#انت_نعمتي8
#Hanan_Adil ✒
{ ﻭﺟﻮﺩ ﺍﻷﺥ ﻓﻲ ﺣﻴﺎﺓ ﺍﻟﻔﺘﺎﺓ ﻫﻮ ﺣﻀﻮﺭ ﻟﺼﺪﻳﻖ ﺃﺑﺪﻱ ، ﻭﺭﻓﻴﻖ ﺃﻭﻝ ﻟﻠﻄﻔﻮﻟﺔ.، ﻭﺻﺨﺮﺓ ﺗﺴﺘﻨﺪ ﺇﻟﻴﻬﺎ ﻋﻨﺪﻣﺎ ﺗﻜﺒﺮ ❤ }
وصية سامح لي ظااهرة انها وصية زول مفارق لكن لم سألتو ليه بتقول لي كده قال : مش انتي عايزة تعرسي لي انا هأنشغل مع مرتي و أولادي ما هأفضي ليكم ،، انا : ههههه شوف ده بالله من اسي عايز تبيعني ؟ ،، سامح : ما ببيعك لكن ما بكون زي اول ، انا : تصريح واااضح وصريح انك بعد تتزوج هتتغير مني زي ما بعملو البعض مش مش ؟ ، سامح : ما اسمها هأتغير اسمها مسؤلياتي هتزيد هاااا ، انا : حتى ولو ! انت قدرها يا ابو عادل معقوول يا سموح ده انت سيد الناس وتاج الرأس شرائح الاناناس و......، سامح : خلاص خلاص انتي هتبكشي انا بمزح معاك ده انتو اشيلكم على راسي واختكم جوة عيوني انا بس كنت عايز اختبرك لكن لقيتك ما مؤهلة وبتتزاوغي من مسؤلياتك وفاكرة نفسك لسه شافعه ، انا : ههههههه يخسي عليك والله انت ظالمني انت لو عايز تشوف مؤهلاتي عرس لي وكتها هتعرف لو بالجد مسؤلة ولا لا ؟ عملتلو حركة اني خجلانه وكدا ، سامح : شوف البايرة انتي لو قعدتي تاني سنه وما عرستي بتسكنيني التجاني عشان كده شوفي راجلك وانا من بكرة بعقدلك ، انا : راجل شنو البشوفو انا ، انت قاعد لشنو جيبو لي ، سامح : سبحااان الله انتي البتقولي كدا العارفو انا بنات الزمن ديل الواحده بتختار شريك حياتها براااها ، انا : بس ما كل البنات اناا ، انا حابة اتزوج زواج تقليدي من اختيارك انت غير كدا قاعدالك على قلبك ، سامح : وانتي على قلبي زي العسل والله و لو ده قرارك بس اتخرجي طواالي بعقد ليك ، كان بتكلم جادي طبعاً قلت ليه انت شكلك نعست هوووي تصبح على خييير خليتو يضحك وطلعت ،، الإسبوعين ديل قضيناهم جري مع المشروع ما ارتحنا اصلو عايزين نتفكفك ونوفر زمن للامتحانات النهائيه ، بعد خلصناه سمر قالت لي انا عازمة نفسي بيتزا على حسابك ممكن؟ ، انا : انتي عزمتي نفسك وخلصتي ممكن دي لزومها شنو ارح انجري قدامي ، سمر : ههههه ما انتي غياظة مفروض تجي منك براك نظام سلبريشن وكدا ، انا : على اساس كنت شغالة براي وكدا هاا؟ ، بعد اكلنا وشربنا العصير عملت لي حركه كدا قلت اقيس نبضها قلت ليها : تخيلي سامح اخوي واخيرا اقتنع لي بالعرس خلاص ، اول من اتخرج طواالي بزفو على بيتو ، عاينت لي مسااافه وقالت : اممم كويس والله ومجهزين العروس ولا بتحضرو ساي ؟ ، طبعا العروس جاهزة زميلتو فالشركه قالي هعرفك عليها قريب ، سمر وشها جاب مية لون والا الما بكت قالت : احم خلاص ارح عشان اتاخرت ، انا : ياخ اقيفي خليني اتم حلمي واتخيل شكل العروس ، سمر : ما فهمتك ،، انا : يعني انا حاليا بتخيل انو سامح وافق لي وكدا ، سمر بعد مي قايمه قعدت مسافه اظن لم حيلا شالها حبة وانا كاتمه الضحكه بالعافيه قامت وقالت لي بقيتي ثقييلة ومتخلفه على فكرة حيوانه دي وطلعت لحقتها وانا بضحك : اسي انتي مالك علي اجي ، يا بت انا بتكلم معاك سمر سمورتي بت ، المواصلات ما انتظرتها ركبت امجاد ومشت هههه بس اتاكدت من شكوكي وابتديت افكر فالموضوع بجديه وابحث عن طرق أخرى اقنع بيها سامح ♡المساء بعد جا كنت عايزة اكلمو لكن شفتو تعبان فخليتو ، سمر رسلت لي واتس بتعتذر وكدا قلت ليها افتكرتك عايزة تباركي لي 😂 قفلت بياناتها وطلعت ، قبل انزل الجامعه بيوم كالعاده انا و سامح طلعنا مشوار ظريف واي زول يلاقينا يعلق علينا حلاتكم لايقين على بعض ♡انا كنت ماسكه من يدو ، قالي على فكرة بطريقتك دي بطيري مني المزز والله ، انا : ههههه اصلا ما عايزة واحده تقرب منك ، سامح : عايزة تعرسي لي كيف طيب ؟ ، انا : انا كنت بمزح اوعى يكون فكرت فالموضوع جد جد ، عاين لي وضحك قالي اخير اسكت بس ارح ارح خلينا نطلب ، انا : هههههه هم اساسا دايما تفكيرم سطحي اسي ما شايفين وجه الشبه بيناتنا ؟، سامح : امكن بت اهلي وبنتشابه وين المشكله !، انا : ي سيدي آآآسفين وكان على المزز انا بجيبهم ليك لححد عندك بس انت قول خييير،، سامح : عليك الله ما تخربي لي الطلعه اكلي من سكات ،، انا : سامح....،،
سامح : قلنا اقفلي السيرة خلاص💔وغير الموضوع ،، اثناء ما بناكل اتصل عليه فؤاد اتاري سامح صور الاكل ورسلو ليه واتس ، شبكنا ما عافيلكم وما ينفعكم ان شاءالله كان بمثل انو ببكي بي صوت وانا ميتة ضحك قال لسامح قول للفضيحه دي اضحكي براحه ، سامح فاتح الاسبيكر قربت منو وقلت ليه عاد يا فؤاد ما تقولي المشاوي فاتتك والعجب السمبوسه اممم، فؤاد : والله العظيم انتو ما عندكم خوة ومن يوم الليله لا بعرفكم لا بتعرفوني وبكرة بعزم نفسي براااي وبعزها وطوالي قفل الخط ، بنضحك فيه قلت لسامح : حراام عليك ياخ ما كان ترسلا ليه ، سامح : دا تار تار 😂 ،، بعد رجعنا البيت سامح قالي تعالي نتصل على اخواني ♡وصل اللابتوب واتصلنا فيديو امي مجرد ما قالت ليهم اخوكم اتصل جود واحمد بدو يتقالعو فالتلفون وسامح بضحك قاليهم هزيتوني دقيقه ثبتو التلفون واقعدو كلكم بعيد هشوفكم كلكم والله ، امي قالت غلطانه انا ما كان اكلمكم الا بعد اخلص ، وانا بضحك فيهم اتونسنا معاهم قريب الساعتين واكتر شي بتكلم انا ، سامح كان بعاين ليهم واحد واحد وبتأملهم كأنها آخر مرة يشوفم فيها 💔،، مرت الأيام والكل منغمس في مشاغلو ونحن ديل بس لينا الله حفينا من جري الجامعه حتى الجمعه بنقضيها فالمكتبه ومرة زهجت من القرايه و قفلت معاي سته صفر ، قمت ظبطت لي قهوة بي بخورها و بوشارها و فتحت الاستريو وقلت لابو السيد يلا اشجيني اشتغلت اغنيه :-
