اتجازيني حبا

6.

#أتجازيني_حُباً ؟!
.
.
"ومرّةً في العمر، يقف الإنسان بجوارِ أحدهم ولا يودُّ التحرّك حتى لو فاتهُ العالم".
.
.

عذراء :

سمعت كلام ابويه و ياسر عن حادث قيصر و اني افكر ليش هيج صار
يعني هيج ميصير تكمل فرحتي للنهايه !
منو اللي مأذيته لدرجه ستجاب دعائه بيوم مثل هذا اليوم ، ياربي كون وياي

كمت صعدت غرفتي انظر لنفسي بالثوب
صدك حلوة جنت طالعه
تمنيت يشوفني هيج
نزعت البدله و لبست فستان اسود مال حجاب
مكياجي غسلته و شعري كله فتحته
لفيته كبايه و لبست شالي و نزلت

ياسر .«وين رايحه»
عذراء. «لقيصر ! لازم اكون وياه اني مرته»
ابويه. «صعب ترحين هسه بنيتي»
عذراء. « يعني ما تودوني !!!»

محد رد بيهم ، التفتت على براق
عذراء .«بروقه خابري كاظم يوديني فدوة»
براق .«تدللين بس متأكدة ترحين»

التفتت على بابه .«لازم اروح ، لازم اكون وياه»
تركني و طلع و وراه ياسر
براق اتصلت على اخوها كاظم كال جاي

اتصلت على كرار حمايه اخذت عنوان المستشفى و رحنه اني و براق و سراء
هم اجت وياي رفضت تبقى
وصلنه منتظرني كرار برة
من شفته شون صاير و قميصه دم
متت بمكاني ، اكيد خطر هسه هو
دخلنه كلنه ، عمتي كاعدة و تبجي
لمياء صافنه و باقر قلق يروح و يرد بالممر

انتبهت عليه عمتي و كامت عليه تعد و تصف
شذنبي ! مو اني هم تاذيت مثلها
مو نكسرت فرحتي مثلها !
ستحملت عصبيتها و نطيتها عذر
اكيد من حار گلبها على أبنها
سحبني كرار بعيد عن أمه كعدت و يمي براق
سراء بقت واكفه بس معصبه بسبب عمتي
مالي حيل احجي وياها شي

هذا طول جوة و ما عدنه خبر عنه
سالت كرار كال صارله 3 ساعات !!
يعني من اتصل بيه جان صدك طالعين يجون

جذبني شخص فات كدامي شبهت عليه
بقيت مركزة وياه لحد ما تأكدت هذا هو
اي هذا هو ممتوهمه
التفتت على كرار .«تعال وياي»
عمتي و باقر و سراء عيونهم وراي

تقدمت على هذا الشخص وكرار وياي
كرار .«فهميني عذراء»
عذراء .«لحظه ، بلا زحمه ... »

التفت عليه ومثل ما شكيت هذا هو !
ممسافر ، بعدة هنا يداوم مراح
نظر لي بتفاجؤ من وجودي

هزيم .«عذراء !!! شسوين هنا ؟ بيج شي»
هزيت راسي لا .«مو اني هو جوة ، هزيم فدوة ادخل جوة شوفلنه وضعه صار 3 ساعات وما عدنه منه خبر»

هزيم .«اهدئي اهدئي فهميني على كيف»
عذراء .«كرار ..»
كرار .«حضرتك هنا دكتور !»
هزيم .«اي نعم منو عدكم بالداخل»
كرار .«اخويه سوة حادث ولسه ما طالع ، ياريت لو تدخل اطمنه»
هزيم .«اي ماشي ، عذراء اهدي هسه اشوف واجي ماشي»