : هو انتي خشيتي وخلصتي اصلها لسانه سليط خلاص سلمت على خالتو ليلا : اهلن اهلن حنونه زارنا النبي الليله كيفك وكيف صحتك
انا : تمام يا خالتو انتي كيفك ويينن السجمانات ديل بتنضفي انتي ،؟ قالت لي والله دي دوب قامت تنكاش وسمر لسه نايمه بركه الجيتي خشيلا كان تقوم ، مشيت لقيتها راقده على وشها ومستممخه لبعتها في ضهرها قامت مجنونه وااي ي نونه ليه كده ياخ
انا : نونه ف عينك مش عارفاني جايه اجي القاكم نايمين ده شنو الاحراج ده الساعه ماشه على تسعه قومي ياخ
سمر : انا كنت بهظر على فكرة لم قلت ليك تعالي وانتي واقفه عالهبشه طوالي جيتي
انا : شوف الكلبه اساسا غلطانه انا الجيتك سامح اصلو ما خاتي علي يلا كملي نومك سلام جرتني عليها وحضتني ي هبله انتي زعلتي دي شنو الحركات دي انا بمازحك وانا لاقياك وييين
انا : اسي منو قال زعلت انا ماشه لخالتو انتي اتخمدي نومي طلعت خليتها بتضحك ، بديت نضافه مع خالتي وخشينا المطبخ نجهز للفطور وهي بتقولي ما كفاك شقاوة بيتك امشي ارتاحي ي بتي وانا بقولها عارفاني ما بعرف اقعد ساي خليني اطقش معاك جات سمر تكب شاهيها وقالت :اي ي امي خليها عليك الله هي قاعده تجينا متين حمرت ليها ومشيت قعدت فالهول وبشاغل في لين بعد شويه جا عموري من برة برضو قالي متين صبحت للحوامه غايتو بشعو بي شديد قلت ليهم والله غلطان البتزكركم ي رمم اساسا لو ما خالتو ولا بجيكم قالي اسي ارجعي وسمر وامها بضحكو فينا سمر :هي مالكم مع صحبتي حبيبتي يلا شوفو شغلتكم
انا : بعد.شنو بس انا زعلت يلا وتاني ما بجي
خالتي : ي بت والله تجي انتي ويطلعو هم اما كلام لكن سيبك.منهم ما قلتي لي سامح كيف واخبار امك معاك
انا : والله كويسين ي خالتي اهو خبر التلفون وسامح مدروش مع شغلو الله يعيينو
سمر : انتي ما هتسافري ليها فالاجازة دي ؟
انا : ما نفسي والله ما بقدر اخلي سامح براهو
سمر : ليه ليه براه انا موجوده ي عسل والله اختو ليك في نني عيني بس انتي سافري
انا : ي زفته ي عولاق بتخونيني عايزة تشلبيني مش 👊
سمر : اساسا اساسا هتتشلبي وعما قريب اصبري بس حمرت ليها وقلت قومي جهزي الاكل ده عشان نطلع الزمن يلاا
سمر : نطلع وين ياخ والله ما قادرة خلينا كده اهو كويسين ومتونسين
انا : ي بت قومي شوفي من القعده بقيتي دبه كيف اتحركي وخففي خففي وبعدين انا عايزة لي حجات من السوق انجزي بالله ، ههههه قامت وهي بتتافف جابت الفطور فطرنا وخالتو ظبطت لينا الشاي وعملو لي عصير شربتو وطلعنا متاخرين خالتي تشيل وتوصي فينا ما تتاخرن وانتي ي حنان تعالي راجعه ما تمشي من هناك
انا : والله ي خالتو ما اظن برجع البيت عشان احضر الغدا لسامح قالت لي انتي اريتك ما سمر انتي وسمر تقرص فيني بسببك اتهنت انا لفينا شويه فالسوق والجو كان مسخن شديد وسمر حلفت الا نشرب حاجه باردة لانها هلكت خلااص ،
