عبير بتقول :
مشيت لي امي في المطبخ لقيتها بتغسل العده و ترصها في العنقريب و مقطعه البصل وقفت جمبها .. قلت ليها :
رايقه تسمعيني ؟
__قولي يا عبير !
امي .. ابوي دا لمن اتوفى انا ما كنت واعيه زي اخواني صح ! و من قمت لقيتك انتِ الام و الاب و نفس الشي خالي بكري ! يعني ربيتينا صح و عززتي جوانا حاجات كتيرة سمحة و قمنا عليها ، دايماً كنت بقتنع بي قرارتك وكلامك من غير تفكير .. الا المرة دي يا امي ما قادرة افهمك !
شايفة تصرفات غادة معاكِ قبل العرس كانت حاجة واسي حاجة تانيه خالص ! ورغم ذلك وقفتي معاها رغم انك عارفاها انسانة ما عندها اخلاق .. و بتقيفي معاها لمن تغلط فيني.. ليه ؟!
(ختت الصحانه من يدها ) انا بحاول اصلح الغلط ما قعد اغطى على الغلط و ما دايرة اخرب ليهم حياتهم بالشكاوي الكتيرة واخسر امها وانا عارفة اني ما اتوفقت في اختيار الزوجة المناسبة لي يوسف عشان كدا بحاول بقول يمكن تتغير ! (في اللحظة دي امنيه بتنادي بي تفتيش عبير ..)
عبير : تعالي يا امنيه انحن هنا في المطبخ !
امنيه : اهااا صباح الخير خالتي كيف اصبحتي ؟
بخير يا بتي نحمدالله .. كيف صحتك ؟
امنيه : الحمدلله انا كويسه ، معليش لو قاطعتكم بس دايرة الجلباب يا عبير عشان كدا (عينها وقعت في طشت العده ) ! يا خالتي .. البيت فيهو تلاته بنات ماشاءالله و قاعده تغسلي العده انتي .. قومي لي عليك الله !
عبير : اقيفي يا امنيه .. اول شي انتِ ضيفة هنا عدة شنو التغسليها و تاني شي والاهم ان البمبر دا واطي عليكي بالنسبه للحادث صعبه عليكِ و لسه ما بقيتي تمام انتِ ، و تاني شي امي ما بتحب زول يهبش عدتها ومطبخا عشان كدا زي ما شايفه طلعت خبرتي قليلة في المطبخ !
تسلمي يا بتي انتِ ارتاحي ! و تبقي كويسه وتساعديني بعدين !
امنيه : انا كويسه الحمدلله بس قلبي ما مطاوعني والله عشان كدا راضيني و خليني اغسلها انا !عليك الله !
(عاينت لي عبير ) اتعلمي الذوق !
عبير : براكِ بتمنعيني يا امي اسوي حاجة !
بمنعك عشان بتكسري لي عدتي كلها ! امنيه ! اقعدي هنا ونسيني بس لو دايرة تساعديني !
امنيه : طيب البصل دا دايرة تعمليهو شنو ؟
تقليه بي عصيدة !
امنيه : انا ما عارفه اذا كنت بخش مطبخ ولالا قبل الحادث لكن حسب فكرتي بطبخا ليكم رايك شنو ؟ ما هو يا العده يا الحله الاتنين سوا صعبات والله يا خالتي !
أنت تقرأ
قناع العروس
Randomيعني شنو عروس تهرب قبل زواجها بي يوم ؟ سؤال حتلقو اجابتو جوا روايتنا #قناع_العروس عموماً كدا .. الحياة ما ساهلة ، ولا مُرضية ، ولا عادلة لي حد رغباتنا ! لكن ياهاا حربنا الوحيدة .. الحرب البنخوض فيها كمية من المعارك والتحديات على امل يجي يوم و...