حكاية صابرين (كرونيك جزائري بقلمي) مكتملة

فصل 7

ماقاديتش نرقد هاديك الليلة بقيت نفكر فيه، المرة لولا نشوفه بصح حسيت روحي نعرفه من هادي شحال انا جامي كنت من النوع الرومانسي وما علاباليش بصح هو مانيشعارفا كيفاش نوصف احساسي خاصة مع الموقف تاعه كي شاف آثار الضرب علا جسمي
المهم قعدت هاكا ساهية حتا سمعت واحد يطلع مع الدرج عرفته بلي هو كانت 1 تاع اليل هاكك، قعدت شويا ومبعدا خرجت طلعت عنده لشومبرا طبطبت مبعدا دخلت شفته متكي في بلاسته شومبرا شابة كبيرا تاع اولاد فيها شويا فوضى بصح ماشي بزاف دخلت جمعت فوق كرسي تما سقسيته وين كنت قالي :متخافيش ماقلت حتا لواحد
انا ريحت وقتله :ماشي كيما جا في بالك بصح جدي وخوالي شويا متشددين ومتعصبين بصح نورمال هما رباوني وصرفو عليا
ماعلابالي علاش قتله هاكا بصح انا مابغيتش نطيح من قيمتي قدامه ونبان وليه مسكينة ضعيفة
سورتو هو كلاس وقاري بغيت يشوفني نورمال وحدة قارية بقيمتها
قالي : مهما كان معندهمش الحق كامل يتوشيوك الضرب والعنف ماشي حل سورتو بنت ماتقدش دافع على روحها ونتيا الله يبارك تباني عاقلة متحجبة و ميدسين مالفوق وزيد يتيمة كيفاش يقد يرفد واحد يده عليك والله ما علابالي، هادو قلوبهم كيفاش عاملين
كمل هو الهدرة وانا سهيت فيه انا الرجال لي عرفتهم في حياتي هما خوالي حتا بابا ما عشتش معاه بزاف خلاني صغيرة زعما يكون صح داير هاك هادا آدم
قالي : هاد المرة ماشي نسكت بصح مرة أخرى والله ما نسكت نقول لجدي ومايخليكش دقيقة عندهم
.......
المهم لبنات انا فوت سيمانه تاع الأحلام فريمو سيمانه تهبل مع لافامي تاع بابا زدت تقربت منهم كاملين بنات عماتي واعمامي وجدي
وآدم احم احم ماعرفتش واش نسمي لي بيناتنا بصح  ماشي صداقة علابالي بلي في سيمانة بصح كونا نحكو صباح وفليل
حوس بيا آلجي وزدت تعرفت عليه مليح الحاجة لي تخليني متعلقة بيه هيا حنيته
وصل النهار لي نروح فيه جدي ماخلاني نروح في البيس خلص عليا طيارة حشمني بزاف لحتا قتله صحا ودعتهم كاملين قالولي والي عندنا ديت الأرقام تاعهم باينة وعدتهم نحكي معاهم ونتفكرهم

آدم وانا ماشين للمطار يوصلني جات معانا يسرى بنت عمتي ولينا انا وياها خواتات
ودعتهم وآدم قالي دوك يجي عندي
ركبت الطيارة وحسيت روحي فقت من الحلم لي كنت عايشات وراجعة للكآبة لي موالفتها فكرت وكان نقعد عند جدي تاع بابا ونتهنا بصح لا صبرت صبرت نكمل قرايتي ونوقف علا رجليا ماكلاه نزيدهم همي ونولي عاله عليهم ديجا منديرلهمش المشاكل مع خوالي
المهم ليامات فاتو ووليت لقرايتي في تلمسان والاهانات كل يوم معند جدي وخوالي
آدم جا لهنا زوج مرات شرا ابارتمو باش يقعد فيها كي يجي والفته وحبيته بصح مازال ما اعترفت للا لروحي ولا ليه
سيا شحال من مرة يعطيني دراهم وانا قتله لا
ماحبيتش نكون استغلالية، عطاني لمفتاح تاع لابارتم قلي باش كي نجي جاي نقلك جيبي وحدك تنقيهالي ونخلصها وانا قبلت
ليسونسيال زدنا تقربنا بزااف عرفت طبايعه هو تاني بصح مانحكيلهش كامل كيفاش عايشه يسقسي وانا نبدل السيجي
نحكي مع لافامي تاع بابا دايمن بالواتساب والتليفون
ووليت نعرفهم مليح ويتفكروني دايمن
فاتت العطلة ودخلت سنة الثالثة ميدسين
وبدأت قراية وستاج