انا : والله انتي حنكوشه خلاص متين جينا نحن ، ولاا كاني بتكلم معاها اقرب مطعم خشت فيه وكمان لقيتها طلبت اتصل علي سامح : حنونتي 😊
انا : هلا ي قلبها كيفك
سامح : انا تمام وانتي؟ انا : هسا بقيت تمام اها احكي
سامح : بنبرة جاده مع سمر ولا طلعتي ؟
انا : معاها والله ي سامح وحاليا فالسوق
سامح : اوعى تتاخري وانتظريني بجي غاشيك مفهوم
انا : حاضر حاضر يلا سلام لمن نتلاقى ، قفلت منو وسمر مستمتعه بالمنقه قالت : لي الله انا زول بسال مني ماف ما تسلفيني سامح ده
انا : بت اتعدلي عندك عمرو خلي يسأل منك سمر : عمرو شنو ياااخ ديل لم اطلع من البيت بفرحو انا : والله عندهم حق اسي مالك ما طلبتي لي معاك سمر : ما انا ما عارفاك هتشربي شنو
انا : ما عارفه؟ اصلا انتي ما صدقتي دخلتي ي الشفقاانه مشيت طلبت برتقال وجيت لقيتها شغاله في تلفونها قلت ليها ركزي معاي من هنا ماشين السوبر عندي نواقص في مواد الغذاء
سمر : تعبانه قدر ده ليه ما توصي سامح مالك ومال الغذائيات
انا : ياخ سامح الفيه مكفيه ي حليلو اسي بجي من الشغل متين لمن يلحق وبعدين انتي مالك انا كده مرتاحه اجي
سمر : مالي يختي بس بحسك عجوزة عجوزة كده
انا : ما اصلا نحن كده ولا نسيتي انو السنه الجايه خريجات ي ماما
سمر : تف تف من خشمك منو عجوزة عجزي براك يمه هييي
انا : خلاص اتلهي خلينا نطلع سريع كان نلقى مواصلات
سمر : هتخليني ارجع بالمواصلات
انا : معقوله بس بضرب للكروزر اسي تجيك ي حب ضربتني ف كتفي وهي متغايظه طلبت تاني عصير واثناء ما نحن بنشرب في بت وولد كانو فالطربيزة الجنبنا من قبل نجي كانو كويسين لحدي ما البت جاها تلفون وجهجه افكارها وبقت تجوط وتتراجف وهو بهدي فيها حبيبي خلاص روقي نحن هنطلع وتصلي قبليه اهدي خلاص الله هكلم الويتر يلف لينا الاكل دليفري ونشيلو معانا خلاص هشش ، انا طبعا ما كنت شايفاها الا لفتتني سمر الشمشارة لانهم مقابلنها وطربيزتم قريبه لينا شديد لم الولد مشى جاتها مكالمه تاني اظن من صحبتها كانت بتحكيلا : وااي ي لولا ما شفتي امي اتصلت لي وقالت انو محمد اخوي جاي عالبيت تعالي سرعه امم تخيلي يوم اطلع موعد يجي الزفت ده يبوظ اي شي ، انا هنا نطتت عيوني مخلوعه من كلامها واصلت : اصلا لو ما جاب لي الجلطه ما برتاح يعني ما طبيعي ابدا خنقني خنقه من المووت ما قادرة اتنفس في وجودو ، عليك الله فكينا منو ياخ بلا يخمو يخاف على نفسو انا ما صغيرة بعد كده ما ممكن يقيدني كده ما كل الناس دي بتطلع وتتنفس حتى هو الا انا اوفف ماشي ماشي يلا معتز هدا جاي برجعلك المساء لو قعدت حيه وتضحك ببشاعه شديده وانا هنا خلاص الدم فار في عروقي زي السم وما قدرت اتحكم في نفسي وما حسيت بركعي وهن شايلاتني ناحيتها سمر بتنادي فيني وقفت قدامها قلت ليها : عفواً البتتكلمي عنو ده اخوك ولا اضاني ظلمتني ؟
قالت : تخيلي ؟ وبعدين انتي منو
