#انت_نعمتي7
#Hanan_Adil ✒
بعد وصلنا الخرطوم فؤاد كان منتظرنا بي عربيتو اول من شافنا : السودان نوور والله ياخ مشتاقين وقلد سامح مسااافة ياااه ي صحبي السنين مرت سريع فقدتك شديد والله ، اتلفت علي حنااان ما شاءالله كبرتي والله لكن ما اتغيرتي كتير نفس الملامح والشبه ، سامح ده يضحك لمن يدمع ، انا : واي يا مرارتي سامح انا راجعه ، فؤاد : يمين ما بترجعي اسي قبل ما نضيفك اففو كمان تعالي تعالي ، لحدي ما وصلنا البيت ما قالو كلمتين جادات ورا بعض الا بعد خشينا سالنا : امكم واخوانكم لقيتوهم كيف ؟ انا : أخيراً فقت من ثمالتك ؟ ، سامح : كويسين الحمدلله بسلموا عليك ، فؤاد : على أساس انهم بعرفوني وكدا ، انا : يلا ما تبقى ضيف ثقيل خلينا نرتاح ، فؤاد : هوي زاتي ما فاضيلكم والله بس كنت ماشي اجيبلكم غدا وناكل سوا لكن بعد ده تشمو قدحه وطلع ، نحن زاتو ولا حاسين بي جوع نممنا لحد المغرب صحيت سامح صلينا ودخلت المطبخ اشوف لي شي ناكلو وشغالة كركبه سااي فالمطبخ الجرس ضرب و سمعت صوت فؤاد برة والله فرحت قلت يا رب يكون جاب حاجه طلعت سرعه لقيتو شايل كيسين في يدو قال: عارف مافيكم حسنه لكن حننتوني والله ، مسكت منو الاكياس كنت بعاين ليه ومبتسمه الود اتوتر توتر لمن حيرني وشبكني ليك انجزي ياخ انا جعان ، يعني فؤاد ده بالجد مافي كلام بتقال في حقو تنطبق عليه مقولة : [سلام على الدنيا إذا لم يكن بها صديق صدوق صادق الوعد منصفا ♡]، حضرت الاكل وكانو بتكلمو براحه هو وسامح من جيت انا سكتو وغيرو الموضوع ، فؤاد : اها بكرة هتجي الشركه ولا عايز تركلس حبه ، انا : شركة شنو ياخ مددلو اجازتو اساسا سامح ده نهائي ما قاعد ياخد اجازة ، سامح : واخد اجازة ليه ماشي وين هتقولي لي عيان هدا بقيت كويس وتاني شي انتي نازلة جامعتك هاأجز مع منو مثلا ، انا : ههههه جالك كلامي قلت ليك عرس اسي كان تاجز مع مرتك ، فؤاد : عرس شنو احسن ليك كدا يا صحبي عايزة تورطك ، انا : يا كون محضر خير يا ساعدنا بسكاتك ، فؤاد : اسكت وانا شايفك بتجري على النار بي كرعيه ، انا : انت ما نصيح يا ولد نار شنو ؟ وخرافات شنو الزواج ده سنة الحياة و مصيرو يستقر ويكون بيت واسرة ويجيبلو اولاد يشيلو اسمو ، فؤاد : اديك قلتيها سنة ما فرض و انا ده بشيل اسمو انتي اتفكي منو ، انا : هههههه فؤاد اتكلم بجديه سامح ما تسمع كلامو ما عايزك تعرس وتخليه باير والناس تشيل حالو ، فؤاد : حالي هيفضل مستوور طول ما انا سنجل وفري وعايش على مزاجي ، انا : انتو اساسا لو ارتبطو ولا اتسنجلتو فري ايفري تايم ، نحن البنتقيد بيكم وبتخنقونا بارتباطكم ، فضلنا نتناقش كده وكل مرة يطلع لي بي حجة غير لحد ما العشا اذن وفؤاد قال ماشي سامح طلع معاه للصلاة فالطريق رجعو يكملو حديثم القطعو قبييل ، فؤاد : ها يا سامح يعني خلاص قررت وجهزت نفسك تماام ؟ ، سامح : ايوة ربنا يسهل بس ، فؤاد مسكو من كتفو : ان شاءالله ما تشيل هم ، دخلو صلو وسامح قعد يقرأ قران ويدعي مسافة زمن بعديها فؤاد قالو موعدنا بكرة ومشى ، سامح قعد في صبة طرف الشارع كده واتصل على الدكتور كان اسمو يحيى : الو سلام عليكم ،
د/يحيى : وعليكم السلام ورحمة الله ، سامح : انا سامح عادل ي دكتور عرفتني ، د/يحيى: مرحب مرحب يا ابني عرفتك اي وكنت منتظر اتصالك ده ، كيفك ان شاءالله طيب ؟ ، سامح : الحمدلله بخير والله ااا كنت عايز اخد منك موعد عشان ابدا العلاج وكدا ، د/يحيى : جميل جدا وخطوة ممتازة منك بكرة الساعه 10 تشرفني في مستشفى ال(....) ، سامح : هكون فالموعد ان شاءالله ، د/يحيى : وانا هكون في انتظارك في امان الله ،، سامح بعد جا قالي اعمليلي قهوة ، لم وديتها ليه لقيتو فاتح شنطتو وبشوف في حجات كده اول مرة اشوفها عندو ، سالتو بغرابة سامح ! ديل جبتهن من ويين هههه؟، سامح : بابتسامه عرييضه رفع علاقة المفاتيح شكل كورة كده دي اداني ليها احمد♡تاني مدا لي ساعة صبيانيه لكن ملبوسه مع خاتم جديد وقالي ديل من جود ♡ كانت في ورقة ملفوفه ومثبته بإستكه ، شلتها وانا بفك فيها ودي شنو كمان ؟ لم فتحتها انبهرت شديد كانت راسمه سامح بصورة مبالغه مع انو في حجات ما ظبطتها كويس لكن بالنسبه لعمرها شغل هايل و كمان موقعه اسمها تحت جيهاان !! لالا خطييرة اتاري سكوتها دا وراهو ابدااع ، سامح مسكها مني اتأملها وعيونو بتلمع وعلى وشو نفس الابتسامه وقالي : امم ما شاءالله عليها راجيها مستقبل واعد بإذن الله ، انا : اشعر بالغيرة على فكرة بسببك نسوني انا ما ادوني حاجه ، سامح : انتي لم كنتي بتمشيلم بدوك ؟ ، انا : ااي جود وجيهان طوالي بدوني ، سامح : خلاص ما تزعلي ي حنون انا وانتي واحد ولا شنوو؟ ، انا : هههه طبعا طبعا ودي دايرة كلام ، يلا ارتاح وما تساهر عشان بكرة وراك شغل مع انو القهوة دي ما هتخليك تنوم ، سامح : لا بنوم ما بتعملي حاجه قهوتك الخفيفه دي ، انا : اساسا قاااصده اخففها يلاا تصبح على خير ، سامح : وانتي من اهلو ،، الصباح كلمت سامح اني ماشه لسمر بعد هو طلع ورتبت البيت شلت الهدايا الجبتها ليهم ومشيت فطرت معاهم ، كانت بتسال فيني من ردة فعل اخواني وسامح في اول لقاء بينهم ، قلت ليها : شي خراافي ما هاقدر اوصفلك اتبسطوا قدر شنو حتى سامح إحساس الرضا بان عليه وكمان وعد امي اننا هنمشيلم تاني في اجازة السمستر وفضلت احكيلا بعمايل اخواني معاهو♥،،
