كي كنت فالبيس ريحت شويا واستغفرت ربي
داونا لبنات للسيتي ولولا تاني حطينا صوالحنا وعاود مشينا للوبيتال تما نسيت روحي كامل كي شفت المهنة شحال شابة والناس لي تما يعانيو كتر مني شكرت ربي وقلت نزيد نصبر وخلاص
من بعدا ولينا للاسيتي وانا شويا مريحة فنفسيتي علا الصباح قالونا غدوا ريحو وحوسوا من بعد نكملو
انا تفكرت غدوا خاصني نخرج دراهم ملبانكا بابا الله يرحمه كان دايرلي كونت فيه شويا دراهم راني نتمشى بيهم باش يفوتولي شا باقيلي
.......
فالصباح لبنات قالولي يالله تخرجي تحوسي معانا مي انا محبيتش حبيت نقعد وحدي شويا
ونتمشا وحدي هادي فرصة جاتني نريح فيها ونبدي من جديد
لبست غوب شابة ودرت خيماري وخرجت روحت لابنك خرجت دراهم ماباقيليش بزاف خاصني نحاول عليهم وبديت نتمشا ونشوف فالناس ونتفكر كامل واش صرالي في حياتي، مانبغيش دور الضحية ونعاف روحي نحس روحي مثيرة للشفقة راني قاسية بزاف على روحي مي لازم ادا بغيت نكمل واش باغيا ونعوض كامل لي عشته
تمشيت شحاال كانت العشرة تاع الصباح
مرة وحدة حبست تفكرت حاجة
كنت نسيتها ياااه لافامي تاع بابا يسكنو هنا ترددت فلول مبعدا حسمت أمري وشديت تاكسي قتله لادراس ني عاقلة عليها خاطرش كاينا في وراقيا
حطني شويا بعييد زدت تمشيت شفت الفيلا هاديك يااااه يا حصرااه عندي ذكريات قليلة هنا باسك كان ف عمري 8 سنين كي مات بابا
قربت للباب وبديت نسمع الحس كانو مجمعين فالجنان هوما لاباس عليهم الله يزيدهم
شفته شفت جدي عينيا دمعو تقول شميت ريحة بابا كي جيت لهنا باينة فرحانين من وجوهم وضحك ولعب والقصرة سهيت نشوف فيهم
حتا نقزت مالخلعة واحد زمر عليا بلوطو رانج روفر باغي يدخل للفيلا ف يبان جون مشفتهش مليح باسك لوطو
دخل هوا وماقيمني ماسقساني شكون انا بلاك حسبني كاش وحدة
دخلت موراه هو خرج ملوطو باينة حطة وواثق في روحه وبقلاوة الله يبارك سلم علا دوك الجماعة وقعد معاهم
تقدمت عندهم كي نتبهولي بداو يشوفو فيا مستغربين غي جدي حسيته عرفني
ناضت عندي مرا فالربعينات هاكداك قاتلي خير يابنتي كاش مخصك شفت فيها وعينيا دامعين عاود شفت فيهم قتلهم انا بنت محمد ولدكم
صابرينة عبد الله
أنت تقرأ
حكاية صابرين (كرونيك جزائري بقلمي) مكتملة
Short Storyحياتي كاملة وانا نطيح ونوض الظلم والضرب والإهانة وماستسلمتش