انا : انتي بالنيني ي حيوانه ي عديمه الزوق كيف تتكلمي عن اخوك بالطريقه دي وعشان منو ي السمحه ده ؟ بكرة برميك زي الكلبه وما بتلقي برا اخوك
البت : عفواً انتي منو اساسا هيي اتلمي
انا : اتلمي انتي ي قليلة الحيا ولم تتكلمي عن اخوك تاني مرة اتكلمي بادب والا والله اعلمك الادب انا ، كنت منفعله وعيوني من الغضب لمن محمرة وما منتبهة للانا بقول فيه سمر بتجرني وبتسكت فيني وانا بردح للبت والبت ترد لي واصواتنا شبه طلعت جا الولد الكان معاها قالينا في شنو يخونا هي استهدو بالله وهي بتقولو ما عارفه دي واحده متخلفه انتي مالك بينا الله
انا : متخلفه انا ولا انتي بكرة تندمي وتسفي التراب اصبري بس احمدي ربك انو عندك اخ غيرك متمنين يضوقو طعم الخوة ي ناكرة جميل
البت : لاا دي شكلها مجنونه بجد معتز يلا خلينا نمشي وفي كم بت وشاب كانو بتفرجو وانا عامله زي البركان منفعلة على اخري سمر حاسبت وجرتني طلعنا برة وبتشاكل فيني : انتي جنيتي ي بت مالك بيهم الله ،، وانا عيني هناك فالبت ركبت مع الولد في توسانا سودا مظلله واتحركو وسمر لسه بتتكلم معاي
انا : سمر خلاص انتي كمان كلامها كان مستفز شديد كيف تتكلم عن اخوها بالطريقه دي البنات ديل ما نصاح والله
سمر : خلاص اهدي مفاهيمك دي احتفظي بيها لنفسك فاكرة الناس كلهم زيك وبعدين سامح لو عرف والله يحرم عليك المرقه تاني يلا خلينا نمشي الساعه ماشه على 3 ، مشينا السوبر اشتريت حاجاتي واشتريت لسمر شوية حجات و نوتيلا عارفاها بتموت فيها وعيونها بقت قلوب قلوب ركبتها مواصلاتها واخدت لي امجاد عشان عفشي كتير وانا فالشارع رسلت رساله لسامح محتواها (انا جيت البيت ما تجي غاشيني ) وقفلت تلفوني عشان ما يتصل ويسمعني محاضرة لم يجي بنتفاهم وصلت رتبت حجاتي وعملت لي اسود وبطاطس وخشيت اتدوشت وصليت العصر سامح جا داخل وبحمر لي
انا : سموح مساء الخير
سامح : حنان الله كم ؟ انا : وااحد
سامح : انا مش قلت ليك انتظريني ؟
انا : سامح اهدأ انا وصلت كويسه وبعدين انا مشيت السوق اشتري حجات البيت ما ينفع ارجع مع سمر تاني وجيت بامجاد والله لحد البيت ما بالمواصلات ، خش ادوش دوب احضر الغدا ، هو ما رضى ابدا وكمان ما قدر يتكلم معاي عشان ما اديتو فرصه مشيت خليتو واقف ما لقى غير يستسلم ويسكت بعد الغدا عملت ليه عصير واكلو كان كعب شديد وشو متغير وعيونو مورمه سالتو سامح مالك انت كويس قالي انا تمام مصدع بس خاشي اخد لي نومه صحيني للمغرب ، انا : ما هتشرب القهوة ؟
سامح : بشربها بعدين بتحميني انوم ما تنسيني عشان الحق الصلاة
انا : خلاص كويس نوم انت وارتاح لحقتو حبة بندول بلعها ورقد ، انا لميت العده وغسلتها وجيت قعدت فالتلفزيون فتحت تلفوني واتصلت على سمر اسالها وصلت كيف قالت لي دوب اتزكرتيني ي وسخه ما فيها حسنه نهائي فصلت منها وركزت مع الفيلم لحد ما المغرب اذن دخلت اصحي سامح واول ما ختيت يدي فيه صرخت سااامح......؟
اللهم لطفا بنعمتي وما دون ذلك هين 😔
