#انت_نعمتي6
#Hanan_Adil ✒
سامح جاني بعد العصر ختيتلو الغدا وانا بسال فيه : مشيت وين للزمن ده مش قلت ما هتتاخر لقيت الشغل ماشي وقعدت قبلك صح ، كان بياكل وهو ساكت ما ردا ، انا : انا بتكلم معاك على فكرة ، سامح : ماهو انتي ما بتدي الواحد فرصه يشاركك فالكلام ولا يجاوبك ، انا : ماذا تقصد يا هذا هل تقصد اني ثرثارة ؟؟ ، سامح : هههههه اسالي وجاوبي في نفس الوكت ، انا : ما علينا اكل وارتاح عشان الموضوع القبيل محتاج منك صحصحة وتركيز ، سامح : انا مصحصح والله بس اظبطي لي كباية قهوة تعدل المزاج ده وانا زاتي عايزك فالموضوع ، انا : ما ملاحظ فجأة كده بقينا بتاعين مواضيع ههههه ، قالي : اااي والله غريبه مش ؟ ، عملتلو القهوة وجيت قعدت اها سامعاك قول ، سامح : انتي اول عشان انتي البديتي ، انا : لكن انت الكبير ابدأ انت اول ، سامح : لالا السيدات اول ، انا : بس الرجال قوامون على النساء ، سامح : عارف بس برضو اتكلمي انتي اول ، انا : لا.......، ادني ليك نهرة يا بت ما تتكلمي ، خلاني اخش ليه فالموضوع طوالي حتى المقدمه الكنت محضراها من الصباح طيرها لي 😂، طيب ي سموح ي حبيبي انا نفسي ومنى عيني اشوفك عريس وشايفاك عجزت وهرمت عايزة الحقك القطر ولو ما عندك واحده خاتيها في راسك انا لقيتلك العروس الحلوة المرتبه الهتحبك وتراعيك وتصونك وانا اكون مطمنه عليك وانت معاها مع انو هتشاركني فيك وتشيل محلي لكن كل يهون عشان خاطر سعادتك يا سعادتك ، سامح : ده شنو ده رب رب رب فهميني برااحه براااحه ،
انا : ههههه اصلك الما بدور تفهمو وما بتفهمو من الاخر كده ي اخوي لازم تعرس بعد دا ولا لازم فرض عين عدييل كدا ولا على كيفك ، سامح : اها ودي منو سعيدة الحظ الاخترتيها لي دي ؟، انا : لا فعلاً هي من ناحية حظ فحظها يعني ما شاءالله ما شاءالله بس قمة الفستنكه ، سامح : برضو ما قلتي منووو؟، انا : سمر صحبتي، وغتين وشي نظام خجلانه وكدا ، سامح فقعها ليك ضحكه وقال : ايوااا عايزات تتفقن علي وتجلطني الاتنين مش ، انا : نتفق عليك.شنو هو حد يقدر عليك ، انا بس عشان بعرفها كويس وواثقة من أخلاقها وتربيتها وواثقه كمان انها قدر المسؤليه وهتشاركك حياتك بكل حب ووفاء ، سامح : انتي جاده ي حنون ؟ ، انا : سامح ده ما موضوع يهظرو فيك خليك جادي شويه ولو عندك واحده في راسك كمان قولي فالنهاية الهدف واحد ،، سامح : احم طيب اول شيء انا ما عندي واحده في راسي تاني حاجه انتي اتكلمتي مع سمر وشفتي رايها اول ؟، انا : لا ما اتكلمت ، سامح : حلو يلا الموضوع ده اجلي شويه لسه بدري عليه ، انا : بدري لمتين بس يا سامح انا شايفه انو ده اكتر وكت مناسب ليه وما تقولي لمن تعرسي انتي وكلام من ده ، سامح : لا بجد بدري عليه على الأقل لمن تتخرجي انتي ، انا : شلت نفسي وقلت ليه وتخريجي علاقتو شنو ننتظر تاااني سنه ؟ ، سامح : سنه كتيرة اسي تمر لمح البصر بس انتي طولي بالك انا زاتو ما جاهز اسي وعندي حجات كتيرة عايز اعملا ، انا : ما اقنعتني ، سامح : هتقتنعي فيما بعد يلا خلاص زمنك انتهى وجا دوري ، انا : ههههه اها اشجيني مع انك طرشقت لي موضوعي فالهواء ، سامح : اممم ااا طيب نحن لازم نسافر وباقرب وقت ممكن ، انا : نسااافر؟ نسافر وين ؟ ، سامح : الإمارات لي أمي. .!، فضلت اعاين ليه مسااافه وانا مخلوعه على مدهوشه على مصدومه يعني مفاجأة ما متوقعه ابدا منو ، سامح : هتفضلي مبحلقه فيني كدا ولا عندك رايك تقولي ، انا : سامح انت جااادي ؟ ، سامح : لازم نسافر بكرة باي طريقه عشان نجي سريع وتلحقي جامعتك ان شاءالله نلقى حجز بس ،، لو ماشه جيبي جوازك سريع ما عندنا زمن وقام دخل غرفته قبل يسمع ردي ، اساسا ما كان في كلام يتقال بعد الزمن ده كللو وبعد الحصل لينا ما اتوقعت في يوم سامح يفكر يمشي لامي لانو من ما نزلنا ما حصل رجع للبلد ديك وحتى لم امي تجي كان بقابلها ببرود ما عادي يجي اسي ويقولي لازم نسافر ؟ اي صح انا عرضت عليه الموضوع ده قبل كده بس ما اتخيلتو يفكر فيه وكمان ياخد قرار السفر من غير ما اتناقش معاه ، كنت فاكرة نفسي هلح عليه وألح وألح لحد ما يوافق لكن حصل العكس تماما وانا كمان ما سالتو ولا حبيت احرجو ليه قررت فجأة كدا ؟ وقلت ان شاءالله ربنا يهديه ويكون سامح امي حتى لو ما اتعامل معاها طبيعي المهم يسامحها من قلبو مهما حصل ربنا بسالنا من برها ، باقي اليوم جهزت لينا شنطه صغيرة ما اظن نقعد اكتر من تلاته ايام ومفروض الاسبوع ده امشي اسجل للجامعه رسلت لسمر في الواتس كلمتها ، من الصباح لقيتها في وشي بعد ما سامح طلع قالي ماشي اشوف لينا حجز ، قعدت تسأل فيني الحصل شنو خلى سامح فجأة يسافر ؟ ، انا : والله ي سمر انا زاتي ما عارفه الجد شنو المهم متحمسه للفكرة ، سمر : ً مع انها جات متاخرة لكن حاجه كويسه شديد اقصد يعني ما عارفه اقولك شنو ؟ ، انا : ههههه نفسي الحصل لي لم جا كلمني ما كنت عارفه ارد ، سمر : هههه ي زوله خييير ان شاءالله تمشو وتجو بالسلامه ، انا : ان شاءالله حبيبتي هديك بطاقتي سجلي لي معاك ، سمر : ظابط بس ما تجيني ويدك فاضيه ، انا : اقدر ؟ اقدر انا والله الا القى نفسي حدث اليوم ، سمر : ههههه كويس ي هراشه ، سمر قعدت معاي لحدي بعد الضهر كدا اتوسنااا وعملنا كيك وفرفشنا واتهابلنا +اتصورنا بعديها ودعتني ومثلت انها بتبكي وقاتلي سلمي على امك واخوانك و مشت ، اخدت لي نومه كدا ما عارفه نمتها كيف صحيت على صوت سامح بصحي فيني قالي معاي فؤاد قومي حضري لينا لقمه ناكلا سالتو الساعه كم ؟ قالي الساعه خمسه ي كسلانه ، قمت مخلوعه الصلاة فاتت بس اصلي واجيكم ، سامح : طيب يلا قومي ، حضرت الغدا وقعدنا ناكل ، فؤاد : مرة كسلانه اسي ده اكل ليك ، انا : نحن مقضينا والله مالنا ومال اشعب التالت ، سامح : احسن ليك تسكت منها ما عارف لسانها انت ، فؤاد : احسن شيء لم تجي راجع ما تجيبها معاك خليها مع امها على الاقل تتعلم تطبخ زي الناس ، انا : اول شي انا بعرف اطبخ تاني شي وانت مالك ومال طبخي مرتك مثلا ولا مرتك ، فؤاد : ما مرتي لكن يمكن فالمستقبل يحصل، انا : ششنووو مستحيل طبعاً على أساس الرجال كملو وكدا ، فؤاد : سامح صحبك بتهان وفي نص بيتك ، انا : على اساس هيتخلى عن اختو ، سامح : اتفقوا براكم وعرسو تكوني ريحتوني من شكلكم وخلقكم دي ، فؤاد بضحك وانا مطيرة عيوني كيف ي سامح يعني انت واقف مع صحبك ؟ ، سامح : انا تبع نفسي وبقترح بس انتي فكري ، انا : احسن شي اقوم اخليكم بقو يضحكو الاتنين وفؤاد بقولي عليك الله كباية شاي ساموطيه كدا عشان نتفاهم برواق ، انا : يسمطك شيطان اخرس ان شاءالله ، وهو يضضحك ، سامح : على فكرة لقيت حجز الساعه 1ص ، انا : ششنووو بالسرعه دي ، سامح : من حسن حظنا والله تلاته تزاكر كانت وافرة لاسرة كده وغيرو مواعيدم ، انا : والتزكرة التالته؟ ،فؤاد : البت دي حمارة على فكرة انتي مالك ومال التالته ، انا : خفت تكون مبارينا في دي كمان ، فؤاد : لا اطمني انا ما صدقت ارتاح منكم ، انا : شايف صحبك ي سامح ، سامح : ده باير ساي ما تشتغلي بيه ، فؤاد : هاهاهاهاهااي كدي نادي لينا مدامك من جوة انتعرف عليها وقرقرقر ، فضلنا نتهابل كدا لحدي ما سامح زهج ونهرنا نهرة واااحده و حسم الفوضى ،، فؤاد قال تاني ما بجيكم دي مهزله دي ههههه ،،، قريب الساعه 10 كده كان قفلنا البيت وطلعنا عالمطار فؤاد هو الكان موصلنا ، رسلت لسمر فالواتس انو نحن في المطار وكده ، سامح كان كاست وسرحان طول مدة الرحلة انا ما حبيت اضايقو و قلت ده شيء طبيعي يحصل يعني بعد المدة دي كلها سامح يقرر يسافر عشان امي؟ اكيد هو ما اخد القرار ده بالساهل ، للحظة خطر على بالي سؤال يا ترى في شنو ليه سامح فجأة كده اتغير واتزكر امي وكمان اخد خطوة ناحيتها ؟ ، تاني قلت مش امكن قلبو حنى ليها ما في النهاية هي قطعه منو ومهما حصل الضفر ما بطلع من اللحم ، طردت الأفكار من راسي سريع واستمتعت بوجودو جمبي احساس انو هو مسافر معاي لاول مرة احساس ما حسيتو في سفراتي المضت حاجه مختلفة تماماً ♡، نزلنا في مطار ابو ظبي الصباح ، سامح كان حاجز تكسي يوصلنا من المطار للخالدية الحي الساكنه فيه امي ، حاسة بدقات قلبي زايدة لدرجة فكرت انو هيطلع من محلو بعد 6 سنين مرت رجعت تاني لنفس البلد الكان قررت ما اجيها تاني اخدت القرار ده بعد وفاة ابوي ربنا يرحمه قلت لامي انا ما بقدر اسيب سامح براه لو عايزانا تاني انتي التعالينا وجات ايام الوفاة بس عزتنا وتاني ما شفناها لكن متواصلة معانا بالتلفون ،، طول الطريق انا الكنت شاردة ومتوتره ومشاعري جايطه شديد شوق غضب عتاب الم الفراق واللقاء زاتو مرات بكون مؤلم لم يجي بعد فترة طوييله ، شايلة هم سامح يا ربي اللقاء ده هيكون كيف بالنسبه ليه بكون حاسس بشنو اسي مبسوط لانو هيشوف امي ؟ ولا بكون ندمان على جيتو ، وهي من تستقبلنا كيف بتكون مشتاقه لينا زي ما قالت طيب ليه ما كانت بتجينا ؟، لحد ما وصلنا ما حسيت بالمسافه لقيت نفسي واقفة قدام باب الشقه عاينت لسامح التوتر كان ظاهر في عيونو ابتسم لي لم مسكت يدو وضغط عليها شلت نفس طوييل وبعديها ضربت الجرس امي طبعا ما عارفانا جايين هتتفاجأ بينا غايتو لكن ما عارفه هتكون محزنه ليها ولا سارة؟ ، تاني ضربت الجرس فتحت لينا جود فضلت تعاين لي مسااافه مشبهاني ، انا : جوددد ااي دي انا حنان نسيتيني ؟ بعديها حضنتني شدديد قاتلي معليش ياخ بس ما اتوقعتك اشتقنا ليك والله ، انا : يلا سلمي على......، قبل اتم جملتي قالت لي سامح صح؟ طبعا هم اول مرة يتقابلو كنت بوريهم سامح فالصور بس وهي كمان شافتو عندي فالصور ، مدا ليها يدو من سكات واتخلع لمن حضنتو وقالت ليه ده اسعد يوم في حياتي مبسوطه بشوفتك وجرتو جوا اتفضلو اتفضلو وبقت تكورك يا ماماااا مامااا جيهااان تعالو شوفو منو جاااا ، امي طالعه من غرفتها : يا بت ما تصيحي و......اول من شافتنا وقفت صامده وتعابير وشها ما بتتفسر شوية كده وبدت ترجف وما قادرة تقيف ولا تجي علينا اقرب كرسي جمبها اترمت فيه اكتر شي متفاجأة بسامح طبعاً بدت دموعها تنزل بغزارة ومن غير صوت انا مشيتلها حضنتها شدييد وبست راسها كيف يا امي انتي كويسه ؟ كانت بتعاين لسامح ومادا ليه يدها جا عليها بخطوات تقييلة وقعد على ركبتيه مسك يدها باسها وهي حضنتو عليها وبقت تبكي تبكي بطول حسها من غير كلام امكن غرابة الساعه هي بتبكي وانا ببكي وسامح ساكت بس مرمي بين كرعيها جيهان واحمد واقفين ومخلوعين من منظرنا ، بعد خليتم اتفشو تماام قلت ليها خلاص ي امي كفاكم رفعت سامح منها وشو كان ملان دموع وعيونو بقت صغااار وزي الشرار ، بعد هدت شويه قامت تاني ساعه تسالم فينا وتبوس في سامح وهي لسه بترجف : انا ما مصدقه عيوني ما مصدقه انو انتو قدامي اسي بعد ده كان مت هكون مرتاحه ، (امي شكلها متغير بقت سمراااء وشايخه مع انها ما كبيرة شديد ملامحه بااهته وحزينه ) انا : ليه ي امي بتقولي كده بعد الشر عليك ، غيرت الموضوع : جيهان احمد تعالو سلمو على اخوانكم حتى انا انتبهت اني ما سلمت عليهم احمد الاصغر كان عمرو 8 سنه اخر مرة شفتو وهو و عندو سنتين عشان كده ما عرفنا بس جيهان كانت متزكراني ، جود قالت لاحمد دي حنان وده سامح مش وريتك صورم في تلفون ماما ديل اخونا ، احمد : يعني هم والداهم امي زي ما ولدتنا نحن ؟ ، جود : ااااي ، احمد : طيب ليه ما كانو قاعدين معانا، جود : عشان هم شغالين في مكان بعييد ، جود مع انها ما كبيرة شديد في سابع لكن عقلها كبير وفهما واسع جدا ما شاءالله عليها وجمييلة شايلة ملامح امي اكتر مني انا زاتي ، احمد مبسوط بسامح نهائي ما زح من جمبو يشيل ويسال وسامح برد باختصار اظن لسه متوتر ، امي قالت : تعالي ي جود نعمل الفطور عشان يخشو يرتاحو شويه ، جود : احلى فطور لاحلى اخوان فيك يا دنيا هناكل بي نفس الليله ، ههههه هي ظريفه شديد والفي قلبها على لسانها طوالي صريحة جدا وبتعبر عن مشاعرها سريع وبسهولة ،عشان كده سامح كل مرة بتفاجأة من تصرفاتها معاه وكأنها بتعرفو من سنييين في حين انو هو اول مرة يقابلها مفتكرها حتخت حدود في تعاملها معاه ♡ جيهان شوية خجولة وهاديه ، بعد فطرنا وشربنا العصير امي شابكانا خشو اتاحو شويه قومو خلوهم يرتاحو واحمد و جود ما عايزين يفارقونا بعد تعب احمد اقتنع وفك سامح ، فعلا كنا محتاجين راحه من امبارح عينا ما لاقت النوم ، سامح اثناء ما نايم حسى بي سائل حااار طلع من نخرتو صحى مفجوع وجرا الحمام تندقر فالمغسلة ورعف مسافه حتى وقف كان بسيط بس اكتر من كمية المرة الفاتت غسل وشو وحمدالله انو الحمام داخلي وماف زول شافو ، رجع رقد وكان بفكر بس ،، صحيت بصوت امي : حنان قومي ي بتي الصلاة فاتتك ، انا : الساعه كم ؟ ، امي : الساعه ماشه على خمسه بعد دا ، قمت سريع لا حولااا الضهر ما صليتو غايتو زمنكم ده بجري سريع خلاص ، امي : هههههه اي والله صلي وتعالي الغدا، مشت لسامح لقتو صاحي قاتليه ارح نتغدا ، بعد اتغدينت قعدنا فالهول امي بتسال فينا من جهة واحمد شابك سامح من جهة و جود من جهة فرحتم بي جيتا ظاهره فيهم الا سامح ما زال مشوش، امي : سامح مالك ي ولدي انت ما بقيت كويس ؟ ردالها بتوتر : كويس الحمدلله مالي؟ ، امي : نان مالو وشك شاحب كدا وصحتك نازلة ، سامح : مرهق بس ، المساء جود جات تنوم معاي قعدنا نتونس شويه سالتها من ابوها لاني ما شفتو وما بقدر اسال امي ، فقالت لي انو ابوي يوم يجينا واسبوع ما يجي بقول انو مشغول وبسافر كتير جوة الإمارات + مرات بمشي بيتو التاني لاخواني الكبار ، خشيت الواتس لقيت لسمر مرسلا لي : اها وصلتوو؟ ي بت وينك نسيتيني خلاص وكلام كتيير ، رفعت صورتها فالحاله وكتبت :{ ﻣﻦ ﻛﺎﻥ ﻟﺪﻳﻪ ﺃﺧﺖ ﻓﻬﻮ ﻣﻠﻚ ﺍﻟﺪﻧﻴﺎ ﺑﺄﻛﻤﻠﻬﺎ ؛ وسمورتي ﺑﺤﺪ ﺫﺍﺗﻬﺎ ﺩﻧﻴﺎ ﻭﻋﺎﻟﻢ آخر♥} ، الصباح لقيتها مرسلا ايموجي باكي😭 ، سامح انفتح شوية مع اخواني وبقى يدي وياخد معاهم فالكلام هو لو ما عمل كده احمد و جود غصبا عنو بخلو يتفاعل بلطافتم ، امي انتهزت اول فرصه بقينا فيها برانا وبدت تنبش فالماضي وتعتذر وتبرر لينا كانت بتبكي بحرقة وندم شديدين وقالت انو راجلها كان بمنعها من جيتها ليها وبهددها انو لو سافرت تاني ما هتعرف طريق لاولادها ، انا شفتو صادفتو كم مرة في اجازاتي معاها ما كان ظاهر عليه انو شراني كده برجع واقول المظاهر خداااعة ، سامح هو الكان بخفف عليها وبقولها انسي زي ما نحن نسينا ونحن ما زعلانين منك واعفي لي عن قسوتي معاك ووو..الخ ، انا مبسوطه وما متفاجأة من سامح اصلا مافي اطيب واحن من قلبو بزعل و يزعل بس برجع يسامح مشكلتو ما ببين لخصمو شعور السماح ده بسهولة ، عدن يومين ما حسينا بيهم والله من الفرح والحب الكنا غرقانين فيه ، اليوم التالت طلعنا كللنا اتفسحنا واشترينا شوية حجات لاخواني سامح قاليهم معليش مفروض اجيبلكم من هناك وكده ، جود : وجودكم معانا فاللحظه دي اجمل واغلى هديه في الدنيا ♡♡ لمن بقينا راجعين بكو واتأثرو شديد حتى سامح بكى وكان بضمهم واحد واحد بالزات احمد اتعلق بيه بصورة مبالغه فاليومين ديل ، امي تبكي وبتقولنا اسي دي جية شنو الصغيرة دي شحتفة روح ساي 💔 سامح : معليش ي امي لو ما جامعة حنان كان بنقعد لكن وعد اجازة السمستر بنجيكم ، فالطيارة سامح كان فاتح تلفونو وبقلب في الصور الاخدناها مع امي واخواني مع كل صورة كانت دموعو بتنزل وبرجع يمسحها سريع عشان ما اشوفها 💔
تصرفاتك باتت معهودة لدي ولكن شيئا ما يبدو غريبا كأنما يخبرني بحلول كارثه عظيمه فالقريب العاجل فاللهم لطفا وجبرا يليق بنا 💔
