قناع العروس

١٤

الرد على بعض التعليقات المتكررة :

اول تبادي كدا ! ما حينفع تجو تحرسوني من الدغش و انا كتابه الحلقة بتنزل الساعه 8:00 و رغم داك احيانا بنزلها 7:15pm .. 

1-ليه ما بكتب حلقات كتيرة زي زمان ؟؟

موضحة ليكم في المقدمة اني ما عندي عدد حلقات معين انزلو عشان كدا اتفاديت الوعود من البدايه لاني ادرى بي ظروفي ، و غير كدا تلفوني بقى بيعلق فبواجه صعوبة في الكتابه و بكتب الحلقه الوحدة في يومين عكس زمان + رمضان برامجو كتيرة و بصراحه لو اكتب القصه دي حرف حرف ما عندي نية استعجل فيها لذلك بتفادى بعض التعليقات ! اذا ما عندكم صبر انتظروا لمن تنتهي و اقروها و بكدا نكون حبايب . 

2-البينتقدو في احداث القصه الكتيرة ! 

هههه هي كدا احداثها كتيرة ! و انا بحب الكتابه و الرغي الكتير و اظن من عرفتوني و انا كدا + الانتقاد بالنسبه لي #قناع_العروس مرحلة لسه شوية عليها في رأيي انا ولا كيف ؟، كونك تنتقد حاجة لسه ما انتهت دا ظلم لي اولاً و للقصه ثانياً ! فبتمنى انكم تكتفو بالتوقعات حالياً لاني بحب اقراها ، و خلوها تنتهي و ارائكم لو ما شالها راسي بختها جوه عيوني ! 

والحاجة الاهم من دا : ان القصه دي ما قصه حقيقيه ! قصة من خيالي بس مطابقه للواقع من حيث الاساسيات ، و قبل افكر اكتب نقطه فا انا بحترم عقليتك كقارئ و ما بتجرأ اتجاوز النقطه دي .

واذا ما اصبت المرة دي فاا هحاول المرة الجاية 

و.. قراءة ممتعة للجميع 🖤

#قناع_العروس

بقلم سحر سمير 

-١٤-

بتصفق و هي بتقول ليهو : برااااافووووو راجلي المحترم ! فلمك طبختو على نار هاديه و جاي تغشنا بيهو !! (عاينت لي ام يوسف قالت ليها ) 

اوريكي يا خالتي في الحلقة الاخيرة عمل شنو ؟؟؟ 

#عرسهاااا !!

حاولت امسك نفسي منها لانه هي غلطتي في البداية اني ما وضحت ليها بس هي كل مرة بتثبت لي انه اسلوبها عقيم و تفكيرها محدود و ما بتصدق غير هوس نفسها !! 

امي و عبير في نفس الوقت قالو لي : عرستها يا يوسف !؟؟؟! بس فرق ردة فعل عبير من امي ! ان عبير قالتها بي ضحكة خفيه مرسومة على وشها !! 

عوض : هووووي هااا! شنو انتي من قبيل قاعده تطربقي و ملخبطه الدنيا فوق تحت ! لكن انتي كان دايره نحقق ليك الكلام الفي راسك دا بنحققو ليك تب يا غادة ! انعدلي و ختي حبة احترام لي راجلك و اتعلمي انك تسمعي بعداك طربقي في الكلام بي راحتك ! هو الراجل من الراجل الزيو ما بيقبل صوت يعلى عليهو ! تقومي تجي انتي و باسلوبك ، و حات الخلقني و خلقك قدام راجلك دا بدفنك قبلك !!