بقا نظرها مركز على الصورة لي منعاكسة فالمرايا قبالتها ولي براسها ماعرفاتهاش .. العينين لي كانو يشعو بالأمل ويضويو بالسعادة دبا ذبلو وتطفاو ..
سلوى : شكون هادي لي كاتشوفي فيها هممم؟ ماشي حنان، هادي ماشي نتي، هادي لي قدامك انسانة فاشلة وضعيفة وعمرها طفرو فحياتها، وانا مايشرفنيش نكون صديقة ليها حيت بغيت ناس ايجابيين فحياتي وكلهم أمل وتفاؤل وكايقدرو يتجاوزو الصعاب بسهولة ويكملو فطريقهم وضاربين الدنيا بركلة وماكايهمهم حد من غير نفسهم وسعادتهم ونتي مافيكش هاد الصفات، اذن هاد الانسانة غانزيحها من حياتي ودابا نيت باش ماتنقلش ليا السلبية واليأس
قالت كلامها ودارت يدها فظهر حنان وحنات ليها راسها لافابو وطلقات الما وبدات تفزگ يدها وتمسح ليها وجهها .. كررات العملية لمرات عديدة .. تا سالات وجرات فوطة كانت معلقة تما مسحات ليها ورجعات هزات ليها راسها ودوراتها عندها بزربة قبل ماتشوف راسها فالمرايا .. حطات تخوس ديالها تما وحلاتها وحنان ساكتة وجامدة مخلياها دير فيها لي بغات أصلا قوتها تبخرات ومابقاش عندها السوفل لي يتناقش .. حتى الاحساس فديك اللحظة فقداتو وعقلها سرح فبلاصة خرى .. مخلية صاحبتها كاتزوق فيها وتقاد ..
تقريبا نصف ساعة كانت رجعات كيف جات من دارهم تماما .. صاوبات ليها وجهها وشعرها كذلك، وجابت فورير لبساتو ليها هو والطالون لي تحيد فاش كانت تمرمد .. طلعاتها وهبطاتها بابتسامة هادئة كاتحاول تخفف عليها ..
سلوى : دابا مزيان يالاه ضوري
ضوراتها جهة المرايا وبقات واقفة موراها وزعزعاتها بلطف باش تخرج من سهوتها وتشوف راسها ..
سلوى : هادي لي قدامك هي صاحبتي حنان لي كانعرف، البنت لي تعرفت عليها بالصدفة فالعالم الافتراضي وصداقتنا خرجات لارض الواقع وتقربنا من بعضياتنا ولقينا بزاف دالحاجات مشتركين بيناتنا ولي زادو قربونا كثر وكثر ووطدو العلاقة، وأولهم ولي مهم وهو الأمل والإرادة والعزيمة القوية باش نوصلو لأهدافنا ونحققو أحلامنا وبدينا يد يد وغانكملو للأخير، الماضي مشا ولكن ضروري يخلي لينا درس نتعلموه باش مانعاودوش نفس الأخطاء سمعتي هاداك كان خطأ وجا الوقت فين تصلحيه دابا (ضوراتها جهتها) نتي ا حنان بنت قوية بزاااااف وهادشي لي خلاني نزيد نتقرب منك ونبغي نتصاحب معاك، قوتك لي حذباتني ليك وحبك للحياة .. ودابا اديري يدك فيدي وانرجعو لداك العرس، اتدخلي ليه وراسك مرفوع حيت مادرتيش علاش تحشمي ولا تنزليه، اتمشاي بالثقة لي عرفتك بيها، هاد النظرة اليائسة والحزينة اتحيديها وترجعي النظرة القوية لبلاصتها حيت هي لي كاتليق بهاد العوينات الزوينات .. هاد العبوس اتزوليه حتى هو وترجعي بلاصتو ديك الابتسامة ديالك لي كاتحمق .. كتافك هزيهم حيت فاش جيتي ماكانوش هابطين .. وخلاصة هادشي بغيت دابا نشوف حنان لي خرجت من دارهم، يالاه كانتسنى