اديني إحساس بالأمل
في كل رحلة شوق تطول
وادي الخطاوي الراجعه ليك
في سكتك عشم الوصول
ما الدنيا كلها ارتحال
والانتظار قدر الوصول
الموجة تحلم بالضفاف
والغيمه تحلم بالهطول
***************
ﺭﺍﺣﻞ ﻣﻌﺎﻱ ﺿﻲ ﺍﻷﻣﺎﻧﻲ
ﻭﺫﻛﺮﻱ ﻟﻸﻳﺎﻡ ﻫﻨﺎﻙ
ﻟﺤﻈﺎﺕ ﺑﺘﺬﺧﺮ ﺑﺎﻟﻤﻌﺎﻧﻲ
ﻭﻛﻴﻒ ﺃﻧﺴﻰ ﺗﺬﻛﺎﺭﺍﺕ ﻫﻮﺍﻙ
ﻧﺘﺤﻤﻞ ﺍﻟﻐﺮﺑﺔ ﻭﻧﻌﺎﻧﻲ
ﻭﻧﺼﺒﺮ ﻋﺸﺎﻥ ﻧﻜﺴﺐ ﺭﺿﺎﻙ
ﻭﻧﻐﻨﻲ ﻟﻮ ﺯﺍﺩ ﺍﻟﺤﻨﻴﻦ
ﻳﺎﺭﻳﺘﻮ ﻛﺎﻥ ﺳﻔﺮﺍً ﻣﻌﺎﻙ 💚
****************
كنت في غرفتي مركزة معاه وبدندن وآخر انتشاء لدرجة ما حسيت بسامح وهو واقف بعاين لي على غير العادة جا بدري قالي : كر يا بت امي وصلتي اخر مراحل البورة المزاج العالي ده كلو مع نفسك؟ ، انا عملتو خمسه وخميس بيدي : وهو في اغلى من نفسي عندي عشان اعزوو؟ ، سامح : قلتي لي ابو السيد وكدا♡
انا : اممم العشق المشترك ♡، سامح : س سؤال انتي اصلا معجبه بيه ولا بس معاكم معاكم الانا بسمعو انتي بتسمعي اصلك جنك محاكاة ، انا : ههههه يا اخوي الفن ده ملكية عامه ما محصورة عليك ثانيا انا فعلا زمان كنت بسمعو معاك وبس لكن بعد كبرت وفهمت كلمات اغانيه لقيتها بتلامس الوجدان وتعانق الروح وبتمثل الواقع فلقيت نفسي بعشق ابو ابو ابوالسيد وما بقدر اتخلى عنو 😊، سامح صفق لي : لا برافو عليك يا عميييقه انتي خلاص اخليك تنبسطي مع ابوالسيد انا عايز انوم لي شويه ، انا : تعال هنا مالك جيت بدري اليوم ، سامح : كان عندنا شغل برا وخلصت بدري ، انا : طيب اعملك عصير ، سامح : لا ما عايز اسي لبعدين ،، بعديها بفترة ورغم انشغالي لاحظت لسامح ماشي متغير ابتدأ ينتكس تاني اكلو قل ملامحو مرهقه عيونو دخلت لجوة حولينها هالات سوداء شعرو خف شديد ، وما زال بطمني انا كويس و ما تشيلي هم ، كل يوم بوعدني نمشي الدكتور سوا بمشي فيني ساي اخر النهايه اقنعني انو ساق معاه فؤاد الأكد لي بي كده لم سالتو ، كم مرة كنت بشوف كابوس مرعب مجرد ما بصحى من النوم بنسى تفاصيل الحلم بجري على غرفتو عشان اطمن عليه بلقاه نايم فبقعد اهبش جسمو كلو واصلح ليه الغطى وارجع لكن ما بقدر انوم بمشي اصلي وأقرا قرآن ، وإحساس انو في مصيبة جاياني ابدا ما فارقني لحدي ما يوم وانا فالجامعه كنت بقول لسمر قلبي مقبوض شديد انا حاسه بمصاريني دي كامشه كدا لمن غالبني المشي ، سمر : بسم الله قمتي لي هلوستك خلاص؟ ، مسكت تلفوني واتصلت عليه : سامح انت وين ؟ ، سامح : فالشغل ي حنان مالك انتي كويسه ؟، انا : انا تمام بس بطمن عليك ، سامح : وانا كويس ي بت مالو صوتك متغير؟، انا : لا مافي شي تعبانين ساي طيب خلي بالك من نفسك لمن نتلاقى ، سامح : حااضر وانتي كمان يلا في امان الله ♡ ، في نفس اللحظه دي سامح فالعربيه مع فؤاد الكان سايق باقصى سرعة ليه وجسمو بتصبب عرق من الخوف و الحالة الفيها سامح وبقولو ما تخاف ي سامح ما هيحصلك شي انت كويس سامعني اسي هنصل المستشفى وتتعالج انت مالك فجأة ما كنت كويس سامح سامعني فتح عيونك عاين لي ، سامح وقع التلفون من يدو بتنفس بي صعوبة شديده ماسك في بطنو وما قادر يتكلم ابتدا ينزف بي نخريه فؤاد لم شاف النزيف جن جنونه وزود السرعه لاقصى حد ، الحمدلله الدكتور المتابع حالتو كان موجود اول من وصل دخلو العناية المكثفه ، ادوه جرع كيميائيه بالوريد وعملولو كل الاجراءات اللازمه ، الدكتور وطاقمو المعاه ما فاتوهو للحظة ، بعد تلاته ساعات مرت من الهلع والتوتر حالتو شبه استقرت والحمدلله ، الدكتور ساق فؤاد المكتب وبدا يتكلم معاه ،،
فؤاد : خير يا دكتور سامح مالو ؟ هيبقى كويس صح ؟ هاا جاوبني سريع ،، انتو لو ما قادرين تعالجو كلموني انا مستعد اسفرو برا واودي احسن مستشفيات العالم بس قولي ، الدكتور : اهدأ يا فؤاد صدقني مافي لزوم ولو بحتاج انا براي كان كتبت ليكم السفر في النهاية بتهمنا صحة المريض وعلاجو لو من اخر الدنيا بنجيبو ليه ، فؤاد : طيب هو اسي كيف هيرجع يتحسن ؟ ، انا ما عارف الحصلو شنو فجأة قبيل الصباح كان كويس ،، الدكتور : اصلا المرض ده غدار بصورة ما تتوقعها وما عندو امان ممكن عادي بعد ما المصاب يتماثل للشفاء يهجم عليهو تاني و بطريقه شرسة اعلى من اول زي ما حصل مع صحبك اسي ، فؤاد : ما فاهمك انا قصدك شنو؟، الدكتور : سامح لازم يعمل عملية زرع النخاع باسرع وكت ممكن والا تاني انا زاتي ما عارف الهيحصل شنو هاعمل كل البقدر عليه والباقي بيد الله ده غير انو ظهر معانا تضخم بسيط في الطوحال ، قبل فؤاد يرد ليه جات الممرضه و قالت للدكتور فؤاد ده منو المريض طلب يشوفو ، فؤاد ما حسى بنفسو الا وهو قدام سامح دموعو بتنزل ويرجع يمسحها حاول يتكلم لكن العبرة ساده حلقو ،
سامح مركبين ليه الأوكسجين بدا يتكلم بكلمات متقطعة وصوت خافض : فؤاد يا اغلى ما املك اعظم اخ واجمل رفيق كنت بتقولي مافي شكراً ولا آسف بين الاصدقاء ، وانا بقولك مافي كلام اصلا يتقال في حقك كل العارفو اني منون ومديون ليك لاخر لحظه و.....، قاطعو فؤاد بصوت باكي ومهزوز وجسمو يرتعد : هشش اسكت خلاص قولي من الاخر عايز شنو ما راجع معاي الشركه مش داير تحنكني عشان اشتغلك شغلك ، سامح بحاول يضحك عليه ، فؤاد : بعرفك انا ما بتمدحني ساي لكن انا شبر ما متحرك من هنا لو ما قمت معاي ، سامح ما تضعف ي صحبي ازمه وهتعدي قدرها انت هااا !! بكرة تتغلب على المرض وترجع شدييد بس الله يخليك اتماسك ، سامح : ما بيدي ي فؤاد انا خلاااص حاسي بي نفسي.....، فؤاد ما قدر يمسك نفسو بتكلم وببكي : لاا ما تقولا اسكت اول مرة اعرف انك جبان كدا انت ليه ما بتسمع الكلام قلت ليك هتبقى كويس يعني هتبقى كويس عايز تخلف وعدك معاي طيب وحنان اسي بتكون منتظرة جيتك يلا قوم انا هامشي للدكتور يخرجنا اسي انت هدا كويس ما فيك شي بتتدلع علينا ساي مش ، خليك قبلك اوعى تتحرك بجيب الدكتور وبجي يطلعنا هااا ، سامح مسكو من يدو ووشو مبلل دموع وقالو : اتصل لحنان تجي ، فؤاد : ما هتصل نحن ماشين ليها اصبر بس ، سامح عاين لفؤاد بحزن شديد : فؤاد ارجووك اتصل ليها ، فؤاد : خلاص طيب هننتظرها ونطلع سوا ماشي ؟، فؤاد طلع برة وقف مسااافة مسح دموعو و حاول يكون طبيعي مثبت التلفون بقوة عشان ما يقع منو بسبب الرجفه الفي يديه وجاب رقمي ،، نحن كنا طالعين جمب البوابه تلفوني رن اول ما شفت رقم فؤاد فالشاشه حسيت بقلبي اتفتح نصين رجولي ماتت مسكت سمر من يدها وضغطها بقوة قلت : وااي سامح 💔 ( فؤاد ما من عوايدو يتصل علي ابدا بالذات وانا فالجامعه ) هي بتقولي قولي بسم الله كدي ردي ، اول ما فتحت الخط : فؤاد سامح جاتو حاجه ؟.رد لي بعد مسافه : سامح كويس بس جينا لمقابلتو وقالي خلي حنان تجينا هنا نسوقها معانا البيت تلفونو مطفي هو ، كلامو ده لو اتقال لمجنون ما بصدقو ده غير اني لمست الحزن والتوتر الفي صوتو ، ابتديت ارجف ودموعي جاريه كلمت سمر بكلام فؤاد : سمر سامح حاصلة ليه حاجه انا متاكده فؤاد كذب علي وديني المستشفى سريع الله يخليك ، سمر : طيب طيب استهدي بالله ما تعملي كدا سامح هيكون بخير ان شاءالله ما تخافي ، وقفت اقرب امجاد وكانت راكزاني لانو انا الفيني كملت وأساسا من الصباح ما على بعضي طول الطريق شابكه بتاع الأمجاد اسرع زود السرعه شويه الله يخليك وسمر ما زالت بتهدي فيني ،،،
اثناء ما فؤاد مشى للدكتور يكمل باقي اسألتو ويستفسر اكتر عن حالة سامح ،، جات الممرضه تجري يا دكتور يا دكتور الحق المريض كان في كذا ممرض وومرضه تانيين اتزاحمو على غرفة سامح فؤاد واقف مخلوع بعاين ليهم وهم بتجارو كدا ما قادر يتحرك ما قادر يسالم في شنو مالكم ، الدكتور خشى معاهم وشغالين ليه كشف ودلك وتنفس صناعي ، خيبة امل اصابت من كانو معه داخل الغرفه ، فؤاد ماشي بخطوات متثاقله بجر في كرعيه بالقوة لمن وصل جمب الباب اتلقى الدكتور طالع و دموعو ماليه وشو وتعابيرو بتحكي الحصل من غير ما ينطق بحرف..........💘
أيها الراحل إلى وطن النائمين طويلا ، ﺃﻋﺎﻫﺪﻙ ﺑﺄﻧّﻲ ﺳﺄﺩﻋﻮ ﻟﻚ ﺣﺘﻰ ﺃﺟﺎﻭﺭﻙ ﻭﺳﺘﺒﻘﻰ ﺣﺎﺿﺮﺍً ﻓﻲ ﻗﻠﺒﻲ ﻣﻬﻤﺎ ﺃﺧﺬﻙ ﺍﻟﻐﻴﺎﺏ💔💔
