دوزو نهار ولا أروع بثلاثة .. ساراهم مزيان وخذاهم للمطعم كلاو، ودخلهم لمحلات الملابس كل وحدة شرا ليها حاجة كهدية، واخا حنان رفضات فالأول ولكن بعد إصرارو عليها حشمات وقبلات الهدية ..
وصلات العشية ورجعوها فحالها للدار وهي ماساخياش ترجع، عجبها الحال ولاول مرة من بعد وفاة الأب ديالها كاتحس بهاد السعادة الكبيرة وكاضحك من قلبها .. صاحبتها الوحيدة معاها والسيد لي دق ليه قلبها من أول لقاء بيناتهم شنو بغات كثر؟؟ ..
دخلات لدارهم وضرسة العقل كاتبان ليها بالضحكة العريضة لي راسمة على وجهها خلات أمها تضحك حتى هي بشوفة بنتها الصغيرة فرحانة لهاد الدرجة .. بدلات عليها وطرفات حالتها وصلات صلاتها ورجعات عند ماماها للصالون جلسات جنبها كاتعاود ليها على الخرجة كي دازت .. بلا ماتذكر ليها التطورات لي وقعات بينها وبين منصف مخلية الموضوع للوقت المناسب ..
الأم : مزيان لي خرجكم بدلتو الجو الله يسهل عليه
حنان : وايييه ا ماما والله حتى ارتاحيت اليوم بزاف وداك العيا ديال القراية باحح تبخر بحالا عمرو ماكان، عرفتي تا السينما زوينة ماكانش يحسابلي دايرا هكاك ههه عالم اخور وواحد الشاشة كبييييرة واخا الشعا ضرني فعيني ههه كانشوفوها غير هي والظلام فالقاعة كلها، عرفتي ا ماما هاد المرة نمشي أنا وياك ونديو معانا حتى سميرة ختي ايعجبها الحال، باينا مسكينة عمرها مشات ولا داها توفيق
الأم : ان شاء الله ابنتي، ايوا السيد مشغول مع خدمتو الله يعاونو
حنان : واخا هكاك مافيها باس يلا خصص شوية دالوقت لمراتو وولدو يخرجهم ويساريهم مايبقاوش مقبورين غير فالدار
الأم : بيناتهم ابنتي، وختك مرتاحة وعمرها تشكات
حنان (تنهدات) : ديما ختي حبيبتي كاتخبي فقلبها وعمرها قالت "اي"
الأم : شابهاني، صبارة وبزاف الله يرضي عليها، ايوا مافيكش جوغ؟
حنان : لا ا ماما باقا شبعانة من الماكلة د برا، انوض نعس عييت بزاف
الأم : واخا احبيبتي، تصبحي على خير تانا ننوض نستاراح شويا غدا تابعاني تمارة
حنان (باست ليها راسها) : الله يعاونك ا ماما ودعي معايا نجح ونخدم ونجلسك فالدار ترتاحي
الأم : الله ينجحك ابنتي ويسهل عليك
حنان : آمين آمين
دخلات لبيتها طفات عليها الضو وتخشات ففراشها هازا تيليفونها فيدها والفضول قاتلها تعرف الموضوع لي بغاها فيه منصف .. منين قالها ليها وهي كاتفكر وتخمم حتى ضرها راسها، وتا فاش جلسات مع ماماها بغات غير ايمتا تنوض وتسد عليها باش تدوي معاه ..
غير طلقات كونيكسيون وهوما يوصلوها الميساجات فواتساب، دخلات ليه لقات أغلبيتهم من جروب القسم لي كايتسناو النتيجة، وحتى وفاء مسيفطة ليها ونمرة خرى غريبة، وركات على صورة البروفايل وهو يبان ليها وجههو الشي لي خلا قلبها يزدح بجهد، زوماتها وبقات شحال كاتحقق فيها، دابا عاد خذات راحتها فالشوفة فوجهو ماشي بحال مباشرة ماكانتش تقدر تهز عينها فيه بقوة الخجل والارتباك .. سهات فيه للحظة حتى فيبرا التيليفونن فيدها وهي تفيق من سهوتها .. لقاتو ميساج اخر من عندو ودخلات باش تجاوبو ..
