#انت_نعمتي4
#Hanan_Adil ✒
وانا ماسكه التلفون في يدي بعاين لاسم امي فالتلفون ما قدرت ارد طبعاً ما كان نفسي كل ما اتواصل معاها برجع اتزكر الجانب السيئ من حياتنا الفاتت ، الجانب النفسي ومنى عيني انساه واكمل بسلام لكن وييين ،، احيانا زاكرتك ما بترحمك وبظل الماضي ضباب اسود ماشي وراك ويفزعك من الحين للتاني ،
¤¤¤¤¤¤¤¤¤¤¤¤¤¤¤¤¤¤¤¤¤¤¤¤¤¤
#فلاااش_باك
بعد نزلنا السودان وبعد اربع سنين بالضبط امي اتزكرت انو عندها اولاد وجات تشوفنا او بالأحرى جات عشان تغيظ ابوي بزواجها التاني ،وتشوفو مستاء وهو شايل حملنا وهمنا وفاكرانا منكدين عليه حياتو ، يومها جينا داخلين انا وسامح من المدرسه لقيناها قاعده ومعاها راجل انا ما عرفتو بس سامح عرفو، وقفنا مصدومين طبعاً امي جات ؟ ايوة والله دي امي فرحت شديد من جوة قلبي وكان نفسي اترمي في حضنها واقولها قدر شنو انا مشتاقه ليها وفقدتها وكمان اسالها هي كانت وين وليه ما جات معانا من زمان؟ اول من شافتنا جات جاريه علينا حبايبي الحلوين اشتقت ليكم ي روح ماما حضنتنا سواء في آن واحد وبتبوس فينا كل مرة سامح كان جامد زي الحجر ما اتهزت ليه شعرة ولا مجرد إحساس جميل جواه قابلها بكل برود الدنيا حتى لم سالتو انت كويس هزا ليها راسو وبس ، انا ما قدرت اتحكم في نفسي وبكيييت بكيت لدرجة انو ابوي بكى معاي كان قاعد فالكنبه مراقبنا من سكات من شافني بكيت دموعو نزلت معاي ، امي بتقش لي في دموعي وبتسالني مالك ي حبيبتي انتي كويسه فيك شيء ها ؟ ليه ما بتتكلمي معاي ؟ حنون في شنو قولي لي ؟،، انا عايزة اقولك والله ي امي بس ما عارفه كيف وبياتو طريقه الجواي صعب يتحكي وصعب بتفهم فالسكات احسن والدموع كفيلة لترجمة الجواي بالحرف ، سامح ساقني من يدي وقالي يلا تعالي غيري ملابسك ، وامي مستغربه من تصرفنا ، بس سامح الكان بفهم سكوتي قبل كلامي بعد خشينا حضني عليه مساافه قشى لي دموعي وقالي : اوعى تاني اشوفك بتبكي فاهمه ؟ بتبكي ليه انا هنا جمبك وهكون جمبك طوالي وكمان ابوي اتفقنا يلا خشي استحمي وغيري ، لبست لي بجامه وطلعت قعدت جمب ابوي كانو بتناقشو لم جيت سكتوا ، امي نادتني عشان اقعد جمبها وقالت لي تعالي سلمي على خالك ده اخوي علي ي حنو لم شفتي كنتي صغيرة ما بتتزكري ابوي مسكني من كتفي بمعنى امشي وفعلا مشيت سلمت عليه وقعدت جمب امي وبتملس لي في شعري : ما شاءالله كبرتي ي حنونتي وبقيتي عروسه ، وسالتني اسئله كتيرة كيف مع الدراسه منو بقريك منو بعملك الاكل منو بسرحلك قلت ليها سامح ، وسامح جاي ماشي عالمطبخ عاين لينا وخشى طوالي ، امي : انت ي عادل ما جايب ليهم شغالة ؟ كيف تخليهم يشتغلو براهم وتاكل الحمل كلو على سامح اساسا هو زاتو عايز البهتم بيه ، ابوي فضل السكات بس سامح جا رد ليها : اختي ابدا ما حمل علي ي امي ونحن قادرين نتحمل بعض ونهتم ببعض كويس وكمان نحن كده مرتاحين ومبسوطين شديد ، حنان تعالي اشربي عصيرك عشان تخشي ترتاحي بعدين عندنا مزاكرة ، اترسمت ابتسامة فخر وتعجب على وش ابوي من ردة فعل سامح ما اظن كان متوقع منو كلمات بسيطه زي دي وقوية في نفس الوكت ، امي ما حققت هدفها ورجعت بخيبة امل ظهرت في ملامح وشها بعد ما قالت لينا جبت ليكم هدايا وحجات انا هاقعد هنا اسبوع وارجع تعالو قضو معاي كويس ؟ جيبم لي ي عادل ولو حبيتو اسي ارح معاي ، سامح : معليش نحن شغالين امتحانات شهريه لكن هنجي ان شاءالله، بعد طلعت ابوي قعدنا واتكلم معانا كتير فالموضوع ده وانو ما عندو مانع نمشي ليها ونقعد معاها لحد ما تسافر لكن سامح ما رحب فالفكرة من اساسا وانا البعملو سامح كلو بعملو معاه ، ورجعنا لحياتنا عادي ولا كانها جاتنا او في شي اتغير لحد ما جا اليوم المسافرة فيه جات ودعتنا كانت بتبكي شديد وحلفت ابوي يجيبنا ليها فالاجازة وسافرت ، من يومها اتمحى جوانا اي شعور جميل اتجاه امي وبقت لينا زيها زي اي زول بنعرفو وخلاص عارفين انها امنا وبنحترمها غصبا عننا وعاملين ليها حساب خوفاً من غضب ربنا لكن جوانا مافي اي إحساس بالحب والوئام والالفه والمحنه البتتوجد بين الام وأولادها ، او يمكن كنت بوهم نفسي بكده لاني مرات وغصبا عني كنت بشتاقلها وبفقدها في بعض المواقف ابوي كان بسفرني ليها كل اجازة زي ما وعدها بقضي معاها شهر واجي ومرات برفض امشي واحيانا بتجينا هي لكن بعد زمن طبعا ، اما سامح ولا يوم فكر يمشيلا وكان بفضل يقعد مع ابوي .
¤¤¤¤¤¤¤¤¤¤¤¤¤¤¤¤